Lúka 3
3
Yuána giri gálaat bie gim nannieká ˈdiiyiminylé
1Bár giri Kaisar Tibériyo hí les máállé súm guđo kansichká gaa onnoyká tá wárlé ki tomon tikiˈde a chenká, Bonti Bilááto íín lés Yuuˈdia mé ki yiel. Bár kinaal úba Heróˈde#3:1 Heróˈdééllá he Heróˈde giri gaalí Antibas yegetká. he máá kansich Galilaayaká. Heróˈde nyárlé Fílib íín lés Ituria ubaa lés Tarakoniti kansimle ˈgie. Lusánias íín lés Abileenno he kansimle ˈgie. 2Aalé af giri Ánnas ubaa Kayáfas gál guguđo-, méte suoryoká onnoyká, Yuána giri Iny Sakariaká ˈbakate gaa ije, Waag hí ˈdéé ká shiiche. 3Mu lés wár Yorˈdan ˈdinnamle lulle iđoká af gaa veere, gálaat ki ˈdiiyime, giri gaal héllé ˈdeđew-, eekemeyká gil sug ki haađuo-, gaal Waag makan fafaan-, gáál gaalí bie gim nannuo-, gáál Waag hí ađaabanolle ubaa nyuogimle gaa egeyyoká. 4Yisááya giri Waag hí ˈdéé ka shigicheká, ˈdeeny he warˈgatle gaa veereká hé ˈduway. ˈDee kieye,
Kóˈd máádhat ˈbakat ha gaalí gaa maala, kuoˈd kieye,
Máá Guđoká met les ˈdiidháa,
mú ˈgierimle lođuđaat kóo.
5Golb lulle úr hai kí keeme.
Gumano lulle hai ká leedhe.
ˈGierim kuongʼodoká lođuđaat hai ˈdeeme.
ˈGierim mokodaam ˈguoká hai saalnadha.
6Gálaat lulle Waag rúbáchle il hai ki aargira,#3:6 Yisááya 40:3-5
hai yeedhe,
ˈdee hí yie.
7Aalé Yuána nyésébích hí ˈdu gáá yimie-, bie gim nannieká geey, kieye, It ˈdálto chaaráal! Mááya hí fuute, hí idho Waaˈgiet ka chiimetoká met kar gaa ˈdonyle geey? 8Saano húgúmle midhab-, gálle Waag makan fameká ˈgáa. Tá haí hol geđîny, hí kieye, ˈJaakúnno he Abirááyam, hí chégen. Yú hí geeye, Waag waarééllá um Abiraayam hođichoká hé uˈdo. 9Aaléka, Waag hé yerellé alléká tág ká chirate, ˈguor đuur ˈdú koyye. Ameeny ˈgór saano midhabká hí ma gáá higisinyká lulle ali ha muí gaa muura, ˈjiet ha muí gaa verene, Yuána hí yie. 10Aalé nyesebich mú heete, kieye, Háte nyí ˈdeenne? yie. 11Yuána gáál ˈdéé hol ˈdú nie, kieye, Máá kosam naam ˈguoká hí kóte tikiˈd máá kóte mánká shio. Máá ˈguom ˈguoká úba hí hát tikiˈde kinaal ˈdie, muí yie.
12Gál gibíre guguteká úba ká yimie, giri Yuána hí bie gim nannuoká. Gaal mú heete, kieye, Máá gáál he oonisúóllo, háte nyí ˈdeenne? yie. 13Mu gáál geey, kieye, Haí gálaat nyiimísan. Gibíre ˈdaˈdablé giri gaalí ki mureká ki guugutíe, muí yie. 14Gál yuoyó-, mangis mare úba mú heete, Tá nyíín, háte nyí ˈdeenne? yie. Yuána kieye, Haí hé gálaat farguoginsano ki shugúnan, hé hódhoká úba hí gálaat a ka kâny. Birm kíchia hí símísle dhidhiˈdaká hí gaa ˈdoyyo, gáál yie.
15ˈDaa giri gaal Messíya giri ˈdeenyle gaalí Warˈgat Waaˈgiet gaa veereká met egeseká gaal lulle gerle ki tawue, kieye, Máállá taalle Messíya máámaʼ? he yegie. 16Aalé Yuána gáál geey, kieye, Yú tuuˈdchú íín bie hí gim nannaa. Tá máá ye far ˈdú gogoká hai ká yiimedhe. Yáá ˈduuw ˈguo-, mú koiyle saawle fuuroká mán. Máá kinaallá íín Hím Naasan Waaˈgiet ubaa ˈjiete hí gim nannaa. 17Aaléka mu hé múchlé sííndí ki tutunoká gíl ká ˈguo, giri mu sííndí tuneka, ál sííndí ki tune kinaal gaa hegedho-, sííndí buitle fafuoká. Tá sííndí metle íín ˈjiet ma kufuminyká hai gaa verene, Yuána hí yie.
