Mga Salmo 119
119
Ang Kasugoan sang Ginoo
1Malipayon ang mga wala sing kasawayan sa ila mga kabuhi,
nga nagakabuhi suno sa kasugoan sang Ginoo.
2Malipayon sila nga nagasunod sang iya mga sugo,
nga nagatuman sa iya sa bug-os nila nga tagipusoon.
3Wala sila nagasayop,
nagalakat sila sa mga dalanon sang Ginoo.
4O Ginoo, ginhatag mo sa amon ang imo mga kasugoan,
kag nagsugo ka sa amon sa pagtuman
sini sing matutom.
5Daku gid ang akon handom nga manginmatutom ako
sa pagtuman sang imo mga pagsulondan!
6Kon tumanon ko ang tanan mo nga mga sugo,
ti indi ako mahuy-an.
7Sa akon pagtuon sang imo matarong nga mga pagsulondan,
magadayaw ako sa imo sa putli nga tagipusoon.
8Magatuman ako sang imo mga kasugoan,
indi gid ako pagpatumbayai!
Pagtuman sa Kasugoan sang Ginoo
9Paano ang pagtipig sang isa ka pamatan-on sang iya kabuhi nga manginputli?
Paagi sa pagtuman sang imo mga sugo.
10Sa bug-os ko nga tagipusoon nagtinguha ako sa pag-alagad sa imo,
buligi ako nga indi magmalalison sa imo mga sugo!
11Ginatipigan ko ang imo kasugoan sa akon tagipusoon,
agod indi ako makasala batok sa imo.
12Ginadayaw ko ikaw, O Ginoo,
tudloi ako sang imo mga pagsulondan!
13Ihambal ko sing mabaskog ang tanan nga mga kasugoan nga ginhatag mo.
14Nagakalipay ako sa pagsunod sang imo mga sugo,
labi pa sang sa pag-angkon sang madamo nga mga manggad.
15Nagapamalandong ako sang imo mga sugo,
ginausisa ko ang imo mga pagtudlo.
16Nagakalipay ako sa imo mga kasugoan,
indi ko pagpatumbayaan ang imo mga sugo.
Kalipay sa Kasugoan sang Ginoo
17Magmaayo ka sa akon nga imo alagad,
agod nga magkabuhi ako kag magtuman sang imo mga pagtudlo.
18Buksi ang akon mga mata, agod nga makakita ako
sang makatilingala nga mga kamatuoran sa imo kasugoan.
19Umalagi lang ako sa sining kalibutan,
indi pagtagoa ang imo mga sugo sa akon.
20Ang akon dughan nagapin-ot sa daku nga handom,
sa paghibalo sa tanan nga tion sang imo mga pagsulondan.
21Ginasilutan mo ang bugalon,
ginapakamalaut mo ang mga nagalalis sang imo mga sugo.
22Hilwaya ako sa ila mga pagpakahuya kag pagtamay,
tungod kay gintuman ko ang imo mga kasugoan.
23Bisan ang mga pangulo nagasinapol kag nagaplano batok sa akon,
ako nga imo alagad magapamalandong sang imo mga pagsulondan.
24Ang imo mga pagtudlo nagahatag sa akon sing kalipay,
sila amo ang akon mga manuglaygay.
Pagtapat sa Pagtuman sang Kasugoan sang Ginoo
25Nagahimumogto ako nga nagahigda sa yab-ok,
buhia ako liwat, suno sa imo ginsaad!
26Gintuad ko ang tanan ko nga ginhimo, kag ginsabat mo ako,
tudloi ako sang imo mga pagsulondan!
27Pahangpa ako sang imo mga kasugoan,
kag ako magapamalandong sang imo makatilingala nga mga pagtudlo.#119:27 mga pagtudlo: ukon mga binuhatan.
28Daw malumos ako sa kalisod,
pabakura ako suno sa imo ginsaad.
29Buligi ako nga indi magtalang,
kag sa imo kaayo tudloi ako sang imo kasugoan.
30Nagtapat ako nga magmasinulondon,
ginatalupangod ko ang imo mga pagsulondan.
