2 MGA HARI 10

Si Jehu Nagalaglag sang Panimalay ni Acab

1Karon si Acab may kapitoan ka anak nga lalaki sa Samaria. Gani si Jehu nagsulat sing mga sulat, kag ginpadala sa Samaria, sa mga pangolo sang Jezreel, bisan sa mga tigulang, kag sa mga nagbatiti sang mga anak ni Acab, nga nagasiling, 2“Niyan karon, sa pag-abut gid sining sulat sa inyo, sa ginatan-aw nga yara sa inyo ang mga anak sang inyo agalon, kag yara sa inyo may mga kangga kag mga kabayo, banwang may pamakud man, kag hinganib, 3pangitaa ninyo ang labi gid kaayo kag ang nagakaigo gid nga anak sang inyo agalon kag ibutang sia sa trono sang iya amay, kag pakig-away kamo tungud sa panimalay sang inyo agalon.” 4Apang ginhadlukan sila sing lakas, kag nagsiling, “Yari karon, ang duha ka hari wala makatindug sa atubangan niya; paano bala niyan ang pagtindug ta?” 5Gani ang nagdumala sang panimalay, kag ang nagdumala sang banwa, ang mga tigulang man kag ang mga nagbatiti sang mga bata, nagpadala kay Jehu, nga nagasiling, “Kami imo mga alagad, kag magahimo sang tanan nga isogo mo sa amon. Indi kami maghimo sing hari sang bisan sin-ong tawo; himoa ang maayo sa imo mga mata.” 6Niyan nagsulat sia sa ila sing ikaduha, nga nagasiling, “Kon kamo dampig sa akon, kag kon magpamati kamo sa akon tingug, kuhaa ninyo ang mga olo sang mga tawo nga mga anak nga lalaki sang inyo agalon, kag kari kamo sa akon buwas sa sining tion sa Jezreel.” Karon ang mga anak sang hari, nga kapitoan ka lalaki, upud sa mga dungganon nga mga tawo sang banwa, nga nagbatiti sa ila. 7Kag sang pag-abut sang sulat sa ila, ginkuha nila ang mga anak sang hari, kag ginpatay sila, ang kapitoan ka lalaki, kag ginbutang ang ila mga olo sa mga alat, kag ginpadala sila sa iya sa Jezreel. 8Sang nag-abut ang manugbalita kag nagsugid sa iya, “Gindala nila ang mga olo sang mga anak sang hari,” sia nagsiling, “Ibutang ninyo sila sa duha ka tumpok sa salamputan sang gawang tubtub sa aga.” 9Niyan sang pagkaaga, naggowa sia, kag nagtindug, kag nagsiling sa bug-os nga katawohan, “Kamo mga matarung. Nagpuhon ako batok sa akon agalon, kag ginpatay sia; apang sin-o bala ang nagpatay sini tanan? 10Kilalaha ninyo karon nga wala sing maholog sa duta sang polong sang Ginoo, nga ginpamolong sang Ginoo nahanungud sa panimalay ni Acab; kay nahimo sang Ginoo ang ginpamolong niya paagi sa iya alagad nga si Elias.” 11Gani ginpatay ni Jehu ang tanan nga nabilin sang panimalay ni Acab sa Jezreel,#Os. 1:4. ang tanan niyang dungganon nga tawo, kag ang tanan niyang abyan nga hanuut, kag ang iya mga sacerdote, tubtub nga wala sia sing ginbilin sa iya.

12Niyan nagtindug sia kag nagtaliwan kag nagkadto sa Samaria. Sang didto sia sa balay nga alalotan sang mga manugpahalab sa dalanon, 13nasugata ni Jehu ang mga utud ni Ocozias nga hari sang Juda, kag sia nagsiling, “Sin-o bala kamo?” Kag nagsabat sila, “Mga utud kami ni Ocozias, kag nagdulhog kami sa pag-abiabi sa mga anak sang hari kag sa mga anak sang hara.” 14Nagsiling sia, “Dakpa sila nga buhi.” Kag gindakup nila sila nga buhi, kag ginpatay sila sa bobon sang balay nga alalotan, ang kap-atan kag duha ka lalaki, kag wala sia sing ginbilin sa ila.

15Kag sang nakataliwan sia didto, nasugata niya si Jonadab nga anak ni Recab nga nagapakari sa pagsugata sa iya; kag gin-abiabi niya sia, kag nagsiling sa iya, “Matarung bala ang imo tagiposoon, subong nga ang akon tagiposoon matarung ayon sa imo tagiposoon?” Kag si Jonadab nagsabat, “Amo gid.” “Kon amo ini, idaho sa akon ang imo kamut.” Gani gindaho niya sa iya ang iya kamut. Kag ginpasaka niya sia upud sa iya sa kangga. 16Kag nagsiling sia, “Upud ka sa akon, kag tan-awa ang akon kakugi sa Ginoo.” Gani ginpasakay niya sia sa iya kangga. 17Kag sang pag-abut niya sa Samaria, ginpatay niya ang tanan nga nabilin kay Acab sa Samaria, tubtub nga nalaglag niya sila sono sa polong sang Ginoo nga ginpamolong niya kay Elias.

