1 SAMUEL 17

Si David Nagapatay kay Goliat

1Karon ang mga Filistinhon nagtipon sing tingub sang ila mga hangaway sa inaway; kag nagtipon sila sing tingub sa Soco, nga iya sang Juda, kag nagpahamtang sing dologan sa ulut sang Soco kag Azeca, sa Efes-dammim. 2Kag si Saul kag ang mga lalaki sang Israel nagtipon sing tingub, kag nagpahamtang sing dologan sa nalupyakan sang Ela, kag nagpahamtang sila sing paagisud sa pag-away batok sa mga Filistinhon. 3Kag ang mga Filistinhon nagtindug sa bukid sa pihak, kag ang Israel nagtindug sa bukid sa isa ka pihak, kag may nalupyakan sa ulut nila. 4Kag may naggowa nga isa ka bantog gikan sa dologan sang mga Filistinhon nga ginhingalanan Goliat, sang Gat, nga ang iya kataason anum ka maniko kag isa ka dangaw. 5May tabon sia nga saway sa iya olo, kag napanaptan sia sang limbutong nga hinimbis, kag ang kabug-aton sang limbutong lima ka libo ka siclo nga saway. 6Kag may mga hapin nga saway sia sa iya mga paa, kag may sumbiling nga saway sa ulut sang iya mga abaga. 7Kag ang ulungan sang iya bangkaw kaangay sang likisan sang manughabol, kag ang punta sang iya bangkaw anum ka gatus ka siclo nga salsalon; kag ang iya manugdala sang taming nag-una sa iya. 8Nagtindug sia kag nagsinggit sa mga hangaway sang Israel, “Ngaa bala nga naggowa kamo sa pagpahamtang sing paagisud sa inaway? Indi ako bala isa ka Filistinhon, kag kamo mga alagad ni Saul? Pili kamo nga sa inyo sing isa ka lalaki, kag padulhoga sia sa akon. 9Kon makasarang sia sa pagpakig-away sa akon kag makapatay sa akon, niyan kami mangin-inyo mga alagad; apang kon ako magdaug sa iya kag magpatay sa iya, niyan kamo mangin-amon mga alagad kag mag-alagad sa amon.” 10Kag nagsiling ang Filistinhon, “Ginahangkat ko ang mga hangaway sang Israel sining adlaw; hatagi ninyo ako sing isa ka lalaki, agud nga mag-away kami nga duha.” 11Sang pagkabati ni Saul kag sang bug-os nga Israel sadtong mga polong sang Filistinhon, ginkulbaan sila kag nagkahadluk sing daku.

12Karon si David anak sadtong Efratanhon sang Bet-lehem-juda, nga ginhingalanan Jesse, nga may walo ka anak nga lalaki. Si Jesse sa mga adlaw ni Saul tigulang na, sobol sa panuigon sa tunga sang mga tawo. 13Ang tatlo ka magulang nga anak ni Jesse nagkadto sa pagsonod kay Saul sa inaway; kag ang mga ngalan sang iya tatlo ka anak nga nagkadto sa inaway amo si Eliab nga panganay, ang madason sa iya si Abinadab, kag ang ikatlo si Sama. 14Si David amo ang kamanghuran; ang tatlo ka magulang nagsonod kay Saul, 15apang si David nagpakadto pakari gikan kay Saul sa pagpahalab sang mga carnero sang iya amay sa Bet-lehem. 16Nagpalapit ang Filistinhon sa kaagahon kag sa kahaponon, kag nag-atubang sia sing kap-atan ka adlaw.

17Kag si Jesse nagsiling kay David nga iya anak, “Kuha ka karon nga sa imo mga utud sing isa ka efa sa sining uyas nga sinanlag, kag sining napulo ka bilog nga kalan-onon, kag dalha sila sing madali sa dologan sa imo mga utud; 18dalha man ining napulo ka queso sa pangolo sang ila linibo. Tan-awa kon maanoano ang imo mga utud, kag magkuha ka sing mga handumanan sa ila.”

19Karon si Saul, kag sila, kag ang tanan nga lalaki sang Israel, yadto sa nalupyakan sang Ela, nga nagapakig-away sa mga Filistinhon. 20Kag si David nagbangon sing aga pa, kag nagbilin sang mga carnero sa isa ka manugbantay, kag nagkuha sing balon kag naglakat, sono sa nasogo sa iya ni Jesse; kag nag-abut sia sa duug sang mga karo sang nagagowa ang kasoldadosan sa pag-away nga nagasinggit tungud sa inaway. 21Kag ang Israel kag ang mga Filistinhon nagpahamtang sing paagisud sa inaway, hangaway batok sa hangaway. 22Kag ginbilin ni David ang iya dinala sa kamut sang manugbantay sang mga dinala, kag nagdalagan sa mga hangaway, kag nag-abut kag nag-abiabi sa iya mga utud. 23Sang nagpakighambal sia sa ila, yari karon, nagtaklad ang bantog, ang Filistinhon sang Gat, si Goliat ang ngalan, gikan sa mga kubay sang mga Filistinhon, kag nagpamolong sono sa amo nga mga polong. Kag nabatian sila ni David.

