MARCOS 15

Si Jesus sa Atubangan ni Pilato

(Mat. 27:1-2, 11-14; Luc. 23:1-5; Juan 18:28-38)

1Dihadiha, sa pag-abot na sa kabuntagon, ang mga pangulong pari nakigsabot uban sa mga kadagkoan ug sa mga eskriba ug sa tibuok Sanhedrin. Ug gigapos nila si Jesus ug gidala ug gitugyan ngadto kang Pilato. 2Si Pilato nangutana kaniya, “Ikaw ba ang Hari sa mga Judio?” Ug siya mitubag kaniya, “Gipamulong nimo.” 3Unya ang mga pangulong pari mipasaka ug daghang mga sumbong batok kaniya. 4Ug si Pilato nangutana na usab kaniya, “Wala ka bay ikatubag? Tan-awa unsa ka daghan ang mga sumbong nga ilang gipasaka batok kanimo.” 5Apan si Jesus wala na motubag, tungod niini nahibulong si Pilato.

Si Jesus Gihukman nga Patyon

(Mat. 27:15-31; Luc. 23:13-25; Juan 18:38–19:16)

6Unya nabatasan ni Pilato panahon sa kasaulogan, ang pagbuhi alang kanila sa usa ka binilanggo nga ilang pangayoon. 7Ug dihay usa ka tawo nga gitawag ug Barabas nga gibilanggo kauban sa mga nakigbatok sa kagamhanan ug nakapatay panahon sa usa ka kagubot. 8Busa ang panon sa katawhan misaka ug misugod sa paghangyo kang Pilato nga iya nang buhaton ang iyang naandan nga buhaton alang kanila. 9Ug mitubag siya kanila, “Buot ba kamo nga akong buhian alang kaninyo ang Hari sa mga Judio?” 10Kay nasabtan man niya nga tungod lamang sa ilang kasina gitugyan sa mga pangulong pari si Jesus ngadto kaniya. 11Apan ang mga pangulong pari misugyot sa panon sa katawhan sa pagpabuhi hinuon kang Barabas alang kanila. 12Si Pilato nangutana na usab kanila, “Unya unsa may buot ninyong buhaton nako niining tawhana nga inyong gitawag nga#15:12 buot…gitawag nga: Sa ubang karaang sinulat, buhaton nako niining. Hari sa mga Judio?” 13Ug misinggit sila pag-usab, “Ilansang siya sa krus!” 14Ug si Pilato miingon kanila, “Kay ngano man diay, unsa may iyang nabuhat nga daotan?” Apan misamot na hinuon sila sa pagsinggit, “Ilansang siya sa krus!” 15Busa si Pilato nga nagtinguha sa pagpahimuot sa panon sa katawhan, mibuhi kang Barabas alang kanila ug human niya ipalatigo si Jesus, gitugyan niya siya aron ilansang sa krus.

Si Jesus Gibugalbugalan sa mga Judio

16Unya si Jesus gidala sa mga sundalo ngadto sa hawanan sa palasyo sa gobernador (sa ato pa, ang pretorio) ug ilang gipatigom ang tibuok hugpong sa kasundalohan. 17Ug gisul-oban nila siya ug kapa nga tapol, ug sa nakalukong sila ug purongpurong nga tunokon, ila kining gisul-ob kaniya. 18Ug misugod sila sa pagyukbo kaniya, “Mabuhi, ang Hari sa mga Judio!” 19Gibunalan nila ug lipak ang iyang ulo ug gilud-an nila siya ug miluhod sila agig pasidungog kaniya. 20Ug human nila siya bugalbugali, gihukasan nila siya sa kapa nga tapol ug ilang gibalik pagsul-ob kaniya ang iyang kaugalingong mga bisti. Ug gidala nila siya ngadto sa gawas aron ilansang sa krus.

Si Jesus Gilansang sa Krus

(Mat. 27:32-56; Luc. 23:26-49; Juan 19:17-30)

