2 MGA CRONICA 29
29
Ang Paghari ni Ezequias
(2 Hari 18:1-8)
1Si Ezequias duha ka pulo kag lima ka tuig sang nagsugud sia sa paghari, kag naghari sia sing duha ka pulo kag siam ka tuig sa Jerusalem. Ang ngalan sang iya iloy si Abia nga anak ni Zacarias. 2Kag ginhimo niya ang matarung sa mga mata sang Ginoo, sono sa tanan nga nahimo ni David nga iya amay.
Si Ezequias Nagapahauli sang Panimbahon sa Templo
3Sa nahaunang tuig sang iya paghari, sa nahaunang bulan, ginbuksan niya ang mga ganhaan ang balay sang Ginoo, kag ginkaayo sila. 4Ginpasulud niya ang mga sacerdote kag mga Levinhon, kag gintipon sila sing tingub sa masangkad nga duug sa sidlangan, 5kag nagsiling sa ila, “Pamati sa akon, kamo nga mga Levinhon! Karon pakabalaana ang inyo kaugalingon, kag pakabalaana ang balay sang Ginoo, ang Dios sang inyo mga ginikanan, kag ipagowa ninyo ang kahigkoan gikan sa balaan nga duug. 6Kay ang aton mga ginikanan naglapas kag naghimo sang malaut sa itololok sang Ginoo nga aton Dios; nagbiya sila sa iya, kag nagtalingi sang ila mga nawung gikan sa puluy-an sang Ginoo, kag nagtalikud sila. 7Gintakpan man nila ang mga ganhaan sang portico kag ginpalong ang mga suga, kag wala magsonog sing incienso ukon magdolot sing mga halad-nga-sinonog sa balaan nga duug sa Dios sang Israel. 8Busa ang kasingkal sang Ginoo yara sa Juda kag sa Jerusalem, kag gintugyan niya sila nga kakugmatan, nga kalatingalahan, kag ululigyaton, subong nga ginatan-aw ninyo sang inyo mga mata. 9Kay yari karon, ang aton mga ginikanan napukan paagi sa espada kag ang aton mga lalaking anak kag ang aton mga babaying anak kag ang aton mga asawa yara sa kabihagan tungud sini. 10Karon yari sa akon tagiposoon ang pagpakigkatipan sa Ginoo, ang Dios sang Israel, agud nga ang iya masingkal nga kaakig magbiya sa aton. 11Mga anak ko, dili kamo karon magmapatumbayaon, kay ang Ginoo nagpili sa inyo sa pagtindug sa atubangan niya, sa pag-alagad sa iya, kag nga mangin-alagad kamo niya kag magsonog sing incienso.”
12Niyan ang mga Levinhon nagtindug, si Mahat nga lalaking anak ni Amasai, kag si Joel nga lalaking anak ni Azarias, gikan sa mga lalaking anak sang mga Coatnon; kag gikan sa mga lalaking anak ni Merari, si Cis nga lalaking anak ni Abdi, kag si Azarias nga lalaking anak ni Abdi, kag si Azarias nga lalakinig anak ni Jehaleleel; kag gikan sa mga Gersonhon, si Joa nga lalaking anak ni Zima, kag si Eden nga lalaking anak ni Joa; 13kag gikan sa mga lalaking anak ni Elesafan, si Simri kag si Jeuel; kag gikan sa mga lalaking anak ni Asaf, si Zacarias kag si Matanias; 14kag gikan sa mga lalaking anak ni Heman, si Jehuel kag si Simei; kag gikan sa mga lalaking anak ni Jedutun, si Semaya kag si Uziel. 15Gintipon nila ang ila mga utud, kag nagpakabalaan sang ila kaugalingon, kag nagsulud sono sa sogo sang hari, paagi sa mga polong sang Ginoo, sa pagtinlo sang balay sang Ginoo. 16Ang mga sacerdote nagsulud sa nasulud nga bahin sang balay sang Ginoo sa pagtinlo sini, kag nagpagowa pakadto sa luwang sang balay sang Ginoo sang tanan nga kahigkoan nga nakita nila sa templo sang Ginoo; kag ginkuha ini sang mga Levinhon sa pagdala sini sa gowa sa sapa nga Cedron. 17Nagsugud sila sa pagpakabalaan sa nahaunang adlaw sang nahaunang bulan, kag sa ikawalong adlaw sang bulan nagkadto sila sa portico sang Ginoo; niyan ginpakabalaan nila ang balay sang Ginoo sa walo ka adlaw, kag sa ikanapulog anum nga adlaw sang nahaunang bulan natapus nila. 18Niyan nagsulud sila kay Ezequias nga hari sa sulud sang palacio, kag nagsiling, “Natinloan na namon ang bug-os nga balay sang Ginoo, ang halaran sang halad-nga-sinonog pati ang tanan niyang gamit, kag ang latok sang tinapay nga pahayag pati ang tanan niyang gamit. 19Ang tanan nga gamit nga ginsikway ni Hari Acaz sa iya paggahum sang paglapas niya, gin-aman namon kag ginpakabalaan; kag yari karon, yara sila sa atubangan sang halaran sang Ginoo.
