2 MGA HARI 9
9
Si Jehu Ginhaplas nga Hari sa Israel
1Niyan ang manalagna nga si Eliseo nagtawag sa isa sang mga lalaki nga anak sang mga manalagna kag nagsiling sa iya, “Tampioni ang imo mga balikawang, kag dalha ini nga tibudtibud sang lana sa imo kamut, kag magkadto sa Ramot-galaad. 2Kag sa pag-abut mo didto, pangitaa didto si Jehu nga anak ni Josafat, nga anak ni Nimsi; kag magsulud kag patinduga sia gikan sa tunga sang iya mga utud, kag dalha sia sa hulut nga nasulud. 3Niyan dalha ang tibudtibud sang lana, kag ibobo ini sa iya olo, kag magsiling, ‘Amo ini ang ginasiling sang Ginoo, Nahaplas ko ikaw nga hari sa ibabaw sang Israel.’ Niyan buksi ang ganhaan kag magpalagyo; dili magpalantang.
4Gani ang pamatan-on nga lalaki, bisan ang pamatan-on nga manalagna, nagkadto sa Ramot-galaad. 5Kag sang pag-abut niya, yari karon, nga ang mga pangolo sang kasoldadosan nagalingkod; kag sia nagsiling, “Ginsogo ako sa imo, O pangolo.” Kag si Jehu nagsiling, “Sa kay sin-o bala sa amon nga tanan?” Kag nagsiling sia, “Sa imo, O pangolo.” 6Gani nagtindug sia, kag nagsulud sa balay; kag ginbobo niya ang lana sa iya olo, kag nagsiling sa iya, “Amo ini ang ginasiling sang Ginoo ang Dios sang Israel, Nahaplas ko ikaw nga hari sa ibabaw sang katawohan sang Ginoo, sa ibabaw sang Israel.#1 Hari 19:16. 7Kag laglagon mo ang panimalay ni Acab nga imo agalon, agud nga ako magtimalus sang dugo sang akon mga alagad nga mga manalagna, kag sang dugo sang tanan nga alagad sang Ginoo, sa kamut ni Jezabel. 8Kay ang bug-os nga panimalay ni Acab mawala; kag utdon ko gikan kay Acab ang tagsa ka bata nga lalaki, nga ginbukut ukon layaw, sa Israel. 9Kag himoon ko ang panimalay ni Acab kaangay sang panimalay ni Jeroboam nga anak ni Nabat, kag kaangay sa panimalay ni Baasa nga anak ni Ahias. 10Kag si Jezabel kaonon sang mga ido sa bahin sang Jezreel,#1 Hari 21:23. kag wala sing magalubung sa iya.” Niyan ginbuksan niya ang ganhaan, kag nagpalagyo.
11Niyan naggowa si Jehu sa mga alagad sang iya ginoo, kag nagsiling sa iya ang isa, “Maayo bala ang tanan? Ngaa bala nagkari sa imo ining buang nga tawo?” Kag nagsiling sia sa ila, “Nakilala ninyo ang tawo kag ang iya ginhambal.” 12Kag nagsiling sila, “Di-matuud ini; sugiri na kami.” Kag nagsiling sia, “Amo ini kag amo ini nagpamolong sia sa akon, nga nagasiling, ‘Amo ini ang ginasiling sang Ginoo, Nahaplas ko ikaw nga hari sa ibabaw sang Israel.’” 13Niyan nagdalidali sila kag nagkuha ang tagsa ka tawo sang iya panapton, kag ginbutang nila ini sa idalum niya sa ibabaw sang hagdanan, kag nagpatonog sang budyong, nga nagasiling, “Si Jehu hari.”
Si Jehu Nagapatay kay Joram
14Gani si Jehu nga anak ni Josafat nga anak ni Nimsi nagpuhon batok kay Joram. (Karon si Joram nagabantay sa Ramot-galaad, sia kag ang bug-os nga Israel, bangud kay Hazael nga hari sang Siria; 15apang si Hari Joram nagbalik sa Jezreel sa pagpaayo sang mga pilas nga ginhatag sa iya sang mga Sirianhon sang pagpakig-away niya kay Hazael nga hari sang Siria.) Gani si Jehu nagsiling, “Kon amo ini ang inyo painoino, niyan wala sing bisan sin-o nga papalagyohon kag pagowaon sa banwa sa paglakat sa pagsugid sini sa Jezreel.” 16Niyan si Jehu nagsakay sa kangga, kag nagkadto sa Jezreel, kay si Joram nagahigda didto. Kag si Ocozias nga hari sang Juda nagdulhog sa pagtan-aw kay Joram.
