Mateo 18

Sin-o ang Labing Daku?

(Mar. 9:33-37; Luc. 9:46-48)

1Sa#Luc. 22:24. sadto nga tion nagpalapit ang mga gintuton-an kay Jesus kag nagpamangkot, “Sin-o bala ang labing daku sa Ginharian sang langit?”

2Gani gintawag ni Jesus ang isa ka bata kag ginpatindog sia sa ila atubang, 3kag#Mar. 10:15; Luc. 18:17. nagsiling, “Dumdoma ninyo ini! Kon indi kamo magbaylo kag manginkaangay sang mga kabataan, indi gid kamo makasulod sa Ginharian sang langit. 4Ang bisan sin-o nga nagapaubos sang iya kaugalingon kaangay sini nga bata, sia amo ang labing daku sa Ginharian sang langit. 5Kag ang bisan sin-o nga nagabaton sang kasubong sini nga bata sa akon ngalan nagabaton sa akon.

Ang mga Pagsulay

(Mar. 9:42-48; Luc. 17:1-2)

6“Ang bisan sin-o nga manginkabangdanan sang pagbiya sa pagtuo sa akon, sang isa sining mga katawhan nga nagasalig sa akon kaangay sang mga kabataan, mas maayo pa sa sina nga tawo nga ihigot ang galingan nga bato sa iya liog kag lumsan sia sa madalom nga dagat. 7Makaluluoy man ang kalibutan bangod may mga butang nga nanginkabangdanan sang pagbiya sang mga tawo sa ila pagtuo! Ini nga mga butang mahanabo gid man, pero makaluluoy ang tawo nga manginkabangdanan sini!

8“Kon#Mat. 5:30. ang imo kamot ukon tiil amo ang kabangdanan sang imo pagbiya sa imo pagtuo, utda ini kag ihaboy! Mas maayo pa nga magsulod ka sa kabuhi nga wala sing katapusan nga isa lang ang imo kamot ukon tiil sang sa duha ang imo kamot kag tiil nga idap-ong ka sa kalayo nga wala sing katapusan. 9Kag#Mat. 5:29. kon ang imo mata manginkabangdanan sang imo pagbiya sa imo pagtuo, lukata ini kag ihaboy! Mas maayo pa nga magsulod ka sa kabuhi nga wala sing katapusan nga isa lang ang imo mata sang sa duha ang imo mata nga idap-ong ka sa kalayo sa impierno.

Palaanggiran Nahanungod sa Nadula nga Karnero

(Luc. 15:3-7)

10“Maghalong#Tob. 12:15. kamo nga indi ninyo matamay ang isa sining mga katawhan nga kaangay sang magamay nga mga kabataan sa atubang sang Dios. Nagasiling ako sa inyo nga ang ila mga anghel sa langit yara pirme sa presensya sang akon Amay sa langit.#18:10 Ang iban nga mga manuskrito nagadugang sang bersikulo 11: Kay ang Anak sang Tawo nag-abot sa pagluwas sang nadula (tan-awa ang Luc. 19:10). #Luc. 19:10.

12“Ano bala sa inyo? Ano bala ang himuon sang isa ka tawo nga may 100 nga mga karnero kag ang isa sa ila nadula? Bayaan niya didto sa bakulod ang nobentay nwebe nga nagahalab kag magalakat sia sa pagpangita sang nadula nga karnero. 13Nagasiling ako sa inyo, kon iya makita ini, ang iya kalipay tungod sining isa mas labi pa sang sa iya kalipay sa nobentay nwebe nga wala madula. 14Subong man ang inyo#18:14 inyo: Ang iban nga mga manuskrito mayakon. Amay sa langit indi luyag nga madula ang isa sining mga katawhan nga kaangay sang magamay nga mga kabataan sa iya atubang.

