EZEKIEL 40

Usa ka Panan-awon sa Umaabot nga Templo

(40:1–48:35)

Si Ezekiel Gidala ngadto sa Jerusalem

1Sa ika-25 nga tuig sa among pagkabihag, sa sinugdanan sa tuig, sa ikanapulo nga adlaw sa bulan, sa ikanapulo ug upat nga tuig human gun-oba ang siyudad, sa mao gayod nga adlaw, ang kamot sa Ginoo diha sa ibabaw kanako, ug gidala niya ako didto. 2#Pin. 21:10. Gidala niya ako, diha sa mga panan-awon sa Dios, ngadto sa yuta sa Israel, ug gipahimutang ako sa usa ka habog kaayo nga bukid, diin didto adunay daw dagway sa usa ka siyudad dapit sa habagatan. 3#Pin. 11:1; 21:15. Sa diha nga gidala niya ako didto, dihay usa ka tawo nga ang dagway sama sa bronsi, nagdala ug pisi nga lanot diha sa iyang kamot ug usa ka igsusukod nga lipak, ug siya nagtindog didto sa ganghaan. 4Ug ang tawo miingon kanako, “Anak sa tawo, tan-aw pinaagi sa imong mga mata, ug pamati pinaagi sa imong mga dalunggan, ug timan-i diha sa imong hunahuna ang tanan nga ipakita nako kanimo, kay gidala ikaw dinhi aron kini ikapakita nako kanimo. Isugilon ang tanan nga makita nimo ngadto sa balay sa Israel.”

Ang Ganghaan Dapit sa Silangan

5 # 1 Hari 6:1-38; 2 Cron. 3:1-9. Ug tan-awa, dihay usa ka paril nga naglibot sa gawas sa Templo, ug diha sa kamot sa tawo may usa ka igsusukod nga lipak nga unom ka maniko ang gitas-on, nga ang matag maniko, usa ka maniko ug usa ka palad#40:5 USA KA MANIKO UG USA KA PALAD: Mga 52 ka centimetro. Ang sukod nga gigamit ni Ezekiel taas kay sa naandang maniko nga 44:4 ka centimetro. busa iyang gisukod ang gibag-on sa kuta, usa ka lipak, ug ang gihabogon usa ka lipak. 6Unya miadto siya sa ganghaan nga nag-atubang sa silangan, ug misaka sa mga ang-ang didto, ug gisukod niya ang tugkaran sa pultahan, usa ka lipak ang gibag-on.#40:6 gibag-on: Sa Hebreo, gibag-on ug ang usa ka pultahan usa ka lipak ang gibag-on. 7Ug ang mga lawak sa kilid, usa ka lipak ang gitas-on ug usa ka lipak ang gibag-on. Ang hawanan taliwala sa mga lawak sa kilid, lima ka maniko, ug ang tugkaran sa ganghaan diha sa agianan sa ganghaan dapit sa tumoy usa ka lipak. 8Gisukod usab niya ang agianan sa ganghaan, usa ka lipak. 9Unya iyang gisukod ang agianan sa ganghaan, walo ka maniko, ug ang mga haligi niini duha ka maniko, ug ang agianan anaa dapit sa sulod nga bahin. 10Ug dihay tulo ka lawak sa matag kilid sa ganghaan paingon sa silangan. Ang tulo managsama ug sukod ug ang mga haligi managsama ug sukod sa matag kilid. 11Ug iyang gisukod ang gilapdon sa tugkaran sa ganghaan, napulo ka maniko, ug ang gilapdon sa ganghaan napulo ug tulo ka maniko. 12Ug dihay usa ka ali sa atubangan sa mga lawak sa kilid, tagsa ka maniko sa matag kilid, ug ang mga lawak sa kilid unom ka maniko sa matag kilid. 13Unya iyang gisukod ang ganghaan gikan sa luyo sa usa ka lawak sa pikas kilid ngadto sa luyo#40:13 luyo…luyo: Sa Hebreo, atop…atop. sa usa ka kilid, ang gilapdon 25 ka maniko, pultahan ngadto sa pultahan. 14Gisukod usab niya ang agianan, 20 ka maniko; ug libot sa agianan sa ganghaan mao ang hawanan.#40:14 Ang bersikulo 14 lisod sabton sa Hebreo. 15Ug gikan sa atubangan sa ganghaan sa pagsulod, ngadto sa tumoy sa sulod nga agianan sa ganghaan, 50 ka maniko. 16Ug may mga tamboanan libot sa agianan, nag-anam kagamay padulong sa sulod; ug mao usab ang agianan sa sulod, adunay samang mga tamboanan nga naglibot sa sulod; ug diha sa matag haligi may hulagway sa mga palmera.