17Karon ang manugbantay nagatindug sa torre sa Jezreel, kag nakita niya ang kabon ni Jehu sang nagpakari sia, kag nagsiling, “Ako nakakita sing isa ka kabon.” Kag si Joram nagsiling, “Kuha ka sing isa ka manugkabayo, kag ipadala sa pagsugata sa ila, kag pasilingon sia, ‘Paghidait bala?’” 18Gani may nagkadto nga isa nga nagakabayo sa pagsugata kay Jehu, kag nagsiling, “Amo ini ang ginasiling sang hari, ‘Paghidait bala?’” Kag si Jehu nagsiling, “Ano bala ang labut mo sa paghidait? Liso ka paolihi nakon.” Kag ang manugbantay nagsugid, nga nagasiling, “Ang manugbalita nag-abut sa ila, apang wala sia magbalik.” 19Niyan nagpadala sia sing ikaduha nga nagakabayo, nga nag-abut sa ila, kag nagsiling, “Amo ini ang ginasiling sang hari, ‘Paghidait bala?’” Kag si Jehu nagsabat, “Ano bala ang labut mo sa paghidait? Liso ka paolihi nakon.” 20Liwat ang manugbantay nagsugid, “Sia nag-abut gid sa ila, apang wala magbalik. Kag ang pagpadalagan kaangay sang pagpadalagan ni Jehu nga anak ni Nimsi; kay nagapadalagan sia sing pabuang.”
21Si Joram nagsiling, “Magtakud.” Kag gintakdan nila ang iya kangga. Niyan si Joram nga hari sang Israel kag si Ocozias nga hari sang Juda naggowa, ang tagsa sa iya kangga, kag naggowa sila sa pagsugata kay Jehu, kag nakita sia sa puna ni Nabot nga Jezreelnon. 22Kag sang nakita ni Joram si Jehu, nagsiling sia, “Paghidait bala, Jehu?” Sia nagsabat, “Ano bala nga paghidait, samtang nga tama kadamu ang pagkamakihilawason ni Jezabel nga imo iloy kag ang iya mga pagkadiwatahan?” 23Niyan ginpaliso ni Joram ang iya mga kamut kag nalagyo, kag nagsiling kay Ocozias, “May budhi, O Ocozias!” 24Kag si Jehu nagbingat sang iya pana sa iya bug-os nga kusug, kag gin-igo si Joram sa ulut sang iya mga abaga, kag ang baslay naglapus sa iya tagiposoon, kag nag-uy-uy sia sa iya kangga. 25Nagsiling si Jehu kay Bidkar nga iya pangolo, “Hakwata, kag ihaboy sia sa puna sang latagon ni Nabot nga Jezreelnon; kay dumduma kon paano nga, sang ako kag ikaw nagsakay sing tingub sa olihi ni Acab nga iya amay, ang Ginoo nagmitlang sini nga polong batok sa iya: 26‘Sa pagkamatuud nakita ko kahapon ang dugo ni Nabot kag ang dugo sang iya mga anak—nagasiling ang Ginoo—magabalus ako sa imo sa sini nga puna.’#1 Hari 21:19. Busa karon kuhaa kag ihaboy sia sa puna, sono sa polong sang Ginoo.”
Si Jehu Nagapatay kay Ocozias
(2 Cron. 22:7-9)
27Sang nakita ini ni Ocozias nga hari sang Juda, nagpalagyo sia sa dalan sang balay sa katamnan. Kag ginsonod sia ni Jehu, kag nagsiling, “Pilasa man sia sa kangga”; kag ginpilas nila sia sa taklaran sang Gur, nga yara sa luyo sang Jibleam. Kag nagpalagyo sia sa Meguido, kag napatay didto. 28Gindala sia sang iya mga alagad sa kangga pakadto sa Jerusalem, kag ginlubung sia sa iya lulubngan upud sang iya mga ginikanan sa banwa ni David.
29Sa ikanapulog isa nga tuig ni Joram nga anak ni Acab, nagsugud sa paghari si Ocozias sa ibabaw sang Juda.
Ang Pagkapatay ni Jezabel
30Sang nag-abut si Jehu sa Jezreel, nabatian ini ni Jezabel; kag ginduagan niya ang iya mga mata, kag ginpunihan ang iya olo, kag naggawa sa talambuan. 31Kag sang nagsulud si Jehu sa gawang, si Jezabel nagsiling, “Paghidait bala, ikaw nga Zimri, manugpatay sang imo agalon?” 32Kag nagtangla sia sang iya nawung nayon sa talambuan, kag nagsiling, “Sin-o bala ang dampig sa akon? Sin-o?” May naggawa sa iya nga duha ukon tatlo ka eunuco. 33Nagsiling sia, “Iholog sia.” Gani ginholog nila sia; kag ang iban sang iya dugo nag-asik sa dingding kag sa mga kabayo, kag gintapak nila sia. 34Niyan sang nakasulud sia nagkaon sia kag nag-inum; kag nagsiling sia, “Atipana ninyo ining pinakamalaut nga babayi, kag ilubung sia; kay anak sia sang hari.” 35Apang sang nagkadto sila sa paglubung sa iya, wala na sila sing nakita sa iya kondi ang bagol kag ang mga tiil kag ang mga palad sang iya mga kamut. 36Sang nagbalik sila kag nagsugid sa iya, nagsiling sia, “Amo ini ang polong sang Ginoo, nga ginpamolong niya paagi sa iya alagad nga si Elias nga Tisbinhon, ‘Sa bahin sang Jezreel kaonon sang mga ido ang unud ni Jezabel.#1 Hari 21:23. 37Kag ang bangkay ni Jezabel manginsubong sang ipot sa kadaygan sang latagon sa bahin sang Jezreel, sa bagay nga indi sila magsiling, Ini amo si Jezabel.’”
Currently Selected:
2 MGA HARI 9: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
