MATEO 13

Ang Sambingay Mahitungod sa Magpupugas

(Mar. 4:1-9; Luc. 8:4-8)

1Sa mao gihapon nga adlaw, si Jesus nanaog sa balay ug milingkod sa daplin sa lanaw. 2#Luc. 5:1-3. Ug midugok kaniya ang dagkong mga panon sa katawhan busa misakay siya sa usa ka sakayan ug milingkod didto ug ang tibuok panon sa katawhan nagtindog sa baybayon. 3Ug daghan ang gisulti niya kanila pinaagi ug mga sambingay nga nag-ingon, “Usa ka magpupugas miadto aron sa pagsabod ug binhi. 4Ug sa iyang pagsabod may mga binhi nga nahulog sa daplin sa dalan ug ang mga langgam midugok ug mituka sa binhi. 5Ang ubang mga binhi nahulog sa kabatoan diin dili daghan ang yuta ug kini miturok dayon tungod kay kini wala may giladmon diha sa yuta. 6Apan sa pagsubang sa adlaw, kini nalawos ug kay wala may gamot, kini nalaya. 7Ang ubang mga binhi diha nahulog sa kasampinitan, ug ang mga sampinit mitubo ug miluok niini. 8Apan ang ubang mga binhi nahulog sa maayong yuta ug kini namunga, may namunga ug tagsa ka gatos ka pilo, ang uban 60 ug ang uban 30. 9Ang may igdulungog kinahanglang magpatalinghog.”

Ang Katuyoan sa mga Sambingay

(Mar. 4:10-12; Luc. 8:9-10)

10Unya miduol ang mga tinun-an ug miingon kaniya, “Nganong pinaagi man sa mga sambingay ang imong pagsulti kanila?” 11Mitubag siya nga nag-ingon, “Tungod kay kaninyo gitugot ang pagkahibalo sa mga tinago sa gingharian sa langit apan kanila wala kini itugot. 12#Mat. 25:29; Mar. 4:25; Luc. 8:18; 19:26. Kay siya nga adunay iya, hatagan pa gayod ug magmadagayaon siya, apan siya nga walay iya, bisan ang anaa kaniya kuhaon pa gayod. 13Tungod niini nagsulti ako kanila pinaagi ug mga sambingay kay sa ilang pagtan-aw sila dili makakita, ug sa ilang pagpaminaw sila dili makabati o makasabot. 14Diha kanila natuman ang propesiya ni Isaias nga nag-ingon,

‘Sa pagpaminaw makabati kamo apan dili makasabot,

sa pagtan-aw makasud-ong kamo apan dili gayod makakita.

15 # Isa. 6:9-10 (LXX). Kay ang kasingkasing niining mga tawhana gikubalan

ug ang ilang mga dalunggan gilisdan sa pagpaminaw,

ug ang ilang mga mata gipiyong nila

kay tingali unya hinuon ug makakita sila

pinaagi sa ilang mga mata

ug makabati pinaagi sa ilang mga dalunggan

ug makasabot pinaagi sa ilang kasingkasing,

ug mamalik sila kanako aron ayohon nako sila!’

16Apan bulahan gayod ang inyong mga mata kay makakita man ug ang inyong mga dalunggan kay makabati man. 17#Luc. 10:23-24. Sa pagkatinuod, sultihan ko kamo nga daghan ang mga propeta ug mga tawong matarong nga nangandoy sa pagtan-aw sa inyong nakita apan wala sila makakita niini, ug sa pagpamati unta sa inyong nabatian apan wala sila makabati niini.

Gipasabot ni Jesus ang Kahulogan sa Sambingay Mahitungod sa Magpupugas

(Mar. 4:13-20; Luc. 8:11-15)

18“Busa patalinghogi ninyo ang sambingay mahitungod sa usa ka magpupugas. 19Sa diha nga ang usa ka tawo makabati sa pulong mahitungod sa gingharian ug dili siya makasabot niini, ang daotan motungha ug mosakmit sa gikasabod diha sa iyang kasingkasing. Kini mao ang nahisabod diha sa daplin sa dalan. 20Ug mahitungod niadtong nahisabod diha sa kabatoan, kini mao kadtong nakadungog sa pulong ug dihadiha iya kining gidawat uban sa kalipay. 21Apan siya mismo walay gamot ug molahutay lamang sa makadiyot, ug sa dihang moabot ang kasakitan o pagpanglutos tungod sa pulong, matumba dayon siya. 22Mahitungod niadtong nahisabod diha sa kasampinitan, kini mao kadtong nakadungog sa pulong apan ang mga kabalaka niining kalibotana ug ang gugma sa bahandi magtuok sa pulong ug kini dili makapamunga. 23Mahitungod sa nahisabod diha sa maayong yuta, kini mao kadtong nakadungog sa pulong ug nakasabot niini. Kini siya mamunga gayod ug maghatag ug abot, sa usa ka higayon usa ka gatos ka pilo, ug sa lain 60, ug sa lain 30.”

