Mariko 13
13
Yesu luwo kwoŋ rerok ma Ot pa Were
(Mat 24:1-2; Luk 21:5-6)
1Munyo Yesu owok i Ot pa Were, acel kwoŋ jofonjirok pere owaco rigo ni, “Jafonji, neni paka telin no kodi udi mere beyo!” 2To Yesu owaco rigo ni, “Ineno udi m'ojewere me? Ongoye ka tele kad'acel m'ibino weyo wi nyawote, ma k'okedhi woko.”
Teko kodi acanda
(Mat 24:3-14; Luk 21:7-19)
3Aka munyo Yesu obedo piny wi got Oliv, m'otitere gi Ot pa Were, Petero, Yohana kodi Andereya jopenjo go nyaliŋliŋ ni, 4“Waci riwan ndir ma gime latimer'iye; odoko ranyuth aŋo ma bino bedo ka gime cegin timirok?” 5Gikenyo Yesu owaco rijo ni, “Gwokere win moro wokiri wowondi win. 6Ji mathoth jolabino i nyingan ka jowaco ni, ‘An ago.’ To jowondo ji mathoth. 7Ka wiwinjo ni lweny ogaga kamoro kodi luwirok kwoŋ lweny, lworo wokiri womaki win, gime ripo timirok, to gik piny won kareno fodi k'otundo. 8Nono bino lwenyo gi nono, ker acel bino lwenyo gi ker man. Yengirok pa piny bino bedo kam'omore, kec bino bedo. Me obedo nyaka cakirok pa ŋedi.”
9 #
Mat 10:17-20; Luk 12:11-12 “Kure win, rupiri jobino tero win i kapido; ibino goyo win i kitipa pa jom'oyeyo pa Joyuda aka wibino cungo ruwaŋ rwodhe kodi kerin ro an, aka wititi rijo Wac Manyen Maber, 10rupiri kutho ripo wofonji nonin je Wac Manyen Maber. 11To ka jotero win i kapido wikiri wirembi gima winowaci; be, waci win gim'obin i dhok win i hongo no rupiri wiŋati wik'oluw, to Cuny Maleŋ ama bino luwo. 12Dhano bino kisegeya omin ni woneki, ba nyathi bino kisegeya nyathi pere; nyithindho jobino wire ri jonywol pajo to jomiyo ineko jo. 13#Mat 10:22Aka ji je jobino mon kodi win kwoŋbedo nyingan, to ŋat'ocir candirok me kiri i gike ama bino both.”
Lworo madwoŋ swa
(Mat 24:15-28; Luk 21:20-24)
14 #
Dan 9:27; 11:31; 12:11 “Wibino neno munyo okethi gir'amien madwoŋ ma kelo lworo kama di kiripi woketh'iye (ŋata soma wac me woniaŋi dwoŋ mere). Gikenyo joma nitie i Yuda joworingi wi gote. 15#Luk 17:31Ŋata nitie i wi ot wokiri wolori piny kwanyo gimoro i ot. 16Ŋata nitie i ndelo wokiri wogiki peco kwanyo ruk pere man. 17Kidamba madwoŋ bino bedo ri mon ma joyac kodi megi nyithindho ma fodi nyithindho dhotho jo, i ndir no. 18Kway win Were ni gino wokiri wotimere i ndir ma cwir munyo pe oŋico piny. 19#Dan 12:1; Meny 7:14Kole i ndelo no candirok madwoŋ bino bedo ma fodi yado k'obedo ye wok i cakirok pa piny, aka odoko k'obedi. 20Kabedi Were k'otieko kimoja ye woko ndelo no; ongoye ŋata d'oboth; to ri bero pa ji pere m'oyer, go omoja ye ndelo no. 21Gikenyo, ka moro owaci riwin ni, ‘Panen Kristo ee ni ka.’ Kosa ni, ‘Panen go ni kaca.’ Wikiri wiyeyi. 22Kole jotwodo ma jolwoŋere ni Kristo kosa jotuci wac Were jobino konjere. Aka jobino timo ranyuth kodi gir'aura ma wondo jom'oyer pa Were ka nyalere. 23Am'omiyo wiripo kurok rupiri atieko waco riwin gimoro je con mafodi k'otimere.”
Bino pa Wod Dhano
(Mat 24:29-31; Luk 21:25-28)
24 #
Isa 13:10; Yowel 2:10,31; 3:15; Meny 6:12; Isa 13:10; Eze 32:7 “Ka ndelo ma candirok no otieko rumo, waŋceŋ bino lokere macol, aka dwe k'oliel. 25#Isa 34:4; Meny 6:13; Yowel 2:10Micalin jobino wok malo to jooy piny, aka meni ma polo malo bino yengere tektek. 26#Dan 7:13; Meny 1:7Gikenyo Wod Dhano bino nenere munyo bino i pondeponde gi meni m'oasere kanyacel gi dwoŋ. 27Go bino dhiro jomalaika coko jom'oyer pa Were wok i thenge aŋwen ma koyo, wok i thengi piny je tundo i thengi polo je.”
Fonji kwoŋ makuyu
(Mat 24:32-35; Luk 21:29-33)
28“Fonjere win kwoŋ makuyu. Ka jange olokere mayom, aka boke mere lothi, wiŋeyo ni ndir ma ceŋ cegin tundo. 29Ameno bende ka wineno gigipiny me timere, wiŋeyi ni go ocore cegin, aka ni dho waŋkac. 30Adieri awaco riwin, luse ji ma pama jok'orum mafodi gigipiny me k'otimere. 31Polo gi piny bino rumo to wac paran kilarumo kada mathi.”
Ongoye ŋat'oŋeyo ndelo kosa sawa
(Mat 24:36-44)
32 #
Mat 24:36
“To ongoye ŋat'oŋeyo ndelo kosa sawa ma gime bino timer'iye, kada jomalaika ma polo kosa Wod Were, to Baba kende am'oŋeyo. 33Kure win, bedi win milengela wikway, rupiri wikuya kare ma go obin'iye. 34#Luk 12:36-38Kole cale pa dhano m'okidho wiloka to weyo jotic pere 35kuro rigo peco, jatic je gi muga pere, to waco ri jawaŋkac kuro. Kure win rupiri wikuya hongo ma won peco odwok'iye, nyalo bedo othieno, kosa dier wor, kosa keko, kosa munyo ceŋ gulo. 36K'odwoki abwap, wokiri wonwaŋi winindo. 37Am'omiyo awaco riwin gi joman je ni, ‘Bedi win milengela.’ ”
Currently Selected:
Mariko 13: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
