Lúka 4

Sátan kerka Yíésu he a ˈdú nannasate

1Aalé Yíésu Hím Naasan Waaˈgiet hí koch onnoyyeká, wár Yorˈdan hol gáá nadhe, Hím Naasan hí ˈbakat ˈdú eete. 2Mu ˈbakat ram tomon afur gaa yíéđie. Rám tomon afur kinaal kídhích giri Sátan léká mú ki ekesete. Rám tomon afur kinaallá Yíésu íín hé hé kokoeyká mán. Rám kinaal beeyyeká mú geer hí ˈdú ˈjie. 3Aalé Sátan Yíésu geeyche, kieye, Kúún har Iny Waaˈgiet kátaka, ebá ˈdéé hot, wárallá hí balashá yeet, chie.

4Aalé Yíésu Sátan ˈdéé hol ˈdú nie, kieye, Warˈgat Waaˈgiet kieye, Máádhat hé ˈguom tákámle ma ki iđinyo,#4:4 Hemuumurít ˈDéé Hótlé 8:3 he chie.

5Hé kinaal elle Sátan geđi mú gúm ˈdug site, mú lésallá kamurle lúl a tikiˈd ki argisiche, 6mú geeyche, kieye, Lésallá guchle ubaa kamurle lulle ha yú ko shigia. ˈDaa giri hééllá lulle hé chúká máá yú ki fedo-, yú shiguoká ha yú shigia. 7Har ye visateka, hééllá lulle hé kua yeedhe, Sátan hí mú chie.

8Yíésu mú ˈdéé hol ˈdú nie, kieye, Warˈgat Waaˈgiet kieye, Máá kua Guđo Waag tákámle viivíso, met gaa keekémo,#4:8 Hemuumurít ˈDéé Hótlé 6:13 he chie, Yíésu hí mú yie.

9Aalé Sátan Yíésu ˈjien Yerusalem ˈdú eete, mú ˈBíl Waaˈgiet đírle állé ˈdérká ˈdú koyye, mú geeyche, kieye, Kuun har Iny Waaˈgiet kátaka, hol állá úr gáá lab, 10ˈdaa giri Warˈgat Waaˈgiet hí ki chie-, kieye,

Waag gállé ˈgasso-, urruká ˈdéé hai ki muuˈda,

giri gaal ko ˈdeˈdeen-,

11ubaa gaal ko gil ˈdug ki egeet-,

waar ko ˈgas mé ma ki ˈdaraminyká,#4:10-11 Warˈgat Arram 91:11-12

chieká, Sátan hí mú chie.

12Aalé Yíésu mú ˈdéé hol ˈdú nie, kieye, Warˈgat Waaˈgiet kieye, Ha Máá kua Guđo Waag ki ekemésenno,#4:12 Hemuumurít ˈDéé Hótlé 6:16 he chie, Yíésu hí mú yie. 13Aalé Sátan mú hatal lulle ki ekeseteká, mú in ká siete, giri af éíy taaka mú hol ˈdu gáá nannaatoká.

Yíésu gaalí Násaret gaa điidhe

14Yíésu fargogint Hím Naasan Waaˈgiet hol ki nadhe, Galilááya mé nie. Mú fayamle lés tol iđoká lulle eiy bash ki chie. 15Mu gáál énylé Waaˈgiet ˈdiiyiminyká gaa oonisie, mú gálaat lulle hí meey.

16Aalé Yíésu ˈjienlé giri Nasaret-, gáá guđandheká ki ˈjie. Mu hátlé aađaká Kúlích Hef ˈGisanká ˈbíl ˈdiiyiminyká hile. Mu les gaa kie, giri Warˈgat Waaˈgiet totoyoká. 17Aalé mú gaalí warˈgat máá Yisááya lé-, Waag hí ˈdéé ka shigicheká hí veereká shie. Mu warˈgát fuore, ál muí ˈdeenyéél gaa veereká af eey:

18Máá Guđo Waag Hím Naasanle hé ye gaa iđo.

Waag hé ye salab mé ki liiyye,

giri yú gál he maamanká Fayam Midhabká ki ˈdiyeenká.

Mu ye ali gáá kaayallá he ˈdaa giri gál gaalí hiigidheká

yú ki ˈdiyeen-, gaal yé ka ˈdeˈdeen-,

gál biiy ma gaa arginyká úba yú ki ˈdiyeen-,

gaal biiy gaa aargiroká.

Mu úba ye ali gáá kaayallá

he ˈdaa giri gál gaalí mé les ki tieká yú mé fuuro-,

19wár Waag hí midhantle gálaat gaa aargisichoká

yú gáál ki ˈdiyeenká.#4:19 Yisááya 61:1-2

20Aalé mú warˈgát tuony hí gaa đuyyeká, mu warˈgát mare, warˈgát máá ˈbíl kinaal hujich gaa nannieká shie, les yíéđie. Gál ˈbíl ˈdiiyiminy kinaal gaa ijeká lulle mú gaa dhaay. 21Aalé mu ˈdéé huogodhe, gáál geey, kieye, Kúlíchallá ˈdeeny Waaˈgiet hí warˈgát gaa maalééllá hé ˈduway, muí yie. 22Mu gáál lulle ger gaa meey, ˈdeeny midhab-, muí hogodheká gaalí af ˈdabe, gaal kieye, Hééllá hé iny Yuosef muunîny? gaalí yie. 23Yíésu gáál geey, kieye, Hé ˈduwa, itín gon ˈdéé hótallá haí ye ˈdú hogoto: Máá gil onyi, hol bísish! Hé nyí maalle-, gáál af ˈdaˈdabsuo-, Kafarnáum gaa ekeycheká, lés kuallá úba gaa ékesh, haí ye cheedhe.

