Mga Binuhatan 4

Si Pedro kag si Juan sa Atubang sang Konseho

1Sang nagahambal pa si Pedro kag si Juan sa mga tawo, ginpalapitan sila sang mga pari#4:1 mga pari: ang iban nga mga manuskrito maypangulo nga mga pari. kag sang mga Saduceo kag sang pangulo sang mga gwardya sa Templo. 2Naakig sila tungod kay ang duha ka apostoles nagatudlo sa mga tawo nga si Jesus ginbanhaw, kag ini nagapamatuod nga ang mga patay pagabanhawon. 3Tungod sini ila gindakop si Pedro kag si Juan, kag ginbilanggo nila sila tubtob sa madason nga adlaw, kay sirom na. 4Pero madamo sang mga nakabati sang ila mensahe ang nagtuo, kag karon ang tingob nga kadamuon nila mga 5,000.

5Sang madason nga adlaw nagtipon sa Jerusalem ang mga pangulo nga Judio, ang mga katigulangan sang mga Judio kag ang mga manunodlo sang Kasugoan. 6Nagpakighinun-anon sila sa Pinakamataas nga Pari nga si Anas, kay Caifas, kay Juan, kay Alejandro kag sa iban pa nga mga katapo sang panimalay sang Pinakamataas nga Pari. 7Ila ginpaatubang ang mga apostoles sa ila kag ginpamangkot, “Sa ano bala nga gahom kag sa kay sin-o ngalan ginahimo ninyo ini?”

8Si Pedro nga puno sang Espiritu Santo nagsabat sa ila, “Mga pangulo sang mga tawo kag mga katigulangan sang mga Judio: 9kon ginausisa ninyo kami sa sini nga adlaw nahanungod sang maayo nga buhat nga nahimo sa piang nga tawo kag kon paano sia nag-ayo, 10dapat mahibaluan ninyo tanan kag sang bug-os nga katawhan sang Israel, nga ini nga tawo nga nagatindog diri sa inyo atubang, nag-ayo sa gahom sang ngalan ni Jesu-Cristo nga taga-Nazaret, nga inyo ginlansang sa krus kag ginbanhaw sang Dios. 11Si#Sal. 118:22. Jesus amo ang ginatumod sang kasulatan:

‘Ang bato nga ginsikway ninyo nga mga manunokod

nanginpamakod nga bato.’

12Ang kaluwasan maagom paagi sa iya lamang, kay wala na sing iban nga ngalan sa bug-os nga kalibutan nga ginhatag sang Dios sa mga tawo nga makaluwas sa aton.”

13Natingala ang mga katapo sang Konseho sang makita nila ang kaisog ni Pedro kag ni Juan kay nahibaluan nila nga ini sila ordinaryo nga mga tawo kag wala sing kinaalam. Dayon natalupangdan nila nga ini sila mga kaupdanan anay ni Jesus. 14Pero sang makita nila ang tawo nga gin-ayo nga nagatindog sa tupad ni Pedro kag ni Juan, wala na sila sing may mahambal pa. 15Gani ginpagwa nila sila sa ginatipunan sang Konseho kag gilayon naghinun-anon sila. 16Nagpinamangkutanay sila, “Ano bala ang himuon naton sa sini nga mga tawo? Ang tanan nga mga pumoluyo diri sa Jerusalem nakahibalo nga ini sila nakahimo sang tumalagsahon nga milagro kag indi naton ini mahimutig. 17Pero aton sila paandaman nga indi sila maghambal liwat sa bisan kay sin-o sa ngalan ni Jesus, agod nga indi na ini maglapnag sa iban nga mga tawo.”

18Gani ginpatawag nila sila pabalik sa sulod kag ginhambalan nga indi na gid sila maghambal ukon magpanudlo sa ngalan ni Jesus. 19Pero si Pedro kag si Juan nagsabat sa ila, “Kamo mismo ang dapat maghukom kon diin sini ang matarong sa panulok sang Dios: ang pagtuman sa inyo ukon ang pagtuman sa Dios. 20Kay indi kami makapugong sang amon kaugalingon sa pagsugid sang amon nakita kag nabatian.” 21Gani ginpahog pa gid sila sang Konseho kag ginbuy-an dayon sila, kay wala sila sing nakita nga kabangdanan agod silutan sila. Ang tanan nga mga tawo nagdayaw sa Dios tungod sang nahanabo. 22Ang edad sang tawo nga gin-ayo paagi sa nahimo nga milagro sobra sa kwarenta ka tuig.

