Mga Binuhatan 3

Gin-ayo ang Piang

1Isa sadto ka adlaw nagkadto si Pedro kag si Juan sa Templo sang mga alas tres ang takna sa hapon, nga amo ang tion sa pagpangamuyo. 2Didto sa ginatawag Matahom nga Pwerta, may isa ka tawo nga piang halin sa iya pagkatawo. Ginayayungan sia adlaw-adlaw kag ginabutang sa sini nga pwerta sa pagpakilimos sa mga tawo nga nagasulod sa Templo. 3Sang pagkakita niya nga nagapasulod si Pedro kag si Juan, nagpangayo sia sing limos sa ila. 4Gintulok nila sia kag nagsiling si Pedro sa iya, “Tulok ka sa amon!” 5Kag gintulok niya sila nga nagapaabot nga may pagabatunon sia. 6Pero nagsiling si Pedro sa iya, “Wala gid ako sing kwarta, pero ihatag ko sa imo ang yari sa akon: sa ngalan ni Jesu-Cristo nga taga-Nazaret, tindog ka kag maglakat!” 7Dayon gin-uyatan niya sia sa tuo nga kamot kag ginpatindog. Sa gilayon nagbakod ang iya mga tiil kag bukobuko 8kag nagtumbo sia. Nagtindog sia kag naglakatlakat. Dayon nag-upod sia sa ila nga nagalakat kag nagatumbo kag nagadayaw sa Dios pasulod sa Templo. 9Nakita sang tanan nga mga tawo nga nagalakat sia kag nagadayaw sa Dios, 10kag sang natalupangdan nila nga ini sia amo ang nagapakilimos anay sa Matahom nga Pwerta sang Templo, natingala gid sila sang natabo sa iya.

Ang Wali ni Pedro sa Templo

11Samtang nagauyat ang tawo kay Pedro kag kay Juan, natingala ang tanan nga mga tawo kag nagdinaguso sila pakadto sa ila sa lugar nga ginatawag “Portico ni Solomon.” 12Sang makita ni Pedro ang mga tawo, nagsiling sia sa ila, “Mga taga-Israel, ngaa bala natingala kamo sini? Ngaa nga ginatulok gid ninyo kami? Nagahunahuna bala kamo nga napalakat namon ini nga tawo paagi sa amon gahom ukon pagkadiosnon? 13Ang#Exo. 3:15. Dios ni Abraham, ni Isaac kag ni Jacob, ang Dios sang aton mga katigulangan nagpasidungog sa iya Alagad nga si Jesus. Pero inyo sia gintugyan sa mga awtoridad sang banwa kag inyo sia ginsikway sa atubang ni Pilato bisan pa nga buy-an kuntani sia ni Pilato. 14Balaan#Mat. 27:15-23; Mar. 15:6-14; Luc. 23:13-23; Juan 19:12-15. kag maayo sia nga tawo, pero ginsikway ninyo sia kag ginpangabay gid ninyo si Pilato nga sa baylo kay Jesus, buy-an niya ang isa ka tawo nga manugpatay. 15Gani inyo ginpatay ang nagapangulo sang mga tawo pakadto sa matuod nga kabuhi, pero ginbanhaw sia sang Dios, kag kami tanan mga saksi sini. 16Ang gahom sang iya ngalan amo ang nagpabaskog sining piang nga tawo. Ining inyo nakita kag nahibal-an nahimo tungod sa pagtuo sa iya ngalan, kag ini nga pagtuo sa kay Jesus amo ang nag-ayo sa iya sing bug-os nga karon nakita ninyo tanan.

17“Kag karon, mga utod ko, nakahibalo ako nga kamo kag ang inyo mga pangulo naghimo sini kay Jesus, tungod kay wala kamo makahibalo. 18Madugay na gintagna sang Dios paagi sa tanan nga mga propeta nga ang iya Cristo kinahanglan mag-antos, kag ini iya gintuman. 19Gani maghinulsol kamo kag magbalik sa Dios agod mapatawad niya ang inyo mga sala. 20Magaabot ang mga panahon sang espirituhanon nga kabakod halin sa Ginoo kag iya ipadala si Jesus nga amo ang Cristo nga iya na napilian para sa inyo. 21Kinahanglan magpabilin sia sa langit tubtob mag-abot ang tion nga pagabag-uhon ang tanan nga mga butang suno sa ginpabutyag sang Dios sang una pa paagi sa iya balaan nga mga propeta. 22Kay#Deut. 18:15, 18 (LXX). si Moises nagsiling, ‘Ang Ginoo nga inyo Dios magapadala sang isa ka propeta nga inyo kasimanwa, subong nga ginpadala niya ako.#3:22 subong nga ginpadala niya ako: ukonpareho sa akon. Dapat ninyo tumanon ang tanan nga ginasiling niya sa inyo. 23Ang#Deut. 18:19. indi magtuman sang ginasiling sang amo nga propeta pagapainon sa mga katawhan sang Dios kag pagalaglagon.’ 24Kag ang tanan nga mga propeta, lakip si Samuel kag ang mga naulihi pa sa iya, nga may mensahe, tanan sila nagpahibalo man sang nagakahanabo sa sini nga mga inadlaw. 25Ang#Gen. 22:18. mga ginsaad sang Dios paagi sa iya mga propeta para gid sa inyo, kag may bahin kamo sa kasugtanan nga ginhimo sang Dios sa inyo mga katigulangan. Nagsiling sia kay Abraham, ‘Paagi sa imo mga kaliwat pagabendisyunan ko ang tanan nga tawo sa kalibutan.’ 26Gani ginpili sang Dios ang iya Alagad kag ginpadala sing una sa inyo, sa pagbendisyon sa inyo agod nga bayaan ninyo ang inyo malaut nga mga pagginawi.”

Currently Selected:

Mga Binuhatan 3: MBBHIL12

Highlight

Copy