2 SAMUEL 4
4
Ang Pagpapatay kay Is-boset
1Sang pagkabati ni Is-boset, nga anak ni Saul, nga si Abner napatay sa Hebron, nagpalang-uy-uy ang iya mga kamut, kag nalisang ang bug-os nga Israel. 2Karon si Is-boset nga anak ni Saul may duha ka lalaki nga pangolo sang mga kabon; ang ngalan sang isa si Baana, kag ang ngalan sang isa pa si Recab, ang mga anak ni Rimon nga Beerotnon sa mga anak sang Benjamin (kay ang Beerot man nakabig sa Benjamin; 3ang mga Beerotnon nagpalagyo pa Gitaim, kag nanginmanlulugayaw didto tubtub sini nga adlaw).
4Si Jonatan, anak ni Saul, may anak nga lalaki nga piang sa iya tiil.#2 Sam. 9:3. Sia lima ka tuig sang pag-abut sang mga balita nahanungud kay Saul kag kay Jonatan gikan sa Jezreel; kag ang iya sisiwa naghakwat sa iya, kag nagpalagyo; kag, sang nagdalidali sia sa pagpalagyo, naholog ang bata, kag napiang. Kag ang iya ngalan si Mefiboset.
5Karon ang mga anak ni Rimon nga Beerotnon, si Recab kag si Baana, naglakat, kag nagsulud sa balay ni Is-boset sang mga nagahingudto ang adlaw, sang nagpahuway sia sa udto. 6Kag nagsulud sila sa tunga sang balay subong nga daw makuha sila sing trigo; kag ginbuno nila sia sa lawas; kag nagpalagyo si Recab kag si Baana nga iya utud. 7Sang nagsulud sila sa balay, sang sia nagahigda sa iya higdaan sa iya hulut nga higdaan, ginbuno sia nila, kag ginpatay sia, kag ginpunggol ang iya olo. Ginkuha nila ang olo niya, kag naglakat sa bug-os nga gab-i sa dalanon sang Araba, 8kag gindala nila ang olo ni Is-boset kay David sa Hebron. Kag nagsiling sila sa hari, “Yari ang olo ni Is-boset, ang anak ni Saul, imo kaaway, nga nagtinguha sang imo kabuhi; ang Ginoo nagtimalus nga sa hari nga akon ginoo sini nga adlaw kay Saul kag sa iya kaliwat.” 9Apang si David nagsabat kay Recab kag kay Baana nga iya utud, ang mga anak ni Rimon nga Beerotnon, “Sa nagakabuhi ang Ginoo, nga nagtubus sang akon kalag sa bug-os nga kalisdanan, 10sang nagsugid sa akon ang isa, ‘Yari karon, si Saul patay na,’ nga nagahunahuna sa pagdala sing mga balita nga maayo, gindakup ko sia kag ginpatay sia sa Ziklag, nga amo ang balus nga ginhatag ko sa iya tungud sang iya mga balita.#2 Sam. 1:1-16. 11Daw ano pa, kon ang malaut nga mga tawo nagpatay sang tawo nga matarung sa iya kaugalingon nga balay sa iya higdaan, nga indi ko karon pagpangayoon ang iya dugo gikan sa inyo kamut, kag panason kamo sa duta?” 12Kag si David nagsogo sang mga pamatan-on, kag ginpatay nila sila, kag gin-utud ang ila mga kamut kag ang ila mga tiil, kag ginbitay sila sa luyo sang punong sa Hebron. Apang ginkuha nila ang olo ni Is-boset, kag ginlubung ini sa lulubngan ni Abner sa Hebron.
Currently Selected:
2 SAMUEL 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
