MATEO 12

Pangutana Mahitungod sa Adlawng Igpapahulay

(Mar. 2:23-28; Luc. 6:1-5)

1 # Deut. 23:25. Niadtong panahona, sa adlawng igpapahulay si Jesus miagi sa kaumahan ug ang iyang mga tinun-an gipanggutom ug sila misugod sa pagpangutlo ug mga uhay ug nangaon. 2Apan ang mga Pariseo nga nakakita niini miingon kaniya, “Tan-awa, ang imong mga tinun-an nagbuhat sa supak sa Balaod sa adlaw nga igpapahulay.” 3#1 Sam. 21:1-6. Siya miingon kanila, “Wala ba kamo makabasa mahitungod sa gibuhat ni David, sa dihang gigutom siya ug ang iyang mga kauban? 4#Lev. 24:9. Misulod siya sa balay sa Dios ug mikaon sa mga pan nga gihalad diha sa halaran bisan supak sa balaod ang pagkaon niya niini ug sa iyang mga kauban kay kini alang man lamang sa mga pari. 5#Num. 28:9-10. O wala ba ninyo mabasa sa Balaod nga sa adlawng igpapahulay ang mga pari sulod sa Templo nagpasipala man sa adlaw nga igpapahulay apan wala sila pakasad-a niini? 6Apan sultihan ko kamo, nga aniay usa nga labaw pa kay sa Templo. 7#Mat. 9:13; Hos. 6:6. Ug kon nakasabot pa unta kamo sa kahulogan niini, ‘Kaluoy ang akong gitinguha, dili ang halad,’ dili unta ninyo pakasad-on ang mga walay sala. 8Kay ang Anak sa Tawo agalon bisan pa sa adlaw nga igpapahulay.”

Ang Tawo nga May Kamot nga Mikuyos

(Mar. 3:1-6; Luc. 6:6-11)

9Mibiya si Jesus didto ug misulod sa ilang sinagoga. 10Unya, didtoy usa ka tawo nga may kamot nga mikuyos. Ug aron may ikasumbong sila batok kang Jesus, nangutana sila kaniya, “Uyon ba sa Balaod ang pagpang-ayo ug mga sakit panahon sa adlaw nga igpapahulay?” 11#Luc. 14:5. Siya miingon kanila, “Kinsa bang tawhana kaninyo nga may usa ka karnero nga kon mahulog kini sa lungag sa adlaw nga igpapahulay dili magkuha niini gikan sa lungag? 12Dako pa kaayo ug bili ang tawo kay sa karnero! Busa, uyon sa Balaod ang pagbuhat ug maayo sa adlaw nga igpapahulay.” 13Unya si Jesus miingon sa tawo, “Ituy-od ang imong kamot.” Ug gituy-od niya ang iyang kamot ug naulian kini, maayo na sama sa usa. 14Apan ang mga Pariseo nanggula ug nagsabot batok kang Jesus kon unsaon nila sa paglaglag kaniya.

Ang Sulugoon nga Pinili sa Dios

15Si Jesus nga nasayod niini, mipalayo gikan didto. Ug daghan#12:15 daghan: Ang ubang karaang sinulat nag-ingon: daghang mga panon. ang mikuyog kaniya ug iyang giayo silang tanan 16ug iyang gibaoran sila nga dili nila siya ipanugilon. 17Kini aron matuman ang gisulti pinaagi sa propeta nga si Isaias,

18“Tan-awa, ang akong sulugoon nga akong pinili,

ang akong pinalangga nga nakapahimuot sa akong kalag.

Ibutang nako ang akong Espiritu diha kaniya

ug siya magsangyaw sa hustisya ngadto sa mga Gentil.

19Dili siya makiglalis o mosinggit,

ug walay makadungog sa iyang tingog diha sa kadalanan.

20Dili siya mobali sa bagakay nga nasiak

o mopalong sa pabilo nga nagbaga na lang

hangtod nga mapatigbabaw na niya ang hustisya.

21 # Isa. 42:1-4 (LXX). ug sa iyang ngalan molaom ang mga Gentil.”

Si Jesus ug si Beelzebul

(Mar. 3:19-30; Luc. 11:14-23)

22Unya dihay usa ka tawo nga buta ug amang nga gidemonyohan nga gidala ngadto kang Jesus ug kini iyang giayo ug unya ang tawo makasulti ug makakita na. 23Ug nahibulong ang tanang mga tawo ug miingon, “Mao na ba kaha kini ang Anak ni David?” 24#Mat. 9:34; 10:25. Apan ang mga Pariseo nga nakadungog niini miingon, “Kining tawhana nagpagula sa mga demonyo pinaagi ra usab kang Beelzebul, ang pangulo sa mga demonyo.” 25Apan si Jesus nga nasayod sa ilang mga hunahuna miingon kanila, “Ang matag gingharian nga mabahin batok sa iyang kaugalingon mapukan, ug ang matag siyudad o balay nga mabahin batok sa iyang kaugalingon dili motunhay. 26Ug kon si Satanas magpagula kang Satanas, nabahin diay siya batok sa iyang kaugalingon, busa unsaon man sa pagtunhay sa iyang gingharian? 27Ug kon pinaagi kang Beelzebul gihinginlan nako ang mga demonyo, pinaagi kang kinsa ba diay ang inyong mga anak naghingilin kanila? Busa sila mao ang maghukom kaninyo. 28Apan kon pinaagi sa Espiritu sa Dios ako nagpagula sa mga demonyo, ang gingharian sa Dios miabot na diha kaninyo. 29O unsaon man sa usa ka tawo pagsulod sa balay sa tawong kusgan ug pagsakmit sa kabtangan niini, kon dili una niya gaposon ang tawong kusgan? Ug unya makahimo na siya sa pagpanguha gikan sa balay niini. 30#Mar. 9:40. Ang dili dapig kanako, batok kanako ug ang wala magtigom uban kanako, nagpatibulaag. 31Busa sultihan ko kamo nga ang tanang sala ug pagpasipala sa tawo mapasaylo, apan ang pagpasipala batok sa Espiritu dili gayod mapasaylo. 32#Luc. 12:10. Ug bisan kinsa nga magsulti batok sa Anak sa Tawo, mapasaylo apan bisan kinsa nga magsulti batok sa Espiritu Santo dili gayod pasayloon, bisan niining panahona karon o sa umaabot nga panahon.

