Mga Binuhatan 5

Si Ananias kag si Safira

1Pero may isa ka tawo nga ginhingalanan kay Ananias upod sang iya asawa nga si Safira nagbaligya sang iban nila nga pagkabutang. 2Sa pagpahanugot sang iya asawa, gintago niya ang iban nga kwarta para sa iya kaugalingon, kag ang nabilin ginhatag niya sa mga apostoles. 3Nagsiling si Pedro sa iya, “Ananias, ngaa bala nagpadaog ka kay Satanas sa imo pagbutig sa Espiritu Santo paagi sa imo pagtago sang bahin sang kwarta nga bili sang imo pagkabutang? 4Sang wala mo pa mabaligya ang imo pagkabutang ikaw ang tag-iya sadto, kag sang nabaligya mo na, imo man gihapon ang kwarta. Ngaa bala nakapanghunahuna pa ikaw sa paghimo sini? Wala ka magbutig sa mga tawo, kundi sa Dios!” 5#Su. 1:55. Sang pagkabati ni Ananias sini natumba sia kag napatay. Hinadlukan ang tanan nga nakabati sini nga hitabo. 6Ang pamatan-on nga mga lalaki nagsulod kag ila ginputos ang bangkay, ginyayungan pa gwa kag ginlubong.

7Sang makaligad ang tatlo ka oras, nag-abot ang iya asawa, pero wala sia makahibalo sang natabo. 8Nagpamangkot si Pedro sa iya, “Sugiri ako, amo gid bala ini ang kantidad nga nabaton ninyo sa inyo pagbaligya sang inyo pagkabutang?”

Nagsabat si Safira, “Huo, amo ina tanan ang nabaton namon.”

9Gani si Pedro nagsiling sa iya, “Ngaa bala nga nag-ugyon kamo nga duha sang imo bana sa pagtilaw sang Espiritu sang Ginoo? Ang mga lalaki nga naglubong sang imo bana yara na sa pwertahan kag subong man pagayayungan nila ikaw pa gwa!” 10Sa gilayon natumba si Safira sa tiilan ni Pedro kag napatay. Ang pamatan-on nga mga lalaki nagsulod, kag sang nakita nila nga patay na sia, ila sia ginyayungan pa gwa kag ginlubong sa tupad sang iya bana. 11Hinadlukan gid ang bug-os nga iglesia kag ang tanan nga nakabati sang nahanabo.

Mga Milagro kag Katingalahan nga mga Buhat

12Madamo nga mga milagro kag katingalahan nga mga buhat ang ginhimo sang mga apostoles sa tunga sang mga tawo. Nagtipon sing tingob ang tanan nga mga tumoluo sa Portico ni Solomon. 13Wala sing indi tumoluo nga may nangisog sa pagsimpon sa ila grupo, bisan pa nga ginatahod sila sang mga tawo. 14Pero nagadamo nga nagadamo ang mga lalaki kag mga babayi nga nagatuo sa Ginoo kag nagdugang sa ila grupo. 15Tungod sang mga binuhatan sang mga apostoles, ang mga masakiton gindala sa mga dalan kag ginbutang sa mga higdaan kag mga banig agod nga kon mag-agi si Pedro maagyan sila bisan na lang sang iya landong. 16Madamo nga mga tawo ang nag-abot halin sa mga kabanwahanan sa palibot sang Jerusalem. Gindala nila ang mga masakiton kag ang may malaut nga mga espiritu kag ini sila tanan nag-alayo.

Ginhingabot ang mga Apostoles

17Karon ang Pinakamataas nga Pari kag ang tanan niya nga mga kaupdanan nga mga katapo sang partido sang mga Saduceo nahisa gid sa mga apostoles. 18Gindakop nila ang mga apostoles kag ginpriso sila sa bilangguan sang banwa. 19Pero sa sadto gid nga gab-i ginbuksan sang anghel sang Ginoo ang mga pwertahan sang bilangguan, kag ginpagwa sila. Dayon nagsiling ang anghel sa ila, 20“Lakat kamo kag magtindog sa Templo, kag sugiri ang mga tawo sang tanan nahanungod sining bag-o nga kabuhi.” 21Gintuman nila ang ginsiling sa ila sang anghel kag sang nagapamanagbanag nagsulod sila sa Templo kag nagsugod sa pagpanudlo.

