Lúka 1
1
Fayam warˈgatle Lúka hí Tíáfeles ˈdú veereká
1Kó súm ˈdúwaʼ, Tíáfeles lééllo,#1:1 Meenyééllá urgúaka Lúka 1:3 he gaa ija. gál burnayká hé hib hélle gáál hurt yé gáá ˈdieká hol ˈdú shuune, veere. 2Gál er ali gaa ije-, hé kinaal il ki arge-, he fayamle ˈdiiyimeká nyí fayám ká shie. 3Aalé káána yáá giri hib kinaallá mé gáá koonle ˈgas eeyká úba ko hib kinaallá ˈdú gáá veere-, ko híb ˈgas gáá koyka kalat. 4ˈDeeny yú ko ˈdu gáá verenóóllá ˈdaa giri hé gaalí ko hiibisieká ˈduuwle kuuní kiimisatoká.
Yuána giri gáál bie gim nannuoká ˈdalmaatle máá ˈgasso-, urru-, Waaˈgietká hí Sakaría geey
5Bár giri Heróˈde he kánsích lés gál Yuuˈdi onnoyká mú tikiˈd máá gál suoryo-, Waaˈgiet-, Abiya-, gaalí Sakaría yegie mare hé lés kinaallá gaa ije. Mú minle meenyle Elísabet, ˈbíl íl Aaronno#1:5 Ááron he Móshe angʼallé guđoká. Ííni úba máá suoryo-, Waaˈgiet ˈbíl íl Kowat-, giri iny Leviká. (Erkob 46:11; Yíéˈdími 6:16-20) he yé gáá ˈdiiyye. 6Gaal hullaalle gál ˈdúwa-, Waag kikiatká. Gaal hé Máá Guđo Waag hemuumuritle ubaa atimle tikiˈd úba ma hâny, gáál úba hé gaalí ˈdú ˈdeensetká mán. 7Tá gaal hé um mannay, ˈdaa giri Elísabet ˈdal mannayyeká. Gaal hullaalle eiy warram hí hol ki sedheká.
8Aalé Sakaría ubaa gállé Abiyaká hújíchlé suoryo-, Waag metle tág gaa nannuoká kálle ka maˈdeká, 9hát giri nyátál gál suoryokáka gaal koiy ˈdoy.#1:9 Koiy ˈdony bar kinaalloká amú waaro gaalí ˈdarame. Kot Sakaría ˈdú ˈdoyye, giri mu ˈBíl Waaˈgiet higilo-, mu henyit#1:9 Henyit gál suoryoká hí ˈBíl Waaˈgiet éér gaa kikieká yaalmitle he hát gáál Waag visanle úr mé nanniyyeká. (Yíéˈdími 30:1-8) usiyyoká ˈjiet fafuoká. 10Aalé aadh ˈgas giri gaalí henyit éér kikuoká ali kí ˈdiiyyeká mu ˈBíl Waaˈgiet hile, henyit éér kie. Gál ˈBíl Waaˈgiet álle hol ˈdu gáá yimie-, baaˈd ˈgieká henyit eer hí kieká lulle Waag vite.
11Aalé máá ˈgasso-, urru-, Waaˈgietká Sakaría yé ˈdu gáá ˈdie, kara henyit érle hí ˈdug gaa kekemeká ˈdaa naaniet kí ˈdie. 12Sakaría máá urru kinaal argeká birge, fađane. 13Aalé mu Sakaría geey, kieye, Sakaría, ha bírginy. Waag visankú hé Waag hí maalle. Min kua Elísabet iny yab hai ko kí ˈdaalla. Íny meenylé shigichoká Yuána. 14Kúún geer hai ko gaa meedhe. ˈDaa giri iny hí ki ˈdalmaatká gál burnayká úba ger haí gaa meedhe. 15Iny Máá Guđo Waag metle hai gaa ˈduuwaa. Mu hé ˈduuny vinna#1:15 Vínna he ˈgór yierit ki ég-, saanolle gaalí ˈduˈduo-, gaalí bersh tág gaa nannuo mare. (Erkob 9:20-21) ubaa bersh eiy ma igiminy. Mu hátlé ˈjielle geer gaa ijoká in Hím Naasan Waaˈgiet hí koch cheedhe. 16Mu gál burnay-, Yisirayelká Máállé Guđo Waag hollo hol ˈdu gáá nannaa. 17Mu Hím Naasan ubaa fargogint Waaˈgiet tikiˈde máá Waaˈgiet Elíya hí ˈgieká hai aargira, mu Máá Guđo Waag met hai ká naadha, giri mu idhaam kasle hol gaa lalaan-, gaal ubaa umle hol higiloká. Mu gál ˈdeeny Waaˈgiet nee ma kokonyká hollo hol gaa laama, giri gaal ˈdaalim gál ˈdúwa-, Waag kikiatká ˈdeenyle iiy yeetká. Mu Máá Guđoká gál hí iiy yegetká met tág hai kokoo, máá ˈgasso-, urruká hí yie.
