2 SAMUEL 3
3
1May malawig nga inaway sa tunga sang panimalay ni Saul kag sang panimalay ni David: kag si David nagbakud pa kag nagbakud pa, apang ang panimalay ni Saul nagluya pa kag nagluya pa.
Ang mga Lalaking Anak ni David Natawo sa Hebron
(1 Cron. 3:1-4)
2Kag natawo ang mga anak nga lalaki kay David sa Hebron: ang iya panganay si Amnon, kay Ahinoam nga Jezreelnon; 3kag ang iya ikaduha, si Quileab, kay Abigail nga asawa anay ni Nabal nga Carmelonhon; kag ang ikatlo, si Absalom nga lalaking anak ni Maaca nga babaying anak ni Talmai nga hari sa Gesur; 4kag ang ikap-at, si Adonias nga lalaking anak ni Hagit; kag ang ikalima, si Sefatias nga lalaking anak ni Abital; 5kag ang ikan-um, si Itream, kay Egla, asawa ni David. Ini sila natawo kay David sa Hebron.
Si Abner Nagaribuk batok kay David
6Sang may inaway pa sa tunga sang panimalay ni Saul kag sang panimalay ni David, si Abner nagpamakud sang iya kaugalingon sa panimalay ni Saul. 7Karon si Saul may babayi anay nga ginhingalanan Rizpa, ang anak ni Aya; kag nagsiling si Is-boset kay Abner. “Ngaa bala nga naghiusa ka sa babayi sang akon amay?” 8Niyan si Abner nasingkal sing tama gid tungud sang mga polong ni Is-boset, kag nagsiling, “Olo bala ako sang ido nga iya sang Juda? Sa sining adlaw ako nagapakita sing kalolo sa panimalay ni Saul nga imo amay, sa iya mga utud, kag sa iya mga abyan, kag wala magtugyan sa imo sa kamut ni David; kag bisan pa ginpabangdan mo ako sining adlaw sing sayup nahanungud sining babayi. 9Himoon sang Dios kay Abner ang subong, kag labi pa man, kon sono sa nasumpa sang Ginoo kay David indi ko paghimoon ang amo man sa iya, 10sa pagsaylo sang ginharian gikan sa panimalay ni Saul,#1 Sam. 15:28. kag sa pagtukud sang trono ni David sa ibabaw sang Israel kag sa ibabaw sang Juda, kutub sa Dan tubtub sa Beer-seba.” 11Kag si Is-boset indi makasabat kay Abner sing isa ka polong, kay nahadluk sia sa iya.
12Kag si Abner nagpadala sing mga manugbalita kay David sa Hebron, nga nagasiling, “Kay sin-o bala ang duta? Magpakigdampig ka sa akon, kag yari karon, ang akon kamut mangin-upud sa imo sa pagdala sa imo sang bug-os nga Israel.” 13Kag si David nagsiling, “Maayo; magapakigdampig ako sa imo; apang isa ka butang ang ginakinahanglan ko sa imo; nga amo, dili ka makakita sang akon nawung, kon indi mo anay madala si Micol, ang babaying anak ni Saul, kon magkari ka sa pagtan-aw sang akon nawung.” 14Niyan si David nagpadala sing mga manugbalita kay Is-boset nga anak ni Saul, nga nagasiling, “Itugyan sa akon ang akon asawa nga si Micol, nga akon napangasawa sa bili sang isa ka gatus ka napunta nga panit sang mga Filistinhon.#1 Sam. 18:27.” 15Kag nagpadala si Is-boset, kag nagkuha sa iya gikan sa iya bana nga si Paltiel nga anak nga lalaki ni Lais. 16Apang ang iya bana nag-upud sa iya, nga nagahibi sa nagalakat sia kag nagsonod sa iya tubtub sa Bahurim. Niyan si Abner nagsiling sa iya, “Lakat, balik”; kag nagbalik sia.
17Kag si Abner may balita sa mga tigulang sang Israel, nga nagasiling, “Sa mga tion nga nagligad ginpangita ninyo si David nga manginhari sa ibabw ninyo. 18Niyan karon himoa ini; kay ang Ginoo nagpamolong nahanungud kay David, nga nagasiling, ‘Paagi sa kamut sang akon alagad nga si David luwason ko ang akon katawohan nga Israel gikan sa kamut sang mga Filistinhon, kag gikan sa kamut sang tanan nilang kaaway.’” 19Si Abner man nagpamolong sa mga idulungug sang Benjamin; kag si Abner naglakat man sa pagpamolong sa mga idulungug ni David sa Hebron sang tanan nga maayo sa Israel kag sa bug-os nga panimalay ni Benjamin.
