Mga Binuhatan 6

Ang Pito ka mga Manugbulig

1Sang ulihi, samtang nagadamo ang mga gintuton-an, ang mga Judio nga ang ila hambal Griego nagreklamo batok sa tumandok nga mga Judio kay ang ila mga balo nga babayi wala matatapi sa adlaw-adlaw nga pagpanagtag sang rasyon. 2Gani, ginpatawag sang dose ka mga apostoles ang bug-os nga grupo sang mga gintuton-an kag nagsiling, “Indi bagay sa amon nga patumbayaan ang pagwali sang pulong sang Dios agod nga mag-atipan sang mga kagastohanan. 3Gani, mga utod, magpili kamo sang pito ka mga tawo sa tunga ninyo nga inyo nahibaluan nga napun-an sang Espiritu Santo kag kaalam, kag sila ang aton padumalahon sini nga butang. 4Kag kami amon magagamit sang bug-os namon nga tion sa pagpangamuyo kag sa pagwali.”

5Naluyagan nila tanan ang ginsiling sang mga apostoles, gani ginpili nila si Esteban, isa ka tawo nga puno sing pagtuo kag sang Espiritu Santo, kag sanday Felipe, Procoro, Nicanor, Timon, Parmenas kag si Nicolas nga taga-Antioquia, isa ka Hentil nga nakonbertir sa pagka-Judio. 6Gindala sila sa atubang sang mga apostoles nga nagpangamuyo kag nagtungtong sang ila mga kamot sa ila.

7Gani nagpadayon ang paglapnag sang pulong sang Dios. Ang mga gintuton-an sa Jerusalem nagdamo nga nagdamo kag bisan pa madamo nga mga pari ang nagbaton sini nga pagtuo.

Ang Pagdakop kay Esteban

8Si Esteban, isa ka tawo nga puno sang bugay sang Dios kag gahom, naghimo sing dalagku nga mga milagro kag katingalahan nga mga buhat sa tunga sang mga tawo. 9Pero may mga katapo sang sinagoga nga ginatawag Hilway nga mga Tawo#6:9 HILWAY NGA MGA TAWO: Ini sila mga Judio nga gin-ulipon, pero nagbakal ukon ginhatagan sang ila kahilwayan. nga nagpamatok sa iya. Ini sila mga Judio halin sa Cirene kag Alejandria. Sila kag ang iban nga mga Judio halin sa mga probinsya sang Cilicia kag Asia nagsugod sa pagpakigsuay kay Esteban. 10Pero indi sila makasarang magsumpong kay Esteban kay ang Espiritu naghatag sa iya sing kaalam sa paghambal. 11Gani ginsuholan nila ang pila ka mga tawo sa pagsiling, “Nabatian namon sia nga nagahambal batok kay Moises kag batok sa Dios!” 12Sa sini nga paagi ginsugyot nila ang mga tawo, ang mga katigulangan sang mga Judio kag ang mga manunodlo sang Kasugoan. Ginkadtuan nila si Esteban kag gindakop kag gindala sa Konseho. 13Dayon may ginpasulod sila nga pila ka mga tawo sa pagsaksi sing butig batok sa iya. Nagsiling sila, “Ini nga tawo pirme lang nagahambal batok sa aton balaan nga Templo kag sa Kasugoan ni Moises. 14Kay nabatian namon sia nga nagsiling nga ini nga Jesus nga taga-Nazaret magarumpag sang Templo kag magailis sang tanan nga mga kinabatasan nga ginpaalinton sa aton halin kay Moises!” 15Ang tanan nga katapo sang Konseho nagtulok kay Esteban kag nakita nila nga ang iya guya daw iya sang anghel.

Currently Selected:

Mga Binuhatan 6: MBBHIL12

Highlight

Copy