2 MGA HARI 12
12
Ang Paghari ni Joas
(2 Cron. 24:1-27)
1Sa ikapitong tuig ni Jehu nagsugud sa paghari si Jehoas, kag naghari sia sing kap-atan ka tuig sa Jerusalem. Ang ngalan sang iya iloy si Sibia sang Beer-seba. 2Kag si Jehoas naghimo sang matarung sa mga mata sang Ginoo sa tanan nga adlaw, bangud nga gintudloan sia ni Joiada nga sacerdote. 3Apang wala makuha ang mataas nga mga duug; ang katawohan naghalad kag nagsonog pa sing incienso sa mga duug nga mataas.
4Si Jehoas nagsiling sa mga sacerdote, “Ang tanan nga cuarta sang mga butang nga balaan nga ginsulud sa balay sang Ginoo, sa cuarta nga nagalakat—ang cuarta sang mga tawo nga ginpabili sa tagsa ka tawo sa ila#Ex. 30:11-16.—kag ang tanan nga cuarta nga nagagikan sa tagiposoon sang bisan sin-ong tawo sa pagdala sa balay sang Ginoo, 5batonon ini sang mga sacerdote nga sa ila, ang tagsa ka tawo gikan sa iya kilala; kag kaayohon nila ang mga bulwang sang balay bisan diin makita ang bulwang.” 6Apang sang tuig nga ikaduha ka pulo kag tatlo ni Hari Jehoas wala mapakaayo sang mga sacerdote ang mga bulwang sang balay. 7Niyan gintawag ni Hari Jehoas ang sacerdote nga si Joiada kag ang iban nga mga sacerdote kag nagsiling sa ila, “Ngaa bala nga wala ninyo pagkaayoha ang mga bulwang sang balay? Busa karon dili na kamo magbaton sing cuarta sa inyo mga kilala, kondi ihatag ninyo ini nga sa pagkaayo sang mga bulwang sang balay.” 8Gani ang mga sacerdote nagsugut nga indi na sila magbaton sing cuarta gikan sa katawohan, ukon magpakaayo sang mga bulwang sang balay.
9Niyan si Joiada nga sacerdote nagkuha sing kaban, kag nagboho sa takup sini, kag ginbutang ini sa luyo sang halaran sa too nga kilid kon magsulud sa balay sang Ginoo; kag ang mga sacerdote nga nagbantay sa atangan nagbutang sa sini sing tanan nga cuarta nga ginsulud sa balay sang Ginoo. 10Kag sang nakita nila nga may madamu na nga cuarta sa kaban, nagtaklad ang escriba sang hari kag ang pinakamataas nga sacerdote kag ginbutang nila sa mga puyo kag gin-isip ang cuarta nga nakita sa balay sang Ginoo. 11Niyan ang cuarta nga natimbang ginhatag nila sa mga kamut sang naghimo sang buluhaton nga gintulinan sang balay ang Ginoo; kag ginbayad ini sa mga panday kag sa mga manugpatindug nga naghimo sang balay sang Ginoo, 12kag sa mga cantero kag sa mga manugbasbas sing bato, kag sa pagbakal sing tablon kag sang bato nga binasbasan sa pagpakaayo sang mga bulwang sang balay sang Ginoo, kag sa tanan nga hinguyangon sa pagkaayo sang balay. 13Apang gikan sa cuarta nga ginsulud sa balay sang Ginoo walay nahimo nga sa balay sang Ginoo nga mga tagayan nga pilak, mga inugsugi, mga batiya, mga budyong, bisan anong gamit nga bulawan, ukon mga gamit nga pilak, 14kay ginhatag nila yadto sa mga naghimo sang buluhaton kag sa sina ginkaayo nila ang balay sang Ginoo. 15Labut pa wala nila pagpangayoi sing isip ang mga tawo nga sa ila kamut gintugyan nila ang cuarta sa paghatag sa ila nga naghimo sang buluhaton, kay naghisayo sila sing matutum. 16Ang cuarta tungud sa mga halad-sa-paglapas kag ang cuarta tungud sa mga halad-nga-sa-sala wala madala sa balay sang Ginoo; ini iya sang mga sacerdote.#Lev. 7:7.
17Sa sadtong tion nagtaklad si Hazael nga hari sang Siria kag nagpakig-away batok sa Gat, kag gin-agaw ini. Apang sang si Hazael nagpahamtang sang iya nawung sa pagtaklad sa Jerusalem, 18ginkuha ni Jehoas nga hari sang Juda ang tanan nga mga butang nga balaan nga ginhalad ni Josafat kag ni Joram kag ni Ocozias, nga iya mga ginikanan, nga mga hari sang Juda, kag ang iya kaugalingon nga balaan nga mga butang, kag ang bug-os nga bulawan nga nakita sa mga bahandi sang balay sang Ginoo kag sa balay sang hari, kag ginpadala ini kay Hazael nga hari sang Siria. Niyan naghalin si Hazael sa Jerusalem.
19Karon ang nabilin sang mga binuhatan ni Joas, kag ang tanan nga ginhimo niya, wala bala sila masulat sa Tolon-an sang mga Maragtas sang mga Hari sang Juda? 20Ang iya mga alagad nagtindug, kag nagpuhon, kag nagpatay kay Joas sa balay sang Millo, sa dalanon nga nagapadulhog sa Sila. 21Si Josacar nga anak ni Simeat kag si Josabad nga anak ni Somer, nga iya mga alagad, nagbuno sa iya, kag sia napatay. Kag ginlubung nila sia upud sa iya mga ginikanan sa banwa ni David, kag naghari nga tal-us niya si Amasias nga iya anak nga lalaki.
Currently Selected:
2 MGA HARI 12: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