18Aalé Sakaría mú geey, kieye, Hé kinaal háte yú og? Yú karsich. Minchú úba karsidhe, yie. 19Aalé máá ˈgasso-, urru kinaal mú geey, kieye, Yú he Gáburiel, giri Waag innumle gaa yaalká. Yú Waago ko ye ali ˈdu gáá kaayye, giri ko fayam midhaballá shiguoká. 20Bá dháash, ˈdaa giri kuun hí ˈdeenychú iiy ma ki chéenká kúlích kinaallá ˈdaab ali ma kí ˈdíinyká kúún af ha ˈdaabiyya. ˈDeenychú hai ˈduuwaa, kúlíchle ali hai kí ˈdeenne, muí mú yie.
21Gál baaˈd ˈgie-, Sakaría egeseká Sakaría ˈBíl Waaˈgiet chuoyká he af ˈdabe. 22Aalé mu baaˈd yé kí ˈdieká, af gáál hol ki geđuoká mán. Gaal mu hát hé mákártaká hí ˈBíl Waaˈgiet yé ˈdu gáá ˈdieká kimite. Mu af ˈdabe, mu gáál gil ki geeđie.
23Sakaría kállé he naasan ˈBíl Waaˈgietká ˈgiteká é hol ˈdú nadhe. 24Aalé el ˈdaal mú minlé Elísabet geer hí hile. Min hol shuolsiche, ˈguiyam chen ˈbíl tákáma he gaa iđe. Min kieye, 25Hééllá hé Máá Guđo Waag hí ye ki ekeyká, in aalé káána mu ye ˈdú ˈjie, kern ˈgin yú gálaat innumle ki sesemeká muí ye gaa eey, min hí chie.
Yíésu ˈdalmaatle máá ˈgasso-, urru-, Gáburiel léká hí ˈdiiyime
26Aalé Elísabet geerle ˈguiyam hí le yieká, máá ˈgasso-, urru-, giri Gáburiel léká Waag hí ény Nasaret giri lés Galilaayaká ali ˈdú kaayye. 27Waag Gáburiel ini gaalí María yegie-, Násaret gaa iđe-, kis Yúósef giri ˈbíl íl ˈDawuˈdká hí đarm sidheká muí ali ˈdú kaay. 28Aalé mu María ˈdú sedhe, kieye, Kó Waag ko ˈdú ˈjiiyyéel, náa! Kúún kó Máá Guđo Waag hí hol af iđa, yie.
29María ˈdeenyéél maalleká súm neeyye, tawuyye, ˈDeenyéél hélle meete? chie. 30Aalé máá ˈgasso-, urru kinaal mú geey, kieye, María, ha néeny. Waag hé ko ˈdú ˈjiiyye. 31Bá dháash, kúún geer hai ko higila, iny yab ha ˈdaalla, íny meenylé shigichoká Yíésu. 32Mu máá ˈdúwaká hai yeedhe. Mú meenyle he Iny Waag Úr Iđoká. Máá Guđo Waag mú kara eshi eshimlé ˈDawuˈdká hai shigia. 33Mu taalle bííyyo ˈbíl íl Yakobo mé ki yaalla, mú guchle hé a mé mán, muí María yie.
