Mateo 20
20
Ang mga Manug-obra sa Talamnan sang Ubas
1“Ang Ginharian sang langit kaangay sang isa ka tawo nga naglakat sang aga pa sa pagpangita sing mga manug-obra nga masuholan para sa iya talamnan sang ubas. 2Nagsugot sia sa pagbayad sa ila sang minimo nga suhol sa isa ka adlaw,#20:2 MINIMO NGA SUHOL SA ISA KA ADLAW: Sa Griego denario. Ini amo ang suhol para sa isa ka adlaw nga pag-obra. kag ginpadala niya sila sa pag-obra sa iya talamnan sang ubas. 3Sang mga alas nwebe sa aga nagkadto sia liwat sa tiendahan kag nakita niya nga may mga tawo nga nagatilindog didto nga wala sing obra. 4Gani nagsiling sia sa ila, ‘Lakat man kamo kag mag-obra sa akon talamnan sang ubas, kag suholan ko kamo sang nagakaigo.’ 5Gani naglakat sila. Amo man ang ginhimo niya sang mga alas dose kag sang mga alas tres sa hapon. 6Sang mga alas singko na sa hapon nagkadto naman sia sa tiendahan kag may nakita pa gid sia nga mga tawo nga nagatilindog didto. Nagpamangkot sia sa ila, ‘Ngaa bala nagatilindog lang kamo diri sa bug-os nga adlaw nga wala sing obra?’ 7Nagsabat sila, ‘Kay wala man sing may nagpaobra sa amon.’ Nagsiling sia sa ila, ‘Kon amo ina, kadto man kamo kag mag-obra sa akon talamnan sang ubas.’
8“Sang#Lev. 19:13; Deut. 24:15. sirom na, nagsiling ang tag-iya sang talamnan sang ubas sa iya enkargado, ‘Tawga ang mga manug-obra kag suholi sila halin sa mga naulihi gid nga nag-obra tubtob sa mga nahauna.’ 9Ang tagsatagsa nga nag-ulobra sugod sang alas singko sa hapon ginbayaran sang minimo nga suhol. 10Sang suholan na ang mga nahauna nga nag-ulobra, naghunahuna sila nga mas daku ang ila mabaton, pero ang tagsatagsa sa ila ginhatagan man sang minimo nga suhol. 11Ginbaton nila ang ila suhol ugaling nagkulomuron sila batok sa tag-iya, 12nga nagasiling, ‘Ining mga naulihi, nag-obra sila sing isa ka oras lang, samtang kami nag-obra sa bug-os nga adlaw sa nagatagiti nga init, pero pareho lang ang imo suhol sa amon!’ 13Ang tag-iya nagsabat sa isa sa ila, ‘Abyan, pamati ka! Wala ko ikaw gindayai. Indi bala nagkasugot kita sa minimo nga suhol? 14Karon, kuhaa ang imo suhol, kag magpauli. Akon ini luyag nga suholan ining naulihi pareho sa ginsuhol ko sa imo. 15Indi bala ako makapagusto kon ano ang himuon ko sang akon kwarta? Ukon nahisa ka bala tungod kay maalwan ako?’”
16Dayon#Mat. 19:30; Mar. 10:31; Luc. 13:30. si Jesus nagsiling, “Gani ang mga naulihi mauna, kag ang mga nahauna maulihi.”
Ikatlo nga Paghambal ni Jesus Nahanungod sa Iya Kamatayon
(Mar. 10:32-34; Luc. 18:31-34)
17Sang si Jesus nagataklad pakadto sa Jerusalem, ginpain niya ang dose ka mga gintuton-an, kag samtang nagalakat sila nagsiling sia sa ila nga silahanon lang, 18“Pamati kamo, nagataklad kita pakadto sa Jerusalem sa diin ang Anak sang Tawo igatugyan sa pangulo nga mga pari kag mga manunodlo sang Kasugoan, kag ila sia pamatbatan sing kamatayon. 19Dayon igatugyan nila sia sa mga Hentil nga magayaguta kag magabunal sa iya, kag magalansang sa iya sa krus, pero sa ikatlo nga adlaw pagabanhawon sia.”
Ang Pangabay sang Isa ka Iloy
(Mar. 10:35-45)
20Dayon nagpalapit kay Jesus ang asawa ni Zebedeo upod sa iya duha ka mga anak nga lalaki kag nagluhod sia sa iya atubang, kag may ginpangabay.
21Si Jesus nagpamangkot sa iya, “Ano bala ang luyag mo?”
Nagsabat sia, “Ginapangabay ko nga kon maghari ka na, papungkua ining duha ko ka mga anak, ang isa sa imo tuo kag ang isa sa imo wala.”
22Si Jesus nagsabat sa duha niya ka mga anak, “Wala kamo makahibalo sang inyo ginapangayo. Sarang bala kamo makainom sa kupa sang pag-antos nga akon pagaimnan sa indi na lang madugay?”
Nagsabat sila, “Huo, sarang kami.”
23Nagsiling si Jesus sa ila, “Magainom kamo matuod sa kupa nga akon pagaimnan. Pero ang pagpapungko sa akon tuo ukon sa akon wala, indi ako ang magahatag sina. Ini nga mga pulongkuan para lamang sa ila nga gin-amanan sang akon Amay.”
24Sang pagkabati sini sang napulo ka mga gintuton-an naakig sila sa duha ka mag-utod. 25Gani#Luc. 22:25-26. gintawag sila tanan ni Jesus kag ginsingganan, “Inyo nahibaluan nga ang mga pangulo sang mga pagano may gahom sa ila mga sinakpan kag ang mga gamhanan may bug-os nga awtoridad sa ila. 26Pero#Mat. 23:11; Mar. 9:35; Luc. 22:26. indi manginsubong sini iya ang sa inyo. Kay kon may isa sa inyo nga luyag magpangulo, dapat sia magmanginsuloguon ninyo. 27Kag kon may isa sa inyo nga luyag mangin-una, dapat sia mangin-ulipon ninyo. 28Subong nga ang Anak sang Tawo wala mag-abot agod alagaron, kundi sa pag-alagad kag sa paghatag sang iya kabuhi sa pagtubos sang madamo nga mga tawo.”
Gin-ayo ni Jesus ang Duha ka Bulag
(Mar. 10:46-52; Luc. 18:35-43)
29Madamo nga mga tawo ang nagsunod kay Jesus sang sia kag ang iya mga gintuton-an nagapagwa sa Jerico. 30May duha ka bulag nga nagapungko sa higad sang dalan nga nakabati nga si Jesus nagaagi, gani nagsagad sila singgit, “Sir, Anak ni David! Kaluoyi kami!”
31Ginsaway sila sang mga tawo kag ginsingganan nga maghipos. Pero nagsinggit pa gid sila sing mabaskog, “Sir, Anak ni David! Kaluoyi kami!”
32Si Jesus nagdulog kag nagtawag sa ila. Ginpamangkot niya sila, “Ano bala ang luyag ninyo nga himuon ko sa inyo?”
33Nagsabat sila, “Sir, luyag kami nga makakita!”
34Si Jesus naluoy sa ila kag gintandog niya ang ila mga mata, kag sa gilayon nakakita sila kag nagsunod sa iya.
Currently Selected:
Mateo 20: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
