MARCOS 16

Ang Pagkabanhaw ni Jesus

(Mat. 28:1-10; Luc. 24:1-12; Juan 20:1-10)

1Sa paglabay sa adlaw nga igpapahulay, si Maria Magdalena ug si Maria nga inahan ni Santiago ug si Salome, namalit ug mga pahumot aron ilang adtoon ug dihogan ang lawas ni Jesus. 2Ug sayo kaayo sa unang adlaw sa semana, nangadto sila sa lubnganan sa dihang nakasubang na ang adlaw. 3Ug sila miingon sa usa ug usa, “Kinsa may atong paligiron sa bato gikan sa ganghaan sa lubnganan?” 4Ug sa pagtan-aw pa nila, ilang nakita nga ang bato naligid na, ang maong bato dako kaayo. 5Ug sa pagsulod nila sa lubnganan, ilang nakita ang usa ka batan-ong lalaki nga naglingkod dapit sa tuo, nagsul-ob ug bisti nga puti ug taas. Ug sila nahibulong pag-ayo. 6Apan siya miingon kanila, “Ayaw kamo kahibulong, nangita kamo kang Jesus nga Nazaretnon nga gilansang sa krus. Gibanhaw siya, wala na siya dinhi. Tan-awa ninyo ang dapit nga ilang gibutangan kaniya. 7#Mat. 26:32; Mar. 14:28. Apan panglakaw kamo ug suginli ninyo ang iyang mga tinun-an ug si Pedro nga siya mag-una kaninyo ngadto sa Galilea. Didto ikakita ninyo siya sumala sa iyang giingon kaninyo.” 8Ug nanggula sila ug nanagan gikan sa lubong kay nangurog man sila ug giabot ug kakulba, ug wala silay gikasulti kang bisan kinsa kay nangalisang man sila.#16:8 Ang ubang karaang sinulat mitapos kutob dinhi. Ang uban nagdugang sa Mubo nga Panapos, ug ang uban usab nagdugang sa Taas nga Panapos (ang bersikulo 9-20).

Ang Mubo nga Panapos

[Ang tanan nga gitugon ngadto kanila, ilang gisugilon sa minubo ngadto kang Pedro ug mga kauban niya. Human niini, si Jesus gayod, gikan sa silangan ngadto sa kasadpan mipadala pinaagi kanila sa balaan ug malungtaron nga mensahe mahitungod sa dayon nga kaluwasan. Amen.]#16:8 Amen: Sa ubang karaang sinulat wala kini.

Ang Taas nga Panapos

Si Jesus Nagpakita Ngadto kang Maria Magdalena

(Juan 20:11-18)

[9Sa pagkabanhaw niya nianang kaadlawon sa unang adlaw sa semana, siya mipakita pag-una ngadto kang Maria Magdalena nga iyang gipagulaan ug pito ka demonyo. 10Si Maria miadto ug iyang gisuginlan kadtong mga nakig-uban kang Jesus samtang sila nagbangutan ug nanghilak. 11Apan sa ilang pagkadungog nga siya buhi ug nga siya nakita ni Maria, wala sila motuo niini.

Si Jesus Nagpakita Ngadto sa Duha ka Tinun-an

(Luc. 24:13-35)

12Human niini, diha sa lahi nga panagway mipakita siya sa duha kanila samtang naglakaw sila sa dalan paingon sa balangay. 13Ug mibalik sila ug nanugilon sa uban apan wala sila nila tuohi.

Ang Tugon ni Jesus Ngadto sa Napulo ug Usa

(Mat. 28:16-20; Luc. 24:36-49; Juan 20:19-23)

14Unya mipakita siya sa napulo ug usa samtang nanambong sila sa kan-anan ug gisaway niya sila tungod sa kakulang nila ug pagtuo ug kagahi nila ug kasingkasing, kay wala man sila motuo sa mga nakakita kaniya human siya mabanhaw. 15#Buh. 1:8. Ug siya miingon kanila, “Panglakaw kamo ngadto sa tibuok kalibotan ug iwali ninyo ang Maayong Balita ngadto sa tanang binuhat. 16Ang motuo ug magpabautismo maluwas apan ang dili motuo hukman sa silot. 17Ug kanila nga motuo mag-uban kining maong mga ilhanan: pinaagi sa akong ngalan ang mga demonyo ilang hinginlan, magsulti sila ug bag-ong mga pinulongan, 18kuptan nila ang mga bitin ug kon makainom sila ug bisan unsa nga makahilo, dili sila maunsa, tapin-an nila sa ilang mga kamot ang mga masakiton ug mangaayo sila.”

Ang Pagbayaw Kang Jesus Ngadto sa Langit

(Luc. 24:50-53)

19Unya ang Ginoong Jesus, human siya makasulti kanila, gibayaw ngadto sa langit ug milingkod dapit sa tuo sa Dios. 20Ug nanglakaw sila ug nagwali didto sa tanang dapit ug ang Ginoo nagbuhat uban kanila ug nagpamatuod sa pulong pinaagi sa mga ilhanan nga nag-uban niini. Amen.]#16:20 Amen: Wala kini sa ubang karaang sinulat.

Currently Selected:

MARCOS 16: ABCEB

Highlight

Copy