Márko 6

Yíésu gál ényle hí điidhe

1Yíésu ál kinaal gaa kie, ˈjienlé gáá guđandheká mé nie. Mú lalille hí el gaa veere. 2Kúlích Hef ˈGisanká ali kí ˈdiiyyeká mu gálaat ˈbíl ˈdiiyiminyká he gaa onisie. Gál burnayká mú he onisinyle maaleká he af ˈdabe. Gaal kieye, Máállá hééllá ále gaa arge? ˈDaalim muí argéél he ˈdaalim máre? Hé fargogo ke af ˈdaˈdabóól muí ekemeyóol? 3Máállá hé máá ˈguor hođuoká muunîny? Mu hé iny Maria giri nyaaramle mú Yákob, Yoséítos, Yúúˈda, tá Símon, héétí mú nyaaramlé ˈdeitká hé ke hol állá af ijóóllá muunîny? gaalí yie. Aalé gaal mú shúón gaa nebedhe. 4Aalé Yíésu gáál geey, kieye, Máá Waag hí ˈdéé ka shigichoká hé gaalí kikiat. Gál léslé, gál énylé, tá gál ˈbíl ílle tákáma hí ma kikian, hí điidhma, muí yie.

5Tá Yíésu íín hé hé níínní gaalí af ˈdaˈdabo-, ál kinaal gaa ekeyká mán. Mu taalle gál iraam mán-, basham ˈgieká gil ˈdú fie, gáál bisie. 6ˈDaa giri gaal mú iiy ma yéenká in mu hééllá af ˈdabe.

Yíésu lalillé tomon a naamaká alb fie

Aalé Yíésu ˈjien gaa sedhe, gálaat he onisie. 7Gál láli-, tomon a naamaká muí hol ˈdu gáá vie, hát nanamaká muí hol ki ˈdane, muí alb fie, muí fargogint aryáán ki aruanká shie. 8Yíésu lalille ˈdéé ki mure, gaal hai hé ˈgierich ki nannaatká shúúnan, ˈgulo tákámle gaalí shuunat, gaal hai ˈguom ubaa shomodhaam éen, gaal hai bíre saaw fáan, 9gaalí koiy ˈgas faat, gaal hai đafaraam nanam hol ˈdú fáan, yie. 10Aalé mu gáál geey, kieye, ˈBíl hí ki faanaká taalle gaa yíéđía, ˈdaab hí ál kinaal ma gáá kíinyká. 11Ény hí ki faan-, gálle hí ma shuunan-, tá hí af nee ma kokonyká hí gáá kekeennoká ˈgaskícho shére gaa ˈdodhdhíe. Hát kinaallá in hát gaalí he ki ˈdeeneyká gaalí kiimita, yie.

12Aalé gaal kie, gálaat fayám shie, giri gaal héllé ˈdeđewká haađuo-, Waag makan fafaanká. 13Gaal aryaan burnayyeká gálaat yé gaa ˈdeey. Gaal gál burnay-, basham ˈguoká salab shugudie, gáál bisie.

Yuána gálaat bie gim nannuoká kúfáchlé

14Yíésu meenyle hát les lulle eiy ki bash yieká fayamle máá kansich Heróˈde hí maale. Gáál ˈdáá tikiˈd kieye, Yuána giri gálaat bie gim nannie-, kufeká uushich yé gáá ˈdie, in aalé fargogintééllá arge, hé ki af ˈdaˈdabóóllá ekemeye.

15Gáál ˈdáá tikiˈd kieye, Máállá he Elíya. Gáál ˈdáá tikiˈd kieye, Máállá he gál héle gáál ˈdeeny Waaˈgiet geđieká mú tikiˈde, yie.

16Heróˈde héél maaleká kieye, Yuána giri yú mé gaa mureká hé ˈguoˈd yé gáá ˈdie, yie.

