Mga Salmo 118
118
Isa ka Pangamuyo sa Pagpasalamat tungod sang Pagdaog
1Magpasalamat#1 Cron. 16:34; 2 Cron. 5:13; 7:3; Esd. 3:11; Sal. 100:5; 106:1; 107:1; 136:1; Jer. 33:11. sa Ginoo, tungod kay maayo sia,
kag ang iya gugma nagapadayon sa gihapon.
2Magsiling ang mga tawo sang Israel,
“Ang iya gugma nagapadayon sa gihapon.”
3Magsiling ang mga pari sang Dios,
“Ang iya gugma nagapadayon sa gihapon.”
4Magsiling ang tanan nga nagasimba sa iya,
“Ang iya gugma nagapadayon sa gihapon.”
5Sa akon kalisdanan nagpanawag ako sa Ginoo,
ginsabat kag ginhilway niya ako.
6Ang#Heb. 13:6. Ginoo kaupod nakon, indi ako mahadlok,
sin-o bala ang makahalit sa akon?
7Ang Ginoo amo ang nagabulig sa akon,
kag makita ko ang pagkalutos sang akon mga kaaway.
8Mas maayo ang magsalig sa Ginoo,
sang sa magsalig sa tawo.
9Mas maayo ang magsalig sa Ginoo,
sang sa magsalig sa tawhanon nga mga pangulo.
10Ginlibutan ako sang madamo nga mga kaaway,
pero ginlaglag ko sila sa gahom sang Ginoo!
11Ginlibutan nila ako,
pero ginlaglag ko sila sa gahom sang Ginoo!
12Ginlikupan nila ako kaangay sang putyokan,
pero naupos sila gilayon sa kalayo kaangay sang dagami,
ginlaglag ko sila sa gahom sang Ginoo.
13Ginsalakay ako sing mabaskog kag daw malutos na ako,
pero gintabangan ako sang Ginoo.
14Ang#Exo. 15:2; Isa. 12:2. Ginoo nagahimo sa akon nga gamhanan kag makusog,
sia amo ang akon manluluwas!
15Pamatii ang paghinugyaw sang pagdaog sa mga tolda sang mga tawo sang Dios:
“Ang gamhanan nga kusog sang Ginoo naghimo sini!
16Ang iya gahom nagpadaog sa aton,
ang iya gamhanan nga kusog sa inaway!”.
17Indi ako mapatay, kundi magakabuhi,
kag isugid ko ang ginhimo sang Ginoo.
18Ginsilutan ako sang Ginoo sing tama gid,
pero wala niya pag-itugot nga mapatay ako.
19Buksi ang mga pwerta sang Templo para sa akon,
magasulod ako kag magapasalamat sa Ginoo!
20Amo ini ang pwerta sang Ginoo,
ang mga matarong lamang amo ang makasulod!
21Ginadayaw ko ikaw, O Ginoo,
tungod kay ginpamatian kag ginpadaog mo ako!
22Ang#Mat. 21:42; Mar. 12:10-11.#Luc. 20:17; Bin. 4:11; 1 Ped. 2:7. bato nga ginsikway sang mga manunokod,
nanginpamakod nga bato.
23Ang Ginoo amo ang naghimo sini,
daw ano ka makatilingala ini tan-awon!
24Amo ini ang adlaw sang pagdaog sang Ginoo,
magkalipay kita kag maghinugyaw!
25Luwasa#Mat. 21:9; Mar. 11:9; Juan 12:13. kami, O Ginoo, luwasa kami!
Hatagi kami sing kadalag-an, O Ginoo!
26Kabay#Mat. 21:9; 23:39; Mar. 11:9; Luc. 13:35; 19:38; Juan 12:13. ang Dios magbendisyon sa iya nga nagaabot sa ngalan sang Ginoo!
Gikan sa Templo sang Ginoo nagabendisyon kami sa inyo!
27Ang Ginoo amo ang Dios, nanginmaayo sia sa aton.
Maglibot kamo sa altar nga may mga paklang sa inyo mga kamot
sa pagsugod sang piesta.
28Ikaw ang akon Dios, kag nagapasalamat ako sa imo,
isugid ko ang imo pagkagamhanan.
29Magpasalamat sa Ginoo, tungod kay maayo sia,
kag ang iya gugma nagapadayon sa gihapon!
Currently Selected:
Mga Salmo 118: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012