Lúka 2
2
ˈDalmaat Yiesu
1Bár kinaal máá kansich les ger lulle mé ki yiel-, Káísar giri Agústo léká ˈdéé mure, giri gálaat lullé les gaa ijoká gaalí totoyoká. 2Af giri Kurénios he kánsích Siria onnoyká hééllá he gálaat túóylé erká. 3Aalé gálaat lulle ˈjienle hol ˈdú nadhe, giri meetle gaalí verenoká. 4Yúósef úba ény Nasaret giri lés Galilaayaká gaa kie. Ény ˈDawuˈd-, gaalí Bételeem yeget-, giri lés Yuuˈdiaká mé nie, ˈdaa giri mu máá ˈbíl íl ˈDawuˈdká. 5Yúósef ubaa inillé đarm sidhe-, geer ˈgayye-, gaal hí María yegieká hol eedhdhe, giri gáál gaalí meet verenoká. 6Gaal hátle Bételeem gaa ija, María ˈdálle ali kí ˈdiiyye. 7María veel nyigeeny-, ˈgas kí kooteká ˈdalle. ˈDaa giri gaal é ííf gaa ˈdabeká véel súm gaa iifiche, véel đafaraam buuyye.#2:7 Gál bar kinaalloká umutlé ˈdalaatká ˈdafaraamo gaalí ki mamare.
8Chúúré kinaal ény kinaal ˈjobintle hé fórích aiyiet hí gaa ije. 9Aalé máá ˈgasso-, urru-, Waaˈgietká fórích kinaallá gálle yé ˈdu gáá ˈdie, Máá Guđo Waag édhúmle gáál ˈdinnam lulle gaa veere, gaal súm birge. 10Máá ˈgasso-, urru-, Waaˈgiet kinaal gáál geey, kieye, Haí bírginy. Bá dhaayyíe, yú fayam guđo-, geyyiny ˈgayyo-, gálkícho lulle ki midhabká hí ˈdu gáá sidhe. 11Kúlíchallá ény ˈDawuˈd hé máá gáál ririanká hí ki ˈdalidhe. Máá kinaallá he Máá Guđo Kirísto.#2:11 Kirísto hélle kieye, Máá Waag hí salab mé ki liiyye-, Waag hí kansím koyyeká. 12Mu hátlé hí kiimisatoká hééllá: Hí sieteka, veel ninni-, gaalí đafaraam bue-, súm gaa iifoká haí aargiˈda, muí yie. 13Aalé ál tikiˈde kinaal nyésébích guđo-, yuoyo-, Waaˈgiet-, úr gáá leedheká ubaa máállé ˈgasso-, urru kinaal hol ˈdú fame, gaal Waag meey, kieye,
14Waag Úr Iđoká gaalí meeyo,
gál lesallo-, muí ˈdú iifoká hí naanná yíéđuo,
gaalí yie.
15Aalé nyésébích gál ˈgasso-, urru kinaal kie-, úr mé nieká gál aiyietká hol geey, kieye, Kée, kí kie, kí Bételeem mé nuo, hé yé ká ˈdie-, Máá Guđo Waag hí gáál ka geeyallá kí argo, gaalí hol yie.
16Aalé gaal harare, gaal María ubaa Yúósef, tá veel giri ninni-, súm gaa iifeká af kí ˈdie. 17Gál aiyietká véel argeká, gaal fayam veeliet máá ˈgasso-, urru-, Waaˈgietká hí geeyká lulle gáál shie. 18Gaal lulle fayam gál aiyietká hí geeyká maaleká he af ˈdabe. 19Aalé María ˈdeenyéél lulle geer ki chirate, taawuyye. 20Gál giri aiyietká hol nanadheká Waag meey, Waag miimire, ˈdaa giri hé máá ˈgasso-, urru-, Waaˈgietká hí gáál geeyká lulle ˈduway-, gaalí argeká.
Yíésu gaalí ˈBíl Waaˈgiet eey
21Veel kúlích he gaa ˈdalidheká gaal tiiya rafe, kúlích ki síetká véel hermisinyle ali kí ˈdiiyyeká gaal véel meeny Yíésu léká shie, meeny giri veel hátlé geer ma hílinyká máá ˈgasso-, urruká hí véel ˈjielle geeyká.
22Aalé el ˈdaal, hát héle Móshe hí hemuumurit Waaˈgiet gaa veere-, min ˈdalloká he gaa nímle kúlíchle ali kí ˈdiiyyeka gaalí ˈdeˈdeenká Yúósef ubaa María véel eedhdhe, véel Yerúsalem eey, giri véel Máá Guđo Waag met gaa iđimuoká. 23Hééllá hát Máá Guđo Waag warˈgatle hí chie-, giri kieye, Veel yab er ˈdalaatká gaalí Máá Guđo Waag méé gaa vie,#2:23 Yíéˈdími 13:2 chieká. 24Gaal úba sedhééllá, he hát giri Móshe hí hemuumurit Máá Guđo Waag gaa veere-, giri gaal hóle naama lug sug dhaadhatká, muuninyka, hóle waaroká naam suorle ˈgaˈgaloká.#2:24 ˈDeemano Gál Levi 12:8
25Aalé mú tikiˈd máá Yerúsalem gaa ije mare meenyle Símion. Máá kinaallá máá Waaˈgiet. Mu ˈgíérích ˈdúwa-, saas mánká he gaa igire. Mu máá gál Yisirayel imiro gaa shugudmuoká he met egese. Símion Hím Naasan Waaˈgieto hí gaa iđe. 26Hím Naasan Waaˈgiet Símion fayám shiiche, giri Messíya#2:26 Af Heberewka Kirísto he Messíya. Messíya hélle kieye, Máá Waag hí salab mé ki liiyye-, Waag hí kansím koyyeká. Máá Guđo Waag hí ali gáá kakawká ˈdaab muí ma árginyká mu mán ma yegenká. 27Aalé mú Hím Naasan Waaˈgiet hí geeyche, mu đo ˈBíl Waaˈgiet sedhe. Aalé hát aađa-, gáál nyátállé Yuuˈdiká Yíésu gállé guguđoká hí ˈBíl Waaˈgiet eey. 28Símion véel argeká mu véel ˈjielle gaa eedhdhe, véel úr ki eedhdhe, Waag meey, kieye,
29Máá Guđo Waag, hát giri ye geeyche-,
káána ˈduwayallá yáá gédéch kuallá
aalé naanná guraam hí guuro.
