Mariko 14

Camo sereko ri Yesu

(Mat 26:1-5; Luk 22:1-2; Yoh 11:45-53)

1 # Wok 12:1-27 Onwaŋo odoŋ ndelo ario to kalima ma Kadho kodi ma mugat ma buthow wotundi. Jotel pa jocway ri Were i wi migam kodi jondiko jorango royo ma mako Yesu nyaliŋliŋ jowoneki go. 2Jowaco ni, “Gime wokiri wobedi i ndelo ma kalima, rupiri woy pa ji bino asirok.”

Wiro Yesu gi mo i Bethania

(Mat 26:6-13; Yoh 12:1-8)

3 # Luk 7:37-38 Munyo Yesu onwaŋo nitie Bethania i ot pa Simon jadhowo, munyo go cemo, dhako moro odonjo gi cupa mo wudo maŋwe kur, ma welo mere thoth. Oyawo dhok cupa no to olo mo i wiy Yesu. 4Ji megi m'onwaŋo jo nikenyo jomako nge to jowaco wegi kendi gin ni, “Onyeki mo maŋwe kur me raŋo? 5Bedi tana d'onyalo kelo pesa kada ma kalo nusu ma feza miya adek, t'imiyo jocandi!” Aka jowaco nyingi dheno swa.

6Yesu owaco ni, “Weyi win go! Wikwinyo go raŋo? Go otieko timo tic maber swa kwoŋan? 7#Cik 15:11Kole winitie gi jocandi noknok, aka winyalo konyo jo hongo je. To an ak'obedi gi win ndelo je. 8Go otimo gimaber ma go nyalo; ato go onyo wiro delkwoŋ kicutho ri kaliel. 9Aka adieri awaco riwin, kamoro je ma ofonj'iye Wac Manyen Maber i piny gipi, gima dheno otimo ibino tuco ma poyo go.”

Yuda camo sereko ri Yesu

(Mat 26:14-16; Luk 22:3-6)

10Gikenyo Yuda Iskariot, acel kwoŋ japar g'ario, oay to kidho bongi jotel pa jocway ri Were i wi migam camo sereko ri Yesu. 11Jotel no josangala swa munyo jowinjo gim'okelo go, to jociko miyo go pesa. Gikenyo Yuda ocako rango hongo maber ma miyo jo Yesu.

Yesu camo Kalima ma Kadho gi jofonjirok pere

(Mat 26:17-25; Luk 22:7-14,21-23; Yoh 13:21-30)

12I ndelo marapena ma Kalima ma mugat ma buthow, ndelo m'inek'iye nyithindhi rombo ma wote ma kalima ma Kadho, jofonjirok pa Yesu jopenjo go ni, “Imito wayiki rin Kalima ma Kadho gi kune?” 13Yesu ooro jario kwoŋ jo gi wac me: “Kidhi win i tindi, aka nyatoro m'otiŋo dak pi bino romo gi win. Luw win go 14kiri i ot ma go odonj'iye; to wiwaco ri won ot no ni, ‘Jafonji penjo ni nikune kisika pa wendo m'anocam'iye Kalima ma Kadho gi jofonjirok paran?’ 15Go bino nyutho win kisika ma malo, m'oyik maber, kama winoyik'iye gimoro je mawan.” 16Jofonjirok no joay, jokidho i tindi, to jonwaŋo gimoro je paka Yesu owaco rijo; to joyiko Kalima ma Kadho kenyo.

17Munyo piny otundo othieno, Yesu okidho kenyo gi japar g'ario. 18#Zab 41:10Munyo jonitie dhower, Yesu owaco ni, “Awaco riwin, ŋat'acel kwoŋ win kidho camo ran sereko; aka manago ŋata cemo kodan.” 19Jofonjirok jobwok swa to jocako penjo go, ŋat'acel acele ni, “Iwacan?” 20Yesu odwoko ni, “Manago acel kwoŋ win, ma pilo kodan acero acel. 21Wod Dhano bino tho paka Ndiko Maleŋ waco, to moro je m'ocami sereko ri Wod Dhano bino neno candirok! D'ober ri ŋato, bedi cango weyi ma k'onywol go!”

