2 SAMUEL 5

Si David Ginhimo nga Hari sa Israel

(1 Cron. 11:1-3)

1Niyan nag-abut ang tanan nga kabikahan sang Israel kay David sa Hebron, kag nagsiling, “Yari karon, kami imo tul-an kag imo unud. 2Sa mga tion nga nagligad, sang si Saul naghari sa aton, ikaw nagpagowa kag nagpasulud sang Israel; kag ang Ginoo nagsiling sa imo, ‘Ikaw manginmanugpahalab sang akon katawohan nga Israel, kag ikaw manginprincipe sa Isarel.’” 3Gani nag-abut ang tanan nga tigulang sang Israel sa hari sa Hebron; kag si Haring David nagpakigkatipan sa ila sa Hebron sa atubangan sang Ginoo, kag ginhaplas nila nga hari si David sa Israel. 4Si David katloan ka tuig sang nagsugud sia sa paghari, kag naghari sia sing kap-atan ka tuig. 5Sa Hebron naghari sia sa Juda sing pito ka tuig kag anum ka bulan; kag sa Jerusalem naghari sia sing katloan kag tatlo ka tuig sa bug-os nga Israel kag Juda.#1 Hari 2:11; 1 Cron. 3:4; 29:27.

Si David Nagadaug sang Sion

(1 Cron. 11:4-9)

6Kag ang hari kag ang iya mga tawo nagkadto sa Jerusalem batok sa mga Jebusnon,#Jos. 15:63; Huk. 1:21. ang mga pumuluyo sang duta, nga nagsiling kay David, “Kon indi mo makuha ang mga bulag kag ang mga piang, dili ka magsulud diri”—nga nagahunahuna, “Si David indi makasulud diri.” 7Wala sing sapayan gin-agaw ni David ang pamakud sang Sion, nga amo, ang banwa ni David. 8Kag nagsiling si David sadtong adlaw, “Ang bisan sin-o nga magpatay sa mga Jebusnon, magtaklad sia sa daganasan sa pagpatay sang mga piang kag sang mga bulag, nga ginadumtan sang kalag ni David.” Busa nagasiling sila, “Yara ang mga bulag kag ang mga piang; indi sia makasulud sa balay.” 9Kag si David nagpuyo sa pamakud, kag gintawag ini nga banwa ni David. Kag nagpatindug si David sa palibut kutub sa Milo kag pasulud. 10Kag si David nagdaku pa kag nagdaku pa, kay ang Ginoo, ang Dios sang mga kasoldadosan, nag-upud sa iya.

Ang Pagkilala ni Hiram kay David

(1 Cron. 14:1-2)

11Kag si Hiram nga hari sa Tiro nagpadala sing mga manugbalita kay David, kag mga kahoy nga cedro, mga panday man kag mga kantero nga nagpatindug sing balay kay David. 12Kag nahantup ni David nga ang Ginoo nagpalig-on sa iya nga hari sa Israel, kag nga ginbayaw niya ang iya ginharian tungud sa iya katawohan nga Israel.

Ang mga Anak ni David Natawo sa Jerusalem

(1 Cron. 3:5-9; 14:3-7)

13Kag si David nagkuha pa sing mga babayi kag mga asawa gikan sa Jerusalem, sa tapus na nga nag-abut sia gikan sa Hebron; kag may natawo pa kay David nga mga anak nga lalaki kag mga anak nga babayi. 14Kag yari ang mga ngalan sadtong mga natawo sa iya sa Jerusalem: si Samua, si Sobab, si Natan, si Salomon, 15si Ibhar, si Elisua, si Nefeg, si Jafia, 16si Elisama, si Eliada, kag si Elifelet.

Si David Nagadaug sang mga Filistinhon

(1 Cron. 14:8-17)

17Sang nakabati ang mga Filistinhon nga si David nahaplas nila nga hari sa Israel, ang tanan nga Filistinhon nagtaklad sa pagpangita kay David; apang nakabati sini si David kag nagdulhog sa pamakud. 18Karon nag-abut ang mga Filistinhon kag naglapta sila sa nalupyakan sang Refaim. 19Kag si David nagpamangkot sa Ginoo, “Magataklad ako bala batok sa mga Filistinhon? Itugyan mo bala sila sa akon kamut?” Kag ang Ginoo nagsiling kay David, “Taklad; kay sa pagkamatuud itugyan ko ang mga Filistinhon sa imo kamut.” 20Kag si David nag-abut sa Baal-perazim, kag didto ginpatay sila ni David; kag nagsiling sia, “Ginbulwang sang Ginoo ang akon mga kaaway sa atubangan nakon, kaangay sang pagbulwang sang mga tubig.” Busa ginhingalanan niya yadtong duug Baal-perazim.#5:20 Kon sayoron Ang Ginoo sang mga pagbulwang. 21Kag ginbayaan nila didto ang ila mga larawan, kag si David kag ang iya mga tawo nagdala sa ila.

22Kag ang mga Filistinhon nagtaklad pa liwat, kag naglapta sila sa nalupyakan sang Refaim. 23Kag sang namangkot si David sa Ginoo, nagsiling sia, “Dili ka magtaklad; libut ka sa likod nila, kag kadto ka sa ila sa atubang sang mga kahoy nga moral. 24Kag kon makabati ka sing linapaklapak sa tuyoktuyokan sang mga kahoy nga moral, niyan magpanilag ka; kay niyan ang Ginoo naggowa una sa imo sa paglaglag sang kasoldadosan sang mga Filistinhon.” 25Kag ginhimo ni David ang subong sini sono sa ginsogo sa iya sang Ginoo, kag ginlaglag ang mga Filistinhon kutub sa Geba tubtub sa Gezer.

Currently Selected:

2 SAMUEL 5: ABHIL82

Highlight

Copy