Luka 8

Mon ma jokwaŋo Yesu

1Rumacen Yesu owotho i tindin kodi loka m'omore munyo tito aka fonjo Wac Manyen Maber kwoŋ Ker pa Were. Japar g'ario onwaŋo jo ni bonge, 2kanyacel gi mon moro m'obothi jo kwoŋ cuny m'ocido kodi i two pajo; Maria m'oyido ilwoŋo ni Magadalina, m'oriem kwoŋe jwogi abirio. 3Yoana cipa Kuza, jatic madwoŋ i ot pa Herode, kodi Susana, kodi joman kweth m'onwaŋo jokonyo wendo gi gigipiny ma wegi jokelo.

Ageca kwoŋ jacwoyo

(Mat 13:1-9; Mar 4:1-9)

4Ji jowok i tindin m'opokere opokere jobino bongi Yesu; aka munyo lwak ji ocokere, Yesu oluwo rijo iy'ageca ama: 5“Dhano moro okidho cwoyo kodhi pere, aka munyo go bayo kodhi, megi opodho i dier royo, to ji nyono gi tiendi gin, to winyin bino dimo woko. 6Kodhi megi opodho wi tele kama lowo rep'iye; aka munyo kodhi no otwi, okwako ner, rupiri lowo oyido rep, to munyo odongo, othwo woko, rupiri lowo oyido othwo. 7Kodhi megi opodho i kudhin; aka kudhin odongo gi jo to diyo jo woko. 8Aka megi opodho i lowo ma diwa; odongo to nyak, nyingi gin miya acel kisi tiende acel.” Munyo otieko waco ama, okoko malo ni, “Ŋata nigi ithe ma winjo wowinji.”

Atoŋa ma oro agecin

(Mat 13:10-17; Mar 4:10-12)

9Aka munyo jofonjirok pere jopenjo go dwoŋ ageca me, 10#Isa 6:9Yesu odwoko ni, “Win omiy win niaŋ kwoŋ nyaliŋliŋ ma Ker pa Were; to joman ifonjo jo g'agecin, makada joŋiyi, jokinen, kada jowinji jokiniaŋ dwoŋ gima jowinjo.”

Yesu tito dwoŋ ageca pa jacwoyo

(Mat 13:18-23; Mar 4:13-20)

11“Me a dwoŋ ageca no: Kodhi meno wac pa Were. 12Kodhi m'opodho i dier royo, meno a joma jowinjo, to jwogi bino to kwanyo woko wac i cuny jo, ŋey jokiri jowoyey to joboth. 13Kodhi m'opodho wi tele kama lowo rep'iye, meno a joma jowinjo wac gi kisangala, to wac kirwaki tiende i cuny jo; joyeyo nyaka ma hongo manok, to jopodho ka karatem obino. 14Aka kodhi m'opodho i kudhin, meno a joma jowinjo, to rumacen rembo kodi ŋaŋo ma piny kodi kisangala ma kwo diyo jo piny, aka gima jonyak kitegino. 15To kodhi m'opodho i lowo ma diwa, meno a joma, munyo jotieko winjo wac, jomako maber i cuny jo, aka jonyak maber ro diyo cuny jo.”

Tala m'oum g'agono

(Mar 4:21-25)

16 # Mat 5:15; Luk 11:33 “Ongoye ŋata cwinyo tala to umo g'agono, kosa ketho i tiendi kitanda; kucel go ripo ŋawo tala no wi akare mere aka joma donjo i ot jowoneni lero. 17Kole ongoye gim'opanere ma k'othangi kamaler, kosa gima nyaliŋliŋ ma k'oŋeyere kamaler.”

18 # Mat 25:29; Luk 19:26 “Ciki win ithi win maber, ato ŋata nitie gi gimoro am'ibino medo go man, to ŋat'ongoye gi gimoro, kada ma go paro nike nitie gine no, ibino mayo go woko.”

Min Yesu kodi wutmin Yesu

(Mat 12:46-50; Mar 3:31-35)

19Gikenyo min Yesu gi wutmin jobino bonge, to jok'onyalo tundo bonge ro thotho pa ji. 20Aka owaci rigo ni, “Yokin kodi wutmin in icade jocungo woko, jodwaro nenin.” 21To Yesu owaco ni, “Mama kodi wutmera meno a joma winjo wac pa Were aka joketho i tim.”

Yesu kweyo koyo madwoŋ

(Mat 8:23-27; Mar 4:35-41)

22Ndelo moro Yesu odonjo i ye gi jofonjirok pere, to waco rijo ni, “Weyi wacewere win yu loka ma wakawaka ma koca.” To jocako cewirok. 23Munyo jocewere, Yesu opodho gi nindo, aka koyo madwoŋ obino to kudho wakawaka, to pi cako poŋ i ye, ma ye onwaŋo cegin munyirok i pi. 24Gikenyo jofonjirok jokidho to jocewo Yesu munyo jowaco ni, “Jafonji, Jafonji, watho!” Yesu ocew to ay malo, to oro koyo kodi pi ma tula kwe; gimoro je oliŋ to piny kwe. 25Aka owaco rijo ni, “Nikune yeyo mewin?” Aka jodhier to lworo mako jo, to jowaco wegi kendi gin ni, “Me ŋa ma oro kiri koyo gi pi je to jowinjo go?”