31Ginsunod ko ang imo mga pagtudlo, O Ginoo,
indi pag-itugot nga mahuy-an ako!
32Magatuman ako nga may kakunyag sang imo mga sugo,
tungod kay ikaw magadugang sang akon paghangop.
Pangamuyo agod Makahangop
33Tudloi ako, O Ginoo, sang kahulogan sang imo mga kasugoan,
kag tumanon ko ini sa tanan nga tion.
34Isaysay sa akon ang imo kasugoan, kag akon ini tumanon,
tipigan ko ini sa bug-os ko nga tagipusoon.
35Tuytoyi ako sa pagtuman sang imo mga sugo,
tungod kay sa sini may kalipayan ako.
36Hatagi ako sing handom sa pagtuman sang imo mga pagsulondan,
sa baylo sang handom nga magmanggaranon.
37Ilikaw ang akon igtalupangod sa wala sing pulos,
magmaayo ka sa akon suno sa imo ginsaad.
38Tumana ang imo saad sa akon nga imo alagad,
ang imo ginasaad sa mga nagatahod sa imo.
39Luwasa ako sa mga pasipala nga akon ginakahadlukan,
daw ano kaayo sang imo mga pagsulondan!
40Luyag ko magtuman sang imo mga sugo, tungod kay ikaw matarong,
hatagi ako sing bag-o nga kabuhi.
Pagsalig sa Kasugoan sang Ginoo
41Ipakita sa akon kon daw ano ang paghigugma mo sa akon, O Ginoo,
kag luwasa ako suno sa imo saad.
42Dayon makasabat ako sa mga nagapasipala sa akon,
tungod kay nagasalig ako sa imo pulong.
43Pahambala ako sang kamatuoran sa tanan nga tion,
tungod kay ang akon paglaom yara sa imo mga pagsulondan.
44Tumanon ko pirme ang imo kasugoan,
sa walay katubtoban!
45Magakabuhi ako sa bug-os nga kahilwayan,
tungod kay nagtinguha ako sa pagtuman sang imo mga pagtudlo.
46Ipahibalo ko man ang imo mga sugo sa mga hari,
kag indi ako magkahuya.
47Nagakalipay ako sa pagtuman sang imo mga kasugoan,
tungod kay ginahigugma ko ini.
48Ginatahod kag ginahigugma ko ang imo mga sugo,
magapamalandong ako sa imo mga pagtudlo.
Pagsalig sa Kasugoan sang Ginoo
49Dumdoma man ang imo saad sa akon nga imo alagad,
naghatag ini sa akon sing paglaom.
50Bisan sa akon pag-antos ginlipay ako
tungod kay ang imo saad naghatag sa akon sing kabuhi.
51Ang mga bugalon nagayaguta pirme sa akon,
pero wala ako magbiya sa imo kasugoan.
52Ginadumdom ko ang mga pagsulondan mo sang una
kag nagalipay ini sa akon, O Ginoo.
53Nagakaakig gid ako, kon makita ko ang malaut nga
nagalapas sang imo kasugoan.
54Sa akon pagkabuhi sing malip-ot diri sa kalibutan,
nagakumposo ako nahanungod sang imo mga sugo.
55Sa kagab-ihon ginapanumdom ko ikaw, O Ginoo,
kag ginatuman ko ang imo kasugoan.
56Amo ini ang akon kalipay:
ang pagtuman sang imo mga sugo.
Katutom sa Kasugoan sang Ginoo
57Ikaw gid lang, O Ginoo, ang akon ginahandom,
nagasaad ako sa pagtuman sang imo mga kasugoan.
58Ginapangabay ko ikaw sa bug-os ko nga tagipusoon nga
kaluoyan man ako, suno sa imo ginsaad!
59Gin-usisa ko ang akon pagginawi,
kag nagasaad ako sa pagsunod sang imo mga pagsulondan.
60Nagadalidali ako kag wala nagahinayhinay
sa pagtuman sang imo mga sugo.
61Ang mga malaut nagasambod sing hugot sang ila lubid
sa akon, pero wala ako nagakalipat sang imo kasugoan.