Cemo pa Rwoth m'othieno

(Mat 26:26-30; Luk 22:14-20; 1 Kor 11:23-25)

22Aka munyo jocemo, Yesu okwanyo mugat, omiyo silwany, to turo, to miyo jofonjirok pere. Owaco ni, 23“Cami win, me delkwoŋ.” To kwanyo kikopo, aka munyo otieko foyo Were, omiyo jo, to joje jomadho. Owaco rijo ni, 24#Wok 24:8; Yer 31:31-34“Me remo paran ma cikirok manyen, m'ibino oyo ri ji mathoth. 25Awaco riwin ni, odoko ak'omadhi vini me cuka ndelo m'anomadh'iye vini manyen i Ker pa Were.”

26Munyo jotieko wero wer ma pako Were, jokidho wi got Oliv.

Yesu tuco kwedirok pa Petero

(Mat 26:31-35; Luk 22:31-34; Yoh 13:36-38)

27 # Zek 13:7 Yesu owaco ri jofonjirok pere ni, “Wijoje wibino kedhere gi ŋwec wiweyan, rupiri ondiki ni, ‘Abino neko jakwath to rombo kedhere.’ 28#Mat 28:16To k'atieko cerino, abino telo kidho riwin Galili.” 29Petero odwoko ni, “Akibino weyin, kada jowotan je joweyin.” 30Yesu owaco ri Petero ni, “Adieri awaco rin, kafodi wod gweno k'okoko dirio wor ma konon, ibino kwedere kwoŋan didek.” 31Petero omedo waco gi meni ni, “Akibino kwedere kwoŋin, kada bedi ni atho kodin.” To jofonjirok je bende jowaco ameno.

Yesu kwayo i Gethsemane

(Mat 26:36-46; Luk 22:39-46)

32Yesu gi jofonjirok jotundo kam'ilwoŋo ni Gethsemane, to Yesu waco rijo ni, “Bedi win ka wikway.” 33Gikenyo okwanyo Petero gi Yakobo, gi Yohana, to rembo madwoŋ gi geregere cako poŋ i cunye, 34to waco rijo ni, “Rembo opoŋ i cunyan swa ma mito nekan. Bedi win ka wikway.” 35Gikenyo omedere mathin yumalo, oriewere piny aka okwayo ni ka nyalere go wokiri wodonji i hongo ma candirok. 36Owaco ni, “Aba, Baba, inyalo gimoro je, kwany woko agwata gimakec me kwoŋan. To ki paka amito, kwanyo woko paka iŋat'imito.” 37Gikenyo go ogik to nwaŋo jofonjirok adek no jonindo, 38to waco ri Petero ni, “Simon, inindo? Ikinyal bedo waŋin kada nyaka sawa acel won?” Aka owaco rijo ni, “Bedi win waŋ win aka wikway ŋey wik'odonji i karatem. Cuny win yenyo to del nyap.”

39Go odoko ogik kwayo ka waco wac acel no won. 40Gikenyo odoko odwoko bongi jofonjirok to nwaŋo jonindo; jok'onyalo bedo waŋ gin. To jok'oŋeyo gima di jowaco rigo.

41Munyo odwoko mar'adek owaco rijo ni, “fodi winindo, wiywomere? Meno oromo; hongo otundo; Wod Dhano onyo pama ikidho ketho i cingi joreco. 42Ay win wakadhi; neni, kole ŋat'ocamo ran sereko ee otieko tundo.”

Mako Yesu

(Mat 26:47-56; Luk 22:47-53; Yoh 18:3-12)

43Munyo fodi Yesu luwo, Yuda, acel kwoŋ japar g'ario otundo. Lwak ji ma jotiŋo abor gi ludhe onwaŋo jonigi go kareno jotel pa jocway ri Were i wi migam kodi jondiko kodi jotel pa ji ama jooro jo. 44Jacami ri Yesu sereko oyido otieko miyo jo ranyuth ni, “Ŋat'anocwiy lembe meno a ŋata wirango. Maki win go matek witer go ma wikaro diere.”

45Tekin Yuda tundo bongi Yesu to waco ni, “Jafonji.” To cwiyo lembe. 46Gikenyo jomako Yesu to jokoda go matek. 47To ŋat'acel kwoŋ jom'ocungo kenyo yuyo abor pere to toŋo ŋeca pa jadwoŋ pa jocway ri Were i wi migam to codo woko ithe. 48Gikenyo Yesu owaco rijo ni, “Wibino kodi abor gi ludhe makan pa jakwo nedi? 49#Luk 19:47; 21:37Ndelo je yado abedo gi win i Ot pa Were afonjo, wikimakan. To Ndiko Maleŋ ripo wokethi i tim.” 50Gikenyo jofonjirok pere jokedhere gi ŋwec to joweyo go. 51Jayac moro m'oboyere gi suka oyido luwo Yesu. 52Jotemo mako go to weyo rijo suka, to ringo yombo jo kinyoro.