30Hééllá he ˈdaa giri inchú rúbách kuun hí nyí af iđicheká arge,
31rúbách giri kuun hí tág koyye-, kidh lulle hí il ki aargiroká.
32Rúbáchallá he édhúm kidh lulle hé kua ˈdúwaká aargisuo-,
héétí gál kua Yisirayel gaa verenoká,
Símion hí yie.
33Yíésu ˈjielle ubaa ˈjaalle ˈdeeny Yiesu-, Símion hí hogodheká af ˈdabe. 34Símion gáál ˈdú ˈguunume, kor véel ˈjiellé María geey, kieye, Bá dháash, veelééllá ˈdaalle ˈdugaka gál Yisirayel burnayká les hai ˈdarama, gál Yisirayel éíy taaka burnayká les hai gaa keeme. Veelééllá he hedh gaalí điidhan-, gaalí ˈdeem ˈdeđewká ki hogodhoká, 35giri gál burnayká tawunylé ger ka ˈguoká gaalí mamaloká. Tá kúún geer hai ko gaa kaara, kul máálle hát máá gaalí naan veereká ki égká ha aargiˈda, muí María yie.
36Ál kinaal úba hé min gaalí Ánna yegie-, ini Fanuel-, é meeny Asher-, Waag hí ˈdéé ká shigiche mare hí gaa iđe. Min karsidhe kinaallá af giri máá harte onnoyye-, tá gaal hí eedhdheká, ubaa bélle warram tiiya hol a yíéđie, đo bélle mán yie. 37Min hiyesím gaa yíéđiyye, ˈjíig arram úba hí tomonaam síet a afur chie. Min hé bar lulle ˈBíl Waaˈgiet álle ma gaa lalany. Min kulich ubaa chúúre ál kinaallá gaa iđe, Waago vivisate, héétí afo úba he higisate. 38Aadh ˈgás tikiˈde Símion hí ˈdéé gaa hogodhe kinaal, min hiyesidhe kinaal ká chimie, Waag meeyche, Waag gielmít hol ˈdú niiyye. Min gál giri lulle Yerúsalem rímlé Waag hí ririannoká met egeseká véel fayamle geeđiche.
39Aalé gaal he gaa ním hemuumurit Waaˈgietká hí hoteká lulle mé đig yieká gaal lés Galilaaya hol ˈdú nadhe, énylé Nasaretká mé nie. 40Veel guđandhe, fargogoy, ˈdaaliledhe, midhant Waaˈgiet gaa yíéđie.
Yíésu hol káru ˈBíl Waaˈgiet gaa geey
41Warram hátlé hol el gaa igireká, Yíésu ˈjielle ubaa ˈjaalle ˈjila máá ˈgasso-, urru-, Waaˈgietká hí gáál ˈdug gaa nadheká af léká Yerúsalemo he seseme. 42Yíésu warram hí tomon a naam yieká, gaal hát aađaká ˈjila bííyle mé nie. 43Gaal ˈjila rámle beete-, ˈjienle hol ˈdu gáá nanadheká, Yíésu Yerúsalem ki ˈgite. Mú ˈgisanlé kinaal ˈjielle ubaa ˈjaalle hí moonnoy. 44Gaal íín kieye, Mu hé nyésébích ka yiimetallá hol ˈguo, yegie. Gaal kulich tikiˈd síé ki saanie. Af ˈdaa gelgaká gaal mú gállé hol léká ubaa gál gáál hol ógká gaa ebite. 45Gaal mú ˈdabeká, gaal hol nadhe, mú Yerúsalem ˈdú ˈgeˈgedhe. 46Aalé kúlích ki seđeká gaal mú ˈBíl Waaˈgiet gaa shuunne, mu gál gáál he oonisuoká hurt gaa ija. Yíésu gáál a nee koy, kor gáál heegete. 47Gaal lulle mú ˈdeenyle maaleká mú ˈdaalimle ubaa mú ˈdeenylé muí hol ká nannieká a ˈdabe. 48Mú ˈjielle ubaa mú ˈjaalle hí argeká he af ˈdabe. Mú ˈjiellé María hí heesete, kieye, Inychú, háteka nyí héél ki egeychéel? ˈJaakú ubaa yú, nyáá tág nyí neeyye, nyí ko hol gaa ˈgeˈgete, chie.
49Yíésu gáál ˈdéé hol ˈdú nie, kieye, Háteka hí ye hol gaa ˈgeˈgetéel? It hát yú ˈbíl ˈJaachú gaa ijóól, ití múog? muí yie. 50Yíésu ˈdeeny he hodheká hé ˈjielle ubaa ˈjaalle hí hélle ma kimísan.
51Aalé mu gáál hol eedhdhe, gaal Násaret hol ˈdú nadhe, mu gáál ˈdeenyle el gaa veere. Mú ˈjiellé María ˈdeeny kinaal lulle geerle gaa kaate.
52Yíésu guđandhe, ˈdaaliledhe, mu Waag ubaa gálaat ger gaa meey.
Currently Selected:
Lúka 2: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
