Márko 15

Yíésu gaalí Bilááto ˈdu gáá eey

1Bur biiy hátlé ka biˈdeká gál guguđo-, suoryoká ubaa gál káruká, tá gál nyatalaamká ubaa ar ˈdeem mumuˈdoká lulle hol ˈdéé af gáá maale. Gaal Yíésu gil hiigidhe, mú Bilááto ˈdú eey. 2Aalé Bilááto Yíésu yiete, kieye, Kúún in he kánsích gál Yuuˈdi? yie.

Yíésu mú ˈdéé hol ˈdú nie, kieye, Hát kuuní hogotóóllá, yie.

3Gál guguđo-, suoryoká hé burnayká Yíésu af kaay. 4Bilááto geđi Yíésu heete, kieye, Bá dháash, ˈdeeny guđo-, gaalí ko ˈdú ˈdeentééllá, kó ˈdeeny hol gáá nanniyyoká mân? yie.

5Yíésu hé ˈdeeny hol nieká mán. Bilááto mú shab yeenléél af ˈdabe.

6Warram lulle ˈjila máá ˈgasso-, urru-, Waaˈgietká hí gáál ˈdug gaa nadheká ali kí ˈdiiyyeka, Bilááto nyátálleka gál gaalí hiigidheká tá máá gaalí fedoká đo gáál hai kí fuura. 7Aalé gál gál les met ki ˈgieká ˈjegeduoká fedo-, gaalí hiigidhe mare, mú tikiˈd meenyle Baráábas. Gál kinaallá he gál af giri oos ali kí ˈdiiyyeká gálaat yieská. 8Aalé nyesebich Bilááto ˈdú sedhe, mú ruogone, kieye, Nyí hát kua aađaká kog, yie.

9Bilááto gáál heete, kieye, Máá Kansich Yisirayelká hí kí fuuroká hí féˈde? yie. 10Hé muí hatallá ki yieká, he ˈdaa giri muí óg, gál guguđo-, suoryoká hinaaf Yiesu hí faanne-, Yíésu mú ˈdú gáá eeyká. 11Gál guguđo-, suoryoká nyesebich ˈdéé af gaa koy, giri Baráábas Bilááto hí ka fuuroká.

12Bilááto geđi gáál heete, kieye, Tá máá hí Kánsích Yisirayel chegetéél íín háte yú kokoo hí feˈde? yie.

13Gaal lulle geđi kúóˈd ˈdoy, kieye, Mú ˈgór đarám yaalká ˈdug ˈdú yiesíe! gaalí yie.

14Aalé Bilááto geđi gáál heete, kieye, Háteka? Mu meete ˈdeeney? yie.

Gál giriká geđi súm kúóˈd ˈdoy, kieye, Mú ˈgór đarám yaalká ˈdug ˈdú yiesíe! yie.

15Aalé Bilááto nyesebich ˈdéé ki aabunayoká fede, mu gáál Baráábas ki fure. Aalé mu yuoyle ˈdéé ki mure, giri gaal Yíésu anakoto gaalí sibilaam met ki higidheká ki tuunoká. Yíésu yuoy hí tunneká, Bilááto geđi yuoy geey, giri Yíésu egeet-, mú ˈgór đarám yaalká ˈdug ˈdú ˈdaraannoká.

Yuoy Yíésu manyjasiche

16Aalé yuoy Yíésu ˈbíl ushumba gaalí baratórian yegetká náble eeyye. #15:16 Hé kinaallá máá máá kansichká el gaa yaalká ˈbíllé. Ál kinaal yuoy yuoyléétí hol ˈdu gáá viiyye, 17gaal Yíésu đafar búr korbiso mare kaay. Aalé gaal ˈgór híí ˈguo mare shóte tág gaa nie, mú mé kaay. 18Gaal mú naa yiegie, Kó ˈdúwa-, Kánsích Yuuˈdííllo! gaalí mu yiegie. 19Gaal mú mé ˈgulint ki tune, mú sillam ˈdú faafie, mú ˈgas met les kurram gaa ˈdoy. 20Aalé gaal mú eesheny hí gaa đuyyeká, mú đafar búr korbidheká kaayká gaa fure, mú đafaraamle geđi fie, giri mú egeet-, mú ˈgór đarám yaalká ˈdú ˈdaraanká.

Yíésu gaalí ˈgór đarám yaalká ki ˈdoy

21Aalé gaal máá forich gáá yiimie-, ál kinaal ká nadhe-, gaalí Símon yeget mare he ˈdú moy, giri mu Yíésu ˈgórlé đarám yaalká ˈgar egeetká. Máá kinaallá he máá lés Kurene, Alekesánda ubaa Rúúfus ˈjaallé. 22Aalé gaal Yíésu Ál Golgota ˈdú eedhdhe. Ál Golgota hélle kieye, Ál Me ˈGonte. 23Aalé gaal ˈduuny vinna-, gaalí henyit hol fieká Yíésu shie, ˈduuny kinaal muí điidhe. 24Aalé gaal mú ˈgór đarám yaalká ˈdú ˈdoy, ˈgór ali koy. Aalé gaal hol koiy ki ˈdoy,#15:24 Warˈgat Arram 22:18 giri mú đafaraamle eiy shugunatká.