24Ang tanan nga lalaki sang Israel, sang nakita nila si Goliat, nagpalagyo gikan sa iya, kag nahadluk sing tama. 25Kag ang mga lalaki sang Israel nagsiling, “Nakakita kamo bala sining lalaki nga nagtaklad? Sa pagkamatuud nagtaklad sia sa paghangkat sang Israel; kag ang lalaki nga nagapatay sa iya, ang hari magapamanggad sa iya sing daku nga manggad, kag magahatag sa iya sang iya anak nga babayi, kag magahilway sang panimalay sang iya amay sa Israel.” 26Kag si David nagpamolong sa mga lalaki nga nagtindug sa luyo niya, “Ano bala ang himoon sa lalaki nga nagapatay sining Filistinhon, kag nagakuha sang kahuluy-an sa Israel? Kay si sin-o bala ining Filistinhon nga dicircuncidado, nga maghangkat sia sang mga hangaway sang Dios nga buhi?” 27Kag ang katawohan nagsabat sa iya sono sa sining bagay, “Amo ini ang himoon sa lalaki nga nagapatay sa iya.”

28Karon nabatian ni Eliab nga iya utud nga kamagulangan sang nagpamolong sia sa mga lalaki; kag nagdabdab ang kaakig ni Eliab batok kay David, kag nagsiling sia, “Ngaa bala nagdulhog ka diri? Kag sa kay sin-o mo bala ginbilin yadtong pila ka bilog nga carnero sa kamingawan? Nakilala ko ang imo bugal, kag ang pagkadalas sang imo tagiposoon; kay nagdulhog ka sa pagtan-aw sang inaway.” 29Kag si David nagsiling, “Ano bala ang nahimo ko karon? Wala bala sing kabangdanan?” 30Kag nagliso sia gikan sa iya nayon sa isa, kag nagpamolong sa among bagay; kag ang mga tawo nagsabat sa iya liwat sono sa unang bagay.

31Sang nabatian ang mga polong nga ginpamolong ni David, ginsulit nila ini sila sa atubangan ni Saul; kag ginpatawag sia niya. 32Kag si David nagsiling kay Saul, “Wala sing tawo nga magmatalaw ang tagiposoon bangud sa iya; ang imo alagad magakadto kag magapakig-away sa sining Filistinhon.” 33Kag si Saul nagsiling kay David, “Indi ka makasarang magsumpung sining Filistinhon sa pagpakig-away sa iya; kay ikaw pamatan-on pa kaayo, kag sia lalaki sang inaway kutub sa iya pagkapamatan-on.” 34Apang si David nagsiling kay Saul, “Ang imo alagad nagabantay sang mga carnero sang iya amay; kag kon may mag-abut nga leon, ukon oso, kag magtaban sing cordero gikan sa panong, 35naggowa ako sa olihi niya kag nagsakit sa iya kag nagluwas sini gikan sa iya baba; kag sang nagtindug sia sa pagbato sa akon, gindakup ko sia sa iya bungut, kag ginsakit sia kag ginpatay sia. 36Ang imo alagad nagpatay sang leon kag sang oso; kag ining Filistinhon nga dicircuncidado manginsubong sang isa sa ila, sa ginatan-aw nga ginhangkat niya ang mga hangaway sang Dios nga buhi.” 37Kag si David nagsiling, “Ang Ginoo nga nagluwas sa akon gikan sa kamomoo sang leon kag sa kamomoo sang oso, sia magaluwas sa akon gikan sa kamut sining Filistinhon.” Kag si Saul nagsiling kay David, “Lakat ka, kag ang Ginoo mag-upud sa imo!” 38Niyan ginpapanaptan ni Saul si David sang iya bayo; ginbutangan niya sing pandong nga saway ang iya olo, kag ginsukluban sia sing limbutong nga hinimbis. 39Kag gintaklus ni David ang espada ni Saul sa iya bayo, kag nagtinguha sia sa paglakat, kay wala niya maanari ini. Niyan si David nagsiling kay Saul, “Indi ako makalakat sa sini; kay wala ko maanari sila.” Kag ginhukas ni David sila sa iya. 40Niyan gindala niya ang iya sungkud sa iya kamut, kag nagpili sia sing lima ka bato nga matibonog gikan sa sapa, kag ginsulud sila sa iya balonan, sa iya puyo; ang iya labyug yara sa iya kamut, kag nagpalapit sia sa Filistinhon.

