1 SAMUEL 19
19
Si Saul Nagatinguha sa Pagpatay kay David
1Kag si Saul nagpamolong kay Jonatan nga iya anak kag sa tanan niya nga alagad, nga patyon nila si David. Apang si Jonatan, anak ni Saul nahamuut sing labi kay David. 2Kag si Jonatan nagsugid kay David, “Si Saul nga akon amay nagahimulat sa pagpatay sa imo; busa karon mag-andam ka sa kaagahon, kag pabilin ka sa duug nga tago kag magpanago; 3kag ako magagowa kag magatindug sa luyo sang akon amay sa latagon sa diin yara ka, kag magahinun-anon ako nahanungud sa imo sa akon amay; kag kon makita ko ang bisan ano sugiran ko ikaw.” 4Kag si Jonatan nagpamolong kay Saul nga iya amay sing maayo nahanungud kay David, kag nagsiling sa iya, “Dili magpakasala ang hari batok sa iya alagad nga si David; bangud nga wala sia makasala batok sa imo, kag bangud nga ang iya mga binuhatan ayon sa imo maayo gid; 5kay sia nagbutang sang iya kabuhi sa iya kamut kag nagpatay sang mga Filistinhon, kag ang Ginoo naghimo sing daku nga kaluwasan tungud sa bug-os nga Israel. Ikaw nakakita sini, kag nagpangalipay; ngaa bala niyan magpakasala ka batok sa dugo nga wala sing sala sa pagpatay kay David sa wala sing kabangdanan?” 6Kag si Saul nagpamati sa tingug ni Jonatan; kag nagsumpa si Saul, “Sa nagakabuhi ang Ginoo, dili sia pagpatyon.” 7Kag gintawag ni Jonatan si David, kag ginpahayag sa iya ni Jonatan yadto tanan nga butang. Kag gindala ni Jonatan si David kay Saul, kag didto sia sa atubangan niya subong sadto anay.
8Kag may inaway liwat; kag naggowa si David kag nagpakig-away sa mga Filistinhon, kag nagpatay sa ila sa daku nga kamatay, kag nagpalagyo sila gikan sa atubangan niya. 9Niyan ang espiritu nga malaut gikan sa Ginoo nag-abut kay Saul, sang naglingkod sia sa sulud sang iya balay nga ang iya bangkaw sa iya kamut; kag si David nagakutingkuting sang iya arpa. 10Kag si Saul naghimulat sa paglansang gid sa dingding kay David sang iya bangkaw; apang sia naglikday sa atubangan ni Saul, kag ginhabyog niya nga nagdulut ang bangkaw sa dingding. Kag si David nagpalagyo, kag nakalikaw sadto nga gab-i.
11Si Saul nagpadala sing mga manugbalita sa balay ni David sa pagpanilag sa iya, kag sa pagpatay sa iya sa aga.#Sal. 59 Titulo. Apang si Micol, asawa ni David, nagsugid sa iya, “Kon indi mo pagluwason ang imo kabuhi sini nga gab-i, buwas patyon ka.” 12Gani gintonton ni Micol si David sa talambuan; kag naglakat sia kag nagpalagyo kag naglikaw. 13Si Micol nagkuha sang teraphim kag ginpahigda ini sa higdaan kag ginpaolon sa olonan nga bulbul sang mga kanding, kag gintabunan niya ini sang mga panapton. 14Kag sang si Saul nagpadala sing mga manugbalita sa pagdakup kay David, sia nagsiling, “Nagabalatian sia.” 15Niyan si Saul nagpadala sing mga manugbalita sa pagtan-aw kay David, nga nagasiling, “Dalha sia sa akon sa higdaan, agud nga mapatay ko sia.” 16Kag sang nagsulud ang mga manugbalita, yari karon, ang teraphim yara sa higdaan, nga nagaolon sa olonan nga bulbul sang mga kanding. 17Si Saul nagsiling kay Micol, “Ngaa bala nga ginlimbongan mo ako sing subong, kag ginpalakat ang akon kaaway, sa bagay nga sia nakapalagyo?” Kag si Micol nagsabat kay Saul, “Sia nagsiling sa akon, ‘Palakta ako; ngaa bala nga patyon ko ikaw?’”
18Karon si David nagpalagyo kag naglikaw, kag nag-abut kay Samuel sa Rama, kag nagsugid sa iya sang tanan nga nahimo ni Saul sa iya. Kag sia kag si Samuel nagkadto kag nagpuyo sa Nayot. 19Kag ginsugid ini kay Saul, “Yari karon, si David yara sa Nayot sa Rama.” 20Niyan si Saul nagpadala sing mga manugbalita sa pagdakup kay David; kag sang pagkakita nila sang kabon sang mga manalagna nga nagapanagna, kag kay Samuel nga nagatindug subong nga pangolo nila, ang Espiritu sang Dios nag-abut sa mga manugbalita ni Saul, kag sila man nagpanagna. 21Sang nasugid ini kay Saul, nagpadala sia sing iban nga mga manugbalita, kag sila man nagpanagna. Kag si Saul sa ikatlo nagpadala liwat sing mga manugbalita, kag sila man nagpanagna. 22Niyan sia man nagkadto sa Rama, kag nag-abut sa daku nga bobon nga didto sa Secu; kag namangkot sia, “Diin bala si Samuel kag si David?” Kag ang isa nagsiling, “Yari karon, yara sila sa Nayot sa Rama.” 23Kag nagkadto sia didto sa Nayot sa Rama; kag nag-abut man sa iya ang Espiritu sang Dios, kag nagpadayon sia kag nagpanagna, tubtub nga nag-abut sia sa Nayot sa Rama. 24Kag sia man nag-uba sang iya mga panapton, kag sia nagpanagna man sa atubangan ni Samuel, kag naghigda nga hubo sa bug-os sadto nga adlaw kag sa bug-os sadto nga gab-i. Busa nagasiling sila, “Si Saul man bala sa tunga sang mga manalagna?”#1 Sam. 10:11-12.
Currently Selected:
1 SAMUEL 19: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