Si Jehu Nagapanas sang Pagsimba kay Baal

18Niyan gintipon sing tingub ni Jehu ang bug-os nga katawohan, kag nagsiling sa ila, “Si Acab nag-alagad sing diotay kay Baal; apang si Jehu magaalagad sa iya sing daku. 19Busa karon pakaria sa akon ang tanan nga manalagna ni Baal, ang tanan niyang sumilimba kag ang tanan niyang sacerdote; walay magkulang bisan isa, kay may isa kadaku ako nga halad kay Baal; ang bisan sin-o nga indi magtambong indi sia mabuhi.” Apang ginhimo ini ni Jehu nga may kalalang sa katuyoan nga malaglag niya ang mga sumilimba kay Baal. 20Kag si Jehu nagsiling, “Pakabalaan kamo sing isa ka pagtilipon nga maligdong kay Baal.” Gani ginbantala nila ini. 21Kag si Jehu nagpadala sa bug-os nga Israel; kag nag-abut ang tanan nga sumilimba ni Baal, sa bagay nga walay nabilin nga tawo nga wala mag-abut. Kag nagsulud sila sa balay ni Baal, kag ang balay ni Baal napuno gikan sa isa ka ukbung tubtub sa isa. 22Nagsiling sia sa manugtatap sang mga panapton, “Pagowaa ang mga panapton nga sa tanan nga sumilimba ni Baal.” Gani nagpagowa sia sing mga panapton. 23Niyan nagsulud si Jehu kag si Jonadab nga anak ni Recab sa balay ni Baal; kag nagsiling sia sa mga sumilimba ni Baal, “Usisaa, kag tan-awa nga wala diri upud sa inyo sang mga alagad sang Ginoo, kondi ang mga sumilimba lamang ni Baal.” 24Niyan nagsulud sila sa pagdolot sing mga halad kag mga halad-nga-sinonog.

Karon si Jehu nagtangdo nga sa iya sing kawaloan ka tawo sa gowa, kag nagsiling, “Kon ang bisan sin-o sang mga tawo nga gindala ko sa inyo mga kamut magpalagyo ang nagapapalagyo sa iya ang iya kabuhi ibaylo tungud sa kabuhi niya.” 25Gani sa gilayon nga nakatapus sia sa pagdolot sang halad-nga-sinonog, si Jehu nagsiling sa manugbantay kag sa mga pangolo, “Sulud kamo kag patyon sila; walay bisan sin-o nga pagowaon.” Gani sang ginpatay nila sila sa sulab sang espada, ang manugbantay kag ang mga pangolo nagpilak sa ila sa gowa kag nagkadto sa banwa sang balay ni Baal 26kag ginpagowa nila ang mga obelisco sa balay ni Baal, kag ginsonog sila. 27Kag ginwagawag nila ang haligi ni Baal, kag ginguba ang balay ni Baal, kag ginhimo ini nga palamus-onan nga balay tubtub sining adlaw.

28Amo ini ang paglaglag ni Jehu kay Baal gikan sa Israel. 29Apang gikan sa mga sala ni Jeroboam nga anak ni Nabat, nga sa ila ginpapakasala niya ang Israel, si Jehu wala magtaliwan sa ila, kon sayoron, ang mga tinday nga baka nga bulawan nga yadto sa Bet-el, kag ang yadto sa Dan.#1 Hari 12:28-30. 30Kag ang Ginoo nagsiling kay Jehu, “Bangud nga naghimo ka sing maayo sa pagtuman sang matarung sa akon mga mata, kag naghimo sa panimalay ni Acab sono sa tanan nga yari sa akon tagiposoon, ang imo mga anak sang ikap-at nga kaliwatan magalingkod sa trono sang Israel.” 31Apang si Jehu wala magsapak sa paglakat sa kasogoan sang Ginoo ang Dios sang Israel sa bug-os niyang tagiposoon; wala sia magtaliwan gikan sa mga sala ni Jeroboam, nga sa ila ginpapakasala niya ang Israel.

32Sa sadtong mga adlaw ang Ginoo nagsugud sa pag-utud gikan sa Israel. Si Hazael naglandas sa ila sa tanan nga ginsakpan sang Israel: 33kutub sa Jordan pa sidlangan, ang bug-os nga duta sang Galaad, ang mga Gadhanon, kag ang mga Rubenhon, kag ang mga Manasinhon, kutub sa Aroer, nga sa ubay sang nalupyakan sang Arnon, nga amo, ang Galaad kag Basan. 34Karon ang nabilin sang mga binuhatan ni Jehu, kag ang tanan nga ginhimo niya, kag ang bug-os niyang gahum, wala bala sila masulat sa Tolon-an sang mga Maragtas sang mga Hari sang Israel? 35Gani si Jehu nagtolog upud sa iya mga ginikanan, kag ginlubung nila sia sa Samaria. Kag naghari nga tal-us niya si Joacaz nga iya anak. 36Ang tion nga naghari si Jehu sa ibabaw sang Israel sa Samaria duha ka pulo kag walo ka tuig.

Currently Selected:

2 MGA HARI 10: ABHIL82

Highlight

Copy