25Gaal mú ˈgór đarám yaalká ˈdú ˈdarameká, hé kinaallá he aadh ˈgas seđe burroká. 26Yíésu hé gaalí ˈdú ˈgiliˈgay-, gaalí ˈgór ˈdug gaa veereká kieye,kansich yuuˈdi. 27Gál éíy taaka-, naama-, buraallé mare úba gaalí ˈguor đarám ˈgieká ˈdú ˈdane. Mú tikiˈd gaalí Yíésu gíl ˈdaa naaniet koy, máátí gaalí mú gíl ˈdaa ˈjíbach koy. [28#15:28 Gáralláka warˈgasam kissoká ˈbaal kieye, Mú hé gaalí gál nyakikoraam ˈguoká ˈdú iifie. (Lúka 22:37; Yisááya 53:12) ] 29Aalé gál ál kinaal ka nanadheká mú chaachare, met gaa muotie, kieye, Kúbu! Kuun he máá hol ˈdabe-, ˈBíl Waaˈgiet ˈgieˈgie-, tá ˈBíl aadh seđ gaa ˈdiˈdiseká muunîny? 30ˈDaa! Ebá káána hol rig, hol ˈgór đarám yaal kinaallá gáá léésish! gaalí mú yiegie.

31Hát tikiˈdééllá úba gál guguđo-, suoryoká ubaa gál nyatalaamká hol geey, Yíésu eeshey, kieye, Mu gál eiy riríme, tá íín har káána hol má ririana! 32Ebá Messíya Kánsích Yisirayelallá hí ˈgór đarám yaallallá úr gáá leedho, kí il ki argo, tá kí iiy yeet, gaalí yie. Gál giri gaalí ˈguor đarám ˈgieká ki ˈdaneká úba mú chaachare.

Kúfách Yiesu

33Aalé aadh ˈgas le kulichká ˈdoyyeká biiy lulle đo chuurayye, ˈjíig aadh ˈgas saal đig. 34Aadh ˈgas saal ˈdoyyeká Yíésu af gaa guđoká ki buoy, Eloi, Eloi, lema sabak-dháni? yie. Hé kinaallá hélle kieye, Waagchú, Waagchú, háteka ye haychéel?#15:34 Warˈgat Arram 22:1

35Gál ál kinaal ˈgieká ˈdáá tikiˈd héél maaleká kieye, Ebá dhaayyíe, máá giriká Elíya veveme, hol yie.

36Mú tikiˈd ˈdodhdhe, đafar ˈduuny bírigká ki tie, tá ˈgul mé ki ˈdane, Yíésu ki helie, giri muí ˈbuusatká. Máá kinaal kieye, Ebá kí mú hayo, mú kí ká dhaayo, Elíya har ká yiimet-, mú ˈgór gáá lelesuoka, yie.

37Aalé Yíésu af gaa guđoká kúóˈd ki ˈdoy, đo sidh hí ˈgite. 38Aalé đafar ˈBíl Waaˈgiet-, ˈbíllé geereká af gaa tielká eiy lođuđugul fuate, mé đig, el đig. 39Máá yuoy kúˈd mé ki yiel mare Yíésu bala kí ˈdie. Mu Yíésu yaalmit he kufumeká argeká kieye, Hé ˈduwa, máállá gon he Iny Waaˈgiet, yie.

40Ál kinaal úba hé gál ˈdiet Yíésu dhaˈgame-, tagéétí ˈgie mare hí ˈgie. Gál ˈdíét kinaal mú tikiˈd María Magaˈdalaká, mú tikiˈd María giri Yákob ninniká ubaa Yoséítos ˈjielléká, mú tikiˈd Salóme. 41Gál ˈdíétallá Yíésu Galilááya gaa ijeká ííni mú ˈgar seseme, mú golmie. Gál ˈdiet éíy burnay-, mú hol Yerúsalem ˈgar ka yimieká úba hé ál kinaallá gaa ije.

Yíésu gaalí galie

42Kúlích kinaallá he kúlích gaalí shokodaam hol met tág gaa nannuo-, bííylé ka biiˈdoká Kúlích Hef ˈGisanká. 43Aadh gaanateká máá ˈjien Arimataya-, gaalí Yúósef yegie-, gál arráká máállé ˈdúwa-, Guch Waaˈgiet ka chiimetoká úba met egeseká ká yimie. Máá kinaallá hát sierm mantiká Bilááto ˈdú sedhe, mú gón Yiesu ruogone. 44Bilááto Yíésu hát đo kufeká, af ˈdabe. Aalé mu máá giri yuoy kúˈd mé ki yielká ká vie, tá mú heete, Yíésu har kín kufeka. 45Bilááto máá kinaal hí fayám shie. Aalé Bilááto Yíésu kúfáchle ˈdúúw maaleká Yúósef geey, giri mu Yíésu gónle egeetká. 46Aalé Yúósef đafaraam édh-, ka hidhdheká Yíésu ˈgór úr gáá leesie, mú đafaraam kinaal ki ˈdane, mú liish waariet-, kis gaalí ˈgodhe mare ki galie. Mu nyátáábá gaalgalsie, liish af gaa koy. 47María Magaˈdalaká ubaa María giri Yoséítos ˈjielléká ál gaalí Yíésu gaa kaayká arge.

Currently Selected:

Márko 15: dsh

Highlight

Copy