20Sang si Abner nagkadto kay David sa Hebron upud sa iya ang duha ka pulo ka lalaki, si David naghimo sing sinalosalo kay Abner kag sa mga lalaking upud niya. 21Kag si Abner nagsiling kay David, “Ako magatindug kag magalakat, kag magatipon sang bug-os nga Israel sa akon ginoong hari, agud nga magpakigkatipan sila sa imo, kag nga maghari ka sa bug-os nga luyag sang imo kalag.” Gani ginpalakat ni David si Abner; kag naglakat sia sa paghidait.
Si Joab Nagapatay kay Abner
22Niyan ang mga alagad ni David kag si Joab nag-abut gikan sa pangati, nga nagadala sing daku nga inagaw upud sa ila. Apang si Abner wala didto kay David sa Hebron, kay ginpalakat niya sia, kag nagtaliwan sia sa paghidait. 23Sang nag-abut si Joab kag ang bug-os nga kasoldadosan nga upud sa iya, ginsugiran nila si Joab, “Si Abner nga anak ni Ner nagkadto sa hari, kag ginpalakat niya sia, kag nagtaliwan sia sa paghidait.” 24Niyan si Joab nagkadto sa hari kag nagsiling, “Ano bala ang nahimo mo? Yari karon, si Abner nagkadto sa imo; ngaa bala ginpalakat mo sia, sa bagay nga naglakat sia nga hilway? 25Nakahibalo ka kay Abner nga anak ni Ner nga nagkari sia sa paglimbong sa imo, kag sa paghibalo sang imo paggowa kag sang imo pagsulud, kag sa paghibalo sang tanan nga imo ginahimo.”
26Sang nakagowa si Joab gikan kay David, nagpadala sia sing mga manugbalita sa olihi ni Abner, kag gindala nila sia pabalik gikan sa bobon sang Sira; apang si David wala makahibalo sini. 27Kag sang nakabalik si Abner sa Hebron, gindala sia sing pahain ni Joab sa tunga sang gawang sa paghambal sa iya sing tago, kag didto ginbuno sia sa lawas, sa bagay nga napatay sia, tungud sa dugo ni Asael nga iya utud. 28Ugaling, sang nabatian ini ni David, nagsiling sia, “Ako kag ang akon ginharian wala sing sala sa atubangan sang Ginoo sa gihapon sang dugo ni Abner nga anak ni Ner. 29Maholog ini sa olo ni Joab, kag sa bug-os nga panimalay sang iya amay; kag indi mawalaan ang panimalay ni Joab sing isa nga may tagas, ukon aroon, ukon isa nga nagapanungkud, ukon nagakapukan tungud sa espada, ukon nakulangan sing kalan-on!” 30Gani si Joab kag si Abisai nga iya utud nagpatay kay Abner, bangud nga napatay niya ang utud nila nga si Asael sa inaway sa Gabaon.
31Niyan si David nagsiling kay Joab kag sa tanan nga katawohan nga upud niya, “Kusnita ang inyo mga panapton, kag tampion kamo sing panapton nga sako, kag maglalaw sa atubang ni Abner.” Kag si Haring David nagsonod sa liyaliya. 32Ginlubung nila si Abner sa Hebron; kag ang hari nagbayaw sang iya tingug kag naghibi sa lulubngan ni Abner; kag naghibi ang bug-os nga katawohan. 33Kag ang hari nagpanalabiton tungud kay Abner, nga nagasiling,
“Mamatay bala si Abner subong sang pagkapatay sang buangbuang?
34Ang imo mga kamut wala magapus,
ang imo mga tiil wala nabutang sa grilyos;
subong sang isa ka tawo nga napukan sa atubang sang mga anak sang kalautan
amo ang pagkapukan mo.”
Kag ang bug-os nga katawohan naghibi liwat sa iya.
35Niyan ang bug-os nga katawohan nag-abut sa pagpakaon sing tinapay kay David sang adlaw pa; apang si David nagsumpa, nga nagasiling, “Ang Dios maghimo sang subong sa akon kag labi pa man, kon sa wala pa matunud ang adlaw magtilaw ako sing kalan-on ukon bisan ano nga iban nga butang!” 36Kag ang bug-os nga katawohan nagtanda sini, kag nagpahamuut ini sa ila; subong nga ang bisan ano nga ginhimo sang hari nagpahamuut sa bug-os nga katawohan. 37Gani ang bug-os nga katawohan kag ang bug-os nga Israel naghangup sadto nga adlaw nga indi nagikan sa hari ang pagpatay kay Abner nga anak ni Ner. 38Kag ang hari nagsiling sa iya mga alagad, “Wala bala kamo makahibalo nga may principe kag daku nga tawo nga napukan sini nga adlaw sa Israel? 39Kag sini nga adlaw maluya ako, bisan nga hinaplas nga hari; ining mga tawo nga mga anak ni Sarvia tama kabudlay sa akon. Ang Ginoo magtumbas sa manughimo sang malaut sono sa iya pagkamalauton!”
Currently Selected:
2 SAMUEL 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
