2 MGA HARI 11
11
Ang Pag-agaw ni Atalia sang Trono
(2 Cron. 22:10–23:21)
1Karon sang nakita ni Atalia nga iloy ni Ocozias nga ang iya anak patay na, nagtindug sia kag ginlaglag ang bug-os nga panimalay nga harianon. 2Apang si Josaba, ang babaying anak ni Hari Joram, ang babayi nga utud ni Ocozias, nagkuha kay Joas nga lalaking anak ni Ocozias, kag ginkawat sia gikan sa tunga sang mga anak sang hari nga ginpamatay, sia kag ang iya sisiwa kag ginbutang sila sa hulut nga higdaan. Sa amo gintago sia gikan kay Atalia, sa bagay nga wala sia mapatay; 3kag gintago sia upud sa iya sa balay sang Ginoo sing anum ka tuig, samtang nga si Atalia naghara sa ibabaw sang duta.
4Apang sa ikapitong tuig nagpadala si Joiada kag nagkuha sang mga pangolo sang ginatus sang mga Carinhon kag sang manugbantay, kag gindala sila sa iya sa balay sang Ginoo; kag nagpakigkatipan sia sa ila kag ginpasumpa sila sa balay sang Ginoo, kag ginpakita sa ila ang lalaking anak sang hari. 5Kag nagsogo sia sa ila, “Ini amo ang butang nga inyo himoon: ang ikatlong bahin sa inyo nga nagasulud sa adlaw nga inugpahuway kag nagabantay sang balay sang hari 6(ang isa ka ikatlong bahin didto sila sa gawang nga Sur kag ang isa ka ikatlong bahin sa gawang sa likod sang mga manugbantay), sa amo magbantay kamo sang balay kag manginkaupangan; 7kag ang duha ka kabon sa inyo, ang tanan nga nagagowa sa adlaw nga inugpahuway, kag nagabantay sang balay sang Ginoo sa palibut sang hari, 8libutan ninyo ang hari sing bug-os, nga ang tagsa ka tawo may iya nga hinganiban sa iya kamut; kag ang nagasulud sa mga kubay nga napaagisud patyon sia. Mag-upud kamo sa hari kon maggowa sia kag kon magsulud sia.”
9Ang mga pangolo sang ginatus naghimo sang tanan sono sa ginsogo ni Joiada nga sacerdote, kag nagkuha ang tagsa ka tawo sang iya mga tawo nga magasulud sa adlaw nga inugpahuway, upud sa ila nga magagowa sa adlaw nga inugpahuway, kag nagkadto kay Joiada nga sacerdote. 10Kag ginhatag sang sacerdote sa mga pangolo sang ginatus ang mga bangkaw kag ang mga taming nga iya anay ni Hari David, nga didto sa balay sang Ginoo; 11kag ang manugbantay nagtindug, ang tagsa ka tawo may iya nga hinganiban sa iya kamut, kutub sa kilid nga too sang balay tubtub sa kilid nga wala sang balay, sa ubay sang halaran kag sang balay, sa luyo sang hari palibut. 12Niyan gindala niya sa gowa ang anak sang hari, kag ginbutang sa iya ang purungpurung, kag ginhatag sa iya ang pagpamatuud; kag ginhimo nila sia nga hari, kag ginhaplas sia; kag nagpamalakpak sila, kag nagsiling, “Mabuhi ang hari!”
13Sang nabatian ni Atalia ang ginahud sang manugbantay kag sang katawohan, nagkadto sia sa katawohan sa sulud sang balay sang Ginoo; 14kag sang nagtolok sia, ang hari nagatindug sa luyo sang haligi, sono sa kinabatasan, kag ang mga pangolo kag ang mga budyong sa luyo sang hari, kag ang bug-os nga katawohan sang duta nagkasadya kag nagpatonog sing mga budyong. Kag si Atalia nagkusnit sang iya mga panapton, kag nagsinggit, “Budhi! budhi!” 15Niyan si Joiada nga sacerdote nagsogo sa mga pangolo sang ginatus nga ginpadumala sang kasoldadosan, “Pagowaa ninyo sia nga napatunga sa mga kubay; kag ang nagasonod sa iya patyon sa espada.” Kay ang sacerdote nagsiling, “Dili sia pagpatyon sa balay sang Ginoo.” 16Gani naghawa sila sa iya; kag nag-agi sia sa dalan nga alagyan sang mga kabayo pakadto sa balay sang hari, kag ginpatay sia didto.
17Kag si Joiada naghimo sing katipan sa tunga sang Ginoo kag sang hari kag sang katawohan, nga manginkatawohan sila sang Ginoo; sa tunga sang hari man kag sang katawohan. 18Niyan ang bug-os nga katawohan sang duta nagkadto sa balay ni Baal, kag ginguba nila ini; ginwagwag nila sing bug-os gid ang iya mga halaran kag ang iya mga larawan, kag ginpatay si Matan nga sacerdote ni Baal sa atubangan sang mga halaran. Kag ang sacerdote nagtangdo sing mga manugdumala sa balay sang Ginoo. 19Kag ginkuha niya ang mga pangolo sang ginatus, ang mga Carinhon, ang mga manugbantay, kag ang bug-os nga katawohan sang duta; kag ginpadulhog nila ang hari gikan sa balay sang Ginoo, nga nagasulud sa balay sang hari paagi sa dalan sang gawang sang manugbantay. Kag naglingkod si Jehoas sa trono sang mga hari. 20Gani ang bug-os nga katawohan sang duta nagkasadya; kag ang banwa naglinong sa tapus ginpatay si Atalia sa espada sa balay sang hari.
21Si Jehoas nagsugud sa paghari sang pito ka tuig sia.
Currently Selected:
2 MGA HARI 11: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