Yesu cungo ruwaŋ jopido

(Mat 26:57-68; Luk 22:54-55,63-71; Yoh 18:13-14,19-24)

53Gikenyo jotero Yesu i ot pa jadwoŋ pa jocway ri Were i wi migam, kama jotel pa jocway ri Were i wi migam kodi jotel pa ji kodi jondiko oyido jocoker'iye. 54Petero oluwo Yesu gi bor bor aka odonjo i diedipo pa jadwoŋ no to bedo kenyo gi jolweny kareno bende oyo mac. 55Jotel pa jocway ri Were i wi migam kodi ji ma jo ni ot gibe jotemo rango wac ma mako Yesu, ŋey jowoneki go to jok'onwaŋo gimoro. 56Jokony mathoth jokelo wac ma twodo kwoŋ Yesu, to wac ma jokelo bed'iye piem kendekende.

57Jomoro jocungo to jokelo twodo kwoŋ Yesu ni, 58#Yoh 2:19“Wawinjo go waco ni, ‘Abino kedho woko Ot pa Were me ma cingi dhano am'ogero, to agero man ma k'oger gi cingi jo.’ ” 59Kad'ameno je fodi wegi jopiemo i wac me. 60Jadwoŋ pa jocway ri Were i wi migam oay malo ruwaŋ ji je to penjo Yesu ni, “Ingoye gi dwoki kwoŋ kweth wac ma ji jokelo kwoŋin me?” 61To Yesu oliŋaliŋa ma k'odwoko gimoro. Jadwoŋ no odoko openjo go ni, “Iŋat'ibedo Kristo, Wod Were ma Jasilwany?” 62#Dan 7:13Yesu odwoko ni, “A an won, aka wibino neno Wod Dhano munyo nitie yuracuc pa Jameni je, kareno dwoko i pondeponde ma polo!” 63Gikenyo jadwoŋ pa jocway ri Were i wi migam no oyeco nangin pere ka waco ni, “Wac aŋo man ma fodi wadwaro kendo? 64#Jolevi 24:16Kole watieko winjo gima k'otire m'owaco kwoŋ Were. Withumo nedi?” Aka joje jothumo rigo banja ni go ripo aneka. 65Jomegi jocako ŋulo law kwoŋ Yesu, to joboyo waŋe, aka jopatho go g'adhoŋ, to jokoko malo ni, “Patuci ŋat'ogoyin!” Jolweny jotero go gicen to jogoyo go adonde.

Petero kwedere kwoŋ Yesu

(Mat 26:69-75; Luk 22:56-62; Yoh 18:15-18,25-27)

66Petero onwaŋo fodi nitie i diedipo, to acel kwoŋ nyir ma tiyo ri jadwoŋ pa jocway ri Were i wi migam bino. 67Munyo nyako no oneno Petero oyo mac, okaŋasa go swa to waco ni, “In bende onwaŋo initie gi Yesu Janazareth.” 68To go kwero ni, “Akuya gim'iluwo kwoŋe.” To kidho dho waŋkac. I hongo no to wod gweno koko marapena. 69Jatic manyako no odoko oneno Petero kenyo to cako kowo ri jom'oyido jocungo kenyo ni, jame obedo acel kwoŋ jonago. 70To Petero odoko kwedere. I hongo macek, jom'oyido jocungo jokaro Petero gi wac ni, “Adieri, in acel kwoŋ jo, rupiri ibende ibedo anywola ma Galili.” 71Gikenyo Petero ocako kwoŋirok ni, “Akuya ran ŋata wiluwo kwoŋe me.” 72I hongo no won to wod gweno koko madirio, aka munyo Petero opoyo gima ndir ca Yesu owaco rigo ni, “Kafodi wod gweno k'okoko dirio ibino kwedere kwoŋan didek.” Gikenyo kwoŋe okwe to ywak malith.

Currently Selected:

Mariko 14: DHOPE

Highlight

Copy