1 SAMUEL 3
3
Ang Ginoo Nagatawag kay Samuel
1Karon ang bata nga si Samuel nag-alagad sa Ginoo sa atubangan ni Eli. Kag ang polong sang Ginoo sa sadto nga mga adlaw bilidhon; wala sing masunsun nga palanan-awon.
2Sa sadto nga tion, sang si Eli nakahigda na sa iya duug, karon ang iya mga mata nagsugud sa pagdulum, sa bagay nga indi sia makakita; 3ang suga sang Dios wala pa mapalong, kag si Samuel nakahigda na sa pagtolog sa templo sang Ginoo, diin ang kaban sang Dios. 4Niyan ang Ginoo nagtawag, “Samuel! Samuel!” kag sia nagsiling, “Yari ako!” 5Kag nagdalagan sia kay Eli, kag nagsiling, “Yari ako, kay gintawag mo ako.” Apang si Eli nagsiling, “Wala ako magtawag; higda liwat.” Gani naglakat sia kag naghigda. 6Kag ang Ginoo nagtawag pa liwat, “Samuel!” Kag si Samuel nagbangon kag nagkadto kay Eli, kag nagsiling, “Yari ako, kay gintawag mo ako.” Apang nagsabat sia, “Wala ako magtawag, anak ko; higda liwat.” 7Karon si Samuel wala pa makakilala sa Ginoo, kag ang polong sang Ginoo wala pa mapahayag sa iya. 8Kag ang Ginoo nagtawag liwat kay Samuel sa ikatlo. Kag nagbangon sia kag nagkadto kay Eli, kag nagsiling, “Yari ako, kay gintawag mo ako.” Niyan nahantupan ni Eli nga ang Ginoo nagtawag sang bata. 9Busa si Eli nagsiling kay Samuel, “Lakat ka, maghigda ka; kag kon magtawag sia, ikaw magsiling, ‘Hambal ka, Ginoo, kay ang imo alagad nagapamati.’” Gani si Samuel naglakat kag naghigda sa iya duug.
10Kag ang Ginoo nag-abut kag nagtindug, nga nagatawag subong sang sa iban nga mga tion, “Samuel! Samuel!” Kag si Samuel nagsiling, “Hambal ka, kay ang imo alagad nagapamati.” 11Niyan ang Ginoo nagsiling kay Samuel, “Yari karon, himoon ko ang isa ka butang sa Israel, nga sa sini ang duha ka dulunggan sang tagsatagsa nga makabati sini tingilan. 12Sa sina nga adlaw himoon ko batok kay Eli ang tanan nga akon napamolong nahanungud sa iya panimalay, kutub sa ginsuguran tubtub gid sa katapusan. 13Kay nasugiran ko sia nga hukman ko ang iya panimalay sing dayon, tungud sang kalautan nga iya nahibaloan, bangud nga ang iya mga anak nga lalaki nagdala sing pagpakamalaut sa ila kaugalingon, kag wala niya sila pagpunggi. 14Busa nagsumpa ako sa panimalay ni Eli nga ang kalautan sang panimalay ni Eli indi matumbasan bisan sing halad ukon sing dolot sa gihapon.”
15Si Samuel naghigda tubtub sa aga; niyan nagbukas sia sang mga ganhaan sang balay sang Ginoo. Kag si Samuel nahadluk magpahayag sang palanan-awon kay Eli. 16Apang gintawag ni Eli si Samuel kag nagsiling, “Samuel, anak ko.” Kag nagsiling sia, “Yari ako.” 17Kag si Eli nagsiling, “Ano bala ang butang nga napamolong sang Ginoo sa imo? Indi pag-ilikum ini sa akon. Ang Dios magahimo sang amo sa imo kag labi pa man, kon ilikum mo sa akon ang bisan ano nga butang sang tanan nga butang nga ginpamolong niya sa imo.” 18Gani ginsugid ni Samuel sa iya ang tanan gid kag wala gid sing ginlikum sa iya. Kag sia nagsiling, “Ang Ginoo ini; himoon niya ang maayo sa iya.”
19Kag si Samuel nagtubo, kag ang Ginoo kaupud niya kag wala mag-usik sa duta sang bisan ano sang iya mga polong. 20Kag ang bug-os nga Israel kutub sa Dan tubtub gid sa Beer-seba nakahibalo nga si Samuel napat-ud nga manalagna sang Ginoo. 21Kag ang Ginoo nagpahayag liwat sa Silo, kay ang Ginoo nagpakita sang iya kaugalingon kay Samuel sa Silo paagi sa polong sang Ginoo.
Currently Selected:
1 SAMUEL 3: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
