MATEO 14

Ang Pagkamatay ni Juan nga Tigbautismo

(Mar. 6:14-29; Luc. 9:7-9)

1Niadtong panahona si Herodes nga gobernador nakadungog sa kabantog ni Jesus. 2Ug siya miingon sa iyang mga sulugoon, “Kini mao si Juan nga Tigbautismo, gibanhaw siya gikan sa mga patay busa kining mga gahoma naglihok diha kaniya.” 3#Luc. 3:19-20. Si Herodes mao ang nagpadakop kang Juan, iyang gipagapos siya ug gipabilanggo tungod kang Herodias nga asawa ni Felipe nga igsoon ni Herodes 4#Lev. 18:16; 20:21. kay si Juan miingon man kaniya, “Supak sa balaod ang pag-angkon nimo kaniya.” 5Ug buot unta niyang patyon si Juan, apan nahadlok siya sa katawhan kay siya ila mang giila nga propeta. 6Apan sa kasumaran sa adlawng natawhan ni Herodes, ang babayeng anak ni Herodias misayaw sa atubangan sa mga dinapit ug kini nakapahimuot kang Herodes. 7Tungod niini misaad siya uban sa usa ka panumpa nga iyang ihatag kaniya ang bisan unsa nga pangayoon niini. 8Ug ang dalagita, tinudloan sa iyang inahan, miingon, “Ihatag dinhi kanako ang ulo ni Juan nga Tigbautismo, sinulod sa bandihado.” 9Ug nasubo ang hari apan tungod sa iyang mga panumpa ug sa iyang mga dinapit nga nangaon uban kaniya, siya misugo nga ipahatag kini. 10Ug iyang gipaadtoan ug gipaputlan sa ulo si Juan sulod sa bilanggoan. 11Ug ang ulo ni Juan gihatod, sinulod sa bandihado ug gihatag ngadto sa dalagita ug kini iyang gidala ngadto sa iyang inahan. 12Unya miabot ang mga tinun-an ni Juan ug ilang gikuha ang iyang lawas ug gilubong ug nangadto sila ug gisuginlan si Jesus.

Gipakaon ang Lima ka Libo

(Mar. 6:30-44; Luc. 9:10-17; Juan 6:1-14)

13Ug sa pagkadungog ni Jesus niini, siya mipalayo gikan didto sakay sa usa ka sakayan paingon sa usa ka dapit nga mingaw aron sa pag-inusara. Apan sa pagkadungog sa mga katawhan niini, sila misunod kaniya nga nanglakaw gikan sa kalungsoran. 14Ug sa pagkawas ni Jesus ngadto sa mamala, nakita niya ang usa ka dakong panon sa mga tawo ug siya naluoy kanila ug iyang giayo ang ilang mga masakiton. 15Ug sa pagkahapon na kaayo, ang mga tinun-an miduol kaniya ug miingon, “Awaaw kining dapita ug hapon na kaayo, palakta na ang katawhan aron mangadto sila sa mga balangay aron mamalit ug pagkaon.” 16Apan si Jesus miingon kanila, “Dili kinahanglan nga manglakaw sila. Kamo ang maghatag kanila ug makaon.” 17Ug sila miingon kaniya, “Wala kitay makaon dinhi gawas lamang sa lima ka pan ug duha ka isda.” 18Ug siya miingon, “Dad-a kana diri kanako.” 19Unya iyang gisugo ang panon sa katawhan sa pagpanglingkod sa mga balili. Ug samtang gigunitan niya ang lima ka pan ug duha ka isda, miyahat siya sa langit ug nagpasalamat. Unya iyang gipikaspikas ang mga pan ug gihatag ngadto sa mga tinun-an ug gihatag kini sa mga tinun-an ngadto sa katawhan. 20Busa nangaon silang tanan ug nangabusog. Ug ilang gihipos ang nahibilin nga mga tipik nga miabot ug napulo ug duha ka bukag. 21Ang nangaon mga lima ka libo ka lalaki, gawas sa mga babaye ug mga bata.

Si Jesus Milakaw Ibabaw sa Tubig

(Mar. 6:45-52; Juan 6:15-21)

22Ug ang mga tinun-an gipasakay dayon#14:22 dayon: Wala kini sa ubang karaang sinulat. ni Jesus sa sakayan ug gipauna ngadto sa pikas nga daplin samtang gipalakaw niya ang mga panon sa katawhan. 23Ug sa napagikan na niya ang mga panon sa katawhan, nag-inusara siya pagtungas sa bungtod aron sa pag-ampo. Ug sa pagkagabii na, siya rang usa didto. 24Apan niadtong tungora ang sakayan layo na gikan sa mamala#14:24 layo…mamala: Sa ubang karaang sinulat, didto na sa tunga sa lanaw. ug gikusokuso sa mga balod kay sungsongon man ang hangin. 25Ug sa ikaupat nga hugna sa kagabhion,#14:25 ikaupat…kagabhion: Ang mga Romanhon nagbahin sa kagabhion ngadto sa upat ka hugna, sa mga Judio tulo. miadto siya kanila, naglakaw ibabaw sa tubig. 26Apan sa ilang pagkakita kaniya nga naglakaw ibabaw sa tubig, ang mga tinun-an nangalisang ug nag-ingon, “Naay multo!” Ug naniyagit sila sa kalisang. 27Apan dihadiha, si Jesus misulti kanila nga nag-ingon, “Salig kamo, ako kini; ayaw kamo kalisang.”

28Mitubag kaniya si Pedro nga nag-ingon, “Ginoo, kon ikaw man kana, tugoti ako nga moanha kanimo ibabaw sa tubig.” 29Ug siya miingon, “Dali diri.” Busa si Pedro mikawas sa sakayan ug milakaw ibabaw sa tubig ug miadto kang Jesus. 30Apan sa pagkakita niya sa hangin,#14:30 hangin: Sa ubang karaang sinulat, kusog nga hangin. nahadlok siya ug sa nag-anam siya pagtidlom, misinggit siya nga nag-ingon, “Ginoo, luwasa ako!” 31Dihadiha gituy-od ni Jesus ang iyang kamot ug iyang gikuptan si Pedro ug giingnan, “O tawong gamay ug pagtuo, nganong nagduhaduha man ikaw?” 32Ug sa nakasakay na sila sa sakayan, ang hangin milurang. 33Unya sila nga didto sa sakayan misimba kaniya ug miingon, “Sa pagkatinuod ikaw mao ang Anak sa Dios.”

Giayo ni Jesus ang mga Masakiton sa Genezaret

(Mar. 6:53-56)

34Ug sa nakatabok na sila, midunggo sila sa Genezaret.

35Sa dihang nailhan siya sa mga tawo niadtong dapita nagpadala sila ug balita ngadto sa tanang mga kasikbit nga kayutaan ug ilang gidala ngadto kaniya ang tanang may sakit. 36Ug nagpakiluoy sila kaniya nga pahikapon lamang unta sila sa sidsid sa iyang bisti ug nangaayo ang tanang nakahikap niini.

Currently Selected:

MATEO 14: ABCEB

Highlight

Copy