Márko 16

Yíésu uushich yé gáá ˈdímlé

1Gélgá giri Kúlích Hef ˈGisanká hí gaa ˈgiteká María Magaˈdalaká ubaa María giri Yákob ˈjielléká, tá Salóme sáláb usiyyoká hidhdhe, giri gaal seseen-, Yíésu salab shugudmuoká. 2Aalé rám tiiyaká kúlíchlé erká bííylé ka biˈdeká aadh gulum yé ki ˈdiiyyeká ˈdeg giriká uushich álle siete. 3ˈDég ˈgíéríchlé gaa igiˈdeká hol heesete, kieye, Mááya gáál nyátáábá gaalí uushich af gaa koyal gáál kí gaalgalsia? chie.

4ˈDég fuˈjiyyeká uushich nyátáábá afka mán. Nyátáábá kinaallá hé tág guđo, kor nyátáábá uushich af tól ki ija! 5ˈDég uushich hilleká, máá ruorich đafar édhká kaadhdheká hí gíl ˈdaa naaniet ija, ˈdég birgiyye.

6Aalé máá ruorich kinaal ˈdég geey, kieye, Haí bírginy! Yíésu Nasaret-, gaalí ˈgór đarám yaalká ˈdú yies-, hí ˈdu gáá chimieká hé állá gaa láʼ. Mú hé Waag hí loolnoyche, uushich yé gaa ˈdie. Ebá ál gaalí mú iifieká dhaayyíe. 7Sedhíe, mú lalille ubaa Bétiro geeyyíe, Yíésu met haí naadha, Galilááya hai seeme. Mu hát hí geeyká ál kinaallá hollo hí hol gaa aargiˈda, yiedhíe, Máá giri ruorichká hí yie.

8ˈDég birgiyye, fađanne, uushich álle gaa ˈdoˈdoote, ˈdaa giri ki birgiyyeká hé máá níínní geeycheká mán.

9[Rám tiiyaká kúlíchlé erká bííy ka biˈde-, Yíésu uushich yé gáá ˈdieká, María Magaˈdala-, giri muí aryaan tiiyaká yé gaa ˈdeeyká er mú hol af kí ˈdie. 10Aalé María kinaal Yíésu gállé hol ˈgar sesemeká ˈdú siete. Gáál af kí ˈdiiyyeká gáál ger hí gaa ˈdeenédhe, gaal bebime. Aalé gáál fayám shiiche. 11Gaal ˈdéé maale-, Yíésu geđi lúol yáá arge, María hí chieká, gaal mú ˈdeenyle điidhe.

12Hééllá el ˈdaal Yíésu yaalmit eiy kaadhdhe, gállé ˈgierich gaa igire-, naama mare yé ˈdu gáá ˈdie. 13Gál kinaal úba sedhe, mú gálléétí geey. Gaal kinaal ˈdeenyle úba điidhe.

14Waaséél Yíésu lalillé tomon a takachká hátlé golmoteká Yíésu hí yé ˈdu gáá ˈdie. ˈDaa giri gaal gál kieye, Yíésu hé uushich yé gáá ˈdie, nyáá nyí argiyye, yieká af iiy ma yéen-, met googonoyká in Yíésu hí ki lole.

15Aalé Yíésu gáál geey, kieye, Les lúl gaa sedhíe, gálaat lulle Fayam chia Midhaballá ki ˈdiiyimíe. 16Máá ye iiy yeet-, gaalí bie gim nuoká rubach hai aargira. Tá máá ye iiy ma yéenká kúlích Waag gálaat hol eiy gaa nanniyyoká hé ˈdeewká il haí aargiˈda. 17Gál ye iiy yieká hé gaalí af ˈdaˈdabóóllá hé hol ˈguo: ˈDaa meenychúka gaal gálaat aryáán yé hai gaa ˈdeđia. Gaal af he muogká ˈdéé hai ki hogodho. 18Gaal chár gíl hai ki chiiˈda. Gaal hé gálaat yegeská ˈjieka, hé kinaallá úba hé hát hí kokuoká mán. Gaal gál basham ˈguoká gil ˈdú fieka, gálaat đo hai bie, muí yie.

19Aalé Máá Guđo Yíésu gáál ˈdeenyéél geeyká đo Waag hí eete, úr mé nie, Waag gíl ˈdaallé naanietká yíéđie. 20Aalé Yíésu lalille kie, les lúl gaa sedhe, gálaat Fayam Midhab Yiesúúllá shie. Máá Guđo Yíésu úba hé gáál hol hujich ˈgar nannie. Gaal gálaat ki ˈdiiyimeká gálaat hé hé gaalí af ˈdaˈdaboká úba il ki arge. Hatallá in Yíésu fayamlééllá hát ˈdúwaká gálaat argisie.]#16:20 Gár saal-, ˈjíig gár tomonaam naamáállá đigallá hé warˈgasam kissoká ˈbaal gaa mán.

Currently Selected:

Márko 16: dsh

Highlight

Copy