1 SAMUEL 5
5
Ang Kaban sa Duta sang mga Filistinhon
1Sang naagaw sang mga Filistinhon ang kaban sang Dios, gindala nila ini kutub sa Eben-ezer tubtub sa Asdod; 2niyan ginkuha sang mga Filistinhon ang kaban sang Dios kag ginsulud sa balay ni Dagon kag ginpahamtang ini sa luyo ni Dagon. 3Kag sang nagbangon sing aga pa sa madason nga adlaw ang mga tawo sa Asdod, yari karon, si Dagon napukan nga hapa sa duta sa atubangan sang kaban sang Ginoo. Gani ginkuha nila si Dagon kag ginpahamtang sia liwat sa iya duug. 4Apang sang pagbangon nila sing aga pa sang masonod nga adlaw, yari karon, si Dagon napukan nga hapa sa duta sa atubangan sang kaban sang Ginoo, kag ang olo ni Dagon kag ang duha ka palad sang iya mga kamut nautud nga yara sa atangan; utud lamang ni Dagon ang nabilin sa iya. 5Busa ang mga sacerdote ni Dagon kag ang bisan sin-o nga nagasulud sa balay ni Dagon wala nagatapak sa atangan ni Dagon sa Asdod tubtub sini nga adlaw.
6Mabug-at ang kamut sang Ginoo sa mga taga-Asdod, kag ginlaglag niya sila kag ginsakit sila sing mga almoranas, bisan ang Asdod kag ang iya mga ginsakpan. 7Kag sang nakita ini sang mga tawo sang Asdod nga amo ini, nagsiling sila, “Indi magpabilin sa aton ang kaban sang Dios sang Israel; kay ang iya kamut masakit sa aton kag sa aton dios nga si Dagon.” 8Gani nagpadala sila kag nagpatipon sang tanan nga ginoo sang mga Filistinhon sa ila, kag nagsiling, “Ano bala ang himoon ta sang kaban sang Dios sang Israel?” Nagsabat sila, “Ipalibut ang kaban sang Dios sang Israel pakadto sa Gat.” Gani gindala nila didto ang kaban sang Dios sang Israel. 9Apang sang napalibut nila ini, ang kamut sang Ginoo nanginbatok sa banwa, nga may daku gid nga pagkalisang, kag ginsakit niya ang mga tawo sa banwa, tingub ang magamay kag dalagku, sa bagay nga ang mga almoranas nagbuka sa ila. 10Gani ginpadala nila ang kaban sang Dios sa Ecron. Apang sang nagsulud ang kaban sang Dios sa Ecron, ang mga Ecronhon nagsinggit, “Gindala nila sa aton ang kaban sang Dios sang Israel sa pagpatay sa aton kag sa aton katawohan.” 11Busa nagpadala sila kag nagpatipon sing tingub sang tanan nga ginoo sang mga Filistinhon, kag nagsiling sila, “Ipadala ninyo ang kaban sang Dios sang Israel, kag ipabalik sa iya kaugalingon nga duug, agud nga indi niya pagpatyon kita kag ang aton katawohan.” Kay may kalisang nga makamamatay sa bug-os nga banwa. Ang kamut sang Dios mabug-at gid didto; 12ang mga tawo nga wala mapatay ginsakit sa mga almoranas, kag ang pagtuaw sang banwa naglambut sa langit.
Currently Selected:
1 SAMUEL 5: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
