Mateo 21

Ang Madinalag-on nga Pagsulod ni Jesus sa Jerusalem

(Mar. 11:1-11; Luc. 19:28-40; Juan 12:12-19)

1Sang si Jesus kag ang iya mga gintuton-an nagahilapit na sa Jerusalem, nakaabot sila sa Betfage, sa Bukid sang mga Olivo. Dayon ginpauna ni Jesus ang duha sang iya mga gintuton-an 2kag ginsingganan, “Kadto kamo sa barangay nga yara sa unhan, kag didto inyo makita gilayon ang isa ka asna nga nahigot kaupod sa iya tinday. Hubari ninyo sila kag dalha diri sa akon. 3Kon may magpamatok sa inyo, singgani sia, ‘Ang Ginoo#21:3 Ginoo: ukontag-iya sini. nagakinahanglan sa ila,’ kag sa gilayon ipadala niya sila.”

4Ini nahanabo agod matuman ang ginhambal sang propeta:

5“Sugiri#Zac. 9:9. ninyo ang siudad sang Sion:

lantawa, ang imo hari magaabot sa imo!

Mapainuboson sia kag nagasakay sa asna,

kag sa polyino nga tinday sang asna.”

6Gani nag-una ang duha ka mga gintuton-an kag ila gintuman ang ginsugo ni Jesus: 7gindala nila ang asna kag ang polyino, kag ila ginhampiluan sang ila mga kunop kag ginsakyan ini ni Jesus. 8Madamo nga mga tawo ang naghumlad sang ila mga kunop sa dalan samtang ang iban nagtapas sang mga sanga sang kahoy kag ginladlad nila ini sa dalan. 9Ang#Sal. 118:25-26. mga tawo nga nagalakat una kay Jesus kag ang mga nagasunod sa iya nagsagad singgit, “Dayawon ang Anak ni David! Ang Dios magbendisyon sa iya nga nagaabot sa ngalan sang Ginoo! Dayawon ang Dios!”

10Sang pagsulod ni Jesus sa Jerusalem, ang bug-os nga siudad nagkinagula. Ang mga tawo sa siudad nagpamangkot, “Sin-o bala sia?”

11Nagsabat ang madamo nga mga tawo, “Sia amo ang propeta nga si Jesus nga taga-Nazaret nga sakop sang Galilea.”

Si Jesus Nagkadto sa Templo

(Mar. 11:15-19; Luc. 19:45-48; Juan 2:13-22)

12Nagsulod si Jesus sa templo kag iya ginpanabog pa gwa ang tanan nga nagapamaligya kag nagapamakal didto. Ginpamaliskad niya ang mga lamisa sang mga manugkambyo sang kwarta, kag ang mga pulongkuan sang mga nagapamaligya sang mga pating. 13Ginsingganan#Isa. 56:7; Jer. 7:11. niya sila, “Nasulat sa mga Kasulatan nga ang Dios nagsiling, ‘Ang akon Templo pagatawgon nga balay nga palangamuyoan.’ Pero inyo ginahimo ini nga palanaguan sang mga makawat!”

14Ang mga bulag kag mga piang nagkadto sa iya sa templo kag gin-ayo niya sila. 15Ang pangulo nga mga pari kag ang mga manunodlo sang Kasugoan naakig sang ila makita ang makatilingala nga mga butang nga iya ginahimo kag sang ila nakita ang mga kabataan nga nagasininggit sa templo, “Dayawon ang Anak ni David!” 16Gani#Sal. 8:2 (LXX). nagpamangkot sila kay Jesus, “Nabatian mo bala ang ila ginasiling?”

Si Jesus nagsabat, “Huo! Wala bala ninyo mabasahi ang kasulatan nga nagasiling, ‘Gintudloan mo ang mga kabataan kag mga lapsag sa paghalad sang himpit nga pagdayaw.’?”

17Ginbayaan sila ni Jesus kag naggwa sia sa siudad pakadto sa Betania sa diin sia naghigda sadto nga gab-i.

Ginpakamalaut ni Jesus ang Kahoy nga Higera

(Mar. 11:12-14, 20-24)

18Sa madason nga aga, sang nagapabalik si Jesus sa siudad sang Jerusalem, gingutom sia. 19Nakita niya ang isa ka kahoy nga higera sa higad sang dalan. Ginpalapitan niya ini, pero wala sia sing may nakita nga bunga kundi mga dahon gid lang. Gani nagsiling sia sa kahoy, “Indi ka na gid liwat makapamunga!” Kag sa gilayon nalaya ang kahoy nga higera.

20Sang makita ini sang mga gintuton-an natingala gid sila. Nagpamangkot sila, “Paano bala nalaya gilayon ang kahoy nga higera?”

21Nagsabat#Mat. 17:20; 1 Cor. 13:2. si Jesus, “Dumdoma ninyo ini! Kon nagatuo kamo kag wala nagapangduhaduha, mahimo ninyo ang akon nahimo sa sining kahoy nga higera, kag indi lamang ina, kundi makasiling pa kamo sa sini nga bukid, ‘Halin ka diri kag maglukso sa dagat,’ kag mahimo ina. 22Kon nagatuo kamo, mabaton ninyo ang bisan ano nga pangayuon ninyo sa pangamuyo.”

Ang Pamangkot Nahanungod sa Awtoridad ni Jesus

(Mar. 11:27-33; Luc. 20:1-8)

23Nagbalik si Jesus sa Templo, kag sang nagapanudlo sia didto, ang pangulo nga mga pari kag ang mga katigulangan sang mga Judio nagpalapit sa iya kag nagpamangkot, “Ano bala ang imo awtoridad sa paghimo sini nga mga butang? Sin-o bala ang naghatag sa imo sini nga awtoridad?”