18Aalé mu gáál atim éíy burnayyeká geey, gáál Fayam Midhab Waaˈgietká úba shie.
19Aalé Yuána máá kansich Heróˈde ki lole. Mu Heróˈde héllé ˈdeđew eekemey-, máálle min nyárlé giri gaalí Heróˈdias yegieká eedhdhe-, minle hote-, tá ubaa héllé éíy taaka ˈdeđew-, eekemeyká geey. 20Aalé Heróˈde đo Yuána ˈdú idhane, héllé ˈdeđew kinaal đo geđi hé éíy taaka a ˈdú kaay, mú ˈbíl hiiginká gaa kaay.
Yíésu bie gím nímlé
21Af giri Yuána hátlé Heróˈde hí ma hííginká, Yuána gál ka yimieká lulle bie gim nannieká Yíésu úba bie gim nie. Yíésu hátle Waag vivita úr af hí furme. 22Hím Naasan Waaˈgiet hát yaalmit holeká mú ˈdu gáá leete. Gálaat ˈdéé úr gaa maale, ˈdee kieye, Kúún he Iny chia yú gielká, kó tág ye geer gaa meeyche, ˈdee hí yie.
Yíésu ˈbíl íllé
23Yíésu af giri he onisinyle mé gáá kokodheká warram hí tomonaam seđe. Gálaat tawuny leka kieye, Yíésu he iny Yuosefo, he yegie.
Yíésu eshille he Héli.
24Héli he iny Mataat.
Matáat he iny Levi. Lévi he iny Malki.
Málki he iny Yanay. Yanây he iny Yuosef.
25Yúósef he iny Matatias. Matatías he iny Amos.
Ámos he iny Naum. Náum he iny Hesili.
Hésili he iny Nagay.
26Nagây he iny Maat.
Máat he iny Matatias. Matatías he iny Shemey.
Shémey he iny Yoseg. Yóseg he iny Yoˈda.
27Yóˈda he iny Yonan. Yónan he iny Resa.
Résa he iny Serubabel. Serubábel he iny Salaatiel.
Saláátiel he iny Neri.
28Néri he iny Malki.
Málki he iny Ađi. Áđi he iny Kosam.
Kósam he iny Elmaˈdam. Elmáˈdam he iny Era.
29Éra he iny Yoshua. Yóshua he iny Elieser.
Elíéser he iny Yuorim. Yúórim he iny Mataat.
Matáat he iny Levi.
30Lévi he iny Simion.
Símion he iny Yuuˈda. Yúúˈda he iny Yuosef.
Yúósef he iny Yuonam. Yúónam he iny Elyakim.
31Elyákim he iny Meliya. Melíya he iny Menna.
Ménna he iny Matadha. Matádha he iny Naatan.
Náátan he iny ˈDawuˈd.
32ˈDáwuˈd he iny Yeshay.
Yeshây he iny Yobed. Yóbed he iny Bowas.
Bówas he iny Shalmon. Shálmon he iny Naashon.
33Nááshon he iny Aminaˈdab. Amínaˈdab he iny Aram.
Áram he iny Heseron. Héseron he iny Beres.
Béres he iny Yuuˈda.
34Yúúˈda he iny Yakob.
Yákob he iny Yisak. Yísak he iny Abiraayam.
Abirááyam he iny Tera. Téra he iny Nayor.
35Náyor he iny Serug. Sérug he iny Rew.
Rêw he iny Beleg. Béleg he iny Eber.
Éber he iny Shela.
36Shéla he iny Kenan.
Kénan he iny Arbakashaˈd. Arbákashaˈd he iny Shem.
Shêm he iny Nowa. Nówa he iny Lamek.
37Lámek he iny Metushela. Metúshela he iny Enok.
Énok he iny Yared. Yáred he iny Maalalel.
Máálalel he iny Kenan.
38Kénan he iny Enosh.
Énosh he iny Sedh. Sêdh he iny Aˈdam.
Áˈdam he iny Waago.
Currently Selected:
Lúka 3: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