62Sa tungang gab-i nagamata ako
sa pagdayaw sa imo tungod sang imo matarong nga mga pagsulondan.
63Abyan ako sang tanan nga nagaalagad sa imo,
sang tanan nga nagatuman sang imo mga kasugoan.
64O Ginoo, ang duta puno sang imo mapinadayunon nga gugma,
tudloi ako sang imo mga sugo.
Ang Kapuslanan sang Kasugoan sang Ginoo
65O Ginoo, gintuman mo ang imo saad,
kag maayo ikaw sa akon nga imo alagad.
66Hatagi man ako sing kaalam kag ihibalo,
tungod kay nagasalig ako sa imo mga sugo.
67Sa wala mo pa ako pagsiluti naglalis ako sang imo mga sugo
pero karon ginatuman ko ang imo pulong.
68Daw ano kaayo sa imo kag sang imo ginahimo,
tudloi ako sang imo mga sugo!
69Ang bugalon nga mga tawo nagsugid sing binutig nahanungod sa akon,
pero gintuman ko ang imo mga pagsulondan sa bug-os ko nga tagipusoon.
70Ini nga mga tawo wala sing paghangop,
pero nagakalipay ako sa imo kasugoan.
71Ang akon silot maayo para sa akon,
tungod kay ini nagtudlo sa akon sa pagtuon sang imo mga sugo.
72Ang kasugoan nga imo ginhatag
sa akon labi pa sang sa tanan nga pilak sa kalibutan.
Matarong ang Kasugoan sang Ginoo
73Gintuga mo ako, kag gintipigan nga indi maano,
hatagi ako sing paghangop, agod nga makatuon ako sang imo mga kasugoan.
74Ang mga nagapasidungog sa imo magakasadya kon makita nila ako,
tungod kay nagasalig ako sa imo saad.
75O Ginoo, nakahibalo ako nga ang imo mga paghukom matarong,
kag ginsilutan mo ako tungod kay ikaw matutom.
76Lipaya ako sang imo mapinadayunon nga gugma,
suno sa imo ginsaad sa akon nga imo alagad.
77Kaluoyi ako, kag ako magakabuhi,
tungod kay nagakalipay ako sa imo kasugoan.
78Kabay nga ang mga bugalon mahuy-an tungod sang ila binutig nga pagsumbong batok sa akon,
ako akon magapamalandong sa imo mga pagsulondan.
79Kabay nga ang mga nagapasidungog sa imo
kag ang mga nakahibalo sang imo mga sugo magpalapit sa akon.
80Kabay nga tumanon ko sing himpit ang imo mga sugo,
kag malikaw ako sa kahuloy-anan sang pagkalutos.
Pangamuyo agod Luwason
81Ginalapyo na ako, O Ginoo, sa paghulat sang imo pagluwas sa akon,
nagasalig ako sa imo pulong.
82Ang akon mga mata ginakapoy na sa pagpaabot sang imo saad,
samtang nagapamangkot ako, “San-o mo bala ako buligan?”
83Wala na ako sing pulos kaangay sang indi na maggamit nga panit nga sulodlan
sang bino, pero wala ko pagkalimti ang imo mga sugo.
84Tubtob san-o pa bala ang akon paghulat?
San-o mo bala silutan ang mga nagahingabot sa akon?
85Ang bugalon nga mga tawo nga wala nagatuman sang imo kasugoan,
nagkutkot sing mga tugalbong sa pagdakop sa akon.
86Ang tanan mo nga mga sugo masaligan,
buligi man ako, kay ang mga tawo nagahingabot sa akon paagi sa mga kabutigan!
87Diutayan na lang nila ako mapatay,
pero wala ako magbiya sa imo mga pagtudlo.
88Tungod sang imo mapinadayunon nga gugma, magmaayo ka sa akon,
agod matuman ko ang imo mga kasugoan.
Pagtuo sa Kasugoan sang Ginoo
89Ang imo pulong, O Ginoo, magapadayon sa walay katubtoban,
kay napasad ini sing malig-on sa langit.
