DEUTERONOMIO 21

Katumbasan sa Wala Nahibaloi nga Pagpatay sang Tawo

1“Kon may isa nga makita nga pinatay sa duta nga ginahatag sa imo sang Ginoo nga imo Dios sa pagtag-iya sini, nga nagahamyang sa latagon, kag wala mahibal-i kon sin-o ang nakapatay sa iya, 2niyan ang imo mga tigulang kag ang imo mga hukom maggowa, kag magtakus sila nayon sa mga banwa nga yara sa palibut sang pinatay; 3kag ang mga tigulang sadtong banwa nga malapit gid sa pinatay nga tawo magkuha sa kabakahan sing isa ka tinday nga babayi nga wala pa mahanas kag wala pa matakdi sing gota. 4Kag ang tinday nga babayi sang baka dalhon sang mga tigulang sadtong banwa sa nalupyakan nga may nagailig nga tubig, nga wala maarado kag wala masab-ugi, kag didto sa nalupyakan longgoon ang liog sang tinday nga baka nga babayi. 5Kag magpalapit ang mga sacerdote nga mga anak ni Levi, kay sila ginpili sang Ginoo nga imo Dios sa pagpanghikot nga sa iya kag magpakamaayo sa ngalan sang Ginoo, kag sono sa ila polong ang tagsa ka kasaba kag tagsa ka bunalay mahusay. 6Kag ang tanan nga tigulang sadtong banwa nga malapit gid sa pinatay nga tawo magpanghinaw sang ila mga kamut sa ibabaw sang tinday nga baka nga babayi nga ginlonggo ang iya liog sa nalupyakan; 7kag magsabat sila, ‘Ang amon mga kamut wala magpailig sining dugo, bisan ang amon mga mata wala makakita sini. 8Patawara, O Ginoo, ang imo katawohan nga Israel, nga gintubus mo, kag dili pag-itugut nga ang dugo nga walay sala manginsa tunga sang imo katawohan nga Israel; apang patawaron ang dugo sa ila.’ 9Sa amo masikway mo ang dugo nga walay sala sa tunga nimo, kon himoon mo ang matarung sa mga mata sang Ginoo.

Ang Nagakalainlain nga mga Kasogoan

10“Kon magkadto ka sa pag-awayan batok sa imo mga kaaway, kag itugyan sila sa imo kamut sang Ginoo nga imo Dios, kag dalhon mo sila nga bihag, 11kag makakita sa tunga sang mga bihag sing isa ka babayi nga maayoayo, kag maila ka sa iya kag buut mo kuhaon sia nga asawa mo, 12niyan dalhon mo sia sa imo balay, kag kiskisan niya ang iya olo kag magpanghingoko sia. 13Kag ubahon niya ang panapton sang iya pagkabihag, kag magpabilin sa imo balay kag maghaya sa iya amay kag sa iya iloy sa bug-os nga isa ka bulan; kag sa tapus sina magahiusa ka sa iya, kag manginbana niya, kag sia mangin-asawa mo. 14Niyan, kon wala ka sing kahamuut sa iya, palakton mo sia sa bisan diin nga buut niya; apang dili mo sia nga gayud pag-ibaligya sa cuarta, dili mo sia pagbilangon nga ulipon, bangud nga ginpaubus mo sia.

15“Kon ang isa ka lalaki may duha ka asawa, ang isa nahagugmaan kag ang isa nadumtan, kag ang nahagugmaan kag ang nadumtan nag-anak sila nga sa iya, kag kon ang panganay nga anak nga lalaki iya sang nadumtan, 16niyan sa adlaw nga papanublion niya ang iya mga anak nga lalaki sang iya pagkabutang, dili niya mahimo nga panganayon sing una ang lalaki nga anak sang nahagugmaan sang sa anak nga lalaki sang nadumtan, nga amo ang panganay, 17kondi kilalahon niya ang panganay, ang anak sang nadumtan, sa paghatag s i ya sing pilo nga bahin sa tanan nga iya, kay sia amo ang pamuno sang iya kusug; ang kinamatarung sang pagkapanganay iya.

18“Kon ang isa ka tawo may anak nga batinggilan kag mabinatoon, nga indi magtuman sang tingug sang iya amay ukon sang tingug sang iya iloy, kag, bisan silotan nila sia, indi magpamati sa ila, 19niyan dakpon sia sang iya amay kag sang iya iloy kag dalhon sia sa mga tigulang sang iya banwa sa gawang sang iya duug, 20kag magsiling sila sa mga tigulang sang banwa, ‘Ini nga amon anak batinggilan kag mabinatoon, indi sia magtuman sang amon tingug; hakugan sia kag palahobog.’ 21Niyan ang tanan nga lalaki sang iya banwa magbato sa iya sa kamatayon; sa amo imo mapahilayo ang malaut gikan sa tunga mo; kag ang bug-os nga Israel magapamati, kag magakahadluk.

22“Kag kon ang isa ka tawo nakahimo sing sala nga takus sa kamatayon kag patyon sia, kag bitayon mo sia sa kahoy, 23ang iya bangkay indi magpabilin sa kahoy sa bug-os nga gab-i, kondi ilubung mo gid sia sa amo nga adlaw, kay sia nga ginabitay pinakamalaut sang Dios;#Gal. 3:13. agud nga dili mo madagtaan ang duta nga ginahatag sa imo nga panublion sang Ginoo nga imo Dios.

Currently Selected:

DEUTERONOMIO 21: ABHIL82

Highlight

Copy