2 MGA HARI 6

Ang Wasay Ginpalutaw

1Karon ang mga anak sang mga manalagna nagsiling kay Eliseo, “Yari karon, ang duug nga ginapuy-an naton sa atubangan mo tama kakitid sa aton. 2Magkadto kita sa Jordan kag magkuha didto ang tagsa ka tawo sing balayanon, kag maghimo kita didto sing duug nga mapuy-an naton.” Kag nagsabat sia, “Lakat kamo.” 3Niyan ang isa nagsiling, “Magmahamuut ka sa pag-upud sa imo mga alagad.” Kag sia nagsabat, “Makadto ako.” 4Gani nag-upud sia sa ila. Kag sang nag-abut sila sa Jordan, nagpulud sila sing kahoy. 5Apang sang nagapulud ang isa sing balayanon, ang olo sang wasay naholog sa tubig; kag nagsinggit sia, “Abaw, agalon ko! Hinulaman yadto.” 6Niyan ang tawo sang Dios nagsiling, “Diin bala maholog yadto?” Sang sia nagtudlo sa iya sang duug, nag-utud si Eliseo sing lipak, kag ginhaboy ini didto, kag ginpalutaw ang salsalon. 7Kag nagsiling sia, “Kab-uta ina sa imo.” Gani gin-untay niya ang iya kamut kag ginkuha ini.

Si Eliseo kag ang mga Sirianhon

8Sadto sang nagapakig-away ang hari sang Siria batok sa Israel, nagpakigsapul sia sa iya mga alagad, nga nagasiling, “Sa amo kag sa amo nga duug ipahamtang ko ang akon dologan.” 9Apang ang tawo sang Dios nagpadala sing polong sa hari sang Israel, “Andam ka nga indi mag-agi sa among duug, kay ang mga Sirianhon nagadulhog didto.” 10Kag ang hari sang Israel nagpadala sa duug nga ginsugid sa iya sang tawo sang Dios. Sa amo ginpaandaman niya sia, gani naluwas niya ang iya kaugalingon didto indi sa makaisa ukon makaduha.

11Kag ang tagiposoon sang hari sang Siria naglibog sing tama nahanungud sining butang; kag nagtawag sia sang iya mga alagad kag nagsiling sa ila, “Indi bala kamo magpahayag sa akon kon sin-o sa aton ang nagaapin sa hari sang Israel?” 12Kag ang isa sang iya mga alagad nagsiling, “Wala, ginoo ko, O hari; kondi si Eliseo, ang manalagna nga yara sa Israel, nagasugid sa hari sang Israel sang mga polong nga imo ginpamolong sa imo hulut nga hiligdaan.” 13Kag nagsiling sia, “Lakat kag tan-awa kon diin sia, agud nga makapadala ako kag ipakuha sia.” Ginsugid ini sa iya, “Yari karon, yara sia sa Dotan.” 14Gani nagpadala ang hari didto sing mga kabayo kag mga kangga kag dakung kasoldadosan; kag nag-abut sila sa kagab-ihon, kag ginlikupan ang banwa. 15Sang nagbangon sing aga pa ang alagad sang tawo sang Dios kag naggowa, yari karon, ang kasoldadosan nga may mga kabayo kag mga kangga naglikup sa banwa. Kag ang iya alagad nagsiling sa iya, “Abaw, agalon ko! Ano bala ang himoon ta?” 16Sia nagsabat, “Dili ka magkahadluk, kay ang mga nagaupud sa aton madamu pa sa mga nagaupud sa ila.” 17Niyan nagpangamuyo si Eliseo, kag nagsiling, “O Ginoo, ginaampo ko sa imo, buksi ang iya mga mata agud nga makakita sia.” Gani ginbuksan sang Ginoo ang mga mata sang pamatan-on nga lalaki, kag nakakita sia; kag yari karon, ang bukid hil-ob sang mga kabayo kag sang mga kangga nga kalayo sa palibut ni Eliseo. 18Kag sang nagdulhog ang mga Sirianhon sa iya, nagpangamuyo si Eliseo sa Ginoo, kag nagsiling, “Ginaampo ko sa imo, sakita ining katawohan sa pagkabulag.” Gani ginsakit niya sila sa pagkabulag sono sa polong ni Eliseo. 19Kag si Eliseo nagsiling sa ila, “Indi amo ini ang dalan, kag indi ini ang banwa; sonod kamo sa akon, kag dalhon ko kamo sa tawo nga ginapangita ninyo.” Kag gintuytuyan niya sila pa Samaria.