24Tá hé ˈdúwaká yú hí geeye, máá Waag hí ˈdéé ka shigichoká hé gál lésle hí iiy ma yegen. 25Hé ˈduwa, bár giri héle Elíya ali ijeká, ˈdeg burnayye-, híyeská hé Yísirayel gaa iđe. Bár kinaallá ir hé warram seđ ubaa ˈguiyam eiy le ma gaa túniny. Les lulle kuoˈd guđoká hí gáá ˈdiiyye. 26Elíya hé ˈdeg híyes kinaal min níínní Waag hí ali ˈdú kaayyeká mán. Mú min hiyesidhe-, ény Sarafat giri ˈjien Siˈdon kí ˈjobonoyká gaa iđeká tákáma Waag hí ali ˈdú kaayye. 27Bár giri héle Elísha ali ije-, máálle Waag hí ˈdéé ka shigicheká gál burnay-, nyókot ˈgieká hé lés Yisirayel gaa ije. Gál kinaallá hé máá níínní Waag hí bisicheká mán, Nááman giri máá Siriaká tákáma Waag hí bisiche, Yíésu hí gáál yie.

28Aalé gál ˈbíl ˈdiiyiminyká gaa ijeká ˈdeenyéél maaleká lulle súm idhane. 29Gaal les gaa kie, gaal mú é gaa eedhdhe, mú a chiˈde, mú gurmit giri gaalí é ˈdug gaa ˈdisseká kerka he úr gáá lalame. 30Yíésu đo gáál toom nadhe, ali gaa sedhe.

Máá aryáán ˈgieká

31Aalé Yíésu Kafarnáum giri lés Galilaayaká mé nie, mu Kúlích Hef ˈGisanká ˈbíl ˈdiiyiminyká gálaat he gaa oonisie. 32ˈDaa giri mu hát máá kansim ˈdúwaká ˈguoká ˈdéé ká hogodheká gaal mú he oonisinyle af ˈdabe. 33ˈBíl ˈdiiyiminy kinaal geerle máá aryáán hí hille mare hí gaa ije. Máá kinaal súm kúóˈd ˈdoy, kieye, 34Hêy! Yíésu Nasaretallo, meete ke hol ká ˈgaa? Ha ká chimie-, nyí beđisáta? Kúún yáá ko óg, kúún he Máá saas mán-, Waaˈgietká! yie. 35Aalé Yíésu aryaan mú gaa iđeká il gíl gaa helie, kieye, Shab áat, mú yé gaa ˈdé! yie. Aalé aryáán máállé gaa iđe kinaal gáál hurt les ki ˈdoyye, mú yé gaa ˈdiiyye, hé hát mú koyyeká mán.

36Aalé gálaat lulle he af ˈdabe, hol heegete, kieye, Hééllá ˈdeeny máre, ˈdeeny máálle kansimle ubaa fargogintle aryáán he ki mumuro-, aryáán gálaat yiem gaa ˈdeˈdeenal? gaalí yie. 37Fayam Yiesu đo lés kinaal lulle eiy bash ki chie.

Yíésu gál burnayká bisie

38Aalé Yíésu ˈbíl ˈdiiyiminyká yé gáá ˈdie, mu ény Simon mé nie. Mu ál kinaal kí ˈdieká Símon suoglé furs ˈdeewká hí ˈgieˈgieká gaalí mú geey. 39Yíésu min láá kí ˈdie, min báásh yé gaa ˈdeey. Min đo midhante, les gaa kiiyye, gáál gololiche.

40Aadh dhúú ˈjiiyyeká gálaat lulle gállé basham ˈgie-, basham hí hol ká eiyyeká mú ˈdu gáá eey, mu gáál lulle gil ˈdú fie, gáál bisie.#4:40 Nyátál gál Yuuˈdika Kúlích Hef ˈGisanká gálaat hé sieny ˈdérká ma seseminy, héétí hé hé iigilishká hol ma gaa sisin. Kúlích Hef ˈGisanká af giri aadh dhúú ˈjeˈjeennoká he ˈgite. ˈDaa kinaallá ˈdugaka in gaal gelga ese, Yíésu gál basham ˈguoká ˈdú gáá eey. 41Aryáán gál burnayká yiem gaa ˈdiiyye, koˈdam ˈdanne, kieye, Kúún he Iny Waago! chie. Yíésu aryáán il gíl gaa helie, giri aryáán shab chegetká. Aryáán mu hát he Messíyaká#4:41 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. hé onnoyye.

42Burro-, biiy ka biˈdeká Yíésu kie, ál gálaat mán mare mé nie. Gálaat mú hol gaa ˈgeˈgedhe, mú argeká mú ˈdú sedhe, kerka mú síe he ririme. 43Tá Yíésu gáál geey, kieye, Yú Fayam Midhab Guch Waaˈgietallá gon ˈjien eiy úba gálaat ha gaa oonisia. Yú hé kinaallá ˈdugaka Waag hí ye ali ˈdú gáá kaayye, yie. 44Aalé mu lés gál Yuuˈdiká énylé ˈdiiyiminyká gálaat fayám gaa shiigie.

Currently Selected:

Lúka 4: dsh

Highlight

Copy