Yesu botho dhano ma jwogi ni kwoŋe

(Mat 8:28-34; Mar 5:1-20)

26Jocewere jotundo i piny pa Jogerasa m'ocimere gi Galili. 27Aka munyo Yesu otieko wok dho thengi pi, dhano moro m'owok i tindi m'onwaŋo nigi jwogi kweth kwoŋe oromo gine. Ŋat'oyido ocowo hongo malac ma kiruki gimoro, aka kibedi i ot, to bedo i kaliele ma ŋungu ayino. 28Munyo go oneno Yesu, okoko to podho dho tiende to waco gi derino ni, “Yesu, Wod pa Were Madwoŋ Maloyo! Imito aŋo kwoŋan? Akwayin, ikir'itiman marac.” 29Go owaco ameno, rupiri Yesu oyido ooro cuny m'ocido no wok kwoŋ ŋato. (Ato ndir madit cuny m'ocido no oyido monjo go, aka kada tweyi ŋato i cinge kodi tiende gi lijegere, codo woko lijegere no to cuny m'ocido no tero go i thim.) 30Yesu openjo go ni, “Nyingin ŋa?” Odwoko ni, “Nyingan Lwak.” Kwoŋbedo jwogi kweth oyido jodonjo kwoŋe. 31Jwogi no jokwayo Yesu ni wokiri wodhiri jo i mwombe maluth.

32Kenyo onwaŋo nitie sidwol mbiji madwoŋ ma cemo dho thengi tendere; jwogi jokwayo Yesu nike wowey jowodonji i mbiji no, to yeyo jo. 33Gikenyo jwogi jowok kwoŋ ŋato to jodonjo i sidwol mbiji; aka sidwol no gibe joloro wi tendere to jomunyere i wakawaka.

34Munyo jokwath mbiji joneno gim'otimere, joringo to jonyayo wac i tindi kodi loka no je. 35Ji bende jokidho neno gim'otimere. Jobino bongi Yesu to jonwaŋo dhano ma jwogi jowok kwoŋe obedo piny dho tiendi Yesu, m'oruko nanga aka wiye ber, to lworo mako joje. 36Jom'oneno gim'otimere jotito ri joman paka Yesu obotho ŋato. 37Gikenyo ji je ma iy'adec ma Gerasa jokwayo Yesu nike woeye kenyo, rupiri lworo oyido opoŋ kwoŋ jo. Gikenyo Yesu odonjo i ye to dok. 38Dhano ma jwogi owok kwoŋe okwayo Yesu ni, “Yeyan aluwin.” To Yesu okwero rigo ni, 39“Dok peco ititi ri ji gima Were otieko timo rin.” Jalo owotho i tindi parom munyo tito ri ji gima Yesu otimo rigo.

Nyar Yayiro kodi dhako m'ogeyo nanga pa Yesu

(Mat 9:18-26; Mar 5:21-43)

40Gikenyo munyo Yesu odwoko yu loka ma Galili, lwak ji jojolo go rupiri oyido ji je jokuro go. 41Aka nyatoro obino m'ilwoŋo ni Yayiro, m'obedo jadwoŋ ma dhumo kalamo pa Joyuda; go opodho dho ka tiendi Yesu to kwayo go ni wokidhi peco pere, 42rupiri nyare acel g'acel won, m'onwaŋo romo oro apar g'ario, oyido cegin tho. Aka munyo Yesu kidho korago, lwak ji jodire kwoŋe to jothoko go. 43Gikenyo dhako moro m'oyido remo oy kwoŋe tieko oro apar g'ario gipi, aka ongoye ŋat'onyalo cango rigo two no, kada go oyido otieko wotho bongi jomilerwa mathoth gi nyeko lim pere, 44obino yuŋey Yesu, to geyo dhok nanga pere; gikenyo no won to remo coki. 45Yesu openjo ni, “Ŋat'ogeyan?” Dhano je okwedere, to Petero waco ni, “Jafonji, kole lwak ji othokin aka ji dire kwoŋin.” 46To Yesu owaco ni, “Nyatoro ogeyan, kwoŋbedo awinjo meni owok kwoŋan.” 47Munyo dheno oneno ni onwaŋ go, obino gi kirin, opodho piny dho ka tiendi Yesu, to tito ruwaŋ ji je gim'omiyo ogeyo Yesu, kendo paka olimo both gi kenyo no won. 48Yesu owaco rigo ni, “Nyaran, yeyo perin obothin, kadhi i siem.”

49Munyo Yesu fodi luwo, jamikwenda moro owok peco pa jadwoŋ ca. Ŋato owaco rigo ni, “Nyarin otieko tho, ikir'imedi cando Jafonji nono.” 50Yesu kere oyido owinjo, to waco ri Yayiro ni, “Ikir'ilwor; yey ayino, go bino bedo maber.” 51Munyo Yesu otundo peco no, k'oyeyo moro donjo gi go i ot kwanyo woko Petero, Yohana kodi Yakobo, kodi ba nyathi gi yokimere kende. 52Dhano je oyido ywako nyako no gi ndur. To Yesu owaco ni, “Wikiri wiywak; nyathi me k'otho, nindo ayino.” 53Jono jonyero go rupiri joŋeyo ni nyako no oyido otieko tho. 54To Yesu omako cinge to lwoŋo ni, “Nyathi, ay malo.” 55Gikenyo cuny nyathi no odwoko kwoŋe to ay ni rwat, to Yesu oro jo miyo go gir'acama. 56Jonywol pere jouro swa, to Yesu ciko jo ni jokiri jowowaci ri moro je gim'otimere.

Currently Selected:

Luka 8: DHOPE

Highlight

Copy