20Sang nakasulud sila sa Samaria, si Eliseo nagsiling, “O Ginoo, buksi ang mga mata sining mga tawo, agud nga makakita sila.” Kag ginbuksan sang Ginoo ang ila mga mata, kag nakakita sila; kag yari karon, yara sila sa tunga sang Samaria. 21Ang hari sang Israel nagsiling kay Eliseo sang nakita niya sila, “Amay ko, patyon ko bala sila? Patyon ko bala sila?” 22Nagsabat sia, “Dili mo sila pagpatyon. Buut ka bala magpatay sang nabihag mo sa espada kag sa pana? Butangi sa atubangan nila sing kalan-on kag tubig, agud nga magkaon kag mag-inum sila kag magpauli sa ila agalon.” 23Gani ginhiwatan niya sila sing dakung pagkaon; kag sang nakakaon kag nakainum sila, ginpapauli niya sila, kag sila nagkadto sa ila agalon. Kag ang mga kabon sang Siria wala na magkadto sa duta sang Israel.

Si Eliseo kag ang Pagkibon sang Samaria

24Sa tapus sini si Ben-hadad nga hari sang Siria nagtipon sang bug-os niyang kasoldadosan, kag nagtaklad, kag nagkibon sang Samaria. 25Kag may dakung tiggulutum sa Samaria, kag yari karon, ginkibon nila ini, tubtub nga ang olo sang asno nabaligya sa kawaloan ka siclo nga pilak, kag ang ikap-at ka bahin sang isa ka kab nga iti sang salampati sa lima ka siclo nga pilak. 26Karon sang nagaligad ang hari sang Israel sa ibabaw sang kuta, may babayi nga nagsinggit sa iya, nga nagasiling, “Tabang, ginoo ko, O hari!” 27Kag nagsiling sia, “Kon indi ang Ginoo magtabang sa imo, diin ko bala ikaw tabangan? Gikan bala sa linasan, ukon gikan sa ipitan?” 28Kag ang hari nagsiling sa iya, “Ano bala ang nagasakit sa imo?” Nagsabat sia, “Ining babayi nagsiling sa akon, ‘Ihatag ang imo anak nga lalaki, agud nga makaon naton sia karon nga adlaw, kag buwas kaonon naton ang akon anak nga lalaki.’ 29Gani ginlaga namon ang akon anak, kag ginkaon sia. Kag sa adlaw nga madason ako nagsiling sa iya, ‘Ihatag ang imo anak, agud nga makaon naton sia’; apang gintago niya ang iya anak.” 30Sang nabatian sang hari ang mga polong sang babayi ginkusnit niya ang iya mga panapton—karon nagaligad sia sa ibabaw sang kuta—kag ang katawohan nagtolok, kag yari karon, may panapton nga sako sia sa ibabaw sang iya unud sa sulud— 31Kag nagsiling ang hari, “Ang Dios maghimo sang subong sa akon, kag labi pa man, kon ang olo ni Eliseo nga anak ni Safat mabilin sa ibabaw niya sining adlaw.”

32Kag si Eliseo nagalingkod sa iya balay, kag ang mga tigulang nagalingkod upud sa iya. Karon ang hari nagpadala sing isa ka tawo gikan sa atubangan niya; apang sa wala pa mag-abut ang manugbalita sa iya nagsiling sia sa mga tigulang, “Nakita bala ninyo kon paano nga ining lalaki nga anak sang manugpatay sing tawo nagpadala sa pagkuha sang akon olo? Tan-awa, kon mag-abut ang manugbalita, takpi ang ganhaan, kag punggi ang ganhaan batok sa iya. Wala bala sa olihi niya ang lapaklapak sang mga tiil sang iya agalon?” 33Kag samtang nagahambal pa sia sa ila, ang manugbalita nagdulhog sa iya kag nagsiling sia, “Ining malaut nagagikan sa Ginoo! Ngaa bala maghulat pa ako sa Ginoo?”

Currently Selected:

2 MGA HARI 6: ABHIL82

Highlight

Copy