Ang Hawanan sa Gawas sa Templo

17Unya gidala ako niya ngadto sa gawas nga hawanan, ug dihay mga lawak ug usa ka salog nga tisa libot sa hawanan. Ang 30 ka lawak nag-atubang sa salog nga tisa. 18Ug ang salog nga tisa buyon sa kilid sa mga ganghaan, subay sa gitas-on sa mga ganghaan, mao kini ang ubos nga salog nga tisa. 19Unya iyang gisukod ang gilay-on gikan sa atubangan sa ubos nga ganghaan hangtod sa gawas nga bahin sa atubangan sa hawanan sa sulod, usa ka gatos ka maniko.#40:19 Sa Hebreo may dugang, paingon sa silangan ug amihanan.

Ang Ganghaan sa Amihanan

20Unya iyang gisukod ang ganghaan sa gawas nga hawanan nga nag-atubang sa amihanan, iyang gisukod ang gitas-on ug ang gilapdon niini. 21Ug ang mga lawak sa kilid, tulo sa matag kilid, ug ang mga haligi niini ug ang agianan niini sama ug sukod sa unang ganghaan: ang gitas-on niini 50 ka maniko ug ang gilapdon 25 ka maniko. 22Ug ang mga bintana niini ug ang agianan ug ang mga palmera niini, sama ug sukod sa ganghaan nga nag-atubang sa silangan, ug adunay pito ka ang-ang paingon niini ug ang agianan niini anaa sa sulod.#40:22 sulod: Sa Hebreo, atubangan niini. 23Ug atbang sa ganghaan sa amihanan, sama sa silangan, may ganghaan paingon sa sulod nga hawanan, ug iyang gisukod gikan sa ganghaan ngadto sa ganghaan, usa ka gatos ka maniko.

Ang Ganghaan sa Habagatan

24Unya gidala niya ako paingon sa habagatan, ug dihay usa ka ganghaan paingon sa habagatan, ug iyang gisukod ang mga haligi niini ug ang agianan niini, ang mga sukod niini sama sa uban. 25Dihay mga tamboanan sa palibot niini ug sa agianan, sama sa mga tamboanan sa uban, ang gitas-on 50 ka maniko, ug ang gilapdon 25 ka maniko. 26Dihay pito ka ang-ang sa pagsaka niini, ug ang agianan niini diha sa sulod, ug may mga palmera sa matag kilid anaa sa haligi niini. 27Ug dihay usa ka ganghaan paingon sa sulod nga hawanan dapit sa habagatan, ug kini gisukod niya gikan sa ganghaan ngadto sa ganghaan paingon sa habagatan, usa ka gatos ka maniko.

Ang Hawanan sa Sulod sa Templo: Ang Ganghaan sa Habagatan

28Unya gidala ako niya ngadto sa sulod nga hawanan agi sa ganghaan sa habagatan, ug iyang gisukod ang ganghaan sa habagatan, kini sama ug sukod sa uban. 29Ang mga lawak sa kilid niini ug ang mga haligi niini ug ang agianan niini sama ug sukod sa uban, ug may mga tamboanan sa palibot niini ug sa agianan, kini 50 ka maniko ang gitas-on, ug 25 ka maniko ang gilapdon. 30Ug may mga agianan sa palibot, 25 ka maniko ang gitas-on, ug lima ka maniko ang gilapdon. 31Ang agianan niini nag-atubang sa gawas nga hawanan, ug may mga palmera diha sa mga haligi niini, ug ang hagdan niini may walo ka ang-ang.

Ang Hawanan sa Sulod sa Templo: Ang Ganghaan sa Habagatan

32Unya gidala ako niya ngadto sa sulod nga hawanan dapit sa silangan, ug iyang gisukod ang ganghaan, kini sama ug sukod sa uban. 33Ang mga lawak sa kilid niini, ang mga haligi niini ug ang agianan niini, sama ug sukod sa uban, ug may mga tamboanan sa palibot niini ug sa agianan, kini 50 ka maniko ang gitas-on, ug 25 ka maniko ang gilapdon. 34Ang agianan niini nag-atubang sa gawas nga hawanan, ug may mga palmera diha sa mga haligi niini, sa matag kilid, ug ang hagdanan niini may walo ka ang-ang.