90Ang imo katutom nagapadayon sa tanan nga mga kaliwatan,
ginpahamtang mo ang duta sa iya lugar kag ini nagapadayon.
91Ang tanan nga mga butang nagapadayon tubtob karon tungod sang imo sugo,
tungod kay ini tanan imo mga alagad.
92Kon ang imo kasugoan indi amo ang ginahalinan sang akon kalipay,
kuntani napatay na ako tungod sang akon mga pag-antos.
93Indi ko gid pagpatumbayaan ang imo mga pagsulondan,
tungod kay paagi sini ginbuhi mo ako.
94Imo ako, gani luwasa ako!
Gintinguhaan ko ang pagtuman sang imo mga sugo.
95Ang malaut nga mga tawo nagahulat sa pagpatay sa akon,
pero magapamalandong ako sang imo mga kasugoan.
96Natukiban ko nga ang tanan may katapusan,
pero ang imo sugo wala sing dulonan.
Paghigugma sa Kasugoan sang Ginoo
97Daw ano ang paghigugma ko sang imo kasugoan!
Ginapamalandungan ko ini sa bug-os nga adlaw.
98Ang imo sugo yari sa akon sa tanan nga tion,
kag nagahimo ini sa akon nga mas maalam pa sang sa tanan ko nga mga kaaway.
99Makahangop ako sing labaw pa sang sa tanan ko nga mga manunodlo,
tungod kay ginapamalandungan ko ang imo mga pagtudlo.
100Labi pa ang akon kaalam sang sa tigulang nga mga tawo,
tungod kay ginatuman ko ang imo mga sugo.
101Ginlikawan ko ang tanan nga malaut nga mga pagginawi,
tungod kay luyag ako magtuman sang imo pulong.
102Wala ko ginpatumbayai ang imo mga pagtudlo,
tungod kay ikaw gid ang nagtudlo sa akon.
103Daw ano katam-is ang sabor sang imo mga pagsulondan,
mas matam-is pa ini sang sa dugos!
104Nagakuha ako sing kaalam gikan sa imo mga kasugoan,
gani ginadumtan ko ang tanan nga malain nga mga pagginawi.
Kapawa gikan sa Kasugoan sang Ginoo
105Ang imo pulong isa ka suga nga nagatuytoy sa akon mga tiil,
kag kapawa sa akon alagyan.
106Tumanon ko ang akon ginsumpa
sa paghimo sang imo matarong nga mga pagtudlo.
107O Ginoo, tama gid ang akon mga pag-antos,
buhia ako, suno sa imo ginsaad!
108Batuna ang akon pangamuyo sa pagpasalamat, O Ginoo,
kag tudloi ako sang imo mga sugo.
109Handa ako sa tanan nga tion sa pagtaya sang akon kabuhi sa katalagman,
wala ako#119:109 Handa…wala ako: ukon Ang akon kabuhi yara pirme sa katalagman, pero wala ako. malipat sang imo kasugoan.
110Ang malaut nga mga tawo nagbutang sing siod sa akon,
pero wala ako naglalis sang imo mga sugo.
111Ang imo mga sugo amo ang akon pagkabutang nga wala sing katubtoban,
ini amo ang kalipay sang akon tagipusoon.
112Nagtapat ako sa pagtuman sang imo mga pagsulondan,
tubtob sa adlaw sang akon kamatayon.
Kaluwasan sa Kasugoan sang Ginoo
113Ginadumtan ko ang mga indi mainunongon sa imo,
pero ginahigugma ko ang imo kasugoan.
114Ikaw ang akon mananabang kag mangangapin,
nagalaom ako sa imo saad.
115Palayo kamo sa akon, kamo nga mga makasasala!
Tumanon ko ang mga sugo sang akon Dios.
116Hatagi ako sing kusog suno sa imo ginsaad, kag magakabuhi ako,
indi man pag-itugot nga mapaslawan ako sa akon paglaom!
117Uyati ako, kag indi ako maano,
kag talupangdon ko sa gihapon ang imo mga sugo.