Ang mga Tumoluo Nagpangayo sing Kaisog

23Sang mabuy-an si Pedro kag si Juan, nagbalik sila sa ila mga kaupdanan kag ginsugiran nila sila kon ano ang ginsiling sang pangulo nga mga pari kag sang mga katigulangan sang mga Judio. 24Sang#Exo. 20:11; Neh. 9:6; Sal. 146:6. pagkabati sini sang mga tumoluo nagpangamuyo sila sing tingob sa Dios nga nagasiling: “Ginoo nga Makagagahom, ikaw ang nagtuga sang langit, sang duta, sang dagat kag sang tanan nga yara sa ila! 25Paagi sa Espiritu Santo naghambal ikaw sa imo alagad nga si David nga isa sang amon mga katigulangan sang sia nagsiling:

‘Ngaa bala nagabalingaso ang kaakig sang mga Hentil,

ngaa bala nagapahito ang mga tawo sang mga plano nga wala sing pulos?

26Ang#Sal. 2:1-2 (LXX). mga hari sang kalibutan nagapangaman sang ila kaugalingon,

kag ang mga pangulo nagatingob

sa pagsumpong sa Ginoo kag sa iya Cristo.’

27Kay#Luc. 23:7-11; Mat. 27:1-2; Mar. 15:1; Luc. 23:1; Juan 18:28-29. matuod gid, sa sini nga siudad nagplano si Herodes, si Poncio Pilato, ang mga Hentil kag ang mga taga-Israel batok kay Jesus nga imo balaan nga Alagad kag imo ginhimo nga Cristo. 28Naghiliugyon sila sa paghimo sang tanan nga mga butang nga imo na nga daan ginpat-od nga matabo suno sa imo gahom kag kabubot-on. 29Kag karon, O Ginoo, tan-awa bala ang ila mga pamahog. Hatagi kami nga imo mga alagad sing kaisog sa pagsugid sang imo mensahe. 30Untaya ang imo kamot sa pagpang-ayo, kag itugot nga madamo nga makatilingala nga mga buhat kag mga milagro ang mahimo paagi sa ngalan ni Jesus nga imo balaan nga Alagad.”

31Sa tapos sila makapangamuyo, nag-uyog ang lugar nga ila ginatipunan. Napun-an sila sang Espiritu Santo kag naghambal sila nga may kaisog sang mensahe sang Dios.

Ang mga Tumoluo Nagpakigbahin sang ila mga Pagkabutang

32Ang#Bin. 2:44-45. grupo sang mga tumoluo isa lang sa panghunahuna kag balatyagon. Gintingob nila ang tanan nila nga mga pagkabutang, kag wala sing isa sa ila nga nagkabig sang iya pagkabutang nga iya gid kaugalingon. 33Sa daku nga gahom ang mga apostoles nagpanaksi nahanungod sang pagkabanhaw ni Ginoong Jesus, kag ginbugayan sila tanan sang Dios sing bugana. 34Wala gid sing isa sa ila grupo nga nawad-an. Kay ang may mga duta kag mga balay nagpamaligya sini, kag ang kwarta nga amo ang bili sang ila mga ginbaligya gindala nila kag 35gintugyan sa mga apostoles. Ginpanagtag sang mga apostoles ang kwarta sa tagsatagsa suno sa iya kinahanglanon.

36Gani si Jose nga isa ka Levita nga natawo sa Cipre, nga ginatawag sang mga apostoles nga si Bernabe (nga kon sayuron, “Ang Manugpalig-on”), 37nagbaligya sang iya kaugalingon nga uma, gindala niya ang kwarta kag gintugyan ini sa mga apostoles.

Currently Selected:

Mga Binuhatan 4: MBBHIL12

Highlight

Copy