Ang Utod nga Nagpakasala

15“Kon#Luc. 17:3. ang imo utod makasala batok sa imo,#18:15 Ang iban nga mga manuskrito wala nagalakip sangbatok sa imo. kadtoi sia kag sugiri sang iya sayop nga kamuhanon lang. Kon magpamati sia sa imo, ti magabalik ang inyo pag-ayuhay subong mag-ulotod. 16Pero#Deut. 19:15. kon indi sia magpamati sa imo, dala ka sing isa ukon duha pa ka tawo agod nga suno sa ginasiling sang kasulatan, ‘Ang tagsa ka panumbongon mapalig-on paagi sa pamatuod sang duha ukon tatlo ka mga saksi.’ 17Ugaling kon indi sia magpamati sa ila, isugid ini sa iglesia. Kag kon indi pa gid sia magpamati sa iglesia kabiga sia subong nga pagano ukon manugsukot sang buhis.

Ang Pagdumili kag ang Pagpahanugot

18“Gani#Mat. 16:19; Juan 20:23. nagasiling ako sa inyo nga kon ano ang ginadumilian ninyo sa duta, ini pagadumilian man sa langit. Kon ano ang inyo ginapahanugotan sa duta, ini pagapahanugotan man sa langit.

19“Nagasiling pa gid ako sa inyo: kon ang duha sa inyo maghisugot diri sa duta nahanungod sang mga butang nga inyo ginapangamuyoan, ina pagahimuon sa inyo sang akon Amay sa langit. 20Kay kon diin ang duha ukon tatlo nga nagatipon sa akon ngalan, yara ako sa tunga nila.”

Ang Palaanggiran Nahanungod sang Indi Mapinatawaron nga Suloguon

21Dayon#Luc. 17:3-4. nagpalapit si Pedro kay Jesus kag nagpamangkot, “Ginoo, makapila bala makasala ang akon utod sa akon kag ako magapatawad sa iya? Tubtob bala sa makapito?”

22Si#Gen. 4:24. Jesus nagsabat, “Wala ako magsiling sa imo nga tubtob sa makapito, kundi setenta ka pito.#18:22 setenta ka pito: ukonsetentay siete ka beses. 23Kay ang Ginharian sang langit kaangay sang isa ka hari nga luyag maghusay sang mga utang sang iya mga suloguon sa iya. 24Sang nagsugod sia sa paghusay sang ila mga utang, may gindala sa iya nga suloguon nga nakautang sing minilyon ka pisos. 25Tungod nga indi makabayad ang suloguon sang iya utang, nagmando ang hari nga ibaligya sia, ang iya asawa, ang iya mga kabataan kag ang tanan niya nga pagkabutang agod mabayaran niya ang iya utang. 26Nagluhod ang suloguon sa atubang sang hari kag nagpakitluoy, ‘Hulathulata lang ako anay, kay bayaran ko ikaw sang tanan!’ 27Ang hari naluoy sa iya, gani ginpalakat niya sia kag wala na pagpabayara sang iya utang.

28“Dayon naggwa ang suloguon kag nasugata niya ang iya kapareho nga suloguon nga nakautang sa iya sing pila lamang ka pisos. Ginliab niya sia kag ginkuga nga nagsiling, ‘Bayari ang utang mo sa akon!’ 29Ang pareho niya nga suloguon nagluhod nga nagapakitluoy sa iya, ‘Hulathulata lang ako anay, kay bayaran ko ikaw!’ 30Pero wala sia magkaluoy. Sa baylo ginpabilanggo niya sia tubtob mabayaran niya ang iya utang. 31Sang ang iban nga mga suloguon nakakita sang nahanabo, naglain gid ang buot nila kag ginkadtuan nila ang hari kag ginsugiran sang tanan nga nahanabo. 32Gani ginpatawag sang hari yadtong suloguon kag ginhambalan, ‘Walay pulos ka nga suloguon! Wala ko ikaw ginpabayad sang tanan mo nga utang tungod kay nagpakitluoy ka sa akon. 33Kuntani nagkaluoy ka man sa pareho mo nga suloguon subong sang pagkaluoy ko sa imo.’ 34Naakig gid ang hari kag ginpabilanggo sia agod masilutan tubtob nga bayaran niya ang tanan niya nga utang.”

35Sa katapusan si Jesus nagsiling, “Amo man ini ang himuon sa tagsatagsa sa inyo sang akon Amay sa langit kon indi kamo magpatawad sang inyo utod sa inyo tagipusoon.”

Currently Selected:

Mateo 18: MBBHIL12

Highlight

Copy