2 MGA CRONICA 30
30
Ang Paghiwat sang Pascua
1Si Ezequias nagpadala sa bug-os nga Israel kag Juda, kag nagsulat man sing mga sulat sa Efraim kag sa Manases, nga magkari sila sa Jerusalem sa balay sang Ginoo, sa paghiwat sang pascua sa Ginoo nga Dios sang Israel. 2Kay nakapakigsapul ang hari kag ang iya mga principe kag ang bug-os nga katilingban sa Jerusalem sa paghiwat sang pascua sa ikaduha nga bulan— 3kay sa sadto nga tion indi sila makahiwat sini bangud nga ang mga sacerdote wala makapakabalaan sang ila kaugalingon sa tuman nga kadamuon, kag ang katawohan wala magtipon sing tingub sa Jerusalem#Num. 9:9-11.— 4kag ang butang matarung sa mga mata sang hari kag sa mga mata sang bug-os nga katilingban. 5Gani nagpatok sila sing mando nga magahimo sing pabantala sa bug-os nga Israel, kutub gid sa Beer-seba tubtub sa Dan, nga magkari sila sa paghiwat sang pascua sa Ginoo nga Dios sang Israel, sa Jerusalem; kay sa malawig na nga tion wala sila makahiwat sini sa bagay nga sono sa nasulat. 6Gani ang mga manugdalagan naglakat sa bug-os nga Israel kag Juda nga may mga sulat gikan sa hari kag sa iya mga principe, sono sa sogo sang hari, nga nagasiling, “Kamo nga katawohan sang Israel, balik kamo sa Ginoo, ang Dios ni Abraham, ni Isaac, kag ni Israel, agud nga magbalik sia sa nabilin sa inyo nga nakapalagyo gikan sa kamut sang mga hari sang Asiria. 7Dili kamo manginkaangay sa inyo mga ginikanan kag sa inyo mga utud, nga naglapas batok sa Ginoong Dios sang ila mga ginikanan, sa bagay nga gintugyan niya sila sa kamingaw, subong sang ginatan-aw ninyo. 8Karon dili kamo magtingkoyan subong sang inyo mga ginikanan, kondi itugyan ang inyo kaugalingon sa Ginoo, kag sulud kamo sa iya santuario, nga ginpakabalaan niya sa gihapon, kag alagda ang Ginoo nga inyo Dios, agud nga ang iya masingkal nga kaakig magpalayo sa inyo. 9Kay kon magbalik kamo sa Ginoo, ang inyo mga utud kag ang inyo mga anak makaagum sing kalooy sa atubangan sang mga nagdala sa ila mga bihag, kag magabalik sa sini nga duta. Kay ang Ginoo nga inyo Dios mahinoklogon kag maloloy-on, kag indi sia magtalingi gikan sa inyo sang iya nawung, kon magbalik kamo sa iya.”
10Gani ang mga manugdalagan nag-agi sa banwabanwa sa duta sang Efraim kag Manases, tubtub sa Zabulon; apang ginkadlawan nila sila, kag gin-uligyat. 11Wala sing sapayan ang iban nga tawo sang Aser, sang Manases, kag sang Zabulon nagpaubus sang ila kaugalingon kag nagkadto sa Jerusalem. 12Sa Juda man nag-abut ang kamut sang Dios sa paghatag sa ila sing isa ka tagiposoon sa paghimo sang sogo sang hari kag sang mga principe paagi sa polong sang Ginoo.
13Kag nagtipon sa Jerusalem ang labi kadamu nga katawohan sa paghiwat sang piesta sang tinapay nga wala sing tapay sa bulan nga ikaduha, tama kadaku nga katilingban. 14Nagtindug sila kag ginkuha ang mga halaran nga yara sa Jerusalem, kag ang tanan nga halaran sa mga incienso ginkuha nila kag ginhaboy sila sa sapa nga Cedron. 15Niyan gin-ihaw nila ang pascua sa ikanapulo kag apat nga adlaw sang bulan nga ikaduha. Kag ang mga sacerdote kag ang mga Levinhon nahuya, sa bagay nga nagpakabalaan sila sang ila kaugalingon, kag nagdala sing mga halad-nga-sinonog sa balay sang Ginoo. 16Nagtindug sila sa ila mga duug sono sa ila naigoan sono sa kasogoan ni Moises nga tawo sang Dios; ang mga sacerdote nagwisik sang dugo nga ginbaton nila sa kamut sang mga Levinhon. 17Kay may madamu sa katilingban nga wala makapakabalaan sang ila kaugalingon; busa ang mga Levinhon nangintinulinan sa pag-ihaw sang mga pascua tungud sa tagsatagsa nga indi matinlo, sa pagpakabalaan sa ila sa Ginoo. 18Kay ang kadam-an sang katawohan, ang madamu sa ila gikan sa Efraim, sa Manases, sa Isacar, kag sa Zabulon, wala makapaninlo sang ila kaugalingon, apang nagkaon sila sang pascua tuhay sang sa nasulat. Kay si Ezequias nagpangamuyo tungud sa ila, nga nagasiling, “Ang maayong Ginoo magpatawad sang tagsatagsa 19nga nagatuhoy sang iya tagiposoon sa pagpangita sa Dios, ang Ginoo nga Dios sang iya mga ginikanan, bisan nga wala sia matinlo-i sono sa pagpaninlo sang santuario.” 20Kag ang Ginoo nagpamati kay Ezequias, kag gin-ayo ang katawohan. 21Kag ang katawohan sang Israel nga nagtambong sa Jerusalem naghiwat sang piesta sang tinapay nga wala sing tapay sing pito ka adlaw sa daku nga kasadya; kag ang mga Levinhon kag ang mga sacerdote nagdayaw sa Ginoo adlawadlaw, nga nagaamba sa matonog nga mga tolonggon sa Ginoo. 22Kag si Ezequias nagpamolong sing paglipay sa tanan nga Levinhon nga may maayo nga paghangup sa pag-alagdan sang Ginoo. Gani nagkaon ang katawohan sa bug-os nga piesta sa pito ka adlaw, nga nagadolot sing mga halad sang mga halad-sa-paghidait kag nagapasalamat sa Ginoo ang Dios sang ila mga ginikanan.
23Niyan ang bug-os nga katilingban nagsinapul sa paghiwat sing pito pa ka adlaw; gani naghiwat sila sing pito pa ka adlaw nga may kasadya. 24Kay si Ezequias nga hari sang Juda naghatag sa katilingban nga sa mga halad sing isa ka libo ka tinday nga baka kag pito ka libo ka carnero, kag naghatag ang mga principe sa katilingban sing isa ka libo ka tinday nga baka kag napulo ka libo ka carnero. Kag ang daku nga kadam-an sang mga sacerdote nagpakabalaan sang ila kaugalingon. 25Nagkalipay ang bug-os nga katilingban sang Juda, pati ang mga sacerdote kag ang mga Levinhon, kag ang bug-os nga katilingban nga nag-abut gikan sa Israel, kag ang mga manlulugayaw nga nag-abut gikan sa duta sang Israel, kag ang mga nagpuyo sa Juda, nagkasadya. 26Gani may daku nga kasadya sa Jerusalem, kay kutub sa tion ni Salomon nga anak ni David nga hari sang Israel wala gid sing kaangay sini sa Jerusalem. 27Niyan ang mga sacerdote kag ang mga Levinhon nagtindug kag ginpakamaayo ang katawohan, kag ang tingug nila nabatian, kag ang ila pangamuyo naglambut sa iya balaan nga puluy-an sa langit.
Currently Selected:
2 MGA CRONICA 30: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society