Ang Sambingay Mahitungod sa mga Sagbot

24Ug si Jesus mihatag kanila ug lain pang sambingay nga nag-ingon, “Ang gingharian sa langit sama sa usa ka tawo nga nagsabod ug maayong binhi diha sa iyang uma 25apan samtang nangatulog ang mga tawo, ang iyang kaaway miadto ug nagsabod ug mga binhi sa sagbot taliwala sa mga trigo ug unya mipalayo. 26Busa sa dihang nanubo na ang mga trigo ug nanguhay, nakita usab ang mga sagbot. 27Ug ang mga ulipon sa pangulo sa panimalay miduol ug miingon kaniya, ‘Ginoo, dili ba maayo man kadtong binhi nga gisabod nimo sa imong uma? Naunsa bang anaa may mga sagbot?’ 28Siya miingon kanila, ‘Ang kaaway maoy nagbuhat niini.’ Ug ang mga ulipon miingon kaniya, ‘Unya buot mo bang adtoon namo ug pangibton?’ 29Apan siya miingon kanila, ‘Ayaw, kay tingali unya hinuon nga sa inyong pagpangibot sa mga sagbot maibot ninyo ang mga trigo uban niini. 30Pasagdi sila nga magkaipon sa pagtubo karon hangtod sa ting-ani. Ug sa pagpangani na unya, ingnon nako ang mga tig-ani, Pangibta una ninyo ang mga sagbot ug bangana aron sunogon apan ang mga trigo hakota ninyo ngadto sa akong kamalig.’ ”

Ang Sambingay Mahitungod sa Liso sa Mustasa

(Mar. 4:30-32; Luc. 13:18-19)

31Ug mihatag siya kanila ug lain pang sambingay nga nag-ingon, “Ang gingharian sa langit sama sa liso sa mustasa nga gidala sa usa ka tawo ug gipugas niya sa iyang uma. 32Kini gamay kaayo kay sa ubang mga liso apan sa dihang modako na, kini mao ang labing dako sa tanang tanom sa tanaman ug mahimong kahoy nga tungod niana ang mga langgam sa kalangitan moanha ug magsalag diha sa mga sanga niini.”

Ang Sambingay Mahitungod sa Patubo sa Pan

(Luc. 13:20-21)

33Ug misugilon siya kanila ug lain pang sambingay, “Ang gingharian sa langit sama sa patubo nga gikuha sa usa ka babaye ug gisagol niya pagmasa sa tulo ka takos nga harina hangtod nga kini mitubo.”

Ang Paggamit ni Jesus sa mga Sambingay

(Mar. 4:33-34)

34Kining tanan gisulti ni Jesus ngadto sa mga katawhan pinaagi ug mga sambingay ug wala gayod siyay gisulti kanila nga walay sambingay. 35#Sal. 78:2. Kini aron matuman ang gisulti sa propeta#13:35 sa propeta: Ang ubang karaang sinulat nag-ingon, ni Isaias nga propeta. nga nag-ingon,

“Bukhon nako ang akong baba ginamit ang mga sambingay,

Litokon nako ang mga tinago sukad pa sa pagkatukod sa kalibotan.”

