EZEKIEL 41
41
1Unya gidala niya ako ngadto sa taliwala sa Templo ug gisukod niya ang mga haligi. Sa matag kilid unom ka maniko ang gilapdon sa mga haligi.#41:1 mga haligi: Sa Hebreo, tolda. 2Ug ang gilapdon sa ganghaan napulo ka maniko, ug ang mga kilid sa ganghaan lima ka maniko sa matag kilid, ug iyang gisukod ang gitas-on niini, 40 ka maniko, ug ang gilapdon, 20 ka maniko. 3Unya miadto siya sa lawak sa sulod, ug gisukod ang matag haligi sa ganghaan, duha ka maniko, ug ang gilapdon sa ganghaan, unom ka maniko, ug ang bungbong sa kilid#41:3 bungbong sa kilid: Sa Hebreo, gilapdon. sa ganghaan, pito ka maniko. 4Ug iyang gisukod ang gitas-on sa lawak, 20 ka maniko ug ang gilapdon, 20 ka maniko, saylo sa taliwala nga bahin sa Templo, ug siya miingon kanako, “Mao kini ang labing balaan nga dapit.”
Ang mga Lawak sa Templo
5Unya gisukod niya ang bungbong sa Templo, unom ka maniko ang gibag-on, ug ang gilapdon sa matag lawak sa kilid upat ka maniko, naglibot sa Templo sa tanang kilid. 6Ug ang mga lawak sa kilid tulo ka andana, ang usa ibabaw sa usa, ug katloan sa matag andana. May gipalabaw sa bungbong libot sa Templo aron mosangga sa mga lawak, aron ang bungbong sa Templo dili magsangga sa mga lawak. 7Ug ang mga lawak sa kilid nagkalapad paingon sa itaas libot sa Templo sumala sa gidak-on sa naglabaw sa bungbong nga naglibot, gikan sa usa ka ang-ang ngadto sa usa. Sa kilid sa Templo may hagdan padulong sa itaas nga andana agi sa tungatunga nga andana. 8Nakita usab nako nga ang Templo may naisa nga salog nga naglibot. Ang mga patukoranan sa lawak sa kilid may sangkad nga sukod nga usa ka lipak, unom ka tag-as nga maniko. 9Ang gibag-on sa gawas, nga bungbong sa mga lawak sa kilid, lima ka maniko. Ang nahibilin nga dapit taliwala sa mga lawak sa kilid 10ug sa lawak sa hawanan, may gilapdon nga 20 ka maniko libot sa Templo sa tanang kilid. 11Ug ang mga pultahan sa mga lawak sa kilid moabli paingon sa dapit nga nahibilin, usa ka pultahan paingon sa amihanan, ug laing pultahan paingon sa habagatan, ug ang gilapdon sa dapit nga nahibilin lima ka maniko nga nagpalibot.
Ang Balay Dapit sa Kasadpan
12Ang balay nga nag-atubang sa luna sa Templo, dapit sa kasadpan, 70 ka maniko ang gilapdon, ug ang bungbong nga naglibot sa balay lima ka maniko ang gibag-on, ug ang gitas-on niini 90 ka maniko.
Ang mga Sukod sa Templo
13Unya iyang gisukod ang Templo, usa ka gatos ka maniko ang gitas-on. Ang luna ug ang balay uban ang mga bungbong niini, usa ka gatos ka maniko ang gitas-on. 14Ang gilapdon usab sa atubangan sa Templo ug sa luna dapit sa silangan, usa ka gatos ka maniko.
Ang Ubang mga Bahin sa Templo
15Unya iyang gisukod ang gitas-on sa balay nga nag-atubang sa luna dapit sa kasadpan ug ang mga bungbong,#41:15 bungbong: Ang Hebreo niini lisod sabton. sa matag kilid, usa ka gatos ka maniko.
Ang taliwala nga bahin sa Templo ug ang sulod nga lawak ug ang mga agianan dapit sa gawas#41:15 gawas: Sa Hebreo, hawanan. 16gihaklapan ug tabla,#41:16 gihaklapan ug tabla; Sa Hebreo, tugkaran sa ganghaan. ug libot sa tanan sa tulo adunay mga bintana nga nagkagamay padulong sa sulod.#41:16 ug libot…sulod: Ang Hebreo niini lisod sabton. Itandi sa 1 Hari 6:4. Atubang sa tugkaran sa Templo gihaklapan kini ug tabla sa palibot, gikan sa salog hangtod sa mga bintana (ang mga bintana gitabonan), 17ngadto sa kal-ang ibabaw sa pultahan, bisan hangtod sa sulod nga lawak sa Templo ug sa gawas. Diha sa tanang bungbong nga naglibot sa sulod nga lawak ug sa taliwala nga bahin sa Templo may mga kinulit nga hulagway.#41:17 may…hulagway: Sa Hebreo, gisukod ug gikulit. 18sa mga kerubin ug mga palmera, usa ka palmera gitaliwad-an sa duha ka kerubin. Ang matag kerubin may duha ka nawong, 19ang nawong sa tawo nag-atubang sa palmera sa usa ka kilid, ug ang nawong sa batan-ong liyon paingon sa palmera sa pikas nga kilid. Kini gikulit sa tibuok palibot sa Templo; 20gikan sa salog hangtod sa itaas sa pultahan may gikulit nga mga kerubin ug mga palmera diha sa bungbong.
21Ang mga haligi sa pultahan sa taliwala nga bahin sa Templo kuwadrado, ug diha sa atubangan sa balaang dapit ang usa ka butang nga daw 22usa ka halaran nga kahoy, tulo ka maniko ang gihabogon, ug duha ka maniko ang gitas-on ug duha ka maniko ang gilapdon,#41:22 ug duha ka maniko ang gilapdon: Wala kini sa Hebreo. ug ang kanto niini ug ang sukaranan#41:22 sukaranan: Sa Hebreo, gitas-on. niini, ug ang mga bungbong niini, hinimo sa kahoy. Ug siya miingon kanako, “Mao kini ang lamisa nga anaa sa atubangan sa Ginoo.”
Ang mga Pultahan
23Ang taliwala nga bahin sa Templo ug ang dapit nga balaan adunay duha ka pultahan ang matag usa. 24Ug ang mga pultahan may duha ka palid ang matag usa, duha ka palid alang sa matag usa ka pultahan. 25Diha sa mga pultahan sa taliwala nga bahin dapit sa sulod may kinulit nga mga kerubin ug mga palmera, ingon sa gikulit diha sa mga bungbong, ug adunay atop-atop nga kahoy sa atubangan sa agianan sa gawas. 26Ug may mga bintana nga nagkagamay sa sulod ug mga palmera sa matag kilid, sa mga bungbong sa kilid sa agianan.#41:26 agianan: Sa Hebreo, agianan, ug ang mga lawak sa kilid sa Templo ug ang mga atop-atop.
Currently Selected:
EZEKIEL 41: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