34Aalé María mú heesete, kieye, Héél kor háteeye, yú kálta máá yab nyí hol má arginy? chie. 35Mu María ˈdéé hol ˈdú nie, kieye, Hím Naasan Waaˈgiet hai ko ˈdu gáá leete, fargogint Waag Úr Iđoká hai ko buanna. ˈDaa kinaallá ˈdugaka in veel ˈdalaatká he Iny Waaˈgiet saas mán-, ˈdúwaká. 36Bá dháash, Elísabet giri máá fás kua-, gálaat hí óg ma ˈdaˈdalinyká, har úba káána karsidhe kátaka, hé geer hí hile, geerle káána ˈguiyam hí le. 37Waag hé hé níínní hí ká aađaatká mán, muí María yie.
38Aalé María mú geeyche, kieye, Yú he Máá Guđo Waag gédéchlé, hé hotéél hí hát kinaal ˈdie, María hí mú chie. Máá giri ˈgasso-, urruká đo ali gaa sedhe.
María Elísabet ˈdú siete
39Rám iraam mánká ˈgiteká María đo kiiyye, siete, ény lés gumano Yuuˈdiaká mé niiyye. 40Ál kinaal ki ˈjiiyyeká siete, ˈbíl Sakaria hille, Elísabet naa chie. 41Elísabet tikiˈde naa Maria maalleká, đo veel hí geer gaa kiite. Aalé Elísabet Hím Naasan Waaˈgiet hí koch chie, 42súm af úr ki eeyye, kieye, Gál ˈdiet lulle kúúni Waag ko ˈdú ˈjiiyye, veel kuun hí ˈdaalloká hé Waag hí ˈdú ˈguunuanne. 43He háteeye, yáá Máá chia Guđoká ˈjielle úba ye ˈdu gáá chimíel? 44Bá dháash, tikiˈde giri naakú yú maaleká in veel ninni-, ye geer gaa ijóóllá đo geer hí gaa meedhe, ye geer gaa kiite. 45Min halúg ˈdeeny Máá Guđoká hí geey-, He hát kinaal hai yeedhe, muí yieká iiy chíéllá, ebá geer hí gaa meet, Elísabet hí chie.
María Waag meeyche
46María kieye,
Hodhinchú hé Máá Guđo Waag guđanayche.
47Waag giri Rúbách chiaká hé ye geer gaa meeyche,
48ˈdaa giri yú mú inillé gedech-, biiy ello-, tá mu ye argééllá.
Bá dháash, yú aalé káánaka gálaat hátlé hol ká hođuoká,
min Waag hí ˈdú ˈjiiyyeká gaalí ye yeedhe.
49Waag Fargogiyyoká hé ye hé guđo midhabká ki ekeyche.
Waag meenyle he Máá Saas Mánká.
50Waag gál hí iiy yie-, hí kikiatká
hátlé hol ka hođuoká geer haí ˈdú guudhdha.
51Waag hé tág hé farguogoká gíl geerle tág ki niiyye.
Mu hé gál hol memeyo-, tawunyleka
hol gál ˈdúwaká ka dhaˈgasanká bađisie.
52Mu hé gál farguogoká karmlé guguchiká gáá leesie.
Mu hé gál gaalí eesheyká les gaa shuune.
53Mu hé gál kuoˈd ˈguoká hát ˈdabaanká heyisie.
Mu hé gál kaamúreká gil búrká ki galie.
54Mu hé geer guanle mé ká ˈguo,
gedellé Yisirayelká yiir gáá ˈgiliˈgay,
55hát giri mu Abirááyam ubaa umlé
giri eshim eshim kúnnaaká
hátlé taalle bííyyo hol ka hođuoká muí af iđieká,
María hí chie.
56María ubaa Elísabet hol ˈguiyam seđ a yíéđie, María đo ényle hol ˈdú naate.
