1 SAMUEL 18

Ang Katipan ni Jonatan kay David

1Sang nakatapus sia sa pagpakighambal kay Saul, ang kalag ni Jonatan natingub sa kalag ni David, kag ginhigugma sia ni Jonatan subong sang iya kaugalingon nga kalag. 2Kag ginkuha sia ni Saul sadtong adlaw, kag indi buut nga magpauli pa sia sa balay sang iya amay. 3Niyan naghimo sing katipan si Jonatan kag si David, bangud nga ginhigugma niya sia subong sang iya kaugalingon nga kalag. 4Kag si Jonatan nag-uba sia sang kunup nga yara sa iya, kag ginhatag ini kay David, kag ang iya panapton, kag bisan ang iya espada kag ang iya pana kag ang iya wagkus. 5Kag si David naggowa sa bisan diin nga ginpadala sia ni Saul kag naggawi sia sing maalamon; sa bagay nga ginpadumala sia ni Saul sa mga tawo nga hangaway. Kag maayo ini sa itololok sang tanan nga tawo kag sa itololok man sang mga alagad ni Saul.

Si Saul Nahisa kay David

6Sang pagpauli nila, sang nagbalik si David gikan sa pagpatay sang mga Filistinhon, naggowa ang mga babayi gikan sa tanan nga banwa sang Israel, nga nagaamba kag nagasaut, sa pagsugata kay Haring Saul, nga may mga panderita, nga may kasadya, kag may mga tolonggon. 7Kag ang mga babayi nag-ambahanay sa naglanton sila kag nagsiling,

“Si Saul nagpatay sang iya linibo,

Kag si David sang iya linaksa.”#1 Sam. 21:11; 29:5.

8Kag si Saul nasingkal gid, kag ining pololongon nagpaakig sa iya; nagsiling sia, “Sa kay David ginpahanungud nila ang linaksa, kag sa akon ginpahanungud nila ang linibo; kag ano pa bala ang maangkon niya kondi ang ginharian?” 9Kag kutub sadtong adlaw kag padayon si Saul nagpanilag kay David.

10Kag sa madason nga adlaw ang espiritu nga malaut gikan sa Dios nag-abut sing gamhanan kay Saul, kag nag-aliwasa sia sa tunga sang balay, samtang si David nagkutingkuting sang arpa, subong sang ginhimo niya adlawadlaw. Yara sa kamut ni Saul ang iya bangkaw; 11kag ginhabyog ni Saul ang bangkaw, kay nagsiling sia, “Ilansang ko si David sa dingding.” Apang sa makaduha nakalikday sa iya si David.

12Si Saul nahadluk kay David, bangud nga ang Ginoo kaupud ni David apang nagtaliwan kay Saul. 13Busa ginpahilayo sia ni Saul sa iya, kag ginhimo sia nga iya pangolo sang isa ka libo; kag naggowa si David kag nagsulud sa atubangan sang katawohan. 14Kag si David naggawi sing maalamon sa tanan niyang dalanon; kay ang Ginoo nag-upud sa iya. 15Kag sang nakita ni Saul nga naggawi sia sing maalamon, nahangawa sia sa iya. 16Apang ang bug-os nga Israel kag Juda naghigugma kay David; kay sia naggowa kag nagsulud sa atubangan nila.

17Niyan si Saul nagsiling kay David, “Yari ang akon anak nga babayi nga magulang nga si Merab; ipaasawa ko sia sa imo; lamang mag-isganan ka tungud sa akon kag mag-away sang mga inaway sang Ginoo.” Kay si Saul nagsiling, “Indi magtupa sa iya ang akon kamut, kondi ang kamut sang mga Filistinhon magtupa sa iya.” 18Kag si David nagsiling kay Saul, “Sin-o bala ako, kag ano bala ang akon kabuhi, ukon ang panimalay sang akon amay sa Israel, nga mangin-umagad ako sa hari?” 19Apang sa tion sang si Merab, babayi nga anak ni Saul, ipaasawa na kuntani kay David, ginpaasawa sia kay Adriel nga Meholatnon.

20Karon si Micol, babayi nga anak ni Saul, nahagugma kay David; kag ginsugiran nila si Saul, kag ang butang nakapahamuut sa iya. 21Si Saul nagsiling, “Ihatag ko sia sa iya, agud nga sia manginsiod sa iya, kag ang kamut sang mga Filistinhon manginbatok sa iya.” Busa si Saul nagsiling sing makaduha kay David, “Mangin-umagad ka nakon sining adlaw.” 22Kag si Saul nagsogo sa iya mga alagad, “Hambali ninyo sa tago si David kag magsiling, ‘Yari karon, ang hari nahamuut sa imo, kag ang tanan niyang alagad naluyag sa imo; karon niyan magmangin-umagad ka sang hari.’” 23Kag ang mga alagad ni Saul nagpamolong sadtong mga polong sa mga idulungug ni David. Kag si David nagsiling, “Diotay bala nga butang sa inyo ang magmangin-umagad sang hari, sa ginatan-aw nga ako tawong imol kag ginapakakubus?” 24Kag ang mga alagad ni Saul nagsugid sa iya, “Sa sining bagay nagpamolong si David.” 25Niyan si Saul nagsiling, “Amo ini ang isiling ninyo kay David, ‘Ang hari wala maluyag sang bisan anong dote kondi sang isa ka gatus ka napunta nga panit sang mga Filistinhon, nga timaluson sa mga kaaway sang hari.’” Karon si Saul naghunahuna sa pagpukan kay David paagi sa kamut sang mga Filistinhon. 26Kag sang nasugid ining mga polong kay David sang iya mga alagad, nagpahamuut sing maayo kay David nga mangin-umagad sang hari. Ang mga adlaw wala pa matapus, 27nagtindug si David kag naglakat, sia kag ang iya mga tawo, kag nagpatay sing duha ka gatus ka lalaki sa mga Filistinhon; kag gindala ni David ang mga napunta nga panit nila, kag ginhatag nila sila sa igo nga kadamuon sa hari, agud nga sia mangin-umagad sang hari. Kag ginpaasawa ni Saul sa iya si Micol nga iya anak nga babayi. 28Apang nakita ni Saul kag nakilala nga ang Ginoo nag-upud kay David, kag si Micol, babaying anak ni Saul, nahagugma sa iya, 29si Saul nagkahadluk pa gid kay David. Gani si Saul nanginkaaway ni David sing dalayon.

30Niyan naggowa ang mga principe sang mga Filistinhon sa pagpakig-away, kag sa masunsun nga naggowa sila si David naggawi sing maalamon pa sa tanan nga alagad ni Saul; sa bagay nga ang iya ngalan ginpakabilidhon.

Currently Selected:

1 SAMUEL 18: ABHIL82

Highlight

Copy