21 # Rom. 16:13. Unya ilang gipugos sa pagpapas-an sa iyang krus ang usa ka lumalabay nga miabot sa siyudad gikan sa balangay, si Simon nga taga-Cirene nga amahan nila ni Alejandro ug ni Rufo. 22Ug gidala nila si Jesus ngadto sa usa ka dapit nga ginganlan ug Golgota (nga sa ato pa, dapit sa kalabira). 23Unya gihatagan nila siya ug bino nga sinagolan ug mira apan wala niya kini dawata. 24#Sal. 22:18. Ug gilansang nila siya sa krus ug ang iyang mga bisti ilang gibahinbahin tali kanila pinaagi sa ripa aron sa paggahin kon unsa ang maangkon sa matag usa. 25Ikasiyam nga takna sa buntag#15:25 ikasiyam nga takna sa buntag: Sa Grego, ikatulo nga takna. Ang ilang pag-ihap sa takna nagsugod sa pagsubang sa adlaw. kadto sa diha nga gilansang nila siya sa krus. 26Ang sumbong batok kaniya gisulat nga nag-ingon, “Ang Hari sa mga Judio.” 27Ug uban kaniya dihay duha ka tulisan nga ilang gipanglansang sa krus, ang usa sa iyang tuo ug usa sa iyang wala.#15:27 Ang ubang karaang sinulat nagdugang ug bersikulo 28, “Ug natuman ang kasulatan nga nag-ingon, ‘giisip siya nga kauban sa mga malapason.’ ” 29#Sal. 22:7; 109:25; Mar. 14:58; Juan 2:19. Ug ang mga nangagi mibiaybiay nga naglingolingo sa ilang mga ulo ug nag-ingon, “Aha! Ikaw nga maoy moguba unta sa Templo ug mopatindog niini sulod sa tulo ka adlaw, 30luwasa ang imong kaugalingon ug kanaog gikan nianang krus!” 31Mao usab ang mga pangulong pari, nagbugalbugal sila kaniya, nagsultianay sa usa ug usa uban sa mga eskriba, nga nag-ingon, “Giluwas niya ang uban apan dili siya makahimo pagluwas sa iyang kaugalingon. 32Ang Cristo, ang Hari sa Israel, pakanaoga karon gikan nianang krus aron makakita kita ug makatuo.” Ug ang mga gilansang sa krus uban kaniya nagbugalbugal usab kaniya.

Namatay si Jesus

33Sa pag-abot sa udtong tutok,#15:33 udtong tutok…ikatulo nga takna: Sa Grego, ikaunom…ikasiyam nga takna. dihay kangitngit sa tibuok kayutaan hangtod sa ikatulo nga takna.#15:33 IKAUNOM…IKASIYAM NGA TAKNA: Sa ato pa alas 12:00 sa udto ug alas 3:00 sa hapon. 34#Sal. 22:1. Ug sa ikatulo nga takna, si Jesus mituaw sa kusog nga tingog, “Eloi, Eloi, lama sabacthani,” nga sa ato pa “Dios ko, Dios ko, nganong gibiyaan mo ako?” 35Pipila sa mga nagtindog sa duol nga nakadungog niini, miingon, “Tan-awa, nagtawag siya kang Elias.” 36#Sal. 69:21. Ug dihay midagan, ug sa nakapasuyop siya ug daghang suka pinaagi sa espongha, iya kining gibutang sa tumoy sa usa ka lipak ug gitunol ngadto kang Jesus aron iyang imnon ug miingon siya, “Pasagdi kay tan-awon nato kon moanhi ba si Elias aron sa pagkuha kaniya.” 37Apan si Jesus mituaw sa kusog nga tingog ug nabugtoan sa ginhawa. 38#Ex. 26:31-33. Ug ang tabil sa Templo nagisi ngadto sa duha ka bahin gikan sa taas ngadto sa ubos. 39Ug sa dihang nakita sa kapitan nga nagtindog atbang kaniya, nga sa maong paagi nabugtoan siya sa ginhawa, ang kapitan miingon, “Tinuod gayod nga kining tawhana anak sa Dios!”

40Didtoy mga babaye usab nga naglantaw gikan sa layo ug ang uban kanila mao sila si Maria Magdalena ug si Maria nga inahan nila ni Santiago nga manghod ni Joses ug si Salome. 41#Luc. 8:2-3. Sa didto pa si Jesus sa Galilea, kini sila nanguyog ug nag-alagad kaniya. Ug didtoy daghan pang mga babaye nga mitungas sa Jerusalem uban kaniya.

Ang Paglubong Kang Jesus

(Mat. 27:57-61; Luc. 23:50-56; Juan 19:38-42)

42Sa pagkakilomkilom na, kay kadto adlaw man sa Pangandam, nga sa ato pa, adlaw sa dili pa ang adlaw nga igpapahulay, 43si Jose nga taga-Arimatea nga usa ka tinahod nga sakop sa Sanhedrin, ug nagpaabot usab sa gingharian sa Dios, nangahas sa pag-adto kang Pilato ug gipangayo niya ang lawas ni Jesus. 44Apan si Pilato nahibulong nga si Jesus patay na, ug sa natawag niya ang kapitan, nangutana siya kon si Jesus patay na ba. 45Ug sa pagkasayod niya gikan sa kapitan nga siya patay na, gihatag niya ang patayng lawas ni Jesus ngadto kang Jose. 46Unya si Jose mipalit ug panapton nga lino, ug sa napakanaog na niya ang lawas ni Jesus, giputos niya kini ug panapton nga lino ug gipahimutang sa usa ka binangag nga lubnganan diha sa pangpang, ug iyang giligid ang usa ka bato aron itabon sa ganghaan sa lubnganan. 47Ug si Maria Magdalena ug si Maria nga inahan ni Joses nakakita diin siya gipahimutang.

Currently Selected:

MARCOS 15: ABCEB

Highlight

Copy