Yuána giri gálaat bie gim nannieká ˈdalmaatlé
57Elísabet ˈdálle ali kí ˈdiiyye, mu iny yab ˈdale. 58Mú olle ubaa mú gálle fayám maale-, fayam kieye, Máá Guđo Waag hé tág Elísabet ˈdú ˈjie, gaalí yieká, gaal mú hol ˈgar geyie. 59Ram síet chieká gaal véel hermisinyle ˈdu gáá yimie, gaal onnônyka véel meeny ˈjaallé Sakaría shigie. 60Aalé véel ˈjielle kieye, Hé hát kinaallá muuniny. Véel meenylé ki shiguoká Yuána, chie. 61Aalé gaal min yiete, kieye, Háteka? Mú ˈbíl ílle máá níínní meenyéél léká mán háluke! gaalí yie. 62Aalé gaal véel ˈjaalle bala ˈdú nie, giri véel ˈjaalle meeny hí shiguoká gaalí maaloká. 63Aalé mu ˈgór ˈbasso-, verenoká gáál yiete, mú gaalí ˈgór shie, ˈgór ˈdeeny muí ˈdug gaa veereká kieye, Véel meenyle Yuána, he yie. Aalé gaal lulle he af ˈdabe. 64Ál tikiˈde kinaal Sakaría af hí eiy ˈdie, ˈdéé huogodhe, Waag meey. 65Gál ólloká lulle he af ˈdabe, fayam kinaal lés gumano Yuuˈdiaká lulle bash ki chie, gaalí hol ki geey. 66Gálaat lulle ˈdeenyéél maaleká gerle ki tawue, kieye, Veelééllá aadh ˈdaatika kor veel háte yaal? gaalí yie. Hatal gaalí yíél, veel íín hé Waag gíl geer gaa ije.
Sakaría Waag meey
67Véel ˈjaallé Sakaría Hím Naasan Waaˈgiet hí koch chie, mu ˈdeeny Waag hí shiicheká ˈdiiyime, kieye,
68Kí Máá Guđo Waag Yisirayelká meeyo,
ˈdaa giri mu muun gáál ˈdu gáá yimie-, gáál rieká.
69Waag hé gédéchlé ˈDáwuˈd ˈbíl ílle máá fargogo-,
rubachietká yé gáá ˈdeeyche, mú gáál ká shiiche,
70hát giri héle gál Waag hí taak koyye-,
Waag hí ˈdéé ka shigicheká hí gáál ka geey-,
71giri mu kidh ubaa gál lulle gáál nébká
gil gerle gáál gáá ririanká.
72Waag eshim eshimkúnno geeyche,
giri gáál ˈdaalleka mu gáál geer hí ˈdú guguat-,
he af iđiny mu íín dhúrle hí gáál af iđieká
hí in ma ka baađanyká.
73He af iđiny Waag hí eshi eshim kúnnaa Abirááyam af iđiche-,
máálle hol ˈdodhdhe kinaal hééllá:
74Mu kidh gíl geer hai gáál gaa riima,
giri hé ki kikiat mán-, ki mú vivisatká.
75Tá múún rám kúnnaa ki lésal ˈdú ijoká
Waag innum leka ki gál ˈdúwa-,
he fedit Waaˈgiet gaa ijoká ki gaa yegetká.
76Kó veel chial,
kúún Waag Úr Iđoká máállé ˈdéé ka shigichoká cheedhe.
Kúún Máá Guđoká met ha naata,
mú ˈgíéríchle met tág ha kooyyo.
77Kúún Máá Guđoká hát gálle ririanká gálaat ha ki ˈdiyeenne,
giri mu gáál nyuogimle gaa egewká.
78Rúbách kinaallá Waagkúnno geer kurshamlé yé gáá ˈdeeme,
édhum hai gáál shigia,
hát giri aadh bur yé ká ˈdeˈdeenno-,
gálaat gáá verenoká.
79Édhúm kinaal gál bííy gaa ongʼoˈde-,
bííyle súm húˈd chieká gaa ijoká yé hai ˈdu gáá ˈdeeme,
tá úba ˈgaskúnno ˈgíérích naannáká hai nannaa,
Sakaría hí yie.
80Aalé veel guđandhe, Hím Naasan Waaˈgiet ˈdaa ki liledhe. Mu ˈbakat álle gaa yíéđie, ˈjíig mu gál Yisirayel ál kinaal ki ˈdiiyime.
Currently Selected:
Lúka 1: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