Ang Pinakamataas nga Pari kag ang iya mga kaupdanan nagpatawag sang tanan nga mga katigulangan sang mga Judio agod maghinun-anon ang bug-os nga Konseho. Dayon nagsugo sila nga kuhaon ang mga apostoles sa bilangguan kag ipaatubang sa ila. 22Pero sang pag-abot sang mga soldado didto, wala nila makita sa bilangguan ang mga apostoles. Gani nagbalik sila sa Konseho kag nagsugid, 23“Sang pagsampot namon sa bilangguan, nasapwan namon nga nakandaduhan pa ini kag ang tanan nga mga gwardya nagabantay sa mga pwertahan, pero sang pag-abri namon sang mga pwertahan wala kami sing may nakita nga tawo didto!” 24Sang pagkabati sini sang pangulo sang mga gwardya sang Templo kag sang pangulo nga mga pari, natingala sila kon ano ang natabo sa mga apostoles. 25Dayon may isa ka tawo nga nag-abot kag nagsiling sa ila, “Pamati kamo anay, ang mga tawo nga ginbilanggo ninyo, didto na sa Templo kag nagapanudlo sa mga tawo!” 26Gani nagkadto didto ang pangulo sang mga gwardya sang Templo upod sa iya mga tinawo kag nagbalik sila nga dala ang mga apostoles. Wala nila gindala sa pakusog ang mga apostoles tungod kay nahadlok sila basi batuhon sila sang mga tawo.

27Ginpasulod nila ang mga apostoles kag ginpaatubang sa Konseho, kag ang Pinakamataas nga Pari nagpamangkot sa ila 28nga#Mat. 27:25. nagasiling, “Ginmanduan gid namon kamo nga indi magpanudlo sa ngalan sini nga tawo, pero tan-awa ang inyo ginhimo! Ginpalapnag ninyo ang inyo pagtulon-an sa bug-os nga Jerusalem kag nagapasibangod kamo nga kami ang may salabton sa iya kamatayon!”

29Nagsabat si Pedro kag ang iban nga mga apostoles, “Ang Dios amo ang dapat namon tumanon kag indi ang mga tawo. 30Ang Dios sang aton mga katigulangan nagbanhaw kay Jesus nga inyo ginpatay paagi sa paglansang sa krus. 31Ginbayaw sia sang Dios sa iya tuo subong nga Pangulo kag Manluluwas, sa paghatag sa mga tawo sang Israel sang kahigayunan sa paghinulsol agod nga mapatawad ang ila mga sala. 32Kami mga saksi sini nga mga butang—kami kag ang Espiritu Santo nga ginahatag sang Dios sa mga nagatuman sa iya.”

33Sang pagkabati sini sang mga katapo sang Konseho, naakig gid sila, kag buot nila nga ipapatay ang mga apostoles. 34Pero may isa ka Fariseo nga katapo sang Konseho nga ginahingalanan kay Gamaliel, isa ka manunodlo sang Kasugoan nga ginatahod sang tanan nga mga tawo. Nagtindog sia kag nagmando nga pagwaon anay ang mga apostoles. 35Dayon naghambal sia sa Konseho, “Mga taga-Israel, mag-andam gid kamo kon ano ang inyo himuon sa sini nga mga tawo. 36Madumdoman ninyo nga sang una anay may isa ka tawo nga si Teudas nga nagpakita nga daw si sin-o gid sia kag may nagsunod sa iya nga mga 400 ka mga tawo. Pero ginpatay sia, nag-alaplaag ang iya tanan nga mga sumolunod kag wala na batia ang iya hublag. 37Sa tapos sina may isa naman ka tawo nga nagpakita sa tion sang pagpanglista, kag ini amo si Judas nga taga-Galilea. May madamo man sia nga mga sumolunod pero ginpatay man sia kag nag-alaplaag ang iya tanan nga mga sumolunod. 38Gani sa sini nga kaso nagasiling ako sa inyo, pabay-i lang ninyo ini nga mga tawo kag indi sila paghilabti, kay kon ang ila plano kag hilikuton iya man lang sang tawo kahimuan, indi ini magpadayon. 39#2 Mac. 7:19.Pero kon ini iya sang Dios, indi kamo makapauntat sa ila, kag basi masapwan pa ninyo nga nagapakig-away kamo batok sa Dios!”

Ginsunod sang Konseho ang laygay ni Gamaliel. 40Ginpatawag nila ang mga apostoles nga magsulod, ginpabunal kag ginpaandaman nga indi na sila liwat maghambal sa ngalan ni Jesus, kag dayon ginbuy-an sila. 41Naghalin ang mga apostoles sa Konseho nga nagakalipay, tungod kay ginkabig sila sang Dios nga takos sa pag-antos sang kahuy-anan tungod sa ngalan ni Jesus. 42Kag adlaw-adlaw nagpadayon sila sa pagpanudlo kag sa pagwali sang Maayong Balita sa Templo kag sa mga balay sang mga tawo, nahanungod kay Jesus nga amo ang Cristo.

Currently Selected:

Mga Binuhatan 5: MBBHIL12

Highlight

Copy