Márko 5

Yíésu máá aryáán ˈgieká bisie

1Aalé gaal lés Gerasanno bás ílung ˈdaatí ki fame. 2Yíésu hátlé kadich gaa leedheká máá aryáán ˈguo mare ál gaalí gál kufeká ki ˈgoˈgodho-, liishó mare, yé gáá ˈdie, Yíésu hol met kí ˈdoy. 3Máá kinaallá liishó gaa ije. Hé máá níínní úba hí sibilaam ki ˈdanoká mán. 4Gálaat af burnayká mú sibilaam ˈgas ubaa gil ki ˈdane, kor mu sibilaam giri hí gil ki ˈgieká eiy ˈgieˈgite. Mu muulam ˈgas met ká ˈgieká tune, eiy ˈgieˈgie. Mú hé máá níínní hí ká mooyoká mán. 5Mu kulich ubaa chúúrélle ligisham giri uushimká he gaa ije, in gumano gaa feˈjime, koˈdam gaa ˈdaˈdie, hol waar ki mumure.

6Mu Yíésu bííy fag ká argeká mú agim ˈdodhdhe, mú met les kurram gaa ˈdoy, 7af súm úr ki eey, kieye, Yíésu Iny Waag Úr Iđóóllo, meete ke hol ká ˈgaa? ˈDaa meeny Waaˈgieto yú ko ki ruogone, ha ye manyjasîny! yie. 8Hé muí hatallá ki yíéllá, he ˈdaa giri Yíésu mú geđie-, Aryaan ˈdeewallo, máállá yé gaa ˈdé! yieká.

9Aalé Yíésu mú heete, kieye, Meenykú háteeye? yie.

Máá giriká ˈdéé hol nie, kieye, Meenychú Nyesebich, ˈdaa giri nyí ki burnayyeká, yie. 10Aalé mu súm Yíésu ruogone, giri Yíésu aryáán lés kinaal ma gaa aruminyká.

11Aalé síri ˈjobintlé kinaal golchom burnayká gaalí gaa ˈdeˈdeme. 12Aryaan ˈdeewallá Yíésu ruogonne, kieye, Nyí golchom ˈdú árig, nyí golchom hilla, chie. 13Yíésu aryáán ˈdéé met gaa eedhdhe. Aalé aryáán yíé ˈdiiyye, golchom giriká hille. Golchom lullé shíí naamaká síri gáá okoˈde, bás fame, ˈdiiđime, kufe.

14Aalé gál giri golchom ˈdeˈdemeká ˈdoˈdodhe, fayam kinaal ˈjien gálle ubaa gál lesam gaa ijeká geey. Gálaat hol ˈdu gáá yimie, he arge. 15Gaal Yíésu ˈdú sedhe. Gaal mú arge, mu ubaa máá aryaan nyesebichká ˈgieká hol af ija. Mu đafaraam fádhdhe, me hí mídhab! Gáál sierm hí faanne. 16Gál héél argeká gálaat fayám shie, máá aryáán ˈgieká ˈdeenyle tá ubaa golchom fayamle gáál geey. 17Gaal Yíésu ruogone, giri muí lésle gaa kekeenká.

18Yíésu kadich higileká máá giri aryáán hí yé gaa ˈdiiyyeká hí ruogone, giri mu taalle Yíésu hol egeetká. 19Tá Yíésu hé iiy ma yéen, mu mú geey, kieye, Ény gálkú sí, Máá Guđo Waag hát geer hí ko ˈdú gudhdhééllá ubaa hé midhab muí ko ki ekeyallá fayamle gáál shíish, Yíésu hí mú yie. 20Máá giriká đo ali gaa sedhe, ˈjien ˈDekaboles mé nie. He lullé Yíésu hí ki ekeyká fayamle gálaat shie, gaal lulle he af ˈdabe.

