2 MGA HARI 7
7
1Apang si Eliseo nagsiling, “Pamatii ninyo ang polong sang Ginoo: amo ini ang ginasiling sang Ginoo, Buwas sa mga amo ining tion ang isa ka sukub sang mapino nga harina ibaligya sing isa ka siclo, kag ang duha ka sukub nga sebada sing isa ka siclo, sa gawang sang Samaria.” 2Niyan ang pangolo nga ginahamboyan sang hari sang iya kamut nagsabat sa tawo sang Dios, “Kon ang Ginoo maghimo sing mga talambuan sa langit, mahanabu bala ining butang?” Apang nagsiling sia, “Makita mo ini sang imo mga mata, apang indi ka makakaon sini.”
3Karon may apat ka tawo nga aroon sa salamputan sang gawang; kag nagsilingay sila, “Ngaa bala nagalingkod kita diri tubtub nga kita mapatay? 4Kon magsiling kita, ‘Masulud kita sa banwa,’ ang tiggulutum yara sa banwa, kag mapatay kita didto; kag kon maglingkod pa kita diri, mapatay man kita. Busa karon kari, magdangup kita sa kasoldadosan sang mga Sirianhon; kon luwason kita nila nga buhi mabuhi kita, kag kon patyon nila kita mapatay lamang kita.” 5Gani nagtindug sila sa kasisidmon sa pagkadto sa dologan sang mga Sirianhon; apang sang nag-abut sila sa nahigad gid nga bahin sang dologan sang mga Sirianhon, yari karon, wala didto sing tawo. 6Kay ginhimo sang Ginoo nga ang kasoldadosan sang mga Sirianhon makabati sang dinagubdub sang mga kangga, kag sang kinagahud sang mga kabayo, bisan ang kinagahud sang daku nga kasoldadosan, gani nagsilingay sila, “Yari karon, ang hari sang Israel naghinakay batok sa aton sang mga hari sang mga Hethanon kag sang mga hari sang mga Egiptohanon sa pagdamhag sa aton.” 7Busa nagtindug sila kag nagpalagyo sa kasisidmon kag nagbiya sang ila mga layanglayang, kag sang ila mga kabayo, kag sang ila mga asno, bisan sang dologan subong nga amo sia, kag nagpalagyo tungud sa ila kabuhi. 8Kag sang nagkadto ini nga mga aroon sa mga bahin sang dologan, nagsulud sila sa isa ka layanglayang, kag nagkaon kag nag-inum sila, kag nagdala gikan didto sing pilak kag bulawan kag panapton, kag naglakat kag naghab-on sini; kag nagbalik sila, kag nagsulud sila sa isa pa ka layanglayang, kag nagdala man gikan didto, kag naglakat kag naghab-on sini.
9Niyan nagsilingay sila, “Wala kita nagahimo sing maayo. Ini nga adlawadlaw sang maayo nga mga balita; kon kita nagahipus kag maghulat tubtub sa pamanagbanag, lambuton kita sang silot; busa karon kari, maglakat kita kag magsugid sa panimalay sang hari.” 10Gani nag-abut sila kag nagpanawag sa mga bantay sang gawang sang banwa, kag nagsugid sila sa ila, “Nagsulud kami sa dologan sang mga Sirianhon, kag yari karon, wala sing tawo didto, bisan tingug sang tawo, kondi ang mga kabayo nga nagaid, kag ang mga asno nga nagaid, kag ang mga layanglayang subong nga amo sila.” 11Niyan gintawag niya ang mga bantay sang gawang, kag ginsugid nila ini sa panimalay sang hari sa sulud. 12Kag ang hari nagbangon sa kagab-ihon, kag nagsiling sa iya mga alagad, “Ipakita ko karon sa inyo ang nahimo sa aton sang mga Sirianhon. Sila nakahibalo nga gutum kita; busa naghalin sila sa dologan sa pagpanago sa latagon, nga nagasiling, ‘Kon maggowa sila sa banwa, dakpon naton sila nga buhi kag magsulud sa banwa.’” 13Kag ang isa sang iya mga alagad nagsiling, “Ipakuha sa iban ang lima sang mga kabayo nga nabilin, nga nabilin sa sulud sang banwa (yari karon, sila subong sang bug-os nga kadam-an sang Israel nga nabilin sa iya; yari karon, sila subong sang bug-os nga kadam-an sang Israel nga napapas); kag ipadala naton sila kag patan-awon.” 14Busa nagkuha sila sing duha ka kangga pati sang mga kabayo, kag ginpadala sang hari sa olihi sang kasoldadosan sang mga Sirianhon, nga nagasiling, “Lakat kamo kag tan-awa.” 15Gani ginsonod nila sila tubtub sa Jordan; kag, yari karon, ang bug-os nga dalan nahil-ob sang mga panapton kag mga gamit nga ginhaboy sang mga Sirianhon sa ila pagdaldali. Kag nagbalik ang mga manugbalita, kag nagsugid sa hari.
16Niyan ang katawohan naggowa, kag nag-ati sang dologan sang mga Sirianhon. Gani ang isa ka sukub sang harina nga mapino ginbaligya sa isa ka siclo, kag duha ka sukub nga sebada sa isa ka siclo, sono sa polong sang Ginoo. 17Karon gintulin sang hari ang gawang sa pangolo nga sa iya kamut nagahamboy sia; kag gintapak sia sang katawohan sa gawang, kag napatay sia sono sa nasiling sang tawo sang Dios, nga nagpamolong sang nagdulhog ang hari sa iya. 18Kay sang napamolong sang tawo sang Dios sa hari, “Duha ka sukub nga sebada sa isa ka siclo, kag isa ka sukub sang harina nga mapino sa isa ka siclo, buwas sa mga subong sini ang tion sa gawang sang Samaria,” 19nagsabat yadto nga pangolo sa tawo sang Dios, “Kon ang Ginoo maghimo sing mga talambuan sa langit, mahanabu bala ini nga butang?” Kag nagsiling si Eliseo, “Makita mo ini sang imo mga mata, apang indi ka makakaon sini.” 20Amo ini gid ang nahanabu sa iya, kay ang katawohan nagtapak sa iya sa gawang kag napatay sia.
Currently Selected:
2 MGA HARI 7: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
