Márko 7

Hé Waag hí feˈdoká ubaa siraat gálaat hol ká eiyye

1Gál Farisaayká ubaa gál nyatalaamká ˈdáá tikiˈd Yerúsalem gáá kie, Yíésu ˈdu gáá yimie. 2Gaal Yíésu lalille argeká gáál ˈbáál hátlé gil ma ˈjíanká ˈguom kokoo. 3Gál Farisaayká ubaa gállé Yisirayelká lulle ˈdaab gil hát ˈdabaanká ma ˈjíanká hé ˈguom ma kokony, hát giri gáál siraat eshim eshimle hí chieká. 4Gaal úba alb himietká gáá yimieka, ˈdaab bie ma ˈdú faafáanká hé ma golmoson. Nyatalaam éíy taaka burnayká úba gaalí el gaa veere. Illam gaalí he gaa igianká, illam he koonyietká, tá káláám oroonká úba ha gaalí gaa ˈjiˈjia.

5Aalé gál Farisaayká ubaa gál nyatalaamká Yíésu heete, kieye, Háteka lalikú siraat eshimká ma ki iđiny-, gaal hátlé gil ma ˈjíanká ˈguom kokúol? yie.

6Yíésu gáál ˈdéé hol ˈdú nie, kieye, It halúg gál ˈduuˈdúwaká hol hođicháal! ˈDeeny héle Waag hí Yisááya ka shiiche-, Yisááya hí veereká gon ˈdaakíchoka hé ˈduwa, giri Waag kieye,

Gálallá taalle afo ye ki memeye,

gerle hé tág ye gaa fág.

7Gaal hállééllá ye vivita.

Gaal he onisinylé gálaat oonisuoká

he he onisiny taalle gálaat hí metle kí mumuroká,#7:7 Yisááya 29:13

chieká.

8Itín it hemuumurit Waaˈgiet hayche. Aalé káána itín siraat gálaato tákáma hí el gaa igiˈda, Yíésu hí gáál yie.

9Aalé mu gáál geey, kieye, Hemuumurit Waaˈgiet ití gíl sug ki hayche, giri nyátálkícho hí el gaa verennoká. 10Móshe kieye, ˈJaakú uba ˈjiekú kiikíaw.#7:10 Yíéˈdími 20:12 Mu geđi kieye, Máá ˈjaalle yíékaʼ, ˈjielle yíékaʼ chaacharoká gaalí yeeso,#7:10 Yíéˈdími 21:17; ˈDeemano Gál Levi 20:9 he yie. 11Tá Itín íín hí kieye, Máádhat ˈjaalle yíékaʼ, ˈjielle yíékaʼ geey-, kieye, Hé onnônyka yú ko ka shigieká, yáá ko ma ká shiginy. 12Hé kinaallá he hé shiicho yú Waag shiguoká, muí yieka, mu gállé hí ˈdaleká héllé onnônyka shigieká hí mú ká riate. 13Itín hé kíchia hí gálaat oonisichaká ubaa ˈdeeny Waaˈgiet hé hol ma ki ekeneny. Nátálkícho gálaat hí súm el gaa verenoká hí feˈde, in hí hé burnayallá ekemesete, muí gáál yie.

14Yíésu geđi nyesebich ká vie, kieye, Lulkícho ye af nee kóo, ˈdeenyééllá eiy naatíe. 15Hé níínní baaˈd gáá yiimet-, máádhat higilo-, mú ˈdeđeneyoká mán. Máádhat hé geer ki taawuo-, af gáá hogodhoká in hí ˈdeđeneye, yie. 16[Máá nee ˈguoká hí hééllá maalo.]#7:16 Gárallá hé warˈgasam heleká ˈbaal gaa mán.

