2 MGA HARI 8

Ang Duta sang Sunemnon Gin-uli

1Karon si Eliseo nagpamolong sa babayi nga ang iya anak ginbuhi niya,#2 Hari 4:8-37. “Tindug ka, kag lakat ka kag ang bug-os mo nga panimalay kag magpanlugayaw sa bisan diin nga mapanlugayawan mo; kay ginpaabut sang Ginoo ang tiggulutum, kag magaabut man ini sa duta sing pito ka tuig.” 2Gani ang babayi nagtindug, kag naghimo sono sa polong sang tawo sang Dios; naglakat sia pati sang iya panimalay kag nagpanlugayaw sa duta sang mga Filistinhon sing pito ka tuig. 3Kag sa katapusan sang pito ka tuig, ang babayi nagbalik gikan sa duta sang mga Filistinhon, kag naggowa sia sa pagtu-aw sa hari tungud sang iya balay kag sang iya duta. 4Karon ang hari nagapakighambal kay Giezi nga alagad sang tawo sang Dios, nga nagasiling, “Sugiri ako sang tanan nga dalagku nga butang nga nahimo ni Eliseo.” 5Kag sang nagasugid sia sa hari kon paano nga ginbuhi niya ang patay, yari karon, ang babayi nga ang iya anak ginbuhi niya nagtuaw sa hari tungud sang iya balay kag sang iya duta. Kag si Giezi nagsiling, “Ginoo ko, O hari, amo ini ang babayi, kag amo ini ang iya anak nga lalaki nga ginbuhi ni Eliseo.” 6Kag sang nagpamangkot ang hari sa babayi, sia nagsugid sa iya. Gani ang hari nagtangdo sa iya sing isa ka manugdumala, nga nagasiling, “Ipauli mo ang tanan nga iya, kag ang bug-os nga patubas sang latagon kutub sang adlaw nga nagbiya sia sang duta bisan tubtub karon.”

Si Hazael Nanginhari sa Siria

7Si Eliseo nagkadto sa Damasco. Si Ben-hadad nga hari sang Siria nagmasakit; kag sang ginsugid sa iya, “Ang tawo sang Dios nag-abut diri,” 8ang hari nagsiling kay Hazael, “Dala ka sa imo kamut sing dolot kag lakat sugataa ang tawo sang Dios, kag pamangkot ka paagi sa iya sa Ginoo, nga nagasiling, ‘Magaayo bala ako sa sini nga balatian?’” 9Gani si Hazael nagkadto sa pagsugata sa iya, kag nagdala sing dolot upud sa iya, bisan sang tagsa ka maayo nga butang sang Damasco, nga malulan sa kap-atan ka camelyo. Sang nag-abut sia kag nagtindug sa atubangan niya, nagsiling sia, “Ang imo anak nga si Ben-hadad nga hari sang Siria nagpadala sa akon sa imo, nga nagasiling, ‘Magaayo bala ako sa sini nga balatian?’” 10Kag si Eliseo nagsiling sa iya, “Lakat, isiling sa iya, ‘Sa pagkamatuud magaayo ka’; apang ang Ginoo nagpahayag sa akon nga sia mapatay nga gayud.” 11Kag gintampad niya sing toduk ang iya nawung sa iya, tubtub nga nahuya sia. Kag ang tawo sang Dios naghibi. 12Kag nagsiling sa iya si Hazael, “Ngaa bala nagahibi ang akon ginoo?” Sia nagsabat, “Bangud nga nahibaloan ko ang malaut nga himoon mo sa katawohan sang Israel; ang ila pamakud tutdan mo sa kalayo, kag ang iya mga pamatan-on nga lalaki patyon mo sa espada, kag ipus-ang mo ang ila mga magamay, kag gayhabon mo ang ila mga babayi nga nagabusung.” 13Kag si Hazael nagsiling, “Apang ano bala ang imo alagad, nga ido lamang, nga maghimo sia sini nga daku nga butang?” Si Eliseo nagsabat, “Ang Ginoo nagpakita sa akon nga ikaw manginhari sang Siria.”#1 Hari 19:15. 14Niyan nagtaliwan sia gikan kay Eliseo, kag nag-abut sa iya agalon, nga nagsiling sa iya, “Ano bala ang ginsiling ni Eliseo sa imo?” Kag sia nagsabat, “Sia nagsugid sa akon nga magaayo ka nga gayud.” 15Apang sa madason nga adlaw nagkuha sia sing isa ka tabon nga diotay kag gintusmog ini sa tubig kag ginhumlad ini sa nawung sang hari, sa bagay nga napatay sia. Kag si Hazael naghari nga tal-us niya.

