1 SAMUEL 4
4
Ang mga Filistinhon Nagaagaw sang Kaban
1Kag ang polong ni Samuel nag-abut sa bug-os nga Israel. Karon naggowa ang Israel sa pagpakig-away sa mga Filistinhon; nagpahamtang sila sing dologan sa luyo sang Eben-ezer, kag ang mga Filistinhon nagpahamtang sing dologan sa Afec. 2Ang mga Filistinhon nagpahamtang sing agisud batok sa Israel, kag sang nag-inaway sila, ginsamad ang Israel sa atubangan sang mga Filistinhon, kag ginpatay nila sa hangaway sa latagon ang mga apat ka libo ka lalaki. 3Kag sang nag-abut ang katawohan sa dologan, ang mga tigulang sang Israel nagsiling, “Ngaa bala ginsamad kita karon sang Ginoo sa atubangan sang mga Filistinhon? Dalhon naton gikan sa Silo ang kaban sang katipan sang Ginoo, agud nga magkari ini sa tunga naton kag magluwas sa aton sa kamut sang aton mga kaaway.” 4Gani ang katawohan nagpadala sa Silo, kag gindala nila gikan didto ang kaban sang katipan sang Ginoo sang mga kasoldadosan, nga nagalingkod sa ibabaw sang mga querubin;#Ex. 25:22. kag ang duha ka anak nga lalaki ni Eli, si Ofni kag Finees, yadto didto upud sa kaban sang katipan sang Dios.
5Sang nag-abut ang kaban sang katipan sang Ginoo sa dologan, ang bug-os nga Israel nagsinggit sa daku nga sininggit, sa bagay nga ang duta naglanog liwat. 6Kag sang nabatian sang mga Filistinhon ang gahud sang sininggit, nagsiling sila, “Ano bala ang kahologan sang kagahud sa dologan sang mga Hebreo?” Kag sang nahangpan nila nga ang kaban sang Ginoo nag-abut sa dologan, 7nahadluk ang mga Filistinhon; kay nagsiling sila, “Nag-abut ang mga dios sa dologan.” Kag nagsiling sila, “Kailo kita! Kay wala pa gid sing subong nga butang kutub sadto. 8Kailo kita! Sin-o bala ang magaluwas sa aton sa kamut sini nga mga dios nga gamhanan? Ini sila amo ang mga dios nga nagsakit sa mga Egiptohanon sa tanan nga bagay sang mga kalalat-an sa kamingawan. 9Magpakabakud kamo, kag magpakalalaki, O mga Filistinhon, agud nga indi kamo mangin-ulipon sa mga Hebreo subong nga sila nangin-ulipon sa inyo; magpakalalaki kamo kag mag-away.”
10Gani ang mga Filistinhon nag-away, kag ang Israel ginsamad, kag nagpalagyo ang tagsa ka tawo sa iya layanglayang; kag may daku gid nga kamatay, kay napukan sa Israel ang katloan ka libo ka lalaki nga nagalakat. 11Kag ang kaban sang Dios naagaw; kag ang duha ka anak nga lalaki ni Eli, si Ofni kag si Finees, napatay.
12May nagdalagan nga lalaki sang Benjamin gikan sa hangaway, kag nag-abut sa amo nga adlaw sa Silo, nga nagisi ang iya mga panapton kag may duta sa iya olo. 13Sang mag-abut sia, si Eli nagalingkod sa iya lingkoran nga nagabantay sa higad sang dalan, kay ang iya tagiposoon nagkurug tungud sang kaban sang Dios. Kag sang nag-abut sa banwa ang lalaki kag nagsugid sini, ang bug-os nga banwa naghaya. 14Sang nakabati si Eli sang kagahud sang haya, nagsiling sia, “Ano bala ang kahologan sang kagahud sini nga kagubut?” Niyan ang lalaki nagdalidali kag nag-abut kag nagsugid kay Eli. 15Karon si Eli kasiaman kag walo ka tuig kag ang iya mga mata nag-unay, sa bagay nga indi sia makakita. 16Kag nagsiling ang lalaki kay Eli, “Ako ang naghalin sa hangaway; nagpalagyo ako karon nga adlaw gikan sa hangaway.” Kag nagsiling sia, “Ano bala ang nahanabu, anak ko?” 17Ang nagdala sang mga balita nagsabat kag nagsiling, “Ang Israel nagpalagyo sa atubangan sang mga Filistinhon, kag may daku man nga kamatay sa katawohan; ang imo duha ka anak nga lalaki man, si Ofni kag si Finees, napatay, kag ang kaban sang Dios naagaw.” 18Sang pagmitlang niya sang kaban sang Dios, si Eli naholog nga tingkaya sa iya lingkoran sa kilid sang gawang; kag nalunggo ang liog kag napatay sia, kay tigulang na sia nga lalaki, kag mabug-at. Nakahukom sia sa Israel sing kap-atan ka tuig.
19Karon ang iya umagad nga babayi, asawa ni Finees, nagabusung, nga manug-anak. Kag sang nakabati sia sang mga balita nga ang kaban sang Dios naagaw, kag nga ang iya ugangan nga lalaki kag ang iya bana napatay, nagbarikutut sia kag nag-anak; kay ginsakitan sia. 20Kag sang tagumatayon sia ang mga babayi nga nagtindug sa luyo niya nagsiling sa iya, “Dili ka mahadluk, kay nag-anak ka sing lalaki.” Apang wala sia magsabat kag wala magsapak sini. 21Kag ginhingalanan niya ang bata si Ikabod,#4:21 Kon sayoron Wala sing himaya. nga nagasiling, “Ang himaya nagtaliwan sa Israel!” bangud nga ang kaban sang Dios gin-agaw kag bangud sang iya ugangan nga lalaki kag sang iya bana. 22Kag nagsiling sia, “Nagtaliwan ang himaya gikan sa Israel, kay ang kaban sang Dios naagaw.”
Currently Selected:
1 SAMUEL 4: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