Ang Kahoy ug ang Bunga Niini

33 # Mat. 7:20; Luc. 6:44. “Mahimong himoon ninyong maayo ang kahoy, ug maayo ang bunga niini, o himoon ba ninyong walay pulos ang kahoy ug mawalay pulos ang bunga niini, kay ang kahoy maila pinaagi sa bunga niini. 34Kamong mga kaliwat sa bitin! Unsaon man ninyo pagsultig maayo nga mga daotan man kamo? Kay gikan sa kapuno sa kasingkasing mosulti ang baba.#Mat. 3:7; 23:33; Luc. 3:7; Mat. 15:18; Luc. 6:45. 35Ang maayong tawo magpagula ug maayo gikan sa iyang maayong bahandi apan ang daotang tawo magpagula ug daotan gikan sa iyang daotang bahandi. 36Sultihan ko kamo, nga sa adlaw sa paghukom ang mga tawo maghatag unya ug husay alang sa matag pulong nga walay pulos nga ilang gilitok, 37kay pinasikad sa imong mga pulong ikaw ilhong matarong ug pinasikad sa imong mga pulong ikaw hukman sa silot.”

Ang Daotan nga Kaliwatan Nangita ug Ilhanan

(Luc. 11:29-32)

38 # Mat. 16:1; Mar. 8:11; Luc. 11:16. Unya dihay mga eskriba ug mga Pariseo nga miingon kaniya, “Magtutudlo, buot unta kaming motan-aw ug ilhanan gikan kanimo.” 39#Mat. 16:4; Mar. 8:12. Apan kanila mitubag siya nga nag-ingon, “Ang usa ka daotan ug maluibon nga kaliwatan mangita ug ilhanan apan walay laing ilhanan nga ihatag niini gawas lamang sa ilhanan ni Jonas nga propeta. 40#Jon. 1:17. Kay sama nga si Jonas didto sa tiyan sa dakong isda sulod sa tulo ka adlaw ug tulo ka gabii, ang Anak sa Tawo usab adto sa kahiladman sa yuta sulod sa tulo ka adlaw ug tulo ka gabii. 41#Jon. 3:5. Ang mga tawo sa Ninibe mobangon ra unya sa adlaw sa paghukom uban niining maong katawhan ug maghukom niini sa silot kay ang taga-Ninibe naghinulsol tungod sa pagwali ni Jonas, ug tan-awa, dinhi karon aniay labaw pa kang Jonas. 42#1 Hari 10:1-10; 2 Cron. 9:1-12. Ang rayna sa Habagatan mobangon ra unya sa adlaw sa paghukom uban niining maong katawhan ug maghukom niini sa silot, kay siya mianhi gikan sa kinatumyan sa yuta aron sa pagpamati sa kaalam ni Solomon, ug tan-awa, dinhi karon aniay labaw pa kang Solomon.

Ang Pagbalik sa Hugaw nga Espiritu

(Luc. 11:24-26)

43“Sa diha nga ang hugaw nga espiritu mogula gikan sa tawo, kini mosuroy latas sa mga uga nga dapit aron pagpangita ug kapahulayan apan dili siya makakaplag. 44Unya moingon siya, ‘Mobalik hinuon ako sa akong balay diin ako gikan.’ Ug sa pag-abot niya, iyang makita kini nga wala puy-i, sinilhigan na ug maayong pagkahimutang. 45Unya molakaw siya ug magkuha ug laing pito ka espiritu nga labaw pa ka daotan kay kaniya ug sila mosulod ug mopuyo niini. Ug ang ulahing kahimtang niadtong tawhana labaw pa ka ngil-ad kay sa sinugdan. Busa mao usab kana ang mahitabo niining daotan nga kaliwatan.”

Ang Inahan ug ang mga Lalaking Igsoon ni Jesus

(Mar. 3:31-35; Luc. 8:19-21)

46Samtang nagsulti pa siya sa katawhan, ang iyang inahan ug ang iyang mga igsoong lalaki nagtindog didto sa gawas, buot makigsulti kaniya. [47Dihay misugilon kaniya, “Ang imong inahan ug ang imong mga igsoong lalaki nagtindog didto sa gawas ug buot makigsulti kanimo”]#12:47 Sa ubang karaang sinulat wala ang bersikulo 47. 48Apan siya mitubag ngadto sa tawo nga misugilon kaniya, “Kinsa ba ang akong inahan, ug kinsa ba ang akong mga igsoong lalaki?” 49Ug gituy-od niya ang iyang kamot ngadto sa iyang mga tinun-an ug miingon, “Tan-awa, sila mao ang akong inahan ug ang akong mga igsoon! 50Kay si bisan kinsa nga nagbuhat sa kabubut-on sa akong Amahan nga anaa sa langit, mao ang akong igsoong lalaki ug akong igsoong babaye ug akong inahan.”

Currently Selected:

MATEO 12: ABCEB

Highlight

Copy