Gisaysay ni Jesus ang Kahulogan sa Sambingay Mahitungod sa mga Sagbot

36Unya gipalakaw ni Jesus ang katawhan ug misulod siya sa balay. Ug miduol kaniya ang iyang mga tinun-an nga nag-ingon, “Pasabta kami sa sambingay mahitungod sa mga sagbot sa uma.” 37Ug kanila mitubag siya nga nag-ingon, “Ang nagsabod sa maayong binhi mao ang Anak sa Tawo, 38ang uma mao ang kalibotan, ug ang maayong binhi mao ang mga anak sa gingharian, ang mga sagbot mao ang mga anak sa daotan. 39Ug ang kaaway nga nagsabod kanila mao ang yawa, ang ting-ani mao ang kataposan sa kapanahonan ug ang mga tig-ani mao ang mga anghel. 40Busa sama nga ang mga sagbot pangibton ug sunogon sa kalayo, mao usab kana ang mahitabo unya sa kataposan sa kapanahonan.#13:40 sa kapanahonan: Ang ubang karaang sinulat nag-ingon, niining kapanahonan. 41Ipadala unya sa Anak sa Tawo ang iyang mga anghel ug ilang tapokon ug hakoton ngadto sa gawas sa iyang gingharian ang tanang hinungdan sa pagpakasala ug ang tanang mga malapason sa balaod 42ug ilang itambog sila ngadto sa hudno nga nagdilaab. Didto ang mga tawo manghilak ug magkagot ang ilang mga ngipon. 43Unya sama sa adlaw mosidlak ang mga matarong didto sa gingharian sa ilang Amahan. Ang may mga igdulungog kinahanglang magpatalinghog.

Ang Sambingay Mahitungod sa Gitagoang Bahandi

44“Ang gingharian sa langit sama sa usa ka bahandi nga gitagoan didto sa usa ka uma. Nakaplagan kini sa usa ka tawo ug iya kining gibalik pagtago ug tungod sa iyang kalipay siya milakaw ug iyang gibaligya ang tanan niyang kabtangan ug iyang gipalit ang maong uma.

Ang Sambingay Mahitungod sa Perlas

45“Usab, ang gingharian sa langit sama sa usa ka tigpapatigayon nga nangita ug maanindot nga mga perlas 46ug sa pagkakaplag niya sa usa ka perlas nga bililhon kaayo, milakaw siya ug gipamaligya ang tanan niyang kabtangan ug iyang gipalit ang maong perlas.

Ang Sambingay Mahitungod sa Pukot

47“Usab, ang gingharian sa langit sama sa usa ka pukot nga gitaktak ngadto sa dagat ug nakakuha ug nagkalainlaing matang sa isda. 48Ug sa dihang napuno na kini, gibitad kini sa mga tawo ngadto sa baybayon, ug sila nanglingkod ug ilang gipili ang mga maayong isda ug gibutang kini sa mga sudlanan apan ang mga walay pulos ilang gilabay. 49Sama unya niana ang mahitabo inigkatapos na sa kapanahonan. Ang mga anghel moabot ug ang mga daotan ilang lainon gikan sa mga matarong. 50Ilang ilabay ang mga daotan ngadto sa hudno nga nagdilaab ug didto ang mga tawo manghilak ug magkagot ang ilang mga ngipon.

Ang mga Bahandi nga Bag-o ug Daan

51“Nakasabot ba kamo niining tanan?” Sila miingon, “Oo.” 52Ug siya miingon kanila, “Busa ang matag usa ka eskriba nga natudloan mahitungod sa gingharian sa langit sama sa usa ka pangulo sa panimalay nga magpagula gikan sa iyang mga bahandi sa mga butang nga bag-o ug daan.”

Si Jesus Gisalikway sa Nazaret

(Mar. 6:1-6; Luc. 4:16-30)

53Sa pagkahuman ni Jesus niining mga sambingaya, siya mibiya gikan didto. 54Unya pag-abot niya sa iyang kaugalingong lungsod, siya nagtudlo kanila sulod sa ilang sinagoga nga niini sila nahibulong ug nag-ingon, “Diin man niya kuhaa ang maong kaalam ug gahom sa paghimo ug milagro? 55Dili ba siya mao man ang anak sa panday? Dili ba ang iyang inahan ginganlan ug Maria? Ug dili ba ang iyang mga igsoong lalaki mao man sila si Santiago ug si Jose ug si Simon ug si Judas? 56Ug dili ba ang tanan niyang mga igsoong babaye ania man uban kanato? Busa diin man niya makuha kining tanan?” 57#Juan 4:44. Ug sila misalikway kaniya. Apan si Jesus miingon kanila, “Ang propeta dungganan bisan diin gawas lamang sa iyang kaugalingong lungsod ug sa iyang kaugalingong panimalay.” 58Ug didto wala siya maghimo ug daghang mga milagro tungod sa ilang pagkawalay pagtuo.

Currently Selected:

MATEO 13: ABCEB

Highlight

Copy