Ang Paghari ni Joram sa Juda

(2 Cron. 21:1-20)

16Sa ikalima nga tuig ni Joram nga anak ni Acab, nga hari sang Israel, si Josafat nga niyan hari sang Juda, nagsugud sa paghari si Jehoram nga anak ni Josafat nga hari sang Juda. 17Nagsugud sia sa paghari sang katloan kag duha ka tuig sia, kag naghari sia sing walo ka tuig sa Jerusalem. 18Kag naglakat sia sa dalanon sang mga hari sang Israel, subong sang ginhimo sang panimalay ni Acab, kay naasawa niya ang babayi nga anak ni Acab. Kag ginhimo niya ang malaut sa itololok sang Ginoo. 19Apang ang Ginoo indi buut maglaglag sang Juda, bangud kay David nga iya alagad, subong sang ginsaad niya sa iya nga hatagan sia sing suga tungud sa iya mga anak sa gihapon.#1 Hari 11:36.

20Sa iya mga adlaw ang Edom nagribuk sa idalum sang kamut sang Juda,#Gen. 27:40. kag naghimo sila sing hari nila. 21Niyan si Joram nagliton sa Zair kag ang tanan niya nga kangga upud sa iya, kag nagtindug sia sa kagab-ihon, kag ginsolong ang mga Edomnon nga naglikup sa iya kag ang mga pangolo sang mga kangga; kag ang katawohan nagpalagyo sa ila mga layanglayang. 22Gani ang Edom nagribuk sa idalum sang kamut sang Juda tubtub sini nga adlaw. Niyan ang Libna nagribuk sa amo gid nga tion. 23Karon ang nabilin nga mga binuhatan ni Joram, kag ang tanan nga ginhimo niya, wala bala sila masulat sa Tolon-an sang mga Maragtas sang mga Hari sang Juda? 24Gani si Joram nagtolog upud sa iya mga ginikanan, kag ginlubung upud sa iya mga ginikanan sa banwa ni David; kag si Ocozias nga iya anak naghari sa tal-us niya.

Ang Paghari ni Ocozias

(2 Cron. 22:1-6)

25Sa tuig nga ikanapulog duha ni Joram nga anak ni Acab, nga hari sang Israel, nagsugud sa paghari si Ocozias nga anak ni Jehoram, nga hari sang Juda. 26Nagsugud sa paghari si Ocozias sang sia duha ka pulog duha ka tuig, kag naghari sia sing isa ka tuig sa Jerusalem. Ang ngalan sang iya iloy amo si Atalia; nga anak ni Omri nga hari sang Israel. 27Naglakat man sia sa dalanon sang panimalay ni Acab, kag naghimo sang malaut sa itololok sang Ginoo, subong sang ginhimo sang panimalay ni Acab, kay umagad sia sang panimalay ni Acab.

28Nag-upud siya sa pag-awayan kay Joram nga anak ni Acab sa Ramot sa Galaad batok kay Hazael nga hari sang Siria, kag ginpilas sang mga Sirianhon si Joram. 29Kag si Hari Joram nagbalik sa Jezreel sa pagpaayo sang mga pilas nga ginhatag sa iya sang mga Sirianhon sa Rama, sang pagpakig-away niya kay Hazael nga hari sang Siria. Kag nagdulhog si Ocozias nga anak ni Joram nga hari sang Juda sa pagsugata kay Joram nga anak ni Acab sa Jezreel, bangud nga nagmasakit sia.

Currently Selected:

2 MGA HARI 8: ABHIL82

Highlight

Copy