20Niyan si Ezequias nga hari nagbangon sing aga pa kag nagtipon sang mga principe sang banwa, kag nagtaklad sa balay sang Ginoo. 21Kag nagdala sila sing pito ka tinday nga baka nga lalaki, pito ka carnero nga lalaki, pito ka cordero, kag pito ka kanding nga lalaki nga sa halad-tungud sa-sala tungud sa ginharian kag sa santuario kag sa Juda. Kag ginsogo niya ang mga sacerdote nga mga lalaking anak ni Aaron nga ihalad sila sa ibabaw sang halaran sang Ginoo. 22Gani gin-ihaw nila ang mga tinday nga baka, kag ang mga sacerdote nagbaton sang dugo kag ginwisik ini sa ibabaw sang halaran; kag gin-ihaw nila ang mga carnero kag ginwisik ang dugo sa ibabaw sang halaran; kag gin-ihaw nila ang mga cordero kag ginwisik ang dugo sa ibabaw sang halaran. 23Niyan ang mga kanding nga lalaki sa halad-tungud-sa-sala ginpapalapit nila sa atubangan sang hari kag sang katilingban, kag ginpandung nila ang ila mga kamut sa ila, 24kag gin-ihaw sila sang mga sacerdote kag ang ila dugo ginhimo nila nga halad-tungud-sa-sala sa ibabaw sang halaran, sa paghimo sing katumbasan tungud sa bug-os nga Israel. Kay ang hari nagsogo nga ang halad-nga-sinonog kag ang halad-tungud-sa-sala himoon tungud sa bug-os nga Israel.
25Kag ginbutang niya ang mga Levinhon sa balay sang Ginoo nga may mga apiping, may mga salterio, kag may mga arpa, sono sa sogo ni David kag ni Gad nga manugpanan-aw sang hari kag ni Natan nga manalagna; kay ang sogo gikan sa Ginoo paagi sa iya mga manalagna. 26Ang mga Levinhon nagtindug nga may mga tulunggon ni David, kag ang mga sacerdote nga may mga budyong. 27Niyan si Ezequias nagsogo sa pagdolot sang halad-nga-sinonog sa ibabaw sang halaran. Kag sang nagsugud ang halad-nga-sinonog, ang ambahanon sa Ginoo nagsugud man, kag ang mga budyong, upud sang mga tulunggon ni David nga hari sang Israel. 28Ang bug-os nga katilingban nagsimba, kag ang mga manug-amba nag-amba, kag ang mga manugbudyong nagpatonog; tanan ini nagpadayon tubtub nga ang halad-nga-sinonog natapus. 29Sang nakatapus sila sa paghalad, ang hari kag ang tanan nga nag-upud sa iya nagyaub sila kag nagsimba. 30Kag si Ezequias nga hari kag ang mga principe nagsogo sang mga Levinhon sa pag-amba sing mga pagdayaw sa Ginoo sa mga polong ni David kag ni Asaf nga manugpanan-aw. Kag nag-amba sila sing mga pagdayaw nga may kalipay, kag nagdungok sila sang ila mga olo kag nagsimba.
31Niyan si Ezequias nagsiling, “Karon nahalad na ninyo ang inyo kaugalingon sa Ginoo; palapit kamo, magdala sing mga halad kag mga halad-sa-pagpasalamat sa balay sang Ginoo.” Kag ang katilingban nagdala sa sulud sing mga halad kag mga halad-sa-pagpasalamat; kag ang kapid-an nga may bunayag nga tagiposoon naghalad sing mga halad-nga-sinonog. 32Ang kadamuon sang mga halad-nga-sinonog nga gindala sang katilingban kapitoan ka tinday nga baka, isa ka gatus ka carnero, kag duha ka gatus ka cordero; ini tanan sila tungud sa halad-nga-sinonog sa Ginoo. 33Kag ang nahalad nga mga butang anum ka gatus ka baka kag tatlo ka libo ka carnero. 34Apang ang mga sacerdote diotay lamang nga indi sila tuman sa pagpanit sang tanan nga halad-nga-sinonog, busa ang ila mga utud nga mga Levinhon nagbulig sa ila tubtub nga natapus ang hilikuton, kag tubtub ang mga sacerdote nakapakabalaan sang ila kaugalingon—kay ang mga Levinhon labi pa katarung sa tagiposoon sa pagpakabalaan sang ila kaugalingon sang sa mga sacerdote. 35Ang mga halad-nga-sinonog man bugana pati ang sapay sang mga halad-sa-paghidait, kag pati sang mga halad-nga-ilimnon sa tagsa ka halad-nga-sinonog. Gani ang pag-alagdan sang balay sang Ginoo napahamtang sing nagakaigo. 36Kag si Ezequias nagkasadya kag ang bug-os nga katawohan bangud sang naaman sang Dios nga sa katawohan; kay ang butang nahimo sa padali.
Currently Selected:
2 MGA CRONICA 29: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society