41Kag ang Filistinhon nagpadolong kag nagpalapit kay David, kag ang lalaki nga nagdala sang taming nag-una sa iya. 42Kag sang nagtolok ang Filistinhon, kag nakita si David, ginhikayan niya sia; kay sia pamatan-on pa kaayo, mapulapula, kag labut pa maayoayo sing nawung. 43Kag ang Filistinhon nagsiling kay David, “Ido bala ako, nga nagakari ka sa akon nga may mga bakolo?” Kag ang Filistinhon nagpakamalaut kay David paagi sa iya mga dios. 44Kag ang Filistinhon nagsiling kay David, “Kari ka sa akon, kag ihatag ko ang imo unud sa kapispisan sang kalangitan, kag sa kasapatan sang latagon.” 45Niyan si David nagsiling sa Filistinhon, “Ikaw nagakari sa akon nga may espada kag may bangkaw kag may sumbiling; apang ako nagakara sa imo sa ngalan sang Ginoo sang mga kasoldadosan, ang Dios sang mga hangaway sang Israel, nga imo ginhangkat. 46Sining adlaw ang Ginoo magatugyan sa imo sa akon kamut, kag ako magalaglag sa imo, kag magapunggol sang imo olo; kag ihatag ko sining adlaw ang mga bangkay sang kasoldadosan sang mga Filistinhon sa kapispisan sang kalangitan kag sa talonon nga kasapatan sang duta; agud nga ang bug-os nga duta magkilala nga may Dios sa Israel, 47kag nga ining bug-os nga katilingban magkilala nga ang Ginoo wala nagaluwas sa espada kag sa bangkaw; kay ang inaway iya sang Ginoo, kag ihatag ka niya sa amon kamut.”

48Sang nagtindug ang Filistinhon kag nagkadto kag nagpalapit sa pagsugata kay David, si David nagdalidali kag nagdalagan nayon sa hangaway sa pagsugata sang Filistinhon. 49Kag si David nagkuut sang iya kamut sa iya puyo kag nagkuha didto sing bato, kag ginlabyug ini, kag gin-igo ang Filistinhon sa iya agtang; ang bato naglubung sa iya agtang, kag napukan sia nga hapa sa duta.

50Gani si David naglandas sang Filistinhon sa labyug kag sa bato, kag gin-igo ang Filistinhon, kag ginpatay sia; wala sing espada sa kamut ni David. 51Niyan si David nagdalagan kag nagtindug sa luyo sang Filistinhon, kag ginkuha ang iya espada kag gingabut ini sa iya tagub, kag ginpatay sia, kag ginpunggol sini ang iya olo. Sang nakita sang mga Filistinhon nga ang ila bantog patay na, nagpalagyo sila. 52Kag nagtindug ang mga lalaki sang Israel kag sang Juda kag nagsinggit kag naglagas sang mga Filistinhon tubtub nga makalambut sa Gat kag sa mga gawang sang Ecron, sa bagay nga ang mga Filistinhon nga pilason napukan sa dalanon pakadto sa Saaraim tubtub sa Gat kag sa Ecron. 53Kag ang mga Israelnon nagbalik gikan sa paglagas sang mga Filistinhon, kag gin-ati nila ang ila dologan. 54Kag ginkuha ni David ang olo sang Filistinhon kag gindala ini sa Jerusalem; apang ginbutang niya ang iya hinganib sa iya layanglayang.

55Sang nakita ni Saul si David nga naggowa batok sa Filistinhon, nagsiling sia kay Abner, ang pangolo sang kasoldadosan, “Abner, kay sin-o bala anak ining pamatan-on?” Kag si Abner nagsiling, “Sa nagakabuhi ang imo kalag, O hari, indi ako makasugid.” 56Kag ang hari nagsiling, “Pamangkot ka kon kay sin-o anak ang pamatan-on nga lalaki.” 57Kag sang pagbalik ni David gikan sa pagpatay sang Filistinhon, ginkuha sia ni Abner, kag gindala sia sa atubangan ni Saul nga yara sa iya kamut ang olo sang Filistinhon. 58Kag si Saul nagsiling sa iya, “Kay sin-o ka bala anak, ikaw nga pamatan-on?” Kag si David nagsabat, “Ako anak sang imo alagad nga si Jesse nga taga-Bet-lehem.”

Currently Selected:

1 SAMUEL 17: ABHIL82

Highlight

Copy