Yíésu ini Yairas ubaa min báásh ˈgayye mare bisie

21Aalé Yíésu geđi kadich hile-, bás ílung ˈdaatí yé ki ˈdieká nyésébích guđoká mú ˈdu gáá yimie, mú ki made. Mu íín bás innó he yiel. 22ˈBíl ˈdiiyiminyká gállé kaansúoká tá máá gaalí Yáíras yeget mare ká yimie. Mu Yíésu argeká mú ˈgas met les gaa ˈdoy, 23kieye, Ini chia ninni mare hé tág ayaˈgiyye. Ha yú ko ruogone, káde, ini gílkú ˈdug ˈdú íífish, hí biiyo, hí les ˈdug ˈdú yíéđiyyo, muí yie.

24Aalé gaal hol eedhdhe, nyesebich mú el gaa veere. Gaal mú kuˈd ki yie, mú ki tame. 25Ál kinaallá hé min warram tomon a naam fas hí gaa hegele mare úba hí gaa iđe. 26Min kinaallá gil ony burnayyeká he gaa siete, tá hí gon bolosiche. Min héllé ˈgayyeká lulle gilóny hí gaa gusate. Tá min hé fuu á níínni mare ma chéen, min yaalmít geđi hí súm ˈdeenete. 27Min Yíésu fayamle maalleká nyesebich hurt ká naate, mú sug kí ˈdiiyye, mú đafar đig chie. 28Min hát he tawuyyeká kieye, Mú đafarle yú đig yieka, yú đo ha bie, chie. 29Min mú đig chieká fás giri ˈjibimeká đo ali ki ˈdie, min hát he biiyyeká hol gónle ki shuunate.

30Yíésu hát fargogínt hí gónle yé gaa ˈdiiyyeká hol ki arge. Aalé mu nyesebich bala ki nie, gáál yiete, kieye, Mááya ye đafar đig yie? yie.

31Mú lalille hí ˈdéé hol ˈdú nie, gaal kieye, Nyésébích guđo ko ki made-, argiyyóóllá, máá ko đig yieká háte hegesete? yie.

32Aalé Yíésu gáál il gaa nie, giri máá héél ekeyal aargiroká. 33Min giriká hol héél ki argiyyeká neeyye, fađanne, ká chimie, mú ˈgas met les gaa ˈdoyye, hé ˈdúwaká huogote. 34Aalé Yíésu min geey, kieye, Veelééllo, iiy yeen kua ye iiy chíéllá hé ko bisiche. Waag ki sí, ál ko gáá ˈdiiyyééllá hát ˈdabaanká gaa bé. Naaná yíéđig, yie.

35Yíésu hátle ˈdéé af ká ˈgaa, gálaat Yáíras giri kansichká ényle gáá fame. Gaal mú geey, kieye, Inikú hé mán chie, ha Máá gáál he oonisúóllá hállééllá hawul ˈgéˈgen, yie.

36Yíésu hé gál ˈdéé hogodheká a nee ma kôny, máá giri kansichká geey, kieye, Ha néeny, iiy tákámle áat, mú yie.

37Mu gál he hol egedhdheká síé rie. Bétiro, Yákob, tá Yuána giri Yákob nyárléká tákámle hol eedhdhe. 38Aalé gaal ény máá kansich kinaal ki fameká Yíésu gál guđo-, bebeen-, shiilmisatká arge. 39Aalé Yíésu ˈbíl hile, gáál geey, kieye, Háteka hí kúóˈd ˈdoyye-, hí hatal buoyéel? Veel hé ma kúfiny, hai rafe, yie. 40Aalé Gaal đo mú eeshey.

Mu gáál lulle ˈbíl yé gáá ˈdeey. Véel ˈjaalle ubaa ˈjielle tá gállé hol ˈgieká vie. Gaal ˈbíl geer veel hí gaa iifeká mé nie. 41Mu véel gíl chiˈde, véel geey, kieye, Talídha kúum! yie. Hélle kieye, Ákutú, ha yú ko geey, les gaa keʼ. 42Veel giriká đo les gaa kie, hol gaa seeseme. Véel warram hí tomon a naama. Aalé gaal đo súm he af ˈdabe. 43Yíésu gáál súm il gíl gaa helie, ˈdeenyééllá ha máádhat hí mááliny, yie. Mu úba gáál geey, giri véel gaalí hé geere shiguoká.

Currently Selected:

Márko 5: dsh

Highlight

Copy