Ang Hawanan sa Sulod sa Templo: Ang Ganghaan sa Amihanan

35Unya gidala ako niya ngadto sa ganghaan sa amihanan, ug gisukod niya kini, kini sama ug sukod sa uban. 36Ang mga lawak sa kilid niini, ang mga haligi niini, ug ang agianan niini sama ug sukod sa uban,#40:36 sama sa sukod sa uban: Sa Hebreo wala kini. ug may mga tamboanan sa palibot niini, ang gitas-on 50 ka maniko ug ang gilapdon 25 ka maniko. 37Ang agianan#40:37 agianan: Sa Hebreo, mga haligi. niini nag-atubang sa gawas nga hawanan ug may mga palmera diha sa mga haligi niini, sa matag kilid, ug ang hagdanan niini may walo ka ang-ang.

Mga Lawak Duol sa Amihanang Ganghaan

38Unya dihay usa ka lawak nga ang pultahan niini anaa sa agianan#40:38 agianan: Sa Hebreo, mga haligi. sa mga ganghaan, diin adto nila hugasi ang halad nga sunogon. 39Ug didto sa agianan sa ganghaan may duha ka lamisa sa matag kilid, diin adto ihawon ang halad nga sunogon ug ang halad tungod sa sala ug ang halad tungod sa paglapas. 40Ug dapit sa gawas sa agianan,#40:40 sa agianan: Sa Hebreo, kaniya nga mosaka. sa dayong sulod sa amihanang ganghaan, may duha ka lamisa, ug sa laing bahin sa agianan sa ganghaan, may duha ka lamisa. 41Upat ka lamisa ang diha sa sulod ug upat ka lamisa ang diha sa gawas nga bahin sa ganghaan, walo ka lamesa, diin adto ihawa ang mga halad. 42Ug may upat ka lamisa nga sinapsapan nga bato alang sa halad nga sunogon, usa ka maniko ug tunga ang gitas-on ug usa ka maniko ug tunga ang gilapdon ug usa ka maniko ang gihabogon. Adto nila ibutang ang ilang mga galamiton sa pag-ihaw nila sa halad nga sunogon ug sa halad nga inihaw. 43Ug ang mga kaw-it nga tagsa ka palad ang gitas-on, gipangtaod libot niini, ug anha sa mga lamisa ibutang ang unod sa halad.

44Unya gawas sa kinasulorang ganghaan, may mga lawak alang sa mga mag-aawit sa kinasulorang hawanan, ang usa anaa sa kilid sa amihanang ganghaan ug nag-atubang sa habagatan, ang usa anaa sa kilid sa habagatang#40:44 habagatang: Sa Hebreo, silangang. ganghaan nga nag-atubang sa amihanan. 45Ug siya miingon kanako, Kining lawak nga nag-atubang sa habagatan alang sa mga pari nga may katungdanan sa Templo. 46Ug ang lawak nga nag-atubang sa amihanan alang sa mga pari nga may katungdanan sa halaran. Kini sila mao ang mga kaliwat ni Zadok, nga sa tanang kaliwat ni Levi sila lamang ang makaduol sa Ginoo sa pag-alagad kaniya. 47Ug iyang gisukod ang hawanan, usa ka gatos ka maniko ang gitas-on, ug usa ka gatos ka maniko ang gilapdon, kuwadrado, ug ang halaran diha sa atubangan sa Templo.

Ang Hawanan sa Sulod ug ang Templo

48Unya gidala niya ako sa agianan sa Templo, ug gisukod niya ang matag haligi sa agianan, lima ka maniko sa matag kilid, ug ang gilapdon sa ganghaan napulo ug upat ka maniko ug ang bungbong sa matag kilid tagtulo ka maniko. 49Ang gitas-on sa agianan 20 ka maniko, ug ang gilapdon napulo ug duha#40:49 napulo ug duha: Sa Hebreo, napulo ug usa. ka maniko; ug napulo ka ang-ang padulong #40:49 ug napulo…padulong: sa Hebreo, pinaagi sa mga ang-ang sila mosaka. niini ug may haligi sa matag kilid.

Currently Selected:

EZEKIEL 40: ABCEB

Highlight

Copy