17Aalé mu nyesebich hay-, ˈbíl hileká lalille hí ˈdeeny kinaal hélle heete. 18Yíésu kieye, Itín úba it ˈdaalim hí he eiy ki nannasatká mân? Hát hé níínní baaˈd gáá yiimet-, máádhat higilo-, mú ˈdeđeneyo mánnallá hélle ití ma kimísan? 19ˈGuom hé kas máádhat ma higiliny. Muí koeyka đo baaˈdo muí yíéđie, yie. Hééllá ˈdaa Yíésu hí ki yíéllá, he kieye, ˈguom lulle hé ˈguom ˈdeewká mán.

20Aalé mu geđi ˈdéé huogodhe, kieye, Máádhat hé hí ˈdeđeneyoká he hé hí geer yé gáá ˈdeˈdeenká. 21Máádhat geerle in hé burnay-, ˈdeđewká hí yé gáá ˈdeˈdeme, hát káána tawuny ˈdeewká, herginy gálle hol ma shúúnanká, buraa, máádhat oosó, 22hol buraa, gajálti, féén, nyimisan, kern mánti, il ˈgany, máádhat méé ˈdeeneny, hol meeny, tá hol mé rími. 23Hééllá lullé ˈdeđewallá geere yé gáá ˈdeˈdeme, in máádhat ˈdeđeneye, muí yie.

Min tikiˈd iiy yeenlé

24Aalé Yíésu ál kinaal gáá kie, lés Turo innumle mé nie. Mú ˈbíl hilitle gaalí aargiroká muí má fedo, kor mu hát níínní hol kaawká mán. 25Ál kinaal min inille aryáán ˈgayye mare mú maalleká đo siete, mú ˈgas met les gaa ˈdoyye, 26mú gil ki efiyye, giri inille muí aryáán yé gaa ˈdeđuoká. Min kinaallá kidh hí taaka, kídhle meenyle Héllen, đuurich hí máá Siria-Foinike.

27Yíésu min geey, kieye, Um hí er heyuo, um ˈguomlé kokuoká ki gaa egew-, ki chier shiguoká hé ma midhanany, yie.

28Min mú ˈdéé hol ˈdú niiyye, kieye, Hé ˈduwa, Máá Guđo, chier úba hé ká yiimet, ˈguom um hí les ki okodmuoká les gaa shugunat, kokuo, chie.

29Aalé Yíésu min geey, kieye, ˈDaa giri ˈdeenyéél hol kí niiyyeká, sí, aryáán hé inikú yé gaa ˈdiiyye, yie.

30Aalé Min ényle hol ˈdú naate, inille kúb ˈdú iiyye, ini aryáán hí yé gaa ˈdiiy.

Yíésu máá nee ubaa af mánká bisie

31Yíésu geđi Turo gaa kie, ˈjien Siˈdon gaa nadhe, sedhe, ˈjien ˈDekaboles giri Bás Galilaaya in ijoká mé đig yie. 32Ál kinaal gáál mé tikiˈd máá nee mán-, ére mé guđo mare Yíésu ˈdu gáá eey, giri Yíésu hí đig yegetká.

33Aalé Yíésu mú nyesebich tól gaa eedhdhe, mú gumurle nee in gaa kuokoy, mú abarany ˈdú lay, mú ére đig yie, 34úr gaa dhaay, hím guđoká naate, kieye, Éfata! yie. Hé kinaal hélle kieye, Éíy ˈdé! 35Héél muí hodheká máá giriká đo nee hí eiy ˈdie, af hí yé ká ˈdie, ˈdéé hát ˈdabaanká huogodhe.

36Aalé Yíésu gáál il gíl gaa helie, giri gaal máádhat hééllá ma mamalsinyká. Har káána mu úba gáál súm il gíl gaa helieka, gaal hé geđi súm ˈdéé biiy fie. 37Gaal lulle héél súm af ˈdabe, kieye, Máállá hé ˈdabaanká lullé ekey. Gál nee mánká nee eiy ˈdeđia, gál af mánká af kakaa, gaalí yie.

Currently Selected:

Márko 7: dsh

Highlight

Copy