2 SAMUEL 2

Si David Ginhimo nga Hari sa Juda

1Sa tapus sini si David nagpamangkot sa Ginoo, “Magataklad bala ako sa bisan diin sang mga banwa sang Juda?” Kag ang Ginoo nagsiling sa iya, “Taklad.” Si David nagsiling, “Diin bala ako mataklad?” Kag sia nagsiling, “Sa Hebron.” 2Gani si David nagtaklad didto, kag ang iya duha ka asawa man, si Ahinoam nga Jezreelnon, kag si Abigail nga asawa anay ni Nabal nga Carmelonhon.#1 Sam. 25:42-43. 3Kag ginpataklad ni David upud sa iya ang iya mga tawo, ang tagsa ka tawo pati sang iya panimalay; kag nagpuyo sila sa mga banwa sang Hebron. 4Kag nag-abut ang mga tawo sa Juda, kag didto ginhaplas nila si David nga hari sa panimalay sang Juda.

Sang ginsugiran nila si David, “Ang mga lalaki sang Jabes-galaad amo sila ang naglubung kay Saul,”#1 Sam. 31:11-13. 5si David nagpadala sing mga manugbalita sa mga lalaki sang Jabes-galaad, kag nagsiling sa ila, “Pakamaayohon kamo sang Ginoo, bangud nga nagpahayag kamo sining kalolo sa inyo ginoong Saul, kag naglubung sa iya! 6Karon ang Ginoo nagapahayag sing malig-on nga paghigugma kag katutum sa inyo! Kag ako man magahimo sing maayo sa inyo, bangud nga naghimo kamo sining butang. 7Busa karon magmabakud ang inyo mga kamut, kag mag-isganan kamo; kay si Saul nga inyo ginoo patay na, kag ang panimalay sang Juda man naghaplas sa akon nga hari sa ila.”

Si David Nagapakig-away batok sa mga Hangaway ni Saul

8Karon si Abner nga anak ni Ner, pangolo sang kasoldadosan ni Saul, nagkuha kay Is-boset nga anak nga lalaki ni Saul, kag gindala sia sa Mahanaim; 9kag ginhimo sia niya nga hari sa Galaad kag sa mga Asurnon kag sa Jezreel kag sa Efraim kag sa Benjamin kag sa bug-os gid nga Israel. 10Si Is-boset, anak ni Saul, kap-atan ka tuig sang nagsugud sia sa paghari sa Israel, kag naghari sia sing duha ka tuig. Apang ang panimalay sang Juda nagsonod kay David. 11Kag ang tion nga si David hari sa Hebron sa panimalay sang Juda pito ka tuig kag anum ka bulan.

12Si Abner nga anak ni Ner, kag ang mga alagad ni Is-boset nga anak ni Saul, naggowa gikan sa Mahanaim pakadto sa Gabaon. 13Kag si Joab nga anak ni Sarvia, kag ang mga alagad ni David, naggowa kag nagsugata sa ila sa luyo sang punong sang Gabaon; kag naglingkod sila, ang isa sa pihak nga kilid sang punong, kag ang isa sa pihak nga kilid sang punong. 14Kag si Abner nagsiling kay Joab, “Patinduga ang mga pamatan-on nga lalaki kag pahampanga sa atubangan naton.” Kag si Joab nagsiling, “Patinduga sila.” 15Niyan nagtindug sila kag nagkadto sono sa isip, napulog duha tungud kay Benjamin kag tungud kay Is-boset nga anak ni Saul, kag napulog duha gikan sa mga alagad ni David. 16Kag nagdakpanay ang tagsa sa ila sa olo, kag masigbon-anay sang iya espada sa kilid sang iya kasumpung; gani napukan sila sing tingub. Busa ginhingalanan yadtong duug nga Helcat-hazurim,#2:16 Kon sayoron Ang latagon sang matalum nga mga sundang. nga yara sa Gabaon. 17Kag sadtong adlaw ang inaway matama gid; kag si Abner kag ang mga tawo sang Israel dinaug sa atubangan sang mga alagad ni David.

18Kag yadto didto ang tatlo ka anak nga lalaki ni Sarvia, si Joab, si Abisai, kag si Asael. Karon si Asael makisay sing paniil subong sang usa nga talonon; 19kag si Asael naglagas kay Abner, kag sia wala maglipas sa too ukon sa wala sa pagsonod kay Abner. 20Niyan si Abner nagbalikid sa olihi niya kag nagsiling, “Ikaw bala ini, Asael?” Kag nagsabat sia, “Ako ini.” 21Si Abner nagsiling sa iya, “Lipas ka sa imo too ukon sa imo wala, kag dakpa ang isa sang mga pamatan-on, kag kuhaa ang iya hinganiban.” Apang si Asael indi buut maglipas gikan sa pagsonod sa iya. 22Kag si Abner nagsiling liwat kay Asael, “Lipas ka gikan sa pagsonod sa akon; ngaa bala pukanon ko ikaw sa duta? Paano bala niyan ang pagbayaw ko sang akon nawung sa atubangan sang imo utud nga si Joab?” 23Apang nagdumili sia sa paglipas; busa ginbuno sia ni Abner sang ulungan sang iya bangkaw sa lawas, sa bagay nga ang bangkaw naglapus sa likod niya; kag napukan sia didto, kag napatay sa among duug. Kag ang kapid-an nga nagsamput sa duug diin si Asael napukan kag napatay, nagdolog.

24Apang si Joab kag si Abisai naglagas kay Abner; kag natunud na ang adlaw sang nag-abut sila sa bakolod sang Ama, nga yara sa atubang sang Gia sa dalanon sang kamingawan sang Gabaon. 25Kag nagtilipon sing tingub kay Abner ang mga anak sang Benjamin, kag nangin-isa ka kabon, kag nagtindug sa putokputokan sang bakolod. 26Niyan si Abner nagsinggit kay Joab, “Magalamon bala ang espada sa gihapon? Wala ka bala makahibalo nga sa katapusan manginkapaitan? Tubtub pa bala san-o niyan pabalikon mo ang katawohan gikan sa paglagas sang ila mga utud?” 27Kag si Joab nagsiling, “Sa nagakabuhi ang Dios, kon wala ka kuntani magpamolong, sa pagkamatuud sa pagkaaga ang katawohan nagtaliwan, ukon wala naglagas ang tagsatagsa sa ila mga utud.” 28Gani si Joab nagpatonog sang budyong; kag ang bug-os nga katawohan nagdolog, kag wala na maglagas sa Israel, kag wala na mag-away sila.

29Kag si Abner kag ang iya mga tawo naglatas sa Araba sa bug-os sadtong gab-i; nagtabok sila sa Jordan, kag naglatas sang bug-os nga Bitron kag nag-abut sa Mahanaim. 30Si Joab nagbalik gikan sa paglagas kay Abner; kag sang natipon niya sing tingub ang bug-os nga katawohan, may nakulang sang mga alagad ni David nga napulog siam ka tawo kag si Asael. 31Apang ang mga alagad ni David nagsamad sa Benjamin kag sa mga tawo ni Abner sa bagay nga tatlo ka gatus kag kan-uman ka tawo ang patay. 32Kag ginsapopo nila si Asael, kag ginlubung sia sa lulubngan sang iya amay, nga yara sa Bet-lehem. Kag si Joab kag ang iya mga tawo naglakat sa bug-os nga gab-i, kag naabutan sila sang pamanagbanag sang adlaw sa Hebron.

Currently Selected:

2 SAMUEL 2: ABHIL82

Highlight

Copy