118Ginasikway mo ang tanan nga nagalalis sang imo mga kasugoan,
ang ila dayaon nga pahito wala sing pulos.
119Ang mga malaut ginakabig mo nga sagbot,
gani ginahigugma ko ang imo mga pagtudlo.
120Tungod sa imo, nahadlok ako,
napun-an ako sing kahadlok tungod sang imo mga paghukom.
Pagtuman sa Kasugoan sang Ginoo
121Ginhimo ko ang matarong kag maayo,
indi ako pagpatumbayai sa akon mga kaaway!
122Magsaad ka nga buligan mo ang imo alagad,
indi pag-itugot nga piguson ako sang mga bugalon!
123Ang akon mga mata ginakapoy na sa pagpaabot sang imo kaluwasan,
sang kahilwayan nga imo ginsaad.
124Tatapa ako suno sa imo mapinadayunon nga gugma,
kag tudloi ako sang imo mga sugo.
125Alagad mo ako, hatagi ako sing paghangop,
agod akon mahibaluan ang imo mga pagtulon-an.
126 Ginoo, tion na ini nga maghulag ikaw,
tungod kay ang mga tawo nagalalis sang imo kasugoan!
127Ginahigugma ko ang imo mga sugo sing labi pa sang sa bulawan,
labi pa sang sa pinakapuraw nga bulawan.
128Gani ginasunod ko ang tanan mo nga mga pagtudlo,
kag ginadumtan ko ang di-matarong nga mga pagginawi.
Handom sa Pagtuman sang Kasugoan sang Ginoo
129Ang imo mga pagtulon-an maayo gid,
ginatuman ko ini sa bug-os ko nga tagipusoon.
130Ang pagpaathag sang imo mga pagtulon-an nagahatag sing kapawa,
kag nagahatag sing kaalam sa mga wala sing tinun-an.
131Nagahawathawat ang akon ginhawa,
sa paghandom sang imo mga sugo.
132Balikda kag kaluoyi ako subong sang imo
ginahimo sa tanan nga mga nagahigugma sa imo.
133Indi pag-itugot nga mapukan ako suno sa imo ginsaad,
indi ako pag-ipadaog sa malaut nga mga tawo.
134Luwasa ako sa mga nagapigos sa akon,
agod nga matuman ko ang imo mga sugo.
135Ipakita ang imo kaayo sa akon
kag tudloi ako sang imo mga kasugoan.
136Ang akon mga luha nagailig kaangay sang suba,
tungod kay ang mga tawo wala nagatuman sang imo kasugoan.
Matarong ang Kasugoan sang Ginoo
137Matarong ka, O Ginoo,
kag ang imo mga kasugoan husto.
138Ang mga pagsulondan nga imo ginhatag
matadlong gid kag matarong.
139Ang akon kaakig nagadabdab sa sulod nakon kaangay sang kalayo,
tungod kay ang akon mga kaaway wala nagasapak sang imo mga sugo.
140Masaligan gid ang imo saad!
Ginahigugma ko gid ini!
141Kubos ako kag hilikayan,
pero wala ko ginapatumbayai ang imo mga pagsulondan.
142Ang imo pagkamatarong magapadayon sing walay katubtoban,
kag ang imo kasugoan matuod sa gihapon.
143Napun-an ako sing kagamo kag kalisdanan,
pero ang imo mga sugo nagahatag sa akon sing kalipay.
144Ang imo mga pagtudlo matarong sa walay katubtoban,
hatagi ako sing paghangop, kag ako magakabuhi.
Pangamuyo agod Luwason
145Sa bug-os ko nga tagipusoon nagapanawag ako sa imo,
sabta ako, O Ginoo, kag tumanon ko ang imo mga sugo!
146Nagapanawag ako sa imo,
luwasa ako, kag tumanon ko ang imo mga pagsulondan!
147Sa wala pa magbutlak ang adlaw nagapangayo ako sa imo sing bulig,
nagalaom ako sa imo saad.
148Sa bug-os nga gab-i nagahigda ako nga wala nagatulog,
sa pagpamalandong sa imo mga pagtudlo.
