Mateo 19

Si Jesus Nagtudlo Nahanungod sa Pag-asawahay

(Mar. 10:1-12)

1Sang makasiling si Jesus sini nga mga butang, naghalin sia sa Galilea kag nagkadto sa lugar nga sakop sang Judea sa tabok sang Suba sang Jordan. 2Madamo nga mga tawo ang nagsunod sa iya kag iya ginpang-ayo didto ang mga nagamasakit.

3May mga Fariseo nga nagpalapit sa iya kag luyag magdakupdakop sa iya paagi sa sini nga pamangkot, “Ginatugotan bala sang aton Kasugoan ang isa ka tawo nga iya bulagan ang iya asawa sa bisan ano nga kabangdanan?”

4Si#Gen. 1:27; 5:2. Jesus nagsabat, “Wala bala ninyo mabasahi sa kasulatan nga sang pagtuga sang Dios sang mga tawo sa ginsugoran, ginhimo niya sila nga lalaki kag babayi? 5Kag#Gen. 2:24. ang Dios nagsiling, ‘Tungod sini ang lalaki magabiya sang iya amay kag iloy, kag magahiusa sa iya asawa, kag sila nga duha mangin-isa.’ 6Gani indi na sila duha, kundi isa. Kon amo, indi pagbulagon sang tawo ang gintiayon sang Dios.”

7Ang#Deut. 24:1-4; Mat. 5:31. mga Fariseo nagpamangkot sa iya, “Ti, ngaa man nga nagsugo si Moises nga hatagan lang sang isa ka tawo ang iya asawa sang papeles sang pagbulagay kag bayaan sia?”

8Nagsabat si Jesus sa ila, “Ginpahanugotan kamo ni Moises sa pagbulag sa inyo mga asawa tungod kay matig-a gid ang inyo ulo. Pero sa ginsugoran indi amo ini. 9Gani#Mat. 5:32; 1 Cor. 7:10-11. nagasiling ako sa inyo, nga ang bisan sin-o nga tawo nga magbulag sa iya asawa sa iban nga kabangdanan luas sa pagpanginlalaki, kag magpangasawa liwat, nagapanginbabayi.”

10Ang iya mga gintuton-an nagsiling sa iya, “Kon amo man lang ina ang matabo sa pag-asawahay, maayo pa nga indi na lang magpangasawa.”

11Nagsabat si Jesus, “Ini nga pagtulon-an indi para sa tanan, kundi para lang sa mga ginhatagan sini sang Dios. 12Kay may nagakalainlain nga mga kabangdanan kon ngaa may mga tawo nga indi makapangasawa: ang iban natawo nga indi sarang makapangasawa, ang iban indi makapangasawa tungod kay ginkapon sila, kag ang iban pa gid indi magpangasawa tungod sang Ginharian sang langit. Ang makasarang sa pagbaton sini nga pagtudlo magbaton sini.”

Ginbendisyunan ni Jesus ang Magagmay nga mga Kabataan

(Mar. 10:13-16; Luc. 18:15-17)

13May mga tawo nga nagdala kay Jesus sang mga kabataan agod tungtongan niya sila sang iya mga kamot kag pangamuyoan, pero ginsaway sila sang mga gintuton-an. 14Si Jesus nagsiling, “Pabay-i lang ninyo ang mga kabataan sa pagpalapit sa akon, kag indi ninyo sila pagpunggi, tungod kay ang Ginharian sang langit ila sang mga kasubong nila.”

15Gintungtong ni Jesus ang iya mga kamot sa ila kag sa tapos sini naglakat sia.

Ang Manggaranon nga Pamatan-on

(Mar. 10:17-31; Luc. 18:18-30)

16Isa sadto ka tion, may isa ka tawo nga nagpalapit kay Jesus kag nagpamangkot, “Manunodlo, ano bala ang maayo nga butang nga dapat ko himuon agod maangkon ko ang kabuhi nga wala sing katapusan?”

17Nagsabat si Jesus, “Ngaa bala nagapamangkot ka sa akon kon ano ang maayo? Ang Dios gid lang amo ang maayo. Tumana ang mga sugo kon luyag ka mag-angkon sang kabuhi nga wala sing katapusan.”

18Nagpamangkot#Exo. 20:13; Deut. 5:17; Exo. 20:14; Deut. 5:18; Exo. 20:15; Deut. 5:19; Exo. 20:16; Deut. 5:20. sia, “Ano nga mga sugo?”

Nagsabat si Jesus, “Indi ka magpatay, indi ka magpanginbabayi ukon magpanginlalaki, indi ka magpangawat, kag indi ka magsaksi sang binutig. 19Tahura#Exo. 20:12; Deut. 5:16; Lev. 19:18. ang imo amay kag ang imo iloy, kag higugmaa ang imo isigkatawo subong sang imo kaugalingon.”

20Ang pamatan-on nagsabat sa iya, “Natuman ko na ini tanan nga mga sugo. Ano pa bala ang nakulang sa akon?”

21Si Jesus nagsiling sa iya, “Kon luyag ka nga manginhimpit, lakat ka kag ibaligya ang tanan mo nga pagkabutang kag ihatag mo ang kwarta sa mga imol, kag magaangkon ka sing manggad sa langit kag dali, sunod ka sa akon.”

22Sang pagkabati sini sang pamatan-on, naglakat sia nga masinulob-on, kay manggaranon gid sia.

23Dayon si Jesus nagsiling sa iya mga gintuton-an, “Nagasiling ako sa inyo nga mabudlay para sa isa ka manggaranon ang pagsulod sa Ginharian sang langit. 24Liwaton ko ang pagsiling sa inyo nga mas mabudlay para sa isa ka manggaranon ang pagpasakop sa paghari sang Dios sang sa isa ka kamelyo nga maglusot sa buho sang dagom.”

25Sang pagkabati sini sang mga gintuton-an natingala gid sila. Nagpamangkot sila, “Kon amo, sin-o na lang gali ang maluwas?”

26Gintulok sila ni Jesus sing wala pulopamisok kag ginsabat, “Para sa tawo indi ini mahimo, pero para sa Dios mahimo ini tanan.”

27Dayon si Pedro nagsiling, “Tan-awa bala, ginbayaan namon ang tanan kag nagsunod sa imo. Ano bala ang amon mabaton?”

28Nagsiling#Mat. 25:31; Luc. 22:30. si Jesus sa ila, “Tandai ninyo ini! Kon ang Anak sang Tawo magpungko na sa iya harianon nga trono sa Bag-o nga Panag-on, dayon kamo nga dose nga nagsunod sa akon magapungko man sa inyo mga trono sa paghukom sa dose ka tribo sang Israel. 29Ang tagsatagsa nga nagbiya sang iya mga balay, mga utod nga lalaki, mga utod nga babayi, amay, iloy, kabataan, ukon kaumhan bangod sa akon, magabaton sing sobra sa ginatos ka pilo, kag magaangkon sang kabuhi nga wala sing katapusan. 30Pero#Mat. 20:16; Luc. 13:30. madamo ang mga nahauna subong nga maulihi, kag madamo ang mga naulihi nga mauna.

Currently Selected:

Mateo 19: MBBHIL12

Highlight

Copy