24Si Jesus nagsabat sa ila, “Ako man may isa ka pamangkot sa inyo, kag kon inyo masabat ini sugiran ko kamo sang akon awtoridad sa paghimo sini nga mga butang. 25Sa diin bala nagikan ang awtoridad ni Juan sa pagbautiso, sa Dios bala ukon sa tawo?”

Kag nagbinaisay sila, “Ano bala ang aton isabat? Kon magsiling kita, ‘Gikan sa Dios,’ masiling sia sa aton, ‘Ti, ngaa wala kamo magpati kay Juan?’ 26Pero kon magsiling kita, ‘Gikan sa tawo,’ nahadlok man kita kon ano ang buhaton sang mga tawo sa aton tungod kay ginakilala nila si Juan nga isa ka propeta.” 27Gani nagsabat sila kay Jesus, “Wala kami makahibalo.”

Dayon nagsiling sia sa ila, “Ti, indi ko man kamo pagsugiran kon sa kay sin-o awtoridad ginahimo ko ini nga mga butang.

Ang Palaanggiran Nahanungod sa Duha ka Anak

28“Karon, ano bala ini sa inyo? May isa ka tawo nga may duha ka mga anak nga lalaki. Ginkadtuan niya ang magulang kag ginsingganan, ‘Toto, kadto ka subong sa talamnan sang ubas kag mag-obra.’ 29Nagsabat sia, ‘Indi ako!’ Pero sang ulihi nagbaylo ang iya hunahuna kag nagkadto sa talamnan sang ubas. 30Dayon ang amay nagkadto man sa manghod kag nagsiling sing amo man. Ang bata nagsabat, ‘Huo, Tay,’ pero wala sia magkadto. 31Diin sini sa ila nga duha ang naghimo sang sugo sang amay?”

Nagsabat sila, “Ang magulang.”

Gani si Jesus nagsiling sa ila, “Nagasiling ako sa inyo nga unahan pa kamo sang mga manugsukot sang buhis kag sang malain nga mga babayi sa pagpasakop sa paghari sang Dios. 32Kay#Luc. 3:12; 7:29-30. si Juan nga manugbautiso nag-abot kag nagtudlo sa inyo sang husto nga dalan, kag wala kamo magpati sa iya, pero ang mga manugsukot sang buhis kag ang malain nga mga babayi nagpati sa iya. Bisan pa nakita ninyo ini, wala gid magliso ang inyo mga hunahuna kag magpati sa iya.

Ang Palaanggiran Nahanungod sa mga Agsador sa Talamnan sang Ubas

(Mar. 12:1-12; Luc. 20:9-19)

33Si#Isa. 5:1-2. Jesus nagsiling, “Pamatii ninyo ang isa pa ka palaanggiran: may isa ka tag-iya sang talamnan nga nagpatanom sang ubas. Iya ini ginkudalan palibot, nagpakutkot sia sing buho para pulogaan sang ubas kag nagpatindog sia sing mataas nga balantayan. Iya ini ginpaagsahan kag nagpanglakaton. 34Sang tion na sa pagpamupo sang ubas, ginpadala niya ang iya mga suloguon sa mga agsador sa pagkuha sang iya parti. 35Gindakop sang mga agsador ang iya mga suloguon: ang isa ginbunal nila, ginpatay ang isa, kag ang isa pa gid ginbato nila. 36Liwat iya ginpadala ang iban niya nga mga suloguon nga mas madamo pa sang sa nahauna, kag amo man ang ginhimo sang mga agsador sa ila. 37Sa katapusan ginpadala niya sa ila ang iya anak. Nagsiling sia, ‘Tahuron gid nila ang akon anak.’ 38Pero sang pagkakita sang mga agsador sang anak, nagsinilingay sila, ‘Amo ini ang manunubli. Dali kamo, patyon naton sia, kag mangin-aton ang iya palanublion!’ 39Gani gindakop nila sia, ginhaboy sa gwa sang talamnan sang ubas, kag ginpatay.”

40Nagpamangkot si Jesus, “Karon, kon mag-abot ang tag-iya sang talamnan, ano ang iya himuon sa sadtong mga agsador?”

41Nagsabat sila, “Pamatyon gid niya nga wala sing luoyluoy yadtong malain nga mga tawo, kag ipaagsa niya ang iya talamnan sa iban nga mga agsador, nga magahatag sa iya sang iya parti sang patubas sa nagakaigo nga tion.”

42Si#Sal. 118:22-23. Jesus nagsiling sa ila, “Wala bala ninyo mabasahi ang ginasiling sang mga Kasulatan?

‘Ang bato nga ginsikway sang mga manunokod

nanginpamakod nga bato.

Ang Ginoo amo ang naghimo sini,

daw ano ini ka makatilingala!’

43Gani nagasiling ako sa inyo: indi na maghari ang Dios sa inyo, kundi magahari sia sa mga tawo nga magahimo sang iya ginapaabot.”#21:43 Ang iban nga mga manuskrito nagadugang sang bersikulo 44: Ang bisan sin-o nga mahulog sa sini nga bato mapusa, pero ang mahulogan sini nga bato madugmok(tan-awa ang Luc. 20:18).

45Nabatian sang pangulo nga mga pari kag mga Fariseo ang mga palaanggiran ni Jesus kag nahangpan nila nga sila ang ginatumod ni Jesus. 46Gani gintinguhaan nila nga dakpon sia. Ugaling nahadlok sila sa mga tawo, nga nagakabig kay Jesus subong isa ka propeta.

Currently Selected:

Mateo 21: MBBHIL12

Highlight

Copy