149Pamatii ako, O Ginoo, suno sa imo mapinadayunon nga gugma,
tipigi ang akon kabuhi, suno sa imo matarong nga pamat-od.
150Ang mapintas nga mga manughingabot sa akon nagapalapit na,
mga tawo nga wala gid nagatuman sang imo kasugoan.
151Pero malapit ka sa akon, O Ginoo,
kag ang tanan mo nga mga saad matuod.
152Dugay na nga natun-an ko ang imo mga pagtudlo,
ginhimo mo ini nga magpadayon sa walay katubtoban.
Pakitluoy agod Buligan
153Tan-awa bala ang akon pag-antos, kag luwasa ako,
tungod kay wala ko pagpatumbayai ang imo kasugoan.
154Apini man ang akon kawsa, kag hilwaya ako,
luwasa ako, suno sa imo ginsaad.
155Ang malaut indi maluwas,
kay wala sila nagatuman sang imo mga kasugoan.
156Pero daku ang imo kaluoy, O Ginoo,
gani luwasa ako, suno sa imo pagkamatarong.
157Madamo ang akon mga kaaway kag mga manugpigos,
pero wala ako nagapatumbaya sa pagtuman sang imo mga kasugoan.
158Kon magtulok ako sa sinang mga maluibon, nagalain gid ang akon buot,
tungod kay wala sila nagatuman sang imo mga sugo.
159O Ginoo, tan-awa kon daw ano ang paghigugma ko sang imo mga pagtudlo!
Gani luwasa ako suno sa imo mapinadayunon nga gugma.
160Ang alibutod sang imo kasugoan kamatuoran,
kag ang tanan mo nga matarong nga pagsulondan nagapadayon sa walay katubtoban.
Pagkatutom sa Kasugoan sang Ginoo
161Ang gamhanan nga mga tawo nagahingabot sa akon sing indi matarong
pero ang imo kasugoan amo ang akon ginatahod.
162Daw ano ka malipayon sa akon tungod sang imo mga saad,
subong ka malipayon sa tawo nga nakakita sing madamo nga manggad.
163Ginapakalain ko kag ginakangil-aran ang tanan nga kabutigan,
pero ginahigugma ko ang imo kasugoan.
164Makapito ako magpasalamat sa imo sa tagsa ka adlaw
tungod sang imo matarong nga mga pagsulondan.
165Ang mga nagahigugma sang imo kasugoan may bug-os
nga kalig-unan, kag wala sing may makapukan sa ila.
166O Ginoo, nagahulat ako sa imo sa pagluwas sa akon,
kag ginahimo ko ang imo ginasugo.
167Ginatuman ko ang imo mga pagtudlo,
ginahigugma ko ini sa bug-os ko nga tagipusoon.
168Ginatuman ko ang imo mga sugo kag mga pagsulondan,
makita mo ang tanan ko nga ginahimo.
Pangamuyo agod Buligan
169Kabay nga mabatian mo ang akon pagpangayo sing bulig, O Ginoo!
Hatagi ako sing paghangop, suno sa imo ginsaad.
170Kabay nga ang akon pangamuyo makalambot sa imo,
kag luwasa ako, suno sa imo saad!
171Dayawon ko ikaw sa gihapon,
tungod kay ginatudloan mo ako sang imo mga kasugoan.
172Magakanta ako nahanungod sang imo kasugoan,
tungod kay ang imo mga sugo matarong.
173Magmanginhanda ka sa gihapon sa pagbulig sa akon,
tungod kay ginatuman ko ang imo mga sugo.
174Daw ano ang paghandom ko sang imo kaluwasan, O Ginoo!
May kalipay ako sa imo kasugoan.
175Hatagi ako sing kabuhi, agod makadayaw ako sa imo,
kabay nga ang imo mga pagtudlo magbulig sa akon!
176Nagatalangtalang ako kaangay sang nadula nga karnero,
gani palapit ka sa pagpangita sa akon nga imo alagad,
tungod kay wala ko pagpatumbayai ang imo mga kasugoan.
Currently Selected:
Mga Salmo 119: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012