17Heróˈde hatallá yíéllá he ˈdaa giri íín gáál ali fie-, gaal Yuána ká ˈgiliˈgay-, mú hiigidheká. Hé muí hééllá ki ekeyallá he ˈdaa giri mu nyárlé Fílib minlé Heróˈdias eedhdhe-, 18aalé Yuána Heróˈde geey-, kieye, Kúún min nyárkú eetééllá, hé ma midhanany, yieká. 19Heróˈdias Yuána súm nebete, kerka mú chegeská he feˈde, hé kinaal hí ká adhdhe. 20Heróˈde af kinaal hé Yuána kikiadhe. Hé kinaallá he ˈdaa giri Yuána he máá ˈdúwa-, Waaˈgietká. Aalé mú in gaa yíéđie. Heróˈde ˈdeeny Yuana nee kokoyká fede, har úba káána Yuána ˈdeeny he hodheká mú neesieka.

21Waaséél kúlích Heróˈdias hí ˈjiirtle yé ki ˈdeđisatká bííyle ká biˈde. Kúlích kinaallá he kúlích Heróˈde hí gál guguđo-, gubaayá met ki ˈgieká ubaa yuoy gállé kaansúoká, tá gál Galilaaya-, guguđoká golmuo-, muí ˈdalmaatle táb gaa ˈdoˈdootká. 22Aalé ini Heroˈdias ˈbíl hille-, laalateká Heróˈde ubaa gál hol af ijeká ger hí gaa meedhe.

Heróˈde đo ini geey, kieye, He lullé feˈdoká ye ka géesh, ha yú ko ká shigia, yie. 23Mu đo Waag ˈdodhdhe, ini geey, kieye, He lullé ye heesetoká ha yú ko ká shigia, har úba káána lés yú mé ki yaalallá ˈdáá tikiˈd kátaka, yie.

24Aalé ini yíé ˈdiiyye, ˈjielle heesete, kieye, Meete yú rogonmo? chie.

Ini ˈjielle kieye, Yuána giri gálaat bie gim nannuoká meenyle ye kí muuˈdoká yú fede, áat, chie. 25Ini đo hagisate, geđi ˈbíl hille, máá giri kansichká met ki ˈdiiyye. Mú ruogonne, kieye, Yú káánallá ye Yuána giri gálaat bie gim nannuoká meenyle kí muuˈdo-, ye ˈbakalich kí kakayoká fede, chie. 26Aalé máá giri kansichká súm geer hí gaa ˈdeenedhe, kor mu ˈdaa giri Waag ˈdodhdhe héétí gál hol ˈgar golmoteká úba ali ijeká hé ini héllé heeseteká ma rîny. 27Aalé máá giri kansichká đo máá yuoyoká ali gaa kaay, mú ˈdéé ki mure, giri meeny Yuana muí ká siidhoká. Aalé máá yuoyo kinaal ˈbíl hiiginká sedhe, Yuána mé gáá muˈde, 28mé ˈbakalich gáá kaadhdhe, ini ˈdu gáá sidhe, ini íín hí ˈjielle ˈdú site.

29Yuána gállé láliká mú hát gaalí mé gaa muˈdeká maaleká kie, mú gónle ká eedhdhe, mú úúshích liishoká gaa kaay.

Yíésu gál shíí chen gololie

30Yíésu gállé alb fimiká hol ˈdu gáá yimie, Yíésu af kí ˈdie. Gaal héllé he eekemeyká ubaa hé gálaat onisieká fayamle mú shie. 31ˈDaa giri gál burnayká hol ˈdu gáá yiimet-, tá hol el ˈgiˈgisatká gaal ál ki golmosotká ˈdabe. Aalé Yíésu gáál geey, kieye, Ka yimedhíe, kí ál gaa guđoká tákámkúnno yé ki ˈdie, kí héf ˈgisat, yie.

32Gaal tákámle kadich hile, ál gaa guđo-, gálaat mánká mé nie. 33Gál burnayká gaal sesemeká gáál arge, gáál kimite. Gaal ˈjien lúl gaa ˈdoˈdodhe, Yíésu met đufe. Ál giri gaalí sesemeká gáál met hile. 34Gaal kadich gáá leedheká Yíésu nyésébích ilishká arge. Gaal hát wala máá hí ˈdeˈdeen-, mánká ká ˈgee. Mu đo gáál geer hí ˈdú gudhdhe. Mu gáál hé burnayká onisie.

35Aadh gaanateká mú lalille hí ˈdu gáá yimie, gaal kieye, Hééllá ˈbakate, aadh káána hé gaanate, 36gálaat hí eiy kie, hí ˈjien ˈjóballá ˈguom gaa yiat, yie.

37Aalé mu gáál ˈdéé hol ˈdú nie, kieye, Itín gáál hé geere shía, yie.

Gaal mú geey, kieye, Hé kinaallá bíre máádhat hí ˈguiyam síet gaa kokuoká lullé beđita. Nyí seete, bíre kinaal nyí balashá gaalí kokuoká ká yíáta? yie.

38Mu gáál heete, kieye, Balashá mia hí ˈgayya? Sedhíe, ka dhaayyíe, muí yie. Gaal ˈguom argeká kieye, Balashá chen, bee naama, yie.

39Yíésu gáál ˈdéé ki mure, gálaat hí hol eiy mumuro, hí ísh ˈgileeballá gaa yíéđuo, yie. 40Gál giri shíí chenká af muumuˈde, áltí kúˈd, áltí kúˈd, áltí tomon chen, áltí tomon chen. 41Yíésu balasha giri chenká ubaa beeny giri naamaká eedhdhe, úr gaa dhaay, Waag ˈgielmít hol ˈdú nie. Mu balashá eiy ˈgiˈgidhie, lalille shie, giri gaalí gálaat af fafuoká. Beeny giri naamaká úba muí gálaat lulle eiy ki mumure. 42Gaal lulle gololte, heyie. 43ˈGuom giri gaal hí ˈdú heyie-, ka naateká gaal hí hol ˈdu gáá shuune, balashá ubaa beenyle illam tomon a naama koch koch. 44Gál yááb ˈguom kinaal koeyká shíí chen.

Yíésu bás ˈdug gaa sedhe

45Aalé Yíésu đo lalille kadich fie, giri gaal mú met nannaat-, bás ílunglé ˈdaati-, ény Beđesaidaká yé ki ˈdeˈdeen-, ˈdaab mu íín nyesebich eiy gagalioká. 46Mu gáál hol in eiy ka kieká mu sedhe, gúm feˈjie, giri Waag vivisatká.

47Gelga-, kadich he bás hurt ˈdarameká mu íín tákámlé baaˈd ije. 48Mu gáál argeká mú lalille yaaw bie gaa armita, gáál waanich hí ˈjeʼ. Aaléka bar hátlé gil ma ka sînká, Yíésu bás ˈdug gaa sedhe, lalille ˈdú sedhe, mu onnônyka gáál láá hai naadhe. 49Gaal mú argeká mu bás ˈdug ˈdú see, mú gaaramo he yie. Gaal kúóˈd ˈdoy. 50Gaal lulle mú argeká sierm ˈdeewká hí faanne. Mu đo gáál geey, kieye, Haí néeny, he yú, sierm hayyíe! yie. 51Aalé mu gáál hol kadich ˈgar hile, waanich đo ali ki ˈdie, Yíésu lalille súm he hát ˈdeđewká af ˈdabe. 52Gaal hé tág met guogo, gaal hé balasha giri muí heersieká hélle hátle ma kimísan.

53Aalé gaal bás hođoˈd ˈdoy-, Genésaret ílungle ki ˈdieká kadich mé ˈdisse. 54Tikiˈde giri gaal kadich yé gáá ˈdieká Yíésu đo gaalí kimite. 55Gaal ˈjien gáá ˈdoˈdodhdhe, gál basham ˈguoká ká shuunne, ál giri mú ki maaleká gáál ká sisidhe. 56Alb lullé muí sesemeká, forim yíekaʼ, ˈjien yíekaʼ, lesam yíekaʼ, gál basham ˈguoká alb himanoká ha gaalí kí shuune. Gaal mú gil hai ki efe, giri mú đafarle net chiiratká. Aalé ameeny gál mú đafarle đig yieká lulle bie.

Currently Selected:

Márko 6: dsh

Highlight

Copy