2 MGA CRONICA 31
31
1Karon sang natapus ini tanan, ang bug-os nga Israel nga nagtambong naggowa pakadto sa mga banwa sang Juda kag nagdugmok sang mga obelisco kag nagpulud sang mga Asherim kag naglumpag sang mataas nga mga duug kag sang mga halaran gikan sa bug-os nga Juda kag Benjamin, sa Efraim man kag sa Manases, tubtub nga nalaglag nila sila tanan. Niyan ang tanan nga katawohan sang Israel nagpauli sa ila mga banwa, ang tagsa ka tawo sa iya kaugalingon.
Ang Pag-aman ni Ezequias tungud sa mga Sacerdote kag mga Levinhon
2Kag gintangdo ni Ezequias ang mga kinabon sang mga sacerdote kag sang mga Levinhon, sono sa ila mga kinabon, ang tagsa ka tawo sono sa iya pag-alagdan, tingub ang mga sacerdote kag ang mga Levinhon, nga sa mga halad-nga-sinonog kag nga sa mga halad-sa-paghidait, sa pag-alagad kag sa pagpasalamat kag sa pagdayaw sa mga gawang sang dologan sang Ginoo. 3Gintangdo niya man ang bahin sang hari gikan sa iya pagkabutang nga sa mga halad-nga-sinonog: sa aga kag sa hapon nga mga halad-nga-sinonog, kag ang mga halad-nga-sinonog nga sa mga adlaw nga inugpahuway, sa mga lati, kag sa mga piesta nga pinat-ud, sono sa nasulat sa kasogoan sang Ginoo.#Num. 28:1–29:39. 4Labut pa nagsogo sia sa katawohan nga nagpuyo sa Jerusalem sa paghatag sang bahin sang mga sacerdote kag sang mga Levinhon, agud nga magpanugyan sila sang ila kaugalingon sa kasogoan sang Ginoo. 5Sang naglapnag ang sogo, ang katawohan sang Israel naghatag sing bugana sang nahauna nga mga bunga sang uyas, sang bag-o nga alak, lana, dugus, kag sang tanan nga patubas sang uma;#Num. 18:12-13. kag nagdala sila sing bugana sang ikapulo sang tanan nga butang.#Num. 18:21. 6Kag ang katawohan sang Israel kag sang Juda nga nagpuyo sa mga banwa sang Juda sila man nagdala sang ikapulo sang mga baka kag mga carnero, kag sang ikapulo sang napahanungud nga mga butang nga ginhalad sa Ginoo nga ila Dios, kag ginbutang sila sa mga tinumpok. 7Sa ikatlo nga bulan nagsugud sila sa pagpasad sang sadsaran sang mga tinumpok, kag gintapus sila sang ikapito nga bulan. 8Sang nag-abut kag nakita ni Ezequias kag sang mga principe ang mga tinumpok, ginpakamaayo nila ang Ginoo kag ang iya katawohan nga Israel. 9Niyan ginpamangkot ni Ezequias ang mga sacerdote kag ang mga Levinhon nahanungud sang mga tinumpok. 10Si Azarias nga puno nga sacerdote, gikan sa panimalay ni Sadoc, nagsabat sa iya, “Kutub sa pagsulugud sang mga tawo sa pagdala sang mga halad sa balay sang Ginoo nakakaon kami kag may tuman kag may nabilin nga madamu; kay ginpakamaayo sang Ginoo ang iya katawohan, kag ang nabilin amo ini nga daku nga natipon.”
11Niyan si Ezequias nagsogo sa pag-aman sing mga hulut sa balay sang Ginoo; kag gin-aman nila sila. 12Kag gindala nila sing matutum ang mga halad, ang mga ikapulo kag ang napahanungud nga mga butang. Ang manugdumala sa ila sini amo si Conanias nga Levinhon, kag si Simei nga iya utud nga lalaki ang ikaduha; 13samtang si Jehiel, si Azazias, si Nahat, si Asael, si Jerimot, si Josabad, si Eliel, si Ismaquias, si Mahat, kag si Benaya mga manugtatap sa idalum sang kamut ni Conanias kag ni Simei nga iya utud, sono sa pagtangdo ni Ezequias nga hari kag ni Azarias nga manugdumala sang balay sang Dios. 14Kag si Core nga lalaking anak ni Imna nga Levinhon, ang manugbantay sang gawang sa sidlangan, manugdumala sang mga halad-nga-kinabubut-on sa Dios, sa pagpanagtag sang mga halad nga sa Ginoo kag sang labi gid kabalaan nga mga butang. 15Sa idalum niya si Eden, si Minyamin, si Jesua, si Semaya, si Amarias, kag si Secanias sa mga banwa sang mga sacerdote, sa ila palangakoan nga salaligan, sa paghatag sa ila mga utud sono sa ila mga kinabon, subong sa dalagku amo man sa diotay, 16luwas sa ila nga gin-isip sono sa lista sang kaliwatan, sang mga lalaki kutub sa tatlo ka tuig kag paibabaw, ang tagsatagsa nga nagsulud sa balay sang Ginoo sono sa katungdanan nga ginkinahanglan sang tagsa ka adlaw, tungud sa ila pag-alagdan sa ila mga palangakoan; sono sa ila mga kinabon. 17Sa ila nga gin-isip sono sa lista sang kaliwatan sang mga sacerdote sono sa ila mga kabaranggayan; sang mga Levinhon kutub sa duha ka pulo ka tuig kag pa ibabaw sa ila mga palangakoan, sono sa ila mga kinabon. 18Sa ila nga gin-isip sono sa lista sang kaliwatan sang tanan nila nga mga magamay, sang ila mga asawa, sang ila mga anak nga lalaki, kag sang ila mga anak nga babayi, sa bug-os nga katilingban; kay sa ila palangakoan nga salaligan nagpakabalaan sila sang ila kaugalingon sa pagkabalaan. 19Sa mga lalaking anak ni Aaron man nga mga sacerdote, nga yadto sa mga latagon sang mga halalban sang ila mga banwa, sa tagsa ka banwa may mga tawo nga nasambit sa ngalan sa pagpanagtag sing mga bahin sa tanan nga lalaki sa mga sacerdote kag sa tanan nga gin-isip sono sa lista sang kaliwatan sa mga Levinhon.
20Amo ini ang ginhimo ni Ezequias sa bug-os gid nga Juda; kag ginhimo niya ang maayo kag matarung kag matutum sa atubangan sang Ginoo nga iya Dios. 21Kag sa tagsa ka buluhaton nga ginsugdan niya sa pag-alagdan sa balay sang Dios kag sa kasogoan, kag sa mga sogo, sa pagpangita sa iya Dios, ginhimo niya ini sa bug-os niya nga tagiposoon, kag nag-uswag.
Currently